1. Ino ty toko’e hataontikagne mba hampifaleagne i Jehovah?

 ERETSERETO tie magnomey fagnomezagne tena soa hoahy ty ndaty tena tea’o rehe sady ilae’e i raha mea’o azey. Azo antoke fa halahelo rehe naho ahaja’e avao i fagnomezagney fa tsy darea’e! Mifanohetse amy izay fa ho fale rehe naho ampiasae’e soa i fagnomezagney sady ankasitraha’e. Ino ty teantika hiaviagne? Nimea i Jehovah mba ho mate ho antika i Ana-dahi’ey. Tena ho fale ka ty Jehovah naho maneho fankasitrahagne ty hatea’e naho o fagnomezagne sarobily iohoe tikagne. Ty anto’e, noho o hatea’e iohoe ty nahavy aze nagnomey i solovoigney!​—Jaona 3:16; Rom. 5:7, 8.

2. Ino ty hodinehentikagne amy ty lahatsoratse toy?

² Naho fa mandeha ty fotoagne, le va’e tsy hihevetse i solovoigney ho fagnomezagne sarobily sasa tikagne. Hoe ahajantika avao i fagnomezan’Agnaharey tie amy izay. Fale tikagne managne aze faie tsy dareantikagne reke. Mba hahavy antikagne tsy hanao izay, le toko’e hisaintsaigne mateteke ty raha nataon’Agnahare naho i Kristy ho antikagne tika. Hagnampe antikagne hanao izay ty lahatsoratse toy. Hodinehentikagne tie, ino ty soa rambesentika boake amy i solovoigney tie amy izao naho amy ty hoavy. Hotreantikagne ka tie, akore ty hanoroantikagne fankasitrahagne ty hatea i Jehovah antikagne, lohotsie fa amo ze o vanim-potoa ty Fahatsiarovagne zao.

INO TY SOA RAMBESENTIKAGNE TIE AMY IZAO?

3. Ino ty agnisa ty soa rambesentikagne boake amy i solovoigney tie amy izao?

³ Amy izao tikagne, le fa mandrambe soa boake amy i solovoigne nanoe i Kristỳ. Noho i solovoigney ohatse, le mamela ty fahotantikagne ty Jehovah. Tsy voatere hamela ty helontikagne  reke fa ireke ro te hanao izay. Nampiseho ty fankasitraha’e ty famelan-kelo i Jehovah ty mpanao salamo raike. Hoe reke: “Soa toetse naho vognogne hamela heloke rehe Jehovah.”​—Sal. 86:5; 103:3, 10-13.

4. Natao i Jehovah ho an’ia i solovoigney? (Lioka 5:32; 1 Timoty 1:15)

⁴ Mahatsapa ho tsy fagneva ty famelan-kelo i Jehovah ty ndaty ila’e. Naho ty maregne, le itikagne iaby ro tsy fagneva izay. Nahatsapa ty apostoly Paoly tie “tsy fagneva ty hatao tihoe apostoly” reke. Faie hoe reke: “Ty hasoa fagnahy miambake nasehon’Andrianagnahare ro naha hoe izao ahy.” (1 Kor. 15:9, 10) Naho mibebake amy ty fahotantikagne tika, le mamela antikagne ty Jehovah. Ino ty anto’e? Tsy tihoe noho itikagne fagneva izay fa noho ireke tea antikagne. Naho mahatsapa ho tsy misy dika’e rehe satria mieretseretse tie tsy fagneva ty famelà i Jehovah, le ko haligno fa nagnomey i solovoigney reke. Tsy hoahy ty ndaty tsy manota ty nagnomea’e io fa hoahy ze mpanota mibebake.​—Vakio ty Lioka 5:32; 1 Timoty 1:15.

5. Toko’e hisy amantikagne vao hieretseretse tie tsy maintsy mahazo ty famindram-po i Jehovah? Hazavao.

⁵ Tsy toko’e hisy amantikagne hieretseretse tie, tsy maintsy mahazo ty famindram-po i Jehovah satria fa nanompo aze tagnate ty taogne maro. Ie aloha tsy haligno i Jehovah ze raha nivitantika ho aze. (Heb. 6:10) Faie fagnomezagne maimaim-poagne ty nagnomea’e i Ana-dahi’ey fa tsy tihoe vale ty fanompoantikagne aze. Naho mirehake tika tie fagneva ty hahazo ty famelan-kelo i Jehovah satria fa nanompo aze tagnate ty taogne maro, le hoe mirehake zay tie tsy misy dika’e ty nimateza i Kristy.​—Ampitahao amy ty Galatianina 2:21.

