1. Ino ty raha sarotse amantika ty manao aze?

 MILA mandrambe fanapahan-kevetse tika isan’andro. Mora ty mandrambe fanapahan-kevetse amy ty raha ila’e, agnisa izay ohatse tihoe ino ty ho hanegne maraindraigne ndra amy fire ty hiroro. Faie tsy mora ka ty mandrambe fanampaha-kevetse ila’e kindraike. Va’e hisy voka’e amy ty fahasalamantika, ty fifaleantika, ty ndaty teantika, ndra ty fanompoantika zay. Teantika naho mahasoa antika naho ty keleiantika ty fanapahan-kevetse rambesentikagne. Faie ty tena lahibey le tihoe, mampifale i Jehovah vao i fanapahan-keventikagney.​—Rom. 12:1, 2.

2. Inogne iaby ty raha hagnampe azo handrambe fanapahan-kevetse am-pahendreagne?

² Handrambe fanapahan-kevetse am-pahendreagne rehe naho 1) mamantatse soa ty raha misy, 2) mamantatse ty fomba fiheve i Jehovah miomba i rahay, naho 3) mandineke soa ty safidy anagna’o. Handineke o dingagne reo tika amy ty lahatsoratse toy. Hagnampe antika hampiofagne ty fahaiantika mandineke ka ty lahatsoratse toy.​—Ohab. 2:11.

FANTARO SOA TY RAHA MISY

3. Nagnino tikagne ro mila mandineke soa ty raha misy hey aloha ty handrambe fanapahan-kevetse? Hazavao amy ty ohatse.

³ Ty raha voaloha’e hagnampe antikagne handrambe fanapahan-kevetse soa, le ty famantaragne soa ty raha misy. Nagnino zay ro tena lahibey? Eretsereto tie misy ndaty raike mamonje dokotera satria marare mafe. Le avy le hagnomey fagnafoly aze vao i dokoteray fa tsy hamantatse soa i arete’ey heike ndra hagnontane aze? Aha’a, tsy hanao izay reke. Handrambe fanapahan-kevetse soa ka rehe naho mamantatse soa ty raha misy mifandrambe  amy i raha hatao’oy hey. Akore ty hanoa’o izay?

4. Arake ty Ohabolana 18:13, ino ty hagnampe azo hahafantatse soa ty raha misy? (Henteo ka i sarey.)

⁴ Hahafantatse soa ty raha misy rehe naho magnadihady soa hey. Eretsereto ohatse tie, nasaegne hagnatreke fete raike rehe. Toko’e handeha agne vao rehe? Naho tsy fanta’o soa ty ndaty tompo i fetey ndra ty miomba i fetey, le azo’o agnonteneagne hoe izao reke: “Aia sady ombia ty hanoagne i fetey? Ho maro vao ty ndaty agne? Ia ty hiandraikitse aze? Ia iaby ty ho agne? Inogne iaby ty raha hatao agne? Hisy toake vao ty agne?” Hagnampe azo handrambe fanapahan-kevetse am-pahendreagne ty vale o fagnonteneagne rehoe.​—Vakio ty Ohabolana 18:13.

5. Ino ty toko’e hatao’o naho fa fanta’o soa ty raha misy?

⁵ Naho fa fanta’o ty raha misy, le dineho soa amy izay. Akore ohatse naho fanta’o tie, tsy midare ty toro lala ty Baiboly ty ila’e amy ty ndaty ho agne ndra hisy finoman-toake ty agne faie tsy hisy ndaty hagnara-maso? Naho ty fahatreava’o aze, va’e tsy ho voafehe vao o fete iohoe? (1 Pet. 4:3) Akore naho mifanindry amy ty fotoagne toko’e hagnatreha’o fivoriagne ndra handena’o manompo ty hanoagne i fetey? Naho fanta’o soa iaby ze raha rezay, le ho mora ama’o ty handrambe fanapahan-kevetse soa. Faie mbe misy dingagne hafa ka toko’e hatao’o. Fa fanta’o hinaneo ty miomba i fetey, faie akore ka ty fihevera i Jehovah aze?​—Ohab. 2:6.

