1-2. a) Naho fa ombia tika ro tena mahatsiaro ty longontika nimate? b) Ino ty raha natao i Jesosy tamy i halegne taloha ty namonoagne azey?

 MBE tsiarontika avao i longontika nimate rey ndra fa ela ndra vaho tsy ela ty nimateza iareo. Naho fa miheregne indraike aza i date nimateza iareoy ro tena mahatsiaro iareo tika.

² Isan-taogne le ndaty an-tapetrisa’e ro miarake mivory amy ty fiheregna i date nimateza i Jesosy Kristỳ, i ndaty tena teantikagney. (1 Pet. 1:8) Miarake mivory tika amy io mba hahatsiaro i Jesosy, i nagnomey ty fiai’e ho solovoigne hagnavotagne antika amy ty ota naho ty fatey. (Mat. 20:28) Tea i Jesosy hahatsiaro ty nimateza’e o mpanonjohy ty lia’eo. Tamy i halegne taloha ty nimateza’ey, le nanomboke nanao fankalazagne miambake raike zay reke, sady nandily hoe izao: “Tohizo avao zao ho fahatsiarovagne ahy.”​—Lioka 22:19.

3. Ino ty hodinehentikagne ato?

³ Tsy ampe avao amy i ndaty magnatreke Fahatsiarovagne rey ty mitamà hiaigne an-dagnitse agne. Mitamà hiaigne nainai’e an-tane etoa ty ankamaroa iareo. Hodinehentikagne amy ty lahatsoratse toy tie: Nagnino ro tsy ligne o antoko o ndaty roe rehoe ty hagnatrehagne i Fahatsiarovagney isan-taogne? Ino ty soa rambesentika boake amy ty fagnatrehagne io? Faie andao heike tika handineke ty anto’e ila’e mahavy o voahosotseo hagnatreke Fahatsiarovagne.

4. Nagnino o voahosotseo ro mahazo mihinagne amy i mofo naho minogne amy i divay amy i Fahatsiarovagneỳ?

⁴ Tsy ligne o voahosotseo ty hagnatreke Fahatsiarovagne isan-taogne mba hihinana iareo amy i mofoy naho hinoma iareo amy i divaỳ. Nagnino iareo ro mahazo manao izay? Mba  hamaleagne izay, le andao tika handineke ty raha niseho tamy i halegne fara’e taloha ty namonoagne i Jesosỳ. Nanomboke nanao ty fankalazagne ty Mahakama Hariva i Tompo ty Jesosy naho fa boake nankalaza i Pasake Jiosỳ. Nanolotse mofo naho divay i apostoli’e 11 tsy nivalike rey reke tamy izay, sady nampihinane’e tamy i mofoy naho nampinome’e tamy i divaỳ iareo. Nirehake fifagnekeagne roe tamy iareo ka reke tamy io, le ty fifagnekeagne vaovao naho ty fifagnekeagne amy i Fanjakagney. *(Lioka 22:19, 20, 28-30) Noho o fifagnekeagne rehoe, le nanjare afake ty ho mpanjaka naho ho mpisorogne an-dagnitse agne o apostoli’e rehoe naho ty ndaty voahosotse hafa. (Apok. 5:10; 14:1) Ze voahosotse mbe velogne ambone tane etoa avao ro mahazo mihinagne amy i mofoy naho minogne amy i divay amy i Fahatsiarovagneỳ, satria agnisa ty nanoagne i fifagnekeagne roe rey iareo.

5. Ino ty raha fanta o voahosotseo miomba i fanantenagne nimeagne iareoy?

⁵ Izao ka ty anto’e mahavy o voahosotseo tsy mahalìgne ty hagnatreke Fahatsiarovagne: Afake misaintsaigne i fanantenà iareoy iareo amo o fotoagne iohoe. Miambake ty fanantenagne nimey i Jehovah iareo, satria hanagne vatagne tsy mete mate naho tsy mete momoke iareo naho fa an-dagnitse agne. Hiara-manjaka amy i Jesosy Kristy naho ty ila’e amo o 144 000 reo ka iareo. Fa ty tena lahibey le tihoe hahatrea i Jehovah Andrianagnahare iareo. (1 Kor. 15:51-53; 1 Jaona 3:2) Hay o voahosotseo fa agnisa ty hahazo ze tombotsoa rezay an-dagnitse agne iareo. Faie tsy maintsy mikezake mba tsy hivalike amparam-pahafate’e iareo vaho izay ho afake handeha mban-dagnitse mbeo. (2 Tim. 4:7, 8) Tena mahafale o voahosotseo ty misaintsaigne i fanantenà iareo rey. (Tit. 2:13) Faie akore ty amo o “agnondry hafao”? (Jaona 10:16) Inogne ka ty anto’e ila’e mahavy iareo hagnatreke Fahatsiarovagne?