6. Nagnino ty Paoly ro niasa mafe tamy ty fanompoagne i Jehovah?

⁶ Nifanta i Paoly fa tsy fagneva ty hahazo ty fankasitrahan’Agnahare reke. Nagnino areke reke ro niasa mafe tamy ty fanompoagne i Jehovah? Nanao izay reke satria te hampiseho fankasitrahagne ty hasoa fagnahy miambake aseho i Jehovah, fa tsy tihoe fagneva ty fankasitraha’e. (Efes. 3:7) Mazoto amy ty fanompoagne manahake i Paoly ka tika. Tsy tihoe ty hahazoantika ty famindram-po i Jehovah ty anto’e anoantika izay, fa mba hampisehoantika tie mankasitrake aze tika.

7. Ino ka ty soa rambesentika boake amy i solovoigney tie amy izao? (Romanina 5:1; Jakoba 2:23)

⁷ Agnisa ty soa rambesentika boake amy i solovoigney ka tie amy izao ty fahafahantika tsikiraidraike mifandrambe maifitse amy i Jehovah. a Nitreantika tamy i lahatsoratse taloha itoỳ tie, vaho terake tika le fa tsy nanagne fifandrambesagne taman’Agnahare. Faie noho i solovoigney, le afake “milongo aman’Andrianagnahare” tika sady afake miharine aze.​—Vakio ty Romanina 5:1; Jakoba 2:23.

8. Nagnino tikagne ro toko’e hankasitrake i Jehovah noho itikagne afake mivavake ama’e?

⁸ Managne tombotsoa miambake ka tika noho itika afake mifandrambe amy i Jehovah. Agnisa izay ty fahafahagne mivavake. Tsy ty vavake atao ty vahoa’e miarake mivory avao ty janjigne i Jehovah, fa ty vavake manokagne ataontika tsikiraidraike ka. Afake magnatanjake ty fifandrambesantika amy i Jehovah ka io, fa tsy tihoe mampitony naho magnomey fiadanan-tsaigne antikagne avao. (Sal. 65:2; Jak. 4:8; 1 Jaona 5:14) Nivavake mateteke tamy i Jehovah ty Jesosy tamy ireke tan-tane etoỳ satria nifanta’e tie, nijanjigne aze ty Jehovah sady izay ka ty hagnamafe ty fifandrambesa iareo aman-dRae’e. (Lioka 5:16) Fale tikagne satria  noho i solovoigne nanoe i Jesosỳ, le afake minamagne amy i Jehovah naho mirehake Ama’e amy ty alala ty vavake tikagne.

INO TY SOA HORAMBESENTIKAGNE AMY TY HOAVY?

9. Ino ty soa horambese o mpanompo i Jehovah tsy mivalikeo amy ty hoavy noho i solovoigney?

⁹ Ino ty soa horambese o mpanompo i Jehovah tsy mivalikeo boake amy i solovoigney amy ty hoavy? Hahazo i havelogne nainai’ey iareo. Mieretseretse ty ankamaroa o ndatio tie, tsy hisy ze o havelogne nainai’e zao satria mbe maro avao ty ndaty nimate tagnate ze agnarivo’e taogne zay. Faie ty hiaigna o ndatio nainai’e ty raha fa nisafirie i Jehovah tam-boaloha’e tagne. Naho tsy nanota ty Adama le tsy ho nisy ndaty nieretseretse tie tsy hisy o fiaignagne nainai’e zao. Ndra tie sarotse aza ty mieretseretse i fiaignagne nainai’ey tie amy izao, le afake mitamà izay tikagne satria fa nagnomey i Ana-dahi’e tena tea’ey ho antikagne ty Jehovah.​—Rom. 8:32.