 FANTARO TY FOMBA FIHEVE I JEHOVAH

6. Arake ty Jakoba 1:5, nagnino tikagne ro toko’e hangatake fagnampeagne amy i Jehovah amy ty alala ty vavake?

⁶ Angataho ty Jehovah mba hagnampe azo hahafantatse ty fomba fiheve’e. Mampitamà ty Jehovah tie hagnomey antikagne fahendreagne mba hahafahantika handrambe fanapahan-kevetse mampifale aze. “Matarike amy ze kila ndaty ty Andrianagnahare sady tsy magnomey tsiny” naho fa magnomey o fahendrea’e iohoe.​—Vakio ty Jakoba 1:5.

7. Ino ty hagnampe azo hahafantatse ty fomba fiheve i Jehovah miomba ty raha raike? Hazavao amy ty ohatse.

⁷ Naho fa boake nangatake tari-dalagne tamy i Jehovah rehe, le dineho ty fomba amalea’e i vavake natao’oy. Intoy misy ohatse: Naho montso amy ty toeragne raike rehe, le va’e hangatake fagnampeagne amy ty ndaty amy i toeragney eo. Faie le avy le hibiogne avao vao rehe, ie amy izao reke mbe tsy namale azo? Oho’o, tsy hanao izay rehe fa hitsanogne soa ty raha rehafe’e heike. Hoe izay ka fa naho fa boake nangatake fahendreagne amy i Jehovah rehe, le fantaro ty fomba amalea’e aze. Manao izay rehe naho mikaroke tie ino amy ty lalàna naho toro lalagne agnate Baiboly ao ro mihatse amy i raha iaigna’oy. Naho ohatse rehe hanapa-kevetse tie handeha ndra tsy handeha amy i fete nirehafegne taloha teoy, le azo’o dinehegne tie ino ty rehafe ty Baiboly miomba ty fete tsy voafehe, ty ragnetse raty naho tihoe mahasoa ty manao voalohan-draha  i Fanjakagney aloha ty raha mahafinaritse azo.​—Mat. 6:33; Rom. 13:13; 1 Kor. 15:33.

8. Ino ty hagnampe azo hahatrea ty fagnazavagne ilae’o? (Henteo ka i sarey.)

⁸ Misy fotoagne va’e mila fagnampeagne rehe mba hahatreava’o ty fagnazavagne ilae’o. Va’e hagnomey soso-kevetse azo ty rahalahy ndra rahavave matotse raike. Faie handrambe soa ka rehe naho manao fikarohagne manokagne. Misy fagnazavagne maro ty amy i fitaovagne fianaragne ampiasaentikagne rey, agnisa izay ty Fitaovagne Fikarohagne Hoahy ty Vavolombelo i Jehovah naho ty Andinin-teny Hoahy ty Fiaignantika Kristiana. Ko haligno fa ty tanjogne, le ty handrambe fanapahan-kevetse mampifale i Jehovah.

9. Akore ty ahazoantikagne antoke tie mampifale i Jehovah ty fanapahan-kevetse rambesentikagne? (Efesianina 5:17)

⁹ Akore ty hahazoantika antoke tie, mampifale i Jehovah ty fanapahan-kevetse rambesentikagne? Voaloha’e, mila mahafantatse aze soa tika. Rehafe ty Baiboly fa “ze mahafantatse i Masigne Fara Tampo’ey ro mahira-tsaigne.” (Ohab. 9:10) Hahira-tsaigne ty ndaty raike naho mahafantatse ty toetse i Jehovah, ty raha safirie’e naho ty raha tea’e ndra heje’e. Dineho zao: ‘Ino ty fanapahan-kevetse mampifale i Jehovah ho rambeseko noho iraho mahafantatse aze soa?’​—Vakio ty Efesianina 5:17.

