1. Nagnino tikagne ro toko’e hagnatreke i Fahatsiarovagne ty nimateza i Kristỳ isan-taogne?

 AZO ANTOKE fa eké’o tie, fagnomezagne sarobily i solovoigney! (2 Kor. 9:15) Noho i Jesosy nanao sorogne ty fiai’e hoahy o ndatio, le afake ty hinamagne maifitse amy i Jehovah Andrianagnahare rehe. Afake mitamà ty hiaigne nainai’e ka rehe. Toko’e hankasitrake i solovoigney naho i Jehovah tikagne, satria noho ireke tea antikagne ty nahavy aze nagnomey io antika! (Rom. 5:8) Mba hahavy antikagne hankasitrake sady tsy hagnaligno ty maha lahibey i solovoigney, le nandily antikagne hankalaza i Fahatsiarovagne ty nimateza’ey isan-taogne ty Jesosy.​—Lioka 22:19, 20.

2. Ino ty hodinehentikagne amy ty lahatsoratse toy?

² Hankalazaegne amy Sabotsy 12 Avrily 2025 ty Fahatsiarovagne amy ty taogne toy. Azo antoke fa miomagne hagnatreke io tikagne iaby. Handrambe soa maro tikagne naho manokagne fotoagne hisaintsaignagne a ty raha natao i Jehovah naho i Ana-dahi’ey ho antikagne, amy i vanim-potoa ty Fahatsiarovagney. Hotreantikagne amy ty lahatsoratse toy tie, ino ty ampianare i solovoigney antika miomba i Jehovah naho i Ana-dahi’ey. Hotreantikagne amy ty lahatsoratse magnarake ka tie, ino ty soa rambesentikagne boake amy i solovoigney sady akore ty hanoroantikagne tie mankasitrake o fagnomezagne iohoe tikagne.

 INO TY AMPIANARE I SOLOVOIGNEY ANTIKA MIOMBA I JEHOVAH?

3. Akore ty hahavy ty fahafateza ty ndaty raike voririke hahavita hagnavotse ndaty an-tapetrisa’e? (Henteo ka i sarey.)

³ Treantikagne boake amy i solovoigney tie, manao ty rare’e ty Jehovah. (Deot. 32:4) Nagnino tikagne ro mirehake izay? Dineho moa zao: Noho i Adama tsy nankatò, le nandova ota tikagne iaby sady o ota iohoe ty mahavy antika ho mate. (Rom. 5:12) Mba hagnafahagne antikagne amy ty ota naho ty fate, le nandefa i Jesosy ty Jehovah mba hagnomey i solovoigney. Faie akore ty hahavy ty fahafateza ty ndaty raike voririke hahavita hagnavotse ndaty an-tapetrisa’e? Nagnazava hoe izao ty apostoly Paoly: “Naho fa tsy nankatò ty lahilahy raike [i Adama], le ndaty maro ro nanjare mpanota. Le hoe izay ka fa naho fa nankatò ty ndaty raike [i Jesosy], le ndaty maro ro nanjare ndaty maregne.” (Rom. 5:19; 1 Tim. 2:6) Ty dika izay le tihoe, noho ty tsy fankatoava ty lahilahy raike voririke ty nahavy antikagne ho ndevo ty ota naho ty fate. Tsy maintsy misy lahilahy raike voririke mankatò an’Agnahare ka areke mba hagnafake antikagne amy ty ota naho ty fate.

4. Nagnino ro tsy le avy le nenga i Jehovah hiaigne nainai’e avao ze tarana i Adama managne fo soa?

⁴ Faie le tsy maintsy mate vao ty Jesosy vaho izay mahavita magnavotse antikagne? Tsy azo i Jehovah natao vao ty le avy le nagnenga ze tarana i Adama managne fo soa hiaigne nainai’e? Amy ty maha tsy voririke antikagne, le va’e izay varagne ty eretseretentikagne tie mete. Faie amy i Jehovah tsy mete zay. Noho ireke manao ty rare’e, le tsy tihoe tsy ho darea’e i tsy fankatoava i Adamay.

5. Nagnino tikagne ro afake matoky tie hanao ty rare’e lognandro ty Jehovah?

⁵ Faie akore naho tsy nagnomey i solovoigney ty Jehovah fa nenga’e hiaigne nainai’e avao o tarana i Adama tsy voririkeo? Va’e ho nieretseretse o ndatio tie, tsy hanao ty rare’e amy ty raha hafa ka ty Andrianagnahare. Tena hagnatanterake i raha nampitamae’e rey vao ohatse reke? Tsy misalasala ty amy izay tika. Ino ty anto’e? Satria nanao sorogne i Ana-dahi’e ikokoa’ey ty Jehovah mba hanoagne ty rare’e ndra tie nimafe tama’e aza zay. Izay ty magnaporofo tie vognogne hanao ty rare’e lognandro reke.