10. Ino ty raha fa tsy ligne o voahosotseo naho o agnondry hafao?

¹⁰ Teà i Jehovah hieretseretse ty miomba i fiaignagne nainai’ey tikagne tie amy izao ndra tie mbe amy ty hoavy aza zay vaho ho tanterake. Fa tsy ligne o voahosotseo ty hiaigne an-dagnitse agne, mba hiarake manjaka amy i Kristy, le hinday ty tane toy. (Apok. 20:6) Fa tsy ligne o agnondry hafao ka ty hiaigne nainai’e amy i paradisa tsy hisy fijaleagne naho alahelo an-tane etoỳ. (Apok. 21:3, 4) Agnisa ty agnondry hafa mitamà i fiaignagne tsy misy fara’e an-tane etoỳ vao rehe? Tsy tihoe ambane o fitahiagne iohoe! Naho ty maregne, le niforognegne mba hiaigne nainai’e an-tane etoy o ndatio. Tena hahafale antikagne ty hiaigne an-tane etoy.

11-12. Inogne iaby ty ila’e amy ty fitahiagne fa tsy lignentikagne amy Paradisay ao? (Henteo ka i sare rey.)

¹¹ Eretsereto tie hanao akore ty ho fiaigna’o naho fa amy i Paradisay ao. Tsy hinekoneko miomba ty aretegne naho ty fate sasa rehe. (Isaia 25:8; 33:24) Ho tanterahe i Jehovah  iaby ze fagniria’o. Ino ty raha tena hahaliagne azo tie amy izay? O bibio vao, sa o mozikeo, sa ty hahay hamboatse sare? Azo antoke fa mila ndaty mahay manao plany naho mpamboatse tragno ty amy i paradisay ao. Tsy izay avao fa mbe mila mambole, mahandro, mamboatse fitaovagne, mamboatse zaridaigne vaho mikarakara ireo tikagne naho fa agne. (Isaia 35:1; 65:21) Naho fa hiaigne nainai’e rehe, le hanam-potoagne maro hanoagne ireo sady hitombo ty fahaia’o.

¹² Tena hahafale ty hanalaka ze ndaty nivelomegne amy ty mate! (Asa. 24:15) Alao sare an-tsaigne ty ho hafalea’o naho fa hianatse ty miomba i Jehovah boake amo o raha finoro’e marò rehe. (Sal. 104:24; Isaia 11:9) Ambone izay iaby, le tena hofale rehe satria ho voririke, le ho afake hanompo i Jehovah sady fa tsy hagnamelo-tegna sasa! Hatakalo’o ty ‘fifaleagne tsielatsiela amy ty fahotagne’ vao o fitahiagne amy ty hoavy reo? (Heb. 11:25) Azo antoke fa tsy hanao izay rehe! Mbe soa lavitse mandikoatse ty raha afoentika amy izao ty fitahiagne ho azontika amy ty hoavy. Tadidio fa tena hoavy i Paradisa an-tane etoỳ fa tsy tihoe raha lava lignisagne avao. Naho tsy nitea antikagne ty Jehovah sady tsy nagnomey i ana-dahi’ey ho antika, le tsy ho nisy o raha iaby reo!

ANKASITRAHO TY HATEA I JEHOVAH

13. Akore ty ampisehoantikagne tie mankasitrake ty hatea i Jehovah tika? (2 Korintianina 6:1)

¹³ Akore ty ampisehoantika tie mankasitrake i Jehovah tikagne, noho ireke nagnomey i solovoigney? Manao izay tika naho manao voalohan-draha ty fanompoagne aze amy ty fiaignantikagne. (Mat. 6:33) Nimate ty Jesosy, “amy izay tsy ho velogne hoahy ty tegna’e sasa ze velogne fa hoahy i aze fa nimate hoahy iareo sady fa nivelomegney.” (2 Kor. 5:15) Azo antoke fa tsy tihoe tsy ho dareantikagne ty tanjo ze hasoa fagnahy miambake naseho i Jehovah zay.​—Vakio ty 2 Korintianina 6:1.

14. Akore ty ampisehoantika tie matoky sady magnorike ty tari-dala i Jehovah tika?

¹⁴ Mankasitrake ty hatea i Jehovah ka tikagne naho matoky sady magnorike ty tari-dala’e. Amy ty fomba akore? Naho fa handrambe fanapahan-kevetse miomba ty hamaro ty fianaragne ndra ty karazan’asa toko’e hatao ohatse tikagne, le tsy maintsy mamantatse ty raha tea i Jehovah hataontikagne hey. (1 Kor. 10:31; 2 Kor. 5:7) Naho matoky i Jehovah tikagne naho fa mandrambe fanapahan-kevetse, le hatanjake ty finoantika naho ty fifandrambesantikagne ama’e. Vao mainke hatoky i fampitamà’e rey ka tikagne.​—Rom. 5:3-5; Jak. 2:21, 22.

