1-3. Ino iaby ty raha va’e hampitagny o vahoa i Jehovah-o?

 OMBIA rehe ty nitagny fara’e? Naho fa fale tika, le kindraike mipopoke ty ranomasontikagne. Faie mateteke noho itika malahelo ro mahavy antika tomagny. Va’e hitagny ohatse tika naho fa mate ty ndaty teantikagne. Hoe ty Lorilei, rahavave raike a Etazonia agne: “Nisy fotoagne raho tena nalahelo mafe i anak’ampelako nimatey. Hoe tsy nahafake ty alaheloko zay ze raha natao tamako. Nieretseretse aza raho tamy i fotoagne rey tie le fa halahelo hoe izao avao ty fiaignako.” *

² Va’e hisy anto’e hafa ka hampitagny antika. Hoe ty rahavave Hiromi, mpisava lalagne a Japon agne: “Tomagny raho kindraike satria tsy mba liagne amy ty hafatse torieko boake amy Baiboly ao ty ndaty treako amy i fanompoagney ey. Misy fotoagne aza raho tomagny iaby naho fa mangatake amy i Jehovah mba hampea’e hahatrea ndaty mipay ty hamarenagne.”

³ Fa nahatsapa hoe ireo ka vao rehe? Azo antoke fa nahatsapa izay ty ankamaroantikagne. (1 Pet. 5:9) Teantika ty ‘hanompo i Jehovah am-pifaleagne.’ Faie va’e hisy fotoagne tika hitagny, satria nimate ty longontika ndra misy raha mahakivy antika, ndra misy raha mitsapa ty tsy fivalihantika aman’Agnahare. (Sal. 6:6; 100:2) Inogne ty hagnampe antika hahavita hiatreke ireo?

4. Inogne ty hodinehentikagne ato?

⁴ Afake miana-draha amy i Jesosy tika. Nisy fotoagne reke niore mafe, le ‘nipoke ty ranomaso’e.’ (Jaona 11:35; Lioka  19:41; 22:44; Heb. 5:7) Andao tika handineke ze raha nampitagny aze rezay naho ty lesogne azontika ianaragne boake amy izay. Hodinehentikagne ato ka ty raha azontika atao mba hiatrehagne ty olagne va’e hampitagny antikagne.

5. Inogne ty ianarantika boake amy i Jesosy naho henteagne i fitantaragne amy Jaona 11:32-36 aoy?

⁵ Narare ty Lazarosy ragne i Jesosy tamy ty taogne 32, le nimate tamy ty fara’e. (Jaona 11:3, 14) Nanagne rahavave roe o lahilahy iohoe. I Maria naho i Marta ty agnara iareo. Tena niteà i Jesosy o keleiagne iohoe. Nalahelo mafe iareo mirahavave naho fa nimate i rahalahy iareoy. Nandeha ta Betania agne, amy i tanàgne misy i Marta naho i Mariay agne ty Jesosy tafara ty nimateza i Lazarosy. Naho fa nirey i Marta tie niavy ty Jesosy, le nilay mbama’e mbeo malaky reke. Mba vetsevetseo heike tie nanao akore ty fihetseham-po’e naho fa nirehake tamy i Jesosy reke tie: “O Tompo, naho teto rehe, le tsy ho nimate i rahalahikoy.” (Jaona 11:21) ‘Nipoke ty ranomaso’ i Jesosy tsy ela tafara izay naho fa nahatrea i Maria naho i ndaty hafa nitagny rey.​—Vakio ty Jaona 11:32-36.

6. Nagnino ty Jesosy ro nitagny tamo o fotoagne iohoe?

⁶ Nagnino ty Jesosy ro nitagny tamo o fotoagne iohoe? Izao ty rehafe ty boke Fandalinana ny Soratra Masina: “Nalahelo mafe ty Jesosy le ‘nipoke ty ranomaso’e’ naho fa naharey tie nimate ty Lazarosy sady nahatrea i rahavave’e rey nitagnỳ.” * Va’e nalae i Jesosy sare an-tsaigne ty fanaintaignagne nitsapa i Lazarosy i nama’e tsy foe’ey, tamy ireke narare mafey. Va’e nalae’e sare an-tsaigne ka ty raha nitsapa i Lazarosy naho fa nihai’e tie ho mate reke. Azo antoke fa nahavy i Jesosy hitagny ka ty fahatreava’e ty alahelo i Maria naho i Marta i rahalahy iareo nimatey. Azo antoke fa izay ka ty nitsapa’o naho nimate ty ragne’o maifitse azo ndra ty raike amy ty keleia’o. Andao tika handineke lesogne telo azontikagne ianaragne boake amo o raha niseho iohoe.

