1. Ino ty raha nitsapa ty mpanao salamo raike, le ino ka ty raha va’e ho tsapantika kindraike?

TSY misy ndaty te hivali-doha. Tsy misy ndaty ka tea ze o minekoneko zao. Faie va’e hinekoneko avao tika kindraike manahake ty mpanao salamo raike toy. Hoe reke: “Minekoneko mafe raho, le tsy maharehake.”​—Sal. 77:4.

2. Ino ty hodinehentikagne ato?

² Faie, misy raha azontika atao mba hahavy antika tsy hinekoneko loatse. Handineke iretoa tika amy ty lahatsoratse toy: 1) Ino iaby ty raha va’e hahavy antika hinekoneko? 2) Ino iaby ty raha enegne hagnampe antika tsy ho taitaitse ndra hinekoneko naho fa misy olagne atrehentika?

3. Ino iaby ty raha va’e hahavy antika hinekoneko? Azontika kalagnagne vao rey?

³ Maro ty raha va’e hahavy antika hinekoneko. Tsy azontika kalagnagne aza ty ila’e amy i raha rey. Tsy azontika atao ohatse ty mikalagne ty vily o hanegneo naho o sarogneo tsy hionjogne. Tsy azontika atao ka ty mikalagne o tompon-tragnò tsy hagnonjogne ty hofan-tragno’e. Tsy azontika kalagnagne tsy hanagne toe-tsaigne raty ka ty mpiara-miasa ndra ty mpiara-mianatse amantika te hitaogne antika hanao raha raty ndra ho raty findesam-batagne rey. Tsy azontika raràgne tsy hanao raha raty ka ty ndaty magnodidigne antika. Fa nagnino tika ro miatreke o olagne rehoe? Ty anto’e, tsy midare ty raha rehafe o Baibolio ty ankamaroa ty ndaty amy ty tontolo toy. I Satana ka  ty andrianagnahare ty tontolo toy, le tea’e tika naho fa ‘minekoneko amy ty raha amy ty tontolo toy eto’, amy izay tsy hanompo i Jehovah sasa. (Mat. 13:22; 1 Jaona 5:19) Tsy mahalatsa areke naho maro ty olagne va’e hahavy antika hinekoneko amy hinane zao.

4. Ino ty raha va’e hiseho naho minekoneko loatse miomba ty olagne mahazo antikagne tika?

⁴ Va’e tsy hahavita hifantoke amy ty raha hafa sasa tika naho minekoneko loatse miomba ty olagne mahazo antika. Va’e hinekoneko ohatse tika tie kera tsy ho ampe hivilianagne ze raha paliaentikagne ty volantika. Va’e hinekoneko ka tika tie: ‘Akore naho marare raho? Tsy ho afake hiasa raho, le va’e ho voaroake.’ Va’e hinekoneko ka tika tie kera tsy ho vitantika ty tsy hivalike amy i Jehovah naho fa misy ndaty mitaogne antika handika ty lili’e. Tsy ho ela ty Satana, le handrisike o mpanohagne azeo mba hanafike antika. Va’e hinekoneko areke tika tie akore ty hataontika amy ze fotoagne zay? Faie intoy misy raha va’e ho eretserete’o: ‘Diso vao raho naho minekoneko miomba o raha rehoe?’

5. Ino ty tea i Jesosy ho rehafegne naho fa nirehake reke tie: “Ko minekoneko sasa ... nareo”?

⁵ Hoe ty Jesosy tamo o mpanonjohy ty lia’eo: “Ko minekoneko sasa ... nareo.” (Mat. 6:25) Te hirehake vao ty Jesosy tie tsy toko’e hinekoneko tika? Aha’a, tsy izay. Ko haligno fa nisy mpanompo i Jehovah taloha ninekoneko faie mbe nankasitraha’e avao iareo. * (1 Mpanj. 19:4; Sal. 6:3) Te hirehake areke ty Jesosy tie tsy toko’e hinekoneko loatse tika. Tsy tea’e hinekoneko loatse miomba ze raha ilaentikagne ohatse tika, satria va’e hijanogne tsy hanompo i Jehovah sasa tika naho manao izay. Ino areke ty hagnampe antika naho fa minekoneko tika?—Henteo ty efajoro tihoe “ Ino Iaby ty Raha Hagnampe Azo Tsy Hinekoneko?”

6. Ino ty hagnampe antika tsy hinekoneko loatse naho ty Filipianina 4:6, 7 ro henteagne?

⁶ 1) Mivavaha mateteke. Tsy hinekoneko loatse miomba ty olagne mahazo azo rehe naho mangatake fagnampeagne amy i Jehovah amy ty alala ty vavake. (1 Pet. 5:7) Hahazo ty “fiadanan’Andrianagnahare ambone ze kila eretseretsey” rehe naho manao izay. (Vakio ty Filipianina 4:6, 7.) Amy ty alala i fagnahi’e masigney ty hagnomea i Jehovah azo o fiadanagne iohoe.​—Gal. 5:22.