6. Ino ka ty toetse hafa nandrisike i Jehovah hagnomey i solovoigney? (1 Jaona 4:9, 10)

⁶ Nianarantikagne boake amy i solovoigney tie manao ty rare’e ty Jehovah. Faie tsy izay avao fa misy toetse i Jehovah hafa ka ianarantika boake amy io, le tihoe tena tea antikagne  reke. (Jaona 3:16; vakio ty 1 Jaona 4:9, 10.) Trea boake amy i solovoigney fa tsy tihoe tea i Jehovah hiaigne nainai’e avao tikagne, fa tea’e ho agnisa ty keleia’e ka. Dineho zao: Naho fa nanota ty Adama, le nanjare tsy agnisa ty Keleia’e manompo aze sasa. Ty voka’e, nanjare tsy agnisa ty keleian’Agnahare ka tikagne. Faie noho i solovoigney, le mamela ty fahotantikagne ty Jehovah sady afake ty ho agnisa ty keleia’e ze ndaty maneho finoagne naho mankatò aze. Ndre amy izao, le afake ty hifandrambe soa amy i Jehovah naho amo o mpiharo finoagne amantikagneo tika. Ie, tena teà i Jehovah vata’e tikagne.​—Rom. 5:10, 11.

7. Nagnino ty nifijalea i Jesosy ro magnampe antikagne hahatakatse ty habey ty hatea i Jehovah antikagne?

⁷ Ho tsapantikagne tie tena tea antikagne ty Jehovah naho fantantika tie, tsy nimora tama’e ty nagnomey i solovoigney. Nirehake ty Satana tie, hivalike aman’Agnahare o mpanompo’eo naho fa misy raha sarotse atrehe iareo. Mba hagnaporofoagne tie diso zay, le nenga i Jehovah hijale ty Jesosy taloha ty nimateza’e. (Joba 2:1-5; 1 Pet. 2:21) Nitsikihe i mpanohetse aze rey ty Jesosy, jinera i maramila rey sady nipehe iareo tamy i boda-kataey ey. Nahavazoho ze raha rezay iaby ty Jehovah. Nivazoho’e ty nifijalea i Ana-dahi’e ikokoa’ey taloha ty nimateza’e. (Mat. 27:28-31, 39) Managne hery hikalagnagne ze raha iaby rezay tsy ho niseho ty Jehovah. Nirehake ohatse i fahavalo i Jesosy rey tie: “Naho toe fale ama’e ty Andrianagnahare, le hamonje aze.” Afake nanao izay vata’e ty Jehovah. (Mat. 27:42, 43) Faie naho nanao izay ty Andrianagnahare, le tsy ho nivoaloa i solovoigney sady tsy ho nanan-draha tamaegne tikagne. Nenga i Jehovah hiaretse fijaleagne areke i Ana-dahi’ey amparake ty nimateza’e.

8. Niore mafe vao ty Jehovah naho fa nahavazoho i Ana-dahi’ey nijale? Hazavao. (Henteo ka i sarey.)

⁸ Tsy toko’e hieretseretse tikagne tie, fara izay ty mahery ty Andrianagnahare, le tsy managne fihetseham-po! Natao’e mitovy vintagne ama’e tika naho fa finoro’e. Kanao areke tikagne managne fihetseham-po, le midika zay tie managne ka reke. Rehafe ty Baiboly tie, ‘nalahelo’ sady ‘niore’ reke. (Sal. 78:40, 41) Dineho ka ty raha niaigna i Abrahama naho i Isaka. Tsiaro’o varagne tie nampanoegne sorogne i ana-dahi’e bakotokagney ty Abrahama. (Gen. 22:9-12; Heb. 11:17-19) Alao sare an-tsaigne moa ty fihetseham-po sambehafa nitsapa i Abrahama, tamy ireke handenta i Isakay. Azo antoke fa mbe niore mafe mandikoatse izay ty Jehovah naho fa nahavazoho i Ana-dahi’ey nampijalegne sady vinono!​—Henteo amy jw.org/tdx ao ty video tihoe Tsikombeo ty Finoa Iareo​—I Abrahama, Fizaràgne 2.

