1-2. Nagnino ro mitovy amy ty raha niaigna i ajalahy rehafegne amy i fehentsoratse 1 eoy ty raha iaignantikagne?

 ERETSERETO tie mpagnarivo bey ty rae aman-drene ty ajalahy raike. Nisy loza niseho tie indraike, le nimate i rae aman-drene’e rey. Tena nalahelo mafe reke naho fa naharey izay. Faie mbe nisy vaovao raty hafa ka. Nifanta’e tie kay nandany ty fanagna iareo i rae aman-drene’e rey sady nisy trosa bey tsy nivoaloa iareo. Ndra trosa areke ty nilovae’e tamy i rae aman-drene’e rey fa tsy i fanagnagney sady nitake ty hagnonera’e izay i tompon-trosay. Faie tsy nanagne fahafahagne handoavagne i trosay reke.

² Azo ampitoviegne amy ty raha niaigna o ajalahy iohoe ty raha iaignantikagne. Nivoririke naho nanagne fiaignagne soa ty Adama naho i Eva, i rae aman-drenentikagne voaloha’e rey sady nitoboke tamy i paradisay ao. (Gen. 1:27; 2:7-9) Afake ty ho nanan-karena sady ho niaigne nainai’e iareo. Faie nanota iareo, le niova tampoke ty fiaigna iareo. Namoe i fiaignagne sambatse tamy i Paradisay aoy iareo sady tsy afake ty hiaigne nainai’e ka. Ino areke ty lova nenga iareo hoahy ty tarira’e? Hoe ty Baiboly: ‘Niziliha ty ota ty tontolo toy noho ty raha natao ty lahilahy raike [Adama], sady ty ota ty nahavy o fahafatezagneo, le niparitake tamy ze kila ndaty ty fahafatezagne satria sambe fa nanota iareo iaby.’ (Rom. 5:12) Nandova ota boake amy i Adama areke tikagne, le izay ty mahavy antika ho mate. Manahake ty trosa bey ze ota nilovaentikagne zay, le tsy misy amantika mahavita magnonetse aze.​—Sal. 49:8.

 3. Nagnino ty ota ro azo ampitoviegne amy ty “trosa”?

 ³ Nampitovie i Jesosy amy ty “trosa” ty ota. (Mat. 6:12; Lioka 11:4) Naho fa manota tikagne, le hoe anagna i Jehovah trosa. Tsy maintsy aloantika areke o trosa iohoeke. Faie naho tsy voaloa io, le ie tikagne mate vaho izay afake amy ty fandoavagne aze.​—Rom. 6:7, 23.

 4. a) Ho nanao akore o ndaty mpanotao naho tsy nisy nagnampe? (Salamo 49:7-9) b) Manondro ino ty rehake tihoe “ota” amy Baiboly ao? (Henteo ty efajoro tihoe “ Ota.”)

⁴ Naho itika irerike avao, le tsy afake ty hahazo indraike i raha iaby nafoe i Adama naho i Eva rey. (Vakio ty Salamo 49:7-9.) Naho tsy misy magnampe tika, le tsy afake mitamà ty hiaigne nainai’e sady tsy hitamà ty hovelomegne amy ty mate manahake o bibio.​—Mpito. 3:19; 2 Pet. 2:12.

 5. Ino ty natao i Raentika bey hateay mba hagnampeagne antikagne amy i trosa ndra i fahotagne nilovantikagney? (Henteo i sarey.)

⁵ Dineho indraike i ajalahy nirehafegne taloha teoy. Ino ty ho tsapa’e naho ohatse misy lahilahy manan-karena raike vognogne hagnomey vola aze mba handoava’e i trosa’e rey iaby? Azo antoke fa tena hankasitrake izay reke sady handrambe i fagnomezagney. Nagnomey fagnomezagne ho antika ka ty Jehovah, i Raentikagne bey hateay, mba handoavagne i trosa nilovaentikagne boake amy i Adamay. Hoe ty Jesosy: “Tena tean’Andrianagnahare vata’e ty tontolo toy, le nimea’e i Ana’e bakotokagney, amy izay hahazo i havelogne nainai’ey ze maneho finoagne aze fa tsy hozamagne.” (Jaona 3:16) Noho o fagnomezagne iohoe ka, le afake hifandrambe soa amy i Jehovah tika.