6. Nagnino o agnondry hafao ro magnatreke Fahatsiarovagne isan-taogne?

⁶ Tsy mihinagne amy i mofoy naho minogne amy i divaỳ o agnondry hafao naho fa Fahatsiarovagne fa magnatreke am-pifaleagne avao. Tamy 1938 ty nanasagne manokagne voaloha’e ze mitamà hiaigne nainai’e an-tane etoa mba hagnatreke Fahatsiarovagne. Hoe ty gazete Fitalakesan-davitse 1 Marsa 1938: “Tena toko’e ho eo o agnondry hafao amy ty fivoriagne manahake io mba hagnente ty raha atao agne. ... Toko’e hahafale iareo o fotoagne iohoe sady toe mahafale vata’e io.” Fale o ndatio naho fa asaegne hagnatreke mariaze. Hoe izay ka o agnondry hafao. Mahafale iareo ty magnatreke eo naho fa Fahatsiarovagne.

7. Nagnino ro tsy ligne o agnondry hafao ty hitsanogne i lahajaka amy i Fahatsiarovagneỳ?

⁷ Misaintsaigne i fanantenà iareoy ka o agnondry hafao amo o fotoagne iohoe. Tsy ligne iareo ty hitsanogne i lahajaka amy i Fahatsiarovagneỳ. Ty anto’e, ty fagnazavagne amy io le mifantoke amy ty raha hatao i Kristy naho o 144 000 hiara-manjaka ama’eo hoahy ze ndaty tsy mivalike, agnate i Fanjakagne Arivo Taogney. Hitarike o mpiara-manjaka ama’e an-dagnitse agne rehoe ty Jesosy Kristy, i mpanjaka iareoy, mba hagnova ty tane toy ho paradisa sady hagnampe o ndaty mankatò mba hanjare voririke. Tena mahafale o  ndaty an-tapetrisa’e magnatreke Fahatsiarovagneo ty misaintsaigne ty ho fiaigna iareo naho fa ho tanterake ty faminania ty Baiboly amy Isaia 35:5, 6; 65:21-23 ao naho amy Apokalypsy 21:3, 4 ao. Ty fangalà iareo sare an-tsaigne ty vata iareo naho i longo iareo rey amy tontolo vaovao ao, le magnamafe ty fanantenà iareo sady mahavy iareo ho tapa-kevetse hanompo i Jehovah avao.​—Mat. 24:13; Gal. 6:9.

8. Ino ka ty anto’e hafa mahavy o agnondry hafao magnatreke Fahatsiarovagne?

⁸ Misy anto’e hafa ka mahavy o agnondry hafao hagnatreke Fahatsiarovagne. Te hanoro ty hatea’e naho ty fanohagna’e o voahosotseo iareo. Fa nirehafe ty Saontsin’Agnahare mialoha fa hiara-hiasa maifitse o voahosotseo naho ze mitamà hiaigne nainai’e an-tane etoa. Amy ty fomba akore? Andao tika handineke ohatse tsiampeampe miomba izay.

9. Akore ty fomba irehafa ty Zakaria 8:23 ty fifandrambesagne misy amo o agnondry hafao naho o voahosotseo?

⁹ Vakio ty Zakaria 8:23. Tena fanjaka ty fomba irehafa o faminaniagne iohoe ty fifandrambesa o agnondry hafao amo o rahalahy naho o rahavave iareo voahosotseo. Manondro o voahosotse mbe ambone tane etoao ty rehake tihoe “Jiosy raike” naho tihoe “ama’areo.” (Rom. 2:28, 29) Manondro o agnondry hafao ty rehake tihoe “ndaty folo boake amy ty fireha o firenenao.” ‘Mitagne’ ndra mipiteke amo o voahosotseo iareo, sady manompo i Jehovah miarake amy iareo. Manoro ty hatea iareo o voahosotseo areke o agnondry hafao naho fa magnatreke eo iareo amy ty hariva i andro anoagne Fahatsiarovagney.