7. Inogne ty ianarantika miomba i Jehovah boake amy ty tagny i Jesosy i nama’ey?

 ⁷ Taka i Jehovah ty raha tsapa’o. ‘Mitovy tanterake aman-dRae’e ty maha ie’ i Jesosy. (Heb. 1:3) Naho fa nitagny areke ty Jesosy, le trea amy igne fa malahelo ka ty Jehovah naho fa misy ndaty mate. (Jaona 14:9) Naho nimate ty ndaty raike tea’o, le matokia fa tsy ty alahelo’o avao ro vazoho i Jehovah fa tena tsapa’e ka ty alahelo’o. Te hagnasitragne i fo’o torotoroy reke.​—Sal. 34:18; 147:3.

8. Nagnino tika ro matoky fa hovelome i Jesosy i longontikagne fa nimate rey?

⁸ Magniry mafe ty hamelogne i longo’o fa nimate rey ty Jesosy. Tafara kede ty nitagnia i Jesosy, le izao ty toky nimea’e i Marta: “Ho velogne i rahalahi’oy.” Nino i Jesosy ty Marta. (Jaona 11:23-27) Amy ty maha mpanompo i Jehovah tsy mivalike aze, le azo antoke fa nihai’e tie fa namelogne ty mate ty Elia naho i Elisa mpaminany taloha tagne. (1 Mpanj. 17:17-24; 2 Mpanj. 4:32-37) Azo inoagne fa nirei’e ka tie nisy ndaty nivelome i Jesosy tamy ty mate. (Lioka 7:11-15; 8:41, 42, 49-56) Afake matoky ka rehe fa mbe hotrea’o indraike i longo’o fa nimate rey. Ty fitagnia i Jesosy tamy ireke nampionogne i nama’e reỳ areke, le porofo fa tena tsy ligne’e ty hamelogne ty mate.

9. Akore ty azo’o ampionognagne o ndaty nimate longò, manahake ty natao i Jesosy? Mirehafa ohatse raike.

⁹ Afake mampionogne o ndaty nimate longò rehe. Tsy nitagny niarake tamy i Marta naho i Maria avao ty Jesosy fa nitsanogne naho nampionogne iareo ka. Afake manao hoe izay amo o ndaty nimate longò ka tika. Hoe ty Dan, androanavi-pagnahy raike a Ostralia agne: “Tena nipay fampionognagne raho naho fa nimate ty valiko, le nisy mpivaly maromaro nivognogne hitsanogne ahy avao ndra andro ndra halegne. Tsy rinara iareo ka raho naho fa nitagny, sady tsy nimete entsake ty tagniko zao iareo. Nagnampe ahy hanasa i tobilekoy iareo, sady nanao bezara naho nahandro hanegne ho ahy satria nisy fotoagne tena tsy nivitako ty nanao ireo. Nivavake niarake amako ka iareo. Natoro iareo fa tena ragnetse vata’e iareo, sady rahalahy ‘natao hagnampe amy ty andro mahaore.’”​—Ohab. 17:17.

10. Tantarao ty raha niseho voarehake amy Lioka 19:36-40 ao.

¹⁰ Niavy ta Jerosalema agne ty Jesosy tamy 9 Nisana taogne 33. Naho fa nihanarine i tanàgney reke, le maro ty ndaty nandafike ty lamba’e tamy ty lalagne handehana i Jesosy eo, mba hanoroagne tie magneke aze ho Mpanjaka iareo. Tena nahafale i raha niseho ignehoe. (Vakio ty Lioka 19:36-40.) Va’e ho nahagaga i mpiana’e rey areke ty raha niseho tafara izay. Ty anto’e, “naho fa niharine i tanàgney reke sady nahatalake aze, le nitagny mafe.” Tamy ireke nitagnỳ, le nirehake ty loza hanjò ty ndaty ta Jerosalema ao tsy ho ela.​—Lioka 19:41-44.

11. Nagnino ty Jesosy ro nitagny noho ty tsy fandrambesa ty ndaty ta Jerosalema tao ty raha nitorie’e?

¹¹ Niore mafe ty Jesosy tam-po’e tao, satria fa nihai’e tie tsy handrambe ty hafatse miomba i Fanjakagney ty ankamaroa o Jiosio ndra tie niambake aza ty fomba nandrambesa iareo aze. Ty voka’e, horavagne ty Jerosalema, le hanjare o ndevo ze Jiosy hovotso-belogne amy i fandravagney. (Lioka 21:20-24) Mampalahelo fa tena nandietse i Jesosy vata’e ty ankamaroa o ndatio. Manao akore ka ty fandrambesa ty ankamaroa ty ndaty amy ty tanàgne misy azo ty hafatse miomba i Fanjakagney? Ino ty azo’o ianaragne boake amy ty raha nampitagny i Jesosy naho tsy ampe avao ty ndaty mankasitrake ty kezake mafe anoe’o amy ty  fampianaragne iareo ty hamarenagne? Andao tika handineke lesogne telo.