 6. Ino ty rehake ampiasae ty Baiboly hodinehentika amy ty lahatsoratse toy, le ino ty anto’e?

⁶ Ino ty toko’e hataontikagne mba handrambesantika soa naho hahazoantika famelan-keloke boake amo o fagnomezagne miambake iohoe? Hahatrea ty vale o fagnonteneagne iohoe tikagne naho fa mandineke ty rehake ampiasae ty Baiboly retoa: Fampilongoagne, fandrakofam-pahotagne, solovoigne, fagnavotagne naho fagnambaragne ho maregne. Handineke ty dika o rehake reo tsikiraidraike tikagne amy ty lahatsoratse toy. Vao mainke hankasitrake i Jehovah tika naho misaintsaigne o fagnazavagne reo.

TY TANJOGNE: FAMPILONGOAGNE

 7. a) Ino ka ty raha hafa nafoe i Adama naho i Eva? b) Ino ty raha ilae ty tarana i Adama naho i Eva? (Romanina 5:10, 11)

⁷ Tsy vita tihoe tsy afake niaigne nainai’e avao ty Adama naho i Eva naho fa nanota, fa mbe nisimba ka ty fifandrambesa iareo amy i  Jehovah, i Rae iareoy. Nikeleia i Jehovah hey iareo tamy ty voaloha’e. (Lioka 3:38) Faie tsy nankatò i Jehovah iareo, le niroahegne tsy ho agnisa ty keleia i Jehovah sasa. Tafara izay iareo vaho niterake. (Gen. 3:23, 24; 4:1) Mila ampilongoegne amy i Jehovah areke tika satria agnisa ty tarana iareo. (Vakio ty Romanina 5:10, 11.) Ty dika izay, mila managne fifandrambesagne soa ama’e tika. Rehafe ty loharanon-kevetse raike fa ty rehake Grike tihoe “milongo” ampiasaegne etoagne, le azo adika tihoe “minamagne amy ty fahavalo raike.” Mahalatsa fa i Jehovah ty nanao raha voaloha’e mba hahavy ze raha zay ho tanterake. Akore ty natao’e?

TY FANDAHARAGNE NATAO’E: FANDRAKOFAM-PAHOTAGNE

 8. Ino ty natao i Jehovah mba hahavy antikagne hifandrambe ama’e indraike?

⁸ Tihoe Fandrakofam-pahotagne, le fandaharagne natao i Jehovah mba hagneregnagne indraike ty fifandrambesa o ndaty mpanotao ama’e. Raha roe mifandanja soa ty ampifanakalozegne amy io. Mba hahazoagne indraike i raha nafoe i Adamay areke, le raha mitovy lanja amy igne ty nimey i Jehovah. Mirehake ty fandaharagne natao i Jehovah mba hahafaha ty tsikiraidraike hifandrambe ama’e ka ty Soratse Grike Kristiana.​—Rom. 3:25.

 9. Ino ty fandaharagne tsy maharetse natao i Jehovah mba hamelagne ty fahota o Israelitao?

⁹ Nanao fandaharagne tsy maharetse ty Jehovah mba hahazoa o Israelitao famelan-keloke naho hahafaha iareo hifandrambe soa ama’e. Nankalazaegne isan-taogne i Andro Fandrakofam-pahotagney ta Israely agne. Nangalake biby raike hatao sorogne i mpisorom-beỳ tamy io mba handrakofagne ty fahota i vahoakey. Mazava hoaze fa tsy hahavita handrongogne tanterake ty fahota o ndatio naho sorogne biby avao, satria ambane noho o ndatio o bibio. Faie vognogne hamela ty fahota o Israelitao ty Jehovah, naho tena nibebake iareo sady nanao i sorogne nitaké’ey. (Heb. 10:1-4) Ty sorogne natao o Israelitao tamy i Andro Fandrakofam-pahotagney naho tamy ty andro hafa, le nagnampe iareo hahatakatse tie, mpanota iareo sady mila raha tena mahavita mandrongogne tanterake ty fahota iareo.

10. Ino ty fandaharagne natao i Jehovah mba handrakofagne tanterake ty fahota o ndatio?

¹⁰ Ino ty fandaharagne natao i Jehovah mba handrongonagne tanterake ty fahota o ndatio? Nimea’e hatao sorogne “indraike avao mba hinday ty fahota ty ndaty maro” i Ana-dahi’e tena tea’ey. (Heb. 9:28) Nagnomey “ty fiai’e ho solovoigne mba hagnavotagne ndaty maro” ty Jesosy. (Mat. 20:28) Inogne o solovoigne zao?