15. Akore ty anoroantika ty fankasitrahantikagne amy i vanim-potoa i Fahatsiarovagney?

¹⁵ Misy fomba hafa ka azontika ampisehoagne tie, mankasitrake ty hatea i Jehovah tikagne. Manao izay tikagne naho mampiasa soa ty vanim-potoa ty Fahatsiarovagne mba hampisehoagne amy i Jehovah tie tena mankasitrake  i solovoigney tikagne. Ankoatse tihoe miomagne mba hagnatreke i Fahatsiarovagney, le toko’e hanasa ty hafa ka tikagne. (1 Tim. 2:4) Hazavao amy ze ndaty asae’o tie, ino ty raha hiseho amy i Fahatsiarovagney agne. Azo’o atoro iareo ka ty video tihoe Nagnino i Jesosy Nimateo? naho tihoe Tsiarovo ty Nimateza i Jesosy amy jw.org/tdx ao. Toko’e hatao o androanavi-pagnahio azo antoke ka tie, nasaegne iaby o ndaty fa tsy mitory sasao. Eretsereto moa ty ho hafalea ty an-dagnitse agne naho ty an-tane etoy naho misy amy i agnondry i Jehovah nimontso rey miheregne an-jolo’e ao indraike! (Lioka 15:4-7) Naho fa amy i Fahatsiarovagney ao ka, le toko’e ho salamaentikagne iaby ze vaovao ndra ze fa ela tsy nagnatreke, fa tsy itikagne sambe itikagne avao ro hifanalama. Teantikagne ho tsapa iareo tie, rambesegne soa iareo.​—Rom. 12:13.

16. Nagnino tikagne ro toko’e hampitombo ty fanompoantika amy ty vanim-potoa i Fahatsiarovagney?

¹⁶ Afake mampitombo ty fanompoa’o vao rehe amy ty vanim-potoa i Fahatsiarovagney? Fomba tena soa hampisehoagne fankasitrahagne ty raha iaby nataon’Agnahare naho i Kristỳ ho antikagne zay. Arakarake ty ampitomboantika ty fanompoagne i Jehovah, ty vao mainke hahatsapantikagne ty fanohagna’e. Voka’e, hitombo ty fatokisantikagne aze. (1 Kor. 3:9) Anò azo antoke tie, manao i famakiagne Baiboly hoahy ty Fahatsiarovagne amy i Fandinehagne ty Soratse Masigne Sanandroy (malagasy) ao ndra amy i tabilò amy i tari-dalagne hoahy ty fivoriagney rehe. Va’e hifily andinin-teny boake amo o famakiagne Baiboly rehoe rehe mba hatao’o fianaragne raike.

17. Ino ty mahafale i Jehovah? (Henteo ka ty efajoro tihoe “ Fomba Anoroagne Fankasitrahagne ty Hatea i Jehovah.”)

¹⁷ Va’e tsy hagnenga azo hagnorike i soso-kevetse iaby tatoagne rey ty raha iaigna’o. Ko haligno fa tsy mampitaha ty raha vita’o amy ty vita ty hafa ty Jehovah. Mahavazoho ty am-po’o ao reke. Fale reke naho mahavazoho tie, tena mankasitrake i fagnomezagne sarobilỳ, zane hoe i solovoigney rehe.​—1 Sam. 16:7; Mar. 12:41-44.

18. Nagnino tikagne ro mankasitrake i Jehovah Andrianagnahare naho i Jesosy Kristy?

¹⁸ Noho i solovoigney, le afake mahazo famelan-keloke, miragnetse amy i Jehovah sady mitamà ty hiaigne nainai’e tikagne. Lonike abey tikagne mba hampiseho lognandro ty fankasitrahantikagne ty hatea i Jehovah. Ty anto’e, o hatea’e iohoe ty nandrisike aze hagnomey o fitahiagne reo antikagne. (1 Jaona 4:19) Lonike ka tikagne mba hankasitrake ty hatea i Jesosy antikagne, satria izay ty nahavy aze nagnomey ty fiai’e ho antikagne.​—Jaona 15:13.