10. Ino ty natao i Jehovah mba hagnatanterahagne i faminaniagne amy Ezekiela 37:15-19, 24, 25 aoy?

¹⁰ Vakio ty Ezekiela 37:15-19, 24, 25. Nitanterahe i Jehovah o faminaniagne iohoe naho fa natao’e ze hahavy o voahosotseo naho o agnondry hafao hiara-hiasa maifitse. Mirehake hatae roe i faminaniagney. Manahake i hatae “hoahy i Joday” (i foko nijobognagne i Daviday) ze mitamà hiaigne an-dagnitse agne, le manahake i hatae “hoahy i Efraimay” * ze mitamà hiaigne an-tane etoa. Hatamba i Jehovah o antoko o ndaty roe rehoe, le hanjare “hatae raike.” Midika zay tie hanompo i Jehovah raike avao iareo, ambane ty fitariha i Mpanjaka iareoy, le i Jesosy Kristy. Miarake magnatreke Fahatsiarovagne o voahosotseo naho o agnondry hafao isan-taogne fa tsy manao sambe lia’e. Le hoe ‘antokon’agnondry raike’ avao iareo sady ‘raike avao ty mpiarake’ iareo.​—Jaona 10:16.

11. Akore ty fomba lahibey raike anoroa i “agnondry” rehafegne amy Matio 25:31-36, 40 aoy tie manohagne o rahalahy i Kristy reo iareo?

¹¹ Vakio ty Matio 25:31-36, 40. O “agnondry” rehafe o fagnoharagne iohoey, le manondro ty ndaty maregne mitamà hiaigne ambone tane etoa amy ty fotoa ty fara’e. Tsy ia zay fa o agnondry hafao. Manohagne o rahalahy i Kristy voahosotse mbe velogne an-tane etoao iareo. Fomba lahibey raike anoa iareo izay ty fagnampea iareo o voahosotseo hagnatanterake i andraikitse lahibey nankinegne amy iareoy, le ty hitory magneran-tane naho ty hanao mpianatse.​—Mat. 24:14; 28:19, 20.

12-13. Akore ka ty fomba hafa anoroa o agnondry hafao tie manohagne o rahalahy i Kristy reo iareo?

¹² Akore ka ty fomba hafa anohagna o agnondry hafao o rahalahy i Kristy reo? Manao ze azo’e atao iareo heregnandro tsiampeampe aloha i Fahatsiarovagney mba hanasagne  ndaty maro hagnatreke o fotoagne iohoe isan-taogne. (Henteo ty efajoro tihoe “ Ty Raha Azo’o Atao amy ty Vanim-potoa i Fahatsiarovagney.”) Magnampe amy ty fagnomanagne ze raha ilaegne amy i Fahatsiarovagney ka iareo, ndra tie tsy misy voahosotse aza ty fiangonagne misy iareo. Tena mahafale o agnondry hafao ty manohagne o rahalahy i Kristy reo amy ze lafi’e zay. Hay o agnondry hafao fa rambese i Jesosy hoe atao ama’e ze raha atao iareo amo o rahalahi’e voahosotseo.​—Mat. 25:37-40.

¹³ Inogne ka ty anto’e ila’e mahavy antika iaby hagnatreke Fahatsiarovagne, ndra aia ndra aia ty fanantenantikagne?

14. Akore ty fomba nanoroa i Jehovah naho i Jesosy ty halahibey ty hatea iareo antika?

¹⁴ Te hisaotse i Jehovah naho i Jesosy noho ty hatea naseho iareo antika. Maro ty fomba nanoroa i Jehovah ty hatea’e antika. Faie misy raike zay tena miambake. Nirahe’e ho an-tane etoy i Ana-dahi’e tsy foe’ey mba hijale naho ho mate ho antika. (Jaona 3:16) Ekentikagne fa tena lahibey ka ty hatea i Jesosy antika kanao reke nivognogne hagnomey ty fiai’e ho antika. (Jaona 15:13) Tsy ho voavalentika ty hatea naseho i Jehovah naho i Jesosy antika ndra ombia ndra ombia. Faie azontika atoro amy ty fomba fiaignantika isan’andro ty fankasitrahantika ty raha natao iareo. (Kol. 3:15) Magnatreke Fahatsiarovagne ka tika satria te hisaintsaigne ty hatea naseho iareo tamantikagne naho mba hanoroantikagne ty hateantika iareo.

15. Nagnino i solovoigney ro tena fagnomezagne sarobily amo o voahosotseo naho amo o agnondry hafao?

¹⁵ Tena fagnomezagne sarobily amantika i solovoigney. (Mat. 20:28) Tena sarobily amo o voahosotseo i solovoigney, satria naho tsy nisy io le tsy ho nanagne i raha tamae iareo fanjakay iareo. Noho ty finoa iareo i sorogne nanoe i Kristỳ, le nambara i Jehovah ho maregne iareo sady natsanga’e ho ana’e. (Rom. 5:1; 8:15-17, 23) Sarobily amo o agnondry hafao ka i solovoigney. Noho ty finoa iareo io le afake ty hitsangagne agnatrehan’Andrianagnahare eo iareo, manao fanompoagne masigne ho aze sady mitamà ‘ho votso-belogne amy i haoreagne lahibeỳ.’ (Apok. 7:13-15) Maneho ty fankasitraha iareo i solovoigney areke o voahosotseo naho o agnondry hafao naho fa magnatreke Fahatsiarovagne isan-taogne.