TY VILI’E: SOLOVOIGNE

11. a) Arake ty Baiboly, ino ty atao tihoe solovoigne? b) Ndaty manao akore ty afake magnomey i solovoigney?

¹¹ Arake ty Baiboly, tihoe solovoigne, le vili’e aloa mba handrakofagne fahotagne naho hampilongoagne. a Amy i Jehovah, le o raha iohoe ty magneregne indraike i raha nafoey. Amy ty fomba akore? Tadidio fa fiaignagne voririke naho fahafahagne hiaigne nainai’e ty nafoe i Adama naho i Eva. Toko’e hifandanja amy ze raha nafoe iareo zay ka areke i solovoigney. (1 Tim. 2:6) Toko’e ho ndaty 1) voririke; 2) managne fahafahagne hiaigne nainai’e an-tane etoy, sady 3) vognogne hagnomey ndra hanao sorogne ty fiai’e ho antika ty magnomey i solovoigney. Ty fiay o ndaty raike iohoe avao ty afake magnonetse i raha nafoey.

12. Nagnino ty Jesosy ro afake nagnomey i solovoigney?

 ¹² Nagnino ty Jesosy ro afake magnomey i solovoigney? Misy anto’e telo retoa: 1) Voririke reke zane hoe “tsy nanota.” (1 Pet. 2:22) 2) Noho ireke voririke, le managne fahafahagne ty hiaigne nainai’e an-tane etoy reke. 3) Vognogne ty ho mate naho hagnomey ty fiai’e ho antika reke. (Heb. 10:9, 10) Voririke manahake i lahilahy voaloha’ey, zane hoe i Adama mbe tsy nanotay ty Jesosy. (1 Kor. 15:45) Naho fa nimate ty Jesosy, le afake nagnomey solovoigne mifandanja amy i nafoe i Adamay. (Rom. 5:19) I Jesosy areke ty “Adama fara’e.” Tsy mila ndaty voririke hafa hagnonetse i raha nafoe i Adamay sasa tika. Fa nimate “indraike avao” ty Jesosy.​—Heb. 7:27; 10:12.

13. Ino ty tsy mampitovy i fandrakofam-pahotagney naho i solovoigney?

¹³ Ino areke ty tsy mampitovy i fandrakofam-pahotagney naho i solovoigney? Ty fandrakofam-pahotagne, le fandaharagne natao i Jehovah mba hahafaha o ndatio hifandrambe soa ama’e indraike. Fa ty solovoigne, le vili’e naloa mba handrakofagne ty fahota o ndatio. I lio i Jesosy natsopa’e ho antikagney o vili’e naloa iohoeke.​—Efes. 1:7; Heb. 9:14.

TY VOKA’E: FAGNAVOTAGNE NAHO FAGNAMBARAGNE HO MAREGNE

14. Ino ty raha hodinehentika, le ino ty anto’e?

¹⁴ Inogne iaby ty voka i fandaharagne fandrakofam-pahotagney? Mampiasa rehake maro ty Baiboly mba hagnazavagne ty soa azo boake amy io. Ndra tie misy ifandrambesa’e aza ty dika o rehake rehoe, le sambe magnasongadigne i fandrakofam-pahotagney, zane hoe i fomba ahafaha i Jehovah mamela antikagney. Naho fa mandineke o rehake rehoe tika, le hotreantika ty soa rambesentika tsikiraidraike.

15-16. a) Arake ty Baiboly, irehafagne ino tihoe “fagnavotagne”? b) Nagnino io ro mahasoa antika?

¹⁵ Mirehake ty Baiboly fa tihoe fagnavotagne, le fagnafahagne azo boake amy ty nandoavagne i solovoigney. Izao ty fomba nirehafa i apostoly Petera izay: “Fanta’areo fa tsy tamy ty raha mete simba manahake ty volafotsy ndra volamena, ro nagnafahagne [Abt: “nagnavotagne, nanoagne solovoigne ho”] anareo tamy ty fomba fiaignagne tsy mahasoa nilovae’areo tamy ty razambei’areo, fa tamy ty lio sarobily, le ty lio i Kristy, manahake ty lio ty anak’agnondry tsy misy tsiko’e naho tsy misy tasy.”​—1 Pet. 1:18, 19; f.a.p.