9. Ino ty ianara’o boake amy Romanina 8:32, 38, 39 ao miomba ty hatea i Jehovah?

 ⁹ Ampianare i solovoigney antikagne fa tsy misy ndaty tea antikagne mandikoatse i Jehovah, ndra longontikagne zay ndra namantikagne maifitse. (Vakio ty Romanina 8:32, 38, 39.) Azo antoke fa mandikoatse ty hateantikagne ty vatantika ty hatea i Jehovah antikagne. Te hiaigne nainai’e vao rehe? Mandikoatse izay ty fagniria i Jehovah. Tea’o ho voavela vao ty fahota’o? Mandikoatse izay ty tea i Jehovah hatao. Ty raha mba angatahe’e amantikagne, le ty hagnekeantikagne i fagnomezagne sarobilỳ avao. Manao izay tikagne naho maneho finoagne o fagnomezagne iohoe sady mankatò aze. Porofo ty hatea i Jehovah antikagne i solovoigney. Mbe hianatse raha maro miomba ty hatea i Jehovah tikagne, amy i tontolo vaovaoy ao.​—Mpito. 3:11.

INO TY AMPIANARE I SOLOVOIGNEY ANTIKA MIOMBA I JESOSY?

10. a) Ino ty raha tena nampinekoneko i Jesosy amy ty fomba hamonoagne aze? b) Akore ty nagnamasigna i Jesosy ty tahina i Jehovah? (Henteo ka ty efajoro tihoe “ Nagnamasigne ty Tahina i Jehovah ty Tsy Fivaliha i Jesosy.”)

¹⁰ Tena lahibey amy i Jesosy ty laza i Baba’e. (Jaona 14:31) Tena nampinekoneko i Jesosy tie, kera hanalatse ty tahina i Baba’e ty fomba hamonoagne aze. Ty anto’e, hovonoegne manahake o ndaty tsy magnaja an’Agnahare sady mpamono ndatio reke. Izay ty anto’e nahavy aze nivavake hoe izao: “O Baba, naho mete, le afaho amako ty kope toy.” (Mat. 26:39) Noho i Jesosy tsy nivalike hatrake am-para’e, le afake nagnamasigne ty tahina i Baba’e reke.

11. Akore ty nampisehoa i Jesosy tie tea’e o ndatio? (Jaona 13:1)

¹¹ Ampianare i solovoigney antikagne ka fa tena tea o ndatio ty Jesosy, lohotsie fa o mpiana’ eo. (Ohab. 8:31; vakio ty Jaona 13:1.) Fa nampoize i Jesosy ohatse fa hiatreke raha sarotse reke amy ty fanompoa’e an-tane etoy, lohotsie ireke ho matey. Tsy tihoe adidy avao ty nagnatanteraha i Jesosy ty fanendreagne aze tan-tane etoy, fa noho ty hatea’e o ndatio. Nitory, nampianatse naho nanompo ty hafa tamy ty fo’e iaby reke. Ndra tie tamy i andro himateza’ey aza, le nanokagne fotoagne hanasagne ty tombo i apostoli’e rey reke sady nampahery naho nanoro hevetse iareo. (Jaona 13:12-15) Tamy i Jesosy tamy i boda-kataey eoy ka, le nanokagne fotoagne kede mba hagnomeagne raha tamaegne i malaso fa ho matey sady nandamigne ty ho fikarakaragne i rene’e. (Lioka 23:42, 43; Jaona 19:26, 27) Tsy tihoe tamy tie ireke nimatey avao ty nampisehoa’e ty hatea’e o ndatio fa tamy ty fiaigna’e iaby.

12. Ino ty raha atao i Jesosy ho antikagne tie amy izao?

¹² Maregne fa “nimate indraike avao” ty Kristy, faie mbe manao raha maro ho antika avao reke. (Rom. 6:10) Amy ty fomba akore? Mbe manao raha avao reke ty amy izao mba hahafahantikagne hahazo raha fanjaka maro noho i solovoigney. Dineho moa ty hamaro ty raha atao’e: Mpanjaka reke, Mpisorom-bey sady loha ty fiangonagne. (1 Kor. 15:25; Efes. 5:23; Heb. 2:17) Mamory o voahosotseo naho o vahoake marò ka reke. Aloha ty hifaragna i haoreagne lahibeỳ vaho ho vita ze raha atao’e rezay. b (Mat. 25:32; Mar. 13:27) Atao’e azo antoke ka tie, mahazo ze raha ilae’e ara-pagnahy o mpanompo i Jehovah tsy mivalikeo tie amo o andro fara’e zao. (Mat. 24:45) Mbe hikarakara ze raha ilaentikagne ka reke amy i Fanjaka’e Arivo Taogney. Nagnomey i Ana-dahi’ey ho antikagne vata’e ty Jehovah!