10. Nagnino ty toro lala ty Baiboly ro toko’e ho lahibey amantikagne fa tsy ty fomban-drazagne ndra ty kolontsaigne?

¹⁰ Mandiso tamà ty ndaty maifitse antikagne ty raha ataontika kindraike satria tsy maintsy mampifale i Jehovah tika. Va’e hamoresé ty anak’ampela’e zao ohatse ty rae aman-drene ila’e mba hanambaly lahilahy mpanam-bola bey ndra afake magnomey lafitihy beibey, ndra tie tsy matanjake ara-pagnahy aza i ndatỳ. Ara-dalàna naho tea iareo ho metemete ty fiaigna i anak’ampela iareoy. Faie afake hagnampe aze handroso amy ty lafi’e ara-pagnahy vao o ndaty iohoeke? Akore ty fivazohoa i Jehovah izay? Treantikagne amy Matio 6:33 ao ty vale izay. Risihegne mba ‘hanao voalohan-draha i Fanjakagney’ o Kristianao amo o andine’e iohoe ao. Ty hampifale i Jehovah ty tena lahibey amantikagne ndra tie te hagnomey voninahitse ty rae aman-drenentika sady te hagnaja ty ndaty amo o fiaraha-monegneo eo aza tikagne.

DINEHO SOA TY SAFIDY ANAGNA’O

11. Ino amy ty toetse rehafegne amy Filipianina 1:9, 10 ao ro hagnampe azo hahay handineke soa ty safidy anagna’o?

¹¹ Naho fa hai’o iaby ty toro lala ty Baiboly mifandrambe amy i fanapahan-kevetse rambese’oy, le dineho soa ty safidy anagna’o. (Vakio ty Filipianina 1:9, 10) Ty fahaiagne mandineke, le hagnampe azo hahay hamantatse ty ho voka ty safidy tsikiraidraike anagna’o. Va’e ho mora ty manapa-kevetse kindraike. Faie tsy ze fanapahan-kevetse iaby ro ho mora hoe izay. Ty fahaiagne mandineke, le hagnampe azo handrambe fanapahan-kevetse am-pahendreagne ndra tie sarotse aza i fanapahan-kevetsey.

12-13. Nagnino ty fahaiagne mandineke ro hagnampe azo handrambe fanapahan-kevetse am-pahendreagne naho fa hifily asa?

¹² Dineho moa zao: Mipay asa rehe mba hamelomagne ty keleia’o, le nahatrea asa roe. Mandineke soa ty raha misy rehe, tafilitse amy izay ty miomba i asay, ty fotoagne iasagne, ty lera lani’o naho fa mbeo vaho ty maro hafa. Sambe mete amy ty Kristiana i asa roe rey. Faie va’e ty raike ama’e ty hofilie’o satria tea’o sady bey karama. Faie intoa misy raha hafa mila dinehe’o aloha ty handrambesa’o fanapahan-kevetse.

¹³ Mikalagne azo tsy hagnatreke fivoriagne vao i asay? Ho afake hanokagne fotoagne hoahy ty keleia’o vao rehe sady hagnampe iareo hifandrambe maifitse amy i Jehovah? Naho mandineke o fagnonteneagne reo rehe, le tsy  hatakalo’o vola bey ty fanompoa’o i Jehovah naho ty keleia’o. Ireo “ty raha tena lahibey.” Handrambe fanapahan-kevetse hotahie i Jehovah ka rehe afara izay.