¹⁶ Noho i solovoigney, le afake amy ty lalà ty ota naho ty fate, i mampijale antikagne rey tika. (Rom. 5:21) Tena mankasitrake i Jehovah naho i Jesosy tikagne, noho iareo nagnavotse antika tamy ty alala i lio i Jesosy sarobilỳ.​—1 Kor. 15:22.

17-18. a) Ino ty dika tihoe ambara ho maregne tikagne? b) Ino ty soa rambesentika boake amy izay?

¹⁷ Mirehake ty Baiboly fa ambara ho maregne o mpanompo i Jehovah-o. Midika zay tie tsy mitake ty handoavantika onetse noho ty fahotagne nataontikagne ty Jehovah. Faie ndra tie manao izay aza reke, le tsy midika zay tie mandika ty fitsipi’e miomba ty rare’e reke. Tsy tihoe ambara i Jehovah ho maregne tikagne satria fagneva izay ndra tsy mampagninogne aze ty fahotagne ataontika. Vognogne hamoagne i trosantikagney reke satria maneho finoagne i fandaharagne fandrakofam-pahotagney naho i solovoigne naloay tika.​—Rom. 3:24; Gal. 2:16.

¹⁸ Midika ino ho antikagne tsikiraidraike zay? Fa nambara ho maregne, le tinoka tihoe anan’Agnahare ze finily hiarake manjaka amy  i Jesosy an-dagnitse agne. (Tit. 3:7; 1 Jaona 3:1) Fa nivoavela ty fahota iareo. Hoe fa tsy nanao raha raty sasa iareo, le izay ty mahavy iareo hahafeno fepetse ho agnisa i Fanjakagney. (Rom. 8:1, 2, 30) Fa nambara ho maregne ka ze mitamà ty hiaigne nainai’e an-tane etoy, le natao tihoe naman’Andrianagnahare sady fa voavela ty fahota iareo. (Jak. 2:21-23) Mitamà ty tsy homate sasa i vahoake maro tsy vatse isahegne ho votso-belogne amy i Haramagedonaỳ. (Jaona 11:26) Hovelomegne amy ty mate ka ty ndaty “maregne” naho ty “tsy maregne” naho fa amy i tontolo vaovaoy ao. (Asa. 24:15; Jaona 5:28, 29) “Hahazo i fahafahagne miambake anagna ty anan’Andrianagnaharey” ze mpanompo i Jehovah mankatò an-tane etoy. (Rom. 8:21) Tena fitahiagne miambake vata’e ty azontikagne boake amy i fandaharagne fandrakofam-pahotagney satria hilongo soa amy i Jehovah, i Babantikagney tika!

19. Nagnino ty raha natao i Jehovah naho i Jesosy ro nagnova ty fiaignantika? (Henteo ka ty efajoro tihoe “ Famindram-po i Jehovah.”)

¹⁹ Namoe ze kila raha naho nandova trosa bey tsy ombia ho voaloa manahake i ajalahy taloha tagney tika. Faie soa avao fa nagnampe antikagne ty Jehovah, le tena mankasitrake aze tika. Niova ty raha nisy satria nanao i fandaharagne fandrakofam-pahotagney reke sady nandoa i solovoigney. Ho avotse naho ho afake amy ty ota naho ty fate tika naho mino i Jesosy Kristy. Voafafa tanterake ka ty fahotantika sady hoe tsy nanao raha raty tika. Faie ty raha tena lahibey le tihoe, afake mifandrambe soa amy i Jehovah, i Raentika bey hatea an-dagnitse agney tika tie amy izao.

20. Ino ty hodinehentika amy ty lahatsoratse magnarake?

²⁰ Naho misaintsaigne ty raha iaby natao i Jehovah naho i Jesosy ho antikagne tika, le tena hankasitrake iareo. (2 Kor. 5:15) Tsy ho nanan-draha tamaegne tika naho tsy nampea iareo! Faie ino maregne moa ty soa ho azontikagne tsikiraidraike boake amy ty famelan-kelo i Jehovah? Hirehake miomba izay tika amy ty lahatsoratse magnarake.