MIANARA LOGNANDRO

13. Ino ty hagnampe azo hianatse miomba ty hatea i Jehovah naho i Jesosy lognandro?

¹³ Afake manohy mianatse miomba ty hatea i Jehovah Andrianagnahare naho i Kristy Jesosy antikagne rehe, naho fa misaintsaigne lognandro ty fomba nanehoa iareo izay. Afake mamaky ty raike amy i Filazantsara rey ndra ie iaby rehe amy ty vanim-potoa ty Fahatsiarovagne amy ty taogne toy. Mamakia miadagne, le henteo ty anto’e hafa mahavy antikagne toko’e hotea i Jehovah naho i Jesosy. Zarao amy ty hafa ka ze raha nianara’o.

14. Inogne ty hagnampe antika hanohy hianatse avao miomba i solovoigney, le nagnino ro afake magnampe antika amy izay ty fanoagne fikarohagne? (Salamo 119:97) (Henteo i sarey.)

 ¹⁴ Naho fa ela rehe ty tagnate ty hamaregnagne ao, le va’e hieretseretse tie, mbe maro ty raha toko’e hianara’o miomba ty fanoa i Jehovah ty rare’e, ty hatea’e vaho i solovoigney. Tsy mete tapetse ty hamaregnagne azontika ianaragne miomba ireo naho miomba ty foto-kevetse hafa. Ino areke ty azo’o atao? Vakio naho ianaro ty fagnazavagne fanjaka mioregne amo o boke aman-gazetentikagneo. Manoa fikarohagne naho tsy mazava ama’o soa ty raha vakie’o amy Baiboly ao. Isan’andro, le saintsaigno ty raha nianara’o miomba i Jehovah, i Ana-dahi’ey naho ty hatea iareo azo.​—Vakio ty Salamo 119:97 naho i fagnamarehagne ambane pejey.

15. Nagnino tika ro toko’e hikezake hikaroke vatosoa amy Baiboly ao avao?

¹⁵ Ko kivy naho ohatse tsy mahatrea raha vaovao ndra raha mahaliagne rehe isake tie mamaky ndra manao fikarohagne. Manahake ty ndaty raike mikezake mipay volamena rehe. Mila mandany lera naho andro maro mateteke, o ndaty mipay volamenao vaho izay mahatrea kedekede. Mikezake mipay avao iareo satria tena sarobily ama’e ndra tie pote-bolamena kedekede avao aza. Mbe sarobily mandikoatse o volamenao ty hamaregnagne amy Baiboly ao! (Sal. 119:127; Ohab. 8:10) Manàgna faharetagne areke, le oriho avao i fandaharagne famakia’o Baibolỳ.​—Sal. 1:2.

16. Akore ty azontika anahafagne i Jehovah naho i Jesosy?

¹⁶ Naho fa mianatse rehe, le henteo ty fomba hampihara’o ze raha ianara’o. Tsikombeo ohatse ty fanoa i Jehovah ty rare’e, le mikezaha tsy hagnavakavake. Tsikombeo ty hatea i Jesosy i Rae’ey naho ty hafa, le mivognona hijale noho ty amy i tahina i Jehovah-y sady hagnampe o mpiharo finoagne ama’ò. Tsikombeo ka ty Jesosy, le mitoria amy ty hafa amy izay afake magneke i fagnomezagne fanjaka boake amy i Jehovah-y ka iareo.

17. Ino ty hodinehentika amy ty lahatsoratse magnarake?

¹⁷ Naho mahatakatse soa sady mankasitrake i solovoigney tika, le vao mainke hitombo ty hateantika i Jehovah naho i Ana-dahi’ey. Hitombo ka ty hatea iareo antika. (Jaona 14:21; Jak. 4:8) Ampiasao soa mba hianaragne miomba i solovoigney avao areke ty Baiboly naho ty boke aman-gazete boake amy fandaminagne. Handineke ty fitahiagne ila’e azontika boake amy i solovoigney naho ty azontika atao mba hampisehoagne fankasitrahagne i Jehovah tika amy ty lahatsoratse magnarake.