14. Nagnino ty fahaiagne mandineke naho ty hatea ro magnampe antikagne tsy hanao raha hampihemotse ty hafa?

¹⁴ Ty fahaiagne mandineke ka, le hagnampe antikagne hamantatse ty ho voka ty fanapahan-keventikagne amy ty ndaty hafa, amy izay tikagne “tsy hampihemotse ty ila’e.” (Fil. 1:10) Tena lahibey ty manao izay, lohotsie amy ty raha miankigne amy ty safidy ty tsikiraidraike. Agnisa izay ohatse ty fihaminagne naho ty akanjo. Va’e hisy fomba fiakanjo ndra pozy manokagne teantikagne. Faie akore naho manafintohigne ty ndaty hafa amo o fiangonagneo eo ndra amy ty ndaty amy ty tontolo toy eto zay? Hagnampe antika hagnaja ty fihetseham-po iareo ty fahaiagne mandineke. Handrisike antikagne hipay ze “hahasoa ty hafa” naho hanao akanjo magneva ka ty hatea. (1 Kor. 10:23, 24, 32; 1 Tim. 2:9, 10) Fanapahan-kevetse mampiseho hatea naho fagnajagne ty hafa areke ty toko’e ho rambesentika.

15. Ino ty raha toko’e hodinehe’o aloha ty handrambe fanapahan-kevetse lahibey?

 ¹⁵ Naho fa handrambe fanapahan-kevetse lahibey rehe, le dineho mialoha ka tie ino ty raha tsy maintsy atao’o mba hagnatanterahagne aze. Nampianatse antika mba ‘hikontekonte ty holany’ ty Jesosy. (Lioka 14:28) Dineho areke ty fotoagne, ty raha ilaegne naho ty kezake mila atao’o mba hagnatanterahagne i fanapahan-kevetsey. Amy ty fanapahan-kevetse ila’e, le va’e hifampirehake amy ty keleia’o rehe, mba hahafantaragne ty raha toko’e hatao ty tsikiraidraike, amy izay i fanapahan-kevetsey ho tomombagne. Nagnino ty fanoagne izay ro tena lahibey? Naho manao izay rehe, le va’e hotrea’o tie mila ahitsy i fanapahan-keve’oy ndra misy fomba hafa tena azo agnatanterahagne aze soa. Naho magnontane ty heve ty keleia’o sady mitsanogne ty soso-keve iareo rehe, le ho mora amy iareo ty hanohagne azo mba hahatomombagne i fanapahan-kevetsey.​—Ohab. 15:22.

MANDRAMBESA FANAPAHAN-KEVETSE METE SOA

16. Inogne iaby ty dingagne toko’e horihe’o mba hahavy ty fanapahan-kevetse rambese’o ho tomombagne? (Henteo ka ty efajoro tihoe “ Ino ty Hagnampe azo Handrambe Fanapahan-kevetse Am-pahendreagne?”)

¹⁶ Naho magnorike i dingagne nirehafegne tambone teo rey rehe, le handrambe fanapahan-kevetse am-pahendreagne. Fa fanta’o soa hinane zay ty raha misy sady fa nandineke ty toro lalagne hagnampe azo handrambe fanapahan-kevetse mampifale i Jehovah rehe. Afake mangatake amy i Jehovah amy izay rehe hinane zao mba hagnampe azo hanao ze hahatomombagne i fanapahan-kevetsey.

17. Ino ty raha tena lahibey hagnampe azo handrambe fanapahan-kevetse soa?

¹⁷ Ndra tie maro aza ty fanapahan-kevetse nimete natao’o tie taloha, le ko haligno fa ty fianteheragne amy ty fahendrea i Jehovah fa tsy amy ty fahaia’o ndra ty traikefa anagna’o ty hahavy azo handrambe fanapahan-kevetse soa lognandro. Ireke raike avao ty afake magnomey azo fahalalagne, fahiratan-tsaigne naho fahaiagne mandineke. Hanam-pahendreagne rehe naho managne ireo. (Ohab. 2:1-5) Afake magnampe azo handrambe fanapahan-kevetse mampifale aze ty Jehovah.​—Sal. 23:2, 3.