12 Inogne ty azontika ianaragne miomba i Jehovah boake amy ty tagny i Jesosy i nama’e rey?

¹² Midare o ndatio ty Jehovah. Ty tagny i Jesosy le maniahy antika tie tena midare o ndatio ty Jehovah. Hoe ty Baiboly: “Tsy tea’e hisy hibaibay nareo fa sambe hisoloho iaby.” (2 Pet. 3:9) Akore ty fomba anoroantika fa tea ty ndaty itoriantikagne tika? Mila mikezake mafe tika mba hahafoe tegna naho hanohigne ty fo iareo amy i talily soay.​—Mat. 22:39.

13-14. Akore ty nanoroa i Jesosy fa nitretré ndaty reke, le ino ty hagnampe antika hanagne o toetse iohoe?

¹³ Nanompo avao ty Jesosy ndra ombia ndra ombia. Natoro i Jesosy tie tea ndaty reke, le nampianatse iareo avao reke isake tie nahatrea hirike hanoagne izay. (Lioka 19:47, 48) Ino ty nandrisike aze hanao izay? Ty fitretréza’e i ndaty rey. Nimaro ty ndaty nite haharey i Jesosy tie indraike, hafara’e ‘ndra ty fotoagne hihinana iareo amy i mpiana’e rey aza tsy nisy iaby.’ (Mar. 3:20) Mbe nivognogne ty hampianatse ze lahilahy raike zay ka ty Jesosy ndra tie halegne aza ty fotoagne nimete tamy i lahilahỳ. (Jaona 3:1, 2) Ndra tie tsy nanjare mpiana i Jesosy ty ankamaroa i ndaty nitsanogne aze rey, le nanagne fahafahagne hianatse miomba an’Agnahare tamy ty alala’e. Teantikagne ka naho maharey i talily soay ty ndaty tsikiraidraike amy izao. (Asa. 10:42) Faie mba hahavitantikagne izay, le va’e mila magnovaova ty fomba fitoriantikagne tika.

¹⁴ Mivognona hanao ty fagnovagne ilaegne atao amy ty fanompoagne. Naho tsy ovaovantika ty lera itoriantika, le va’e tsy hahatrea i ndaty magniry mafe ty hianatse i talily soay rey tika. Hoe ty Matilda, mpisava lalagne: “Ovaova’ay amy i valiko ty lera itoria’ay. Vaho maraindraigne ohatse le fa mitory amo o toeragne maro birò rey zahay. Ie zahay naho fa atoandro dizeramenay, mampiasa kalesy fampirantiagne satria maro ty ndaty mandeha an-dalagney amy igne. Mitory isan-tragno ka zahay naho fa motakandro satria maro ty ndaty zoegne an-tragno amy igne.” Toko’e ho vognogne hagnovaova ty lera itoriantika amy ty fotoagne ahatreavagne ndaty maro areke tika fa tsy amy ze fotoagne fa nalamintikagne hitoriagne avao. Naho itika manao izay, le ho fale ty Jehovah.

15. Inogne ty raha niseho tamy ty halegne fara’e niaigna i Jesosy, arake ty Lioka 22:39-44?

¹⁵ Nandeha tamy i tonda i Getsemane agne ty Jesosy tamy ty hale ty 14 Nisana taogne 33. Nivorahe’e tamy i Jehovah iaby ze raha tam-po’e ao tamy izay. (Vakio ty Lioka 22:39-44.) “Nihalale ..., sady nitoreo mafe naho nitagny” ty Jesosy tamo o fotoagne iohoe. (Heb. 5:7) Inogne ty raha nangatahe i Jesosy tamo o halegne fara’e taloha ty namonoagne aze iohoe? Nangatake hery reke mba hagnampe aze hahavita tsy hivalike amy i Jehovah naho hanao ty zoton’arofo’e. Nijanjìgne i Jehovah ty vavake natao i Ana-dahi’ey, le nagnirake anjely reke mba hampahery aze.