16. Inogne ka ty anto’e hafa mahavy antika iaby magnatreke Fahatsiarovagne?

¹⁶ Te hankatò i Jesosy tika. Izay ka ty anto’e mahavy antika magnatreke Fahatsiarovagne. Ndra aia ndra aia ty fanantenantikagne, le sambe te hankatò i lily i Jesosy nimei’e tamy i halegne nanoa’e Fahatsiarovagne voaloha’ey tika. Hoe reke: “Anò avao zao ho fahatsiarovagne ahy.”​—1 Kor. 11:23, 24.

17. Nagnino ty Fahatsiarovagne ro magnampe antika hifandrambe maifitse amy i Jehovah?

¹⁷ Manjare mifandrambe maifitse amy i Jehovah. (Jak. 4:8) Nianarantika tato fa fotoagne ahafahantika misaintsaigne ty fanantenagne nimey i Jehovah antikagne ty Fahatsiarovagne. Afake misaintsaigne ty hatea lahibey naseho’e tamantikagne ka tika amy io. (Jer. 29:11; 1 Jaona 4:8-10) Naho misaintsaigne ty raha tamaentika amy ty hoavy naho ty hatea tsy miovaova nasehon’Agnahare tamantikagne tika, le vao mainke hitombo ty hateantikagne aze sady hihamafe ty fifandrambesantikagne ama’e.​—Rom. 8:38, 39.

18. Mandrisike antika hanao ino ty fisaintsaignagne ty raha natao i Jesosy?

 ¹⁸ Manjare te hitsikombe i Jesosy tika. (1 Pet. 2:21) Mifantoke amy ty raha niseho tamy ty heregnandro fara’e niaigna i Jesosy tan-tane etoa naho ty nimateza’e vaho ty namelomagne aze tamy ty mate tika amy ty vanim-potoa i Fahatsiarovagney. Maniahy ty hatea i Jesosy antika i lahajaka atao amy i hariva i Fahatsiarovagneỳ. (Efes. 5:2; 1 Jaona 3:16) Naho mamaky sady misaintsaigne ty fahafoezan-tegna i Jesosy tika, le manjare te ‘handeha lognandro manahake ty lia’e.’​—1 Jaona 2:6.

19. Inogne ty hagnampe antika tsy hisintake amy ty hatean’Andrianagnahare?

¹⁹ Vao mainke tapa-kevetse ty tsy hisintake amy ty hatean’Andrianagnahare tika. (Joda 20, 21) Tsy hisintake amy ty hatean’Andrianagnahare tika naho manao ze azontikagne atao mba hankatoavagne aze naho hagnamasinagne ty tahina’e vaho mba hampifaleagne ty arofo’e. (Ohab. 27:11; Mat. 6:9; 1 Jaona 5:3) Ty fagnatrehantikagne Fahatsiarovagne areke le mandrisike antika ho tapa-kevetse ty hirehake amy i Jehovah hoe izao isan’andro: ‘Tsy te hisintake amy ty hatea’o nainai’e raho.’

20. Ino iaby ty anto’e soa mahavy antika magnatreke Fahatsiarovagne?

²⁰ Ndra mitamà hiaigne nainai’e an-dagnitse agne tika ndra an-tane etoa, le maro ty anto’e soa mahavy antika magnatreke Fahatsiarovagne. Naho fa miarake mivory tika isan-taogne amy ty date i Fahatsiarovagney, le mahatsiaro ty nimateza i ndaty teantikagney ndra i Jesosy Kristy. Fa ambone izay iaby, le mahatsiaro ty hatea lahibey naseho i Jehovah antikagne tika tamy ty nagnomea’e i Ana-dahi’ey mba hisolovoigne antikagne. Hatao amy ty hariva ty Joma 15 Avrily 2022 ty Fahatsiarovagne amy ty taogne toy. Teantika ty Jehovah naho i Ana-dahi’ey. Ko misy raha areke engagne hikalagne antika tsy hagnatreke o fotoagne tena lahibey iohoe, le ty Fahatsiarovagne ty nimateza i Jesosy.