7. Ino ty raha toko’e ho tadidie’o naho fa mivavake?

⁷ Voraho amy i Jehovah iaby ze raha agnate fo’o ao naho fa mivavake rehe. Rehafo ama’e ty olagne mahazo azo naho ty raha tsapa’o noho o olagne iohoe. Naho ohatse azo vahagne i olagney, le mangataha fahendreagne naho hery amy i Jehovah mba hagnampe azo hahatrea ty raha toko’e hatao naho hanagne hery hanoagne aze. Fa naho ohatse tsy azo vahagne, le azo’o atao ty mangatake amy i Jehovah mba hagnampe azo tsy hinekoneko loatse. Naho atao’o voafaritse soa ty vavake anoe’o, le ho mora ama’o ty hahatrea tie namale i vavake nanoe’oy ty Jehovah. Fa akore naho tsy le avy le mivale eo naho eo ty vavake anoe’o? Tsy toko’e ho kivy rehe. Ty anto’e, tsy tihoe tea i Jehovah hatao’o voafaritse soa avao ty vavake anoe’o fa mila maharetse mivavake ka rehe.​—Lioka 11:8-10.

8. Ino ka ty raha toko’e ho rehafentikagne naho fa mivavake?

⁸ Tena ilaegne ty magnankigne amy i Jehovah ty raha mampinekoneko antikagne. Faie ndra tie eo zay, le tsy toko’e ho halignontika ka ty misaotse aze. Ndra tie miatreke  raha sarotse areke tika, le soa ty misaintsaigne tie ino iaby ty fitahiagne fa niazontikagne. Fa akore naho tsy haintika tie akore ty fomba hirehafantika amy i Jehovah ty raha tsapantika? Akore naho izao avao ty vitantika ty mirehake aze: ‘Ampeo raho Jehovah!’? Matokia fa hamale ze vavake anoentikagne zay reke.​—2 Tan. 18:31; Rom. 8:26.

9. Ino ty toko’e hataontika naho fa misy raha mampatahotse antika?

⁹ 2) Miantehera amy i Jehovah fa tsy amy ty hilala’o manokagne. Natahotse ty ho tafihe o Asyrianao ty ndaty ta Joda tao tamy ty taonjato fahavalo T.K. tagne ho agne. Nila vonje tamo o Ejipsianao areke iareo, satria tsy tea iareo naho ho rese o Asyrianao. (Isaia 30:1, 2) Faie nampitao iareo ty Jehovah tie ho loza ty voka ze raha natao iareo zay. (Isaia 30:7, 12, 13) Nagnirake Isaia mpaminany reke mba hirehake tamy iareo tie akore ty hahavy iareo tsy hatahotse. Hoe ty Isaia: “Ty tsy fahataitaira’areo naho ty fatokisa’areo ro ho tanja’areo.”—Isaia 30:15b.

10. Akore ty azo’o ampisehoagne tie matoky i Jehovah rehe?

¹⁰ Akore ty hampisehoa’o tie matoky i Jehovah rehe? Saintsaigno ohatse zao: ‘Akore zao ty hatao’o naho mahatrea asa bey karama rehe, faie tsy maintsy hiasa agnate ty lera maro rehe isan’andro sady va’e hanjare tsy ho afake hanompo i Jehovah sasa ka? Akore ka naho misy mpiara-miasa ama’o tea azo sady te hanambaly azo, faie tsy “amy i Tompo ao” reke? Akore ka zao naho magnorohoro azo ty keleia’o tie ho sasà iareo tsy ho ana’e rehe naho mbe manompo i Jehovah?’ Va’e hivali-doha rehe naho fa tendreke raha hoe ireo. Faie hanoro azo ty raha toko’e hatao’o ty Jehovah. (Mat. 6:33; 10:37; 1 Kor. 7:39) Faie ty fagnonteneagne, le izao: ‘Hatoky i Jehovah vao rehe, le hagnorike ze torohevetse mea’e azo?’

11. Tantara ia agnate Baiboly ao ohatse ty azontika ianaragne naho teantika ty tsy hatahotse naho fa misy manohetse antika?