16. Nagnino ty Jesosy ro niore mafe tamy ireke nivavake tan-tonda i Getsemane aoy?

¹⁶ Azo antoke fa nitagny ty Jesosy tamy ireke nivavake tan-tonda i Getsemane aoy. Ty anto’e, tena nahakivy aze ty ho fihevera o ndatio aze tihoe mpiteratera an’Andrianagnahare. Nihai’e ka tie nisy andraikitse lahibey nankinegne tama’e, le ty tsy hivalike aman-dRae’e naho hagnamasigne i tahina’ey. Inogne ka ty azo’o ianaragne amy i Jesosy naho ohatse misy raha sarotse atrehe’o mitsapa ty tsy fivaliha’o amy i Jehovah? Andao tika handineke lesogne telo hafa ka.

17. Inogne ty ianarantika miomba i Jehovah boake amy ty famalea’e ty vavake mafe natao i Jesosy?

¹⁷ Mijanjigne azo ty Jehovah naho fa ihe mihalale mafe ama’e. Nijanjìgne i Jehovah ty Jesosy naho fa nihalale tama’e. Fa nagnino? Satria tena nilahibey tamy i Jesosy tihoe tsy hivalike aman-dRae’e naho ty hagnamasigne ty tahina’e. Hamale ty vavake ataontikagne ka ty Jehovah naho tena lahibey amantika ty tsy fivalihagne ama’e naho ty fagnamasinagne ty tahina’e.​—Sal. 145:18, 19.

18. Nagnino ty Jesosy ro rehafegne tie ragnetse soa fagnahy sady mahatakatse ty raha mahazo antika?

¹⁸ Taka i Jesosy soa ty raha tsapa’o. Tena fale tika naho managne namagne mahatakatse soa ty raha tsapantika sady mampionogne antika amy itika kivy rey, lohotsie naho fa niatreke raha mitovy amantikagne reke. I Jesosy zao tena hoe izay. Hai’e tie manao akore ze o mahatsiaro ho maleme naho mipay fagnampeagne zao. Taka’e ka ty fahalemeantika, le hentea’e tie mahazo ty fagnampeagne ilaentika  ‘amy ty fotoagne mete’ vao tika. (Heb. 4:15, 16) Nagneke ty fagnampea i anjelỳ aze ty Jesosy tamy ireke tan-tonda i Getsemane aoy. Toko’e ho vognogne handrambe ty fagnampeagne mea i Jehovah ka tika, ndra amy ty alala o boke aman-gazeteo zay, ndra amy ty video, ndra amy ty lahajaka, ndra amy ty fitilihagne mampahery atao ty androanavi-pagnahy ndra ty ragnetse matotse.

19. Inogne ty hagnampe azo hahazo hery naho fa miatreke raha mahakivy mitsapa ty tsy fivaliha’o aman’Agnahare rehe? Mirehafa ohatse raike.

¹⁹ Homey i Jehovah ty ‘fiadana’e’ rehe. Akore ty fomba agnomea i Jehovah hery antika? Hahazo i ‘fiadanan’Andrianagnahare ambone ze kila eretseretsey’ tika naho fa mivavake ama’e. (Fil. 4:6, 7) Magnampe antika ho tony naho hilamin-tsaigne o fiadanagne boake amy i Jehovah iohoe. Nahatsapa izay zao ty rahavave atao tihoe Luz. Hoe reke: “Mateteke raho ro nahatsiaro ho irerike. Naho fa nahatsapa hoe izay raho, le kindraike nieretseretse tie tsy tea ahy ty Jehovah. Faie naho fa miseho ze raha zay, le avy le voraheko amy i Jehovah ze raha tsapako. Magnampe ahy ho tony ty fanoako izay.” Treantika amy ty raha niaigna o rahavave iohoe fa magnampe antika hilamin-tsaigne ty vavake.

20. Inogne ty lesogne ianarantika boake amy i raha nampitagny i Jesosy rey?

²⁰ Tena mampahery naho mampiana-draha antika i raha nampitagny i Jesosy rey. Maniahy antika rey tie mila mampionogne i namantikagne nimate longo rey tika sady mila matoky tie hanohagne antika ty Jehovah naho i Jesosy naho fa itika mamoe longo tsy foen-troke. Mandrisike antika hitretré, i toetse fanjaka anagna i Jehovah Andrianagnahare naho i Jesosy Kristỳ ka igne, le hitory naho hampianatse o ndatio. Ianarantika boake amy i raha nampitagny i Jesosỳ ka fa mahatakatse soa ty raha tsapantika naho ty fahalementika ty Jehovah naho i Ana-dahi’e ikokoa’ey, sady te hagnampe antika mba hahavita hiaretse iareo. Lonike abey tika hikezake hampihatse ty lesogne nianarantika tato amparake ty hiavia ty fotoagne hagnatanteraha i Jehovah i fampitamà’e fanjaka manao tihoey ‘ho fafagne ze ranomaso amy ty masontika iaby.’​—Apok. 21:4.