¹¹ 3) Mandrambesa lesogne amy ty raha natao ty ndaty taloha. Maro ty tantara amy Baiboly ao mampiseho tie tsy toko’e hatahotse ndaty tika fa hatoky i Jehovah avao. Naho fa mianatse i tantara rey rehe, le mareho tie ino ty nagnampe o mpanompo i Jehovah-o ho tony avao naho fa nisy ndaty nanohetse iareo. Nandily o apostolio mba tsy hitory sasa ohatse o Fitsaragne Ambone Jiosio tie indraike. Le akore ty natao i apostoly rey? Tsy natahotse iareo sady nirehake tie: “Andrianagnahare ro mpitondra anay le ie ro orihe’ay, fa tsy ndaty.” (Asa. 5:29) Jinera iareo tafara izay. Faie tsy mba natao iareo hampahotse iareo ka zay. Fa nagnino? Satria hay iareo tie nanohagne iareo ty Jehovah sady nankasitrake iareo. Nanohy nitory i talily soay avao areke iareo. (Asa. 5:40-42) Tsy mba natahotse zao ka ty Stefana naho fa ho nivonoegne. Nitony avao reke. Naho fa nihenteagne ka ty tarehe’e, le “nitovy amo o tarehe o anjelio.” (Asa. 6:12-15) Fa nagnino? Satria natoky reke fa nankasitrake aze ty Jehovah.

12. Nagnino tika ro afake ty ho fale avao ndra tie enjehegne aza, arake ty 1 Petera 3:14; 4:14?

¹² Nahatrea porofo o apostolio fa nanohagne iareo vata’e ty Jehovah. Nimea’e hery ohatse iareo mba hahavità iareo hanao fahagagagne. (Asa. 5:12-16; 6:8) Faie fa tsy manao izay sasa ty Jehovah amy izao. Faie ndra tie eo zay, le magnomey toky antika amy ty alala ty Saontsi’e reke tie tena mankasitrake antika sady mei’e ty fagnahi’e masigne ka tika naho fa enjehe o ndatio noho itika magnorike ty hamarenagne. (Vakio ty 1 Petera 3:14; 4:14.) Tsy toko’e hinekoneko loatse areke tika tie ino ty hatao naho fa misy ndaty magnenjeke antika. Mila manao ze azontika atao tika mba hahavy antika tena hatoky tie hanohagne naho hagnavotse  antika ty Jehovah. Mila matoky ty raha nampitamàe i Jesosy toy tika. Hoe reke: “Hatoroko anareo ze raha toko’e ho rehafe’areo sady homeako hilala ka nareo, amy izay tsy ho vita o fahavalo’areò ty handrese ndra hanohetse anareo.” Nampitamà antika ka reke tie: “Naho miaretse nareo, le ho voavonje’areo ty fiai’areo.” (Lioka 21:12-19) Ko haligno fa ony i Jehovah amy ty pitsopitso’e ty miomba o mpanompo’e tsy mivalike ama’eo. Tsy ho sarotse ama’e areke ty hamelogne iareo naho sagnatria mate iareo.

13. Nagnino ro mahasoa antika ty mandineke o ndaty natahotse naho tsy nitoky tamy i Jehovah-o?

¹³ Faie afake mandrambe fianaragne boake amo o ndaty natahotse naho tsy natoky i Jehovah-o ka tika. Hagnampe antika tsy hagneregne ty raha tsy nimete natao iareo ty fianarantika miomba iareo. Dineho ohatse ty Asa Mpanjaka i Joda. Naho fa nisy maramila maro ohatse nanafike iareo, le niantehetse tamy i Jehovah reke. Ty voka’e, nitahy aze ty Jehovah, le nandrese ka iareo. (2 Tan. 14:9-12) Faie naho fa tafara tatoy, le nanafike aze ty Basa Mpanjaka o Israelio. Tsy ampe avao ty maramila i Basa naho oharegne amy i maramila nanafike aze talohay. Faie tsy nila vonje tamy i Jehovah ty Asa tamy io. Fa ino ty natao’e? Nikarama’e o maramila Syrianao amy izay magnampe aze. (2 Tan. 16:1-3) Tamy ireke narare mafe taloha ty nimateza’ey aza, le mbe tsy niantehetse tamy i Jehovah avao ndra nangatake fagnampeagne tama’e.​—2 Tan. 16:12.

14. Ino ty raha azo ianaragne boake amy ty raha tsy mete natao i Asa?

¹⁴ Niantehetse tamy i Jehovah ty Asa tie taloha naho fa nanagn’olagne. Faie niantehetse tamy ty hilala’e manokagne reke naho fa niatreke olagne tafara tatoy. Nila vonje tamo o Syrianao reke naho fa nialy tama’e o Israelio. Hoe nimete ze raha natao i Asa zay tamy ty voaloha’e. Faie tagnate ty fotoagne fohe avao ty fiaigna iareo ro nilamigne. Izao ka ty raha nisaontsie i Jehovah tamy ty alala ty mpaminany raike: “Noho irehe niantehetse tamy i mpanjaka i Syria, fa tsy tamy i Jehovah Andrianagnahare’o, le ho afake hilay azo o maramila i mpanjaka i Syriao mba tsy ho mate an-tagna’o.” (2 Tan. 16:7) Mila mitao areke tika mba tsy hieretseretse tie: ‘Ndra tie tsy mipay ty tari-dala i Jehovah aza raho, le ho vitako avao ty handamigne ty olagne mahazo ahy toy.’ Ndra tie va’e tsy maintsy mandrambe fanapahan-kevetse malaky aza tika, le ilaentika avao ty miantehetse amy i Jehovah naho mangatake ty tari-dala’e. Handrambe fanapahan-kevetse mete soa tika naho manao izay.

15. Ino ty raha azontika atao naho fa mamaky Baiboly?

¹⁵ 4) Tadidio ze andinin-teny hai’o tie afake magnampe azo tsy hinekoneko fa hatoky i Jehovah. Ino ty hagnampe azo amy izay? Naho fa mamaky Baiboly rehe, le lokò ze andinin-teny trea’o tie afake magnampe azo tsy hatahotse naho hatoky i Jehovah. Ino ka ty va’e hagnampe azo hitadidy i andinin-teny rey? Vakio mafe ndra sorato amy ty raha hafa, amy izay afake hentea’o mateteke. Nandily i Josoa ohatse ty Jehovah mba hamaky handro halegne ty boke misy i Lalànay mba hahavy aze hanao raha aman-kilala. Ty fanoa’e izay ka, le hagnampe aze ho bey herim-po naho fa mitarike o vahoa i Jehovah-o. (Jos. 1:8, 9) Maro ty andinin-teny amy Baiboly ao afake magnampe azo tsy hivali-doha naho fa misy raha mampinekoneko azo.​—Sal. 27:1-3; Ohab. 3:25, 26.

16. Akore ty ampiasà i Jehovah o fiangonagneo mba hagnampeagne antika hatoky aze naho tsy hinekoneko?

¹⁶ 5) Miaraha amo o vahoa i Jehovah-o. Mampiasa o rahalahio naho o rahavaveo ka ty Jehovah mba hagnampeagne antika hatoky aze naho tsy hinekoneko. Mahazo fampaherezagne ohatse tika naho fa mivory. Ty anto’e, mampahery  antika ty lahajaka reintika agne, ty toin-drehake mea o mpiara-manompò, le eo ka ty raha mampahery rehafe iareo. (Heb. 10:24, 25) Tena hahazo fampaherezagne ka tika naho tantaraentika amy ty ragnentika maifitse antika agnivo o fiangonagneo eo ze raha mampinekoneko antika. “Ty rehake soa” boake amy ty namagne hoe izay, le hahavy antika tsy hinekoneko loatse.​—Ohab. 12:25.

17. Nagnino i fanantenantikagney ro magnampe antika tsy hinekoneko loatse naho fa misy raha sarotse manjò antika, arake ty Hebreo 6:19?

¹⁷ 6) Anò ze hahavy azo hatoky avao tie tsy maintsy ho avy eo i raha tamaentika rey. Hoe ty Baiboly: “Ze raha tamaegne anantikagne zay ro vatofantsike ty aintikagne.” (Vakio ty Hebreo 6:19.) Ino ty anto’e? Satria io ty magnampe antika tsy hinekoneko loatse naho hahavita hiatreke ty olagne manjò antika. Vetsevetseo areke i fampitamà i Jehovah antika tihoey tie tsy hisy raha hampinekoneko antika sasa amy ty hoavy. (Isaia 65:17) Vetsevetseo ka tie hanao akore ty fiaigna’o naho fa amy i tontolo vaovaoy ao! Ty anto’e, tsy hisy raha raty sasa ty amy izay. (Mika 4:4) Ino ka ty hagnampe azo hatoky fa tsy maintsy ho avy eo i raha tamae’oy rey? Ty fitalilia’o aze amy ty ndaty hafa. Anò areke ze fara heri’o naho fa mitory naho mampianatse Baiboly rehe. Naho manao izay rehe, le “ho tena azo’o antoke tanterake hatrake ampara’e i raha tamae’oy.”​—Heb. 6:11.

18. Ino ty raha va’e hiseho amy ty hoavy, le ino ty azontika atao mba hahavitantika hiatreke izay?

¹⁸ Haintika tie fa kede sisa, le ho rava ty tontolo i Satana toy. Va’e ho maro areke ty olagne hahavy antika hinekoneko. Faie magnampe antika hahavita hiatreke irey naho tsy hinekoneko loatse i andinin-teny hoahy ty taogne 2021 toỳ. Ty anto’e, mandrisike antika hitoky amy i Jehovah io fa tsy amy ty herim-batantikagne. Andao areke hasehontika amy ty raha ataontika fa tena matoky ty fampitamà i Jehovah toy tika: “Ty tsy fahataitaira’areo naho ty fatokisa’areo ro ho tanja’areo.”​—Isaia 30:15.