1. Ino ty raha ifantoha ty ankamaroa ty ndaty amy izao?

 VOAMARE’O vao tie, mifantoke amy ty tegna’e ty ankamaroa ty ndaty amy izao fa tsy amy ty hafa? Mampiasa tragnom-porarotse fifandrambesagne ohatse iareo mba hirohafa’e miomba ty raha atao’e ndra ty tegna’e. Tsy ampe avao ty ndaty magniry hagnomey voninahitse i Jehovah Andrianagnahare tie amy izao. Hodinehentikagne amy ty lahatsoratse toy tie, ino ty dika tihoe magnomey voninahitse i Jehovah sady ino ty toko’e handrisike antikagne hanao izay. Hotreantikagne ka tie, akore ty hagnomeantika an’Andrianagnahare ty voninahitse fagneva’e sady akore ty hagnomea’e voninahitse i tahina’ey naho fa afarafara ao.

INO TY DIKA TIHOE MAGNOMEY VONINAHITSE I JEHOVAH?

2. Akore ty nampisehoa i Jehovah ty voninahi’e tamy i Vohy i Sinaỳ teo? (Henteo ka i sarey.)

² Ino ty atao tihoe voninahitse? Ty rehake tihoe “voninahitse” amy Baiboly ao, le irehafagne ze raha va’e hahavy ty ndaty raike hisy lanja’e. Tsy ela tafara ty nagnafaha i Jehovah ty firene o Israelio tamy ty fagnandevozagne ta Ejipta agne, le nampiseho ty voninahi’e reke. Alao sare an-tsaigne moa ty raha niseho. Nisy Israelita an-tapetrisa’e, nivory tagnila i Vohy i Sinaỳ teo, mba hitsanogne ty raha ho saontsie i Andrianagnahare iareoy. Nisy rahogne maiegne, nandrongogne ty an-dingo i vohitsey ey. Tampoke teo, le nifeno setroke ty nagnodidigne aze. Nisy horohoron-tane lahibey, helatse, hotroke naho feo mafe ka ty tamy izay. (Eks. 19:16-18; 24:17; Sal. 68:8) Azo’o sare an-tsaigne vao ty nihalatsà o Israelitao naho fa nampisehoa i Jehovah ty voninahi’e?

3. Akore ty azontika agnomeagne voninahitse i Jehovah?

³ Faie akore ty amantikagne? Afake magnomey voninahitse i Jehovah ka vao tikagne? Ie. Agnisa ty fomba raike anoantikagne izay ty firehafantikagne miomba ty heri’e naho ty  toetse soa’e amy ty hafa. Magnomey voninahitse an’Agnahare ka tikagne naho ireke ty deraentika amy ty raha vitantikagne noho ty fagnampea’e. (Isaia 26:12) Ohatse raike miambake amy ty ndaty nagnomey voninahitse i Jehovah ty Davida Mpanjaka. Izao ty nirehafe i Davida tamy ireke nivavake taman’Agnahare tagnatreha o fiangona o Israelio teoy: “O Jehovah, azo ty habey, ty hery, ty hasoa, ty haja naho ty voninahitse satria azo ze raha an-dagnitse agne naho an-tane etoy.” “Nidera i Jehovah i fiangonagney iaby” naho fa avy nivavake ty Davida.​—1 Tan. 29:11, 20.

4. Akore ty nagnomea i Jesosy voninahitse i Jehovah?

⁴ Nagnomey voninahitse an-dRae’e ty Jesosy naho fa nampahafantatse o ndatio tie, boake amy i Jehovah ty hery nahafaha’e nanao fahagagagne. (Mar. 5:18-20) Nahatreavagne izay ka ty firehafa’e ty miomba i Baba’e tamo o ndatio naho ty fomba nindesa’e ty hafa. Nisy fotoagne zao ohatse ty Jesosy nampianatse tamy i sinagogay ao. Agnisa ty nitsanogne aze tao ty rakemba raike nampijalé ty demonia tagnate ty 18 taogne. Natao i demoniay vokoke reke, le tsy afake nitsangagne mahitsy. Tena nahaferenaigne reke! Nitretré i rakembay ty Jesosy, le nagnantogne aze sady nirehake ama’e tie: “O rakemba, votsotse amo o arete’ò rehe.” Nitsapae i Jesosy reke, le teo naho eo avao le nitsangagne mahitsy sady “nagnomey voninahitse an’Andrianagnahare” satria niheregne nisalama indraike! (Lioka 13:10-13) Nanagne anto’e soa nagnomeagne voninahitse i Jehovah o rakemba iohoe, le hoe izay ka tikagne.

INO TY MANDRISIKE ANTIKAGNE HAGNOMEY VONINAHITSE I JEHOVAH?

5. Ino iaby ty anto’e toko’e hagnajantikagne i Jehovah?

⁵ Magnomey voninahitse i Jehovah tika satria tena magnaja aze. Maro ty anto’e toko’e hagnajantikagne i Jehovah. Fara’e ambone reke sady tsy misy fetra’e ty heri’e. (Sal. 96:4-7) Ahatreavagne ty fahendrea’e ka o raha finoro’eo. Ireke ty Foto o fiaigneo sady boake ama’e iaby ze kila raha Ivelomagne. (Apok. 4:11) Tsy mivalike reke. (Apok. 15:4) Ze raha atao’e, le tomombagne iaby sady tanterahe’e iaby ka ty raha ampitamae’e. (Jos. 23:14) Izay ty anto’e nahavy i Jeremia mpaminany nirehake hoe izao miomba i Jehovah: “Tsy misy manahake azo ze ndaty hendre iaby amo o firenenao eo naho ty fanjakà’e.” (Jer. 10:6, 7) Maro areke ty anto’e toko’e hagnajantika i Babantikagne an-dagnitse agney. Faie tsy vita tihoe magnaja aze avao tika fa toko’e ho tea aze ka.

6. Ino ty anto’e iteavantika i Jehovah?

⁶ Magnomey voninahitse i Jehovah tika satria tena tea aze. Maro ty toetse soa i Jehovah, le irey ty mahavy antika ho tea aze. Mamindra fo naho miferenaigne reke. (Sal. 103:13; Isaia 49:15) Mitretré ka reke, le ze marare antikagne marare aze. (Zak. 2:8) Ampea’e tikagne mba hahafantatse aze naho hanjare ho Nama’e. (Sal. 25:14; Asa. 17:27) Miambane ka reke, le “miondreke hivazoho ty an-dagnitse agne naho ty an-tane etoy, le atsanga’e hiala amo o debokeo ty ndaty ambane.” (Sal. 113:6, 7) Rare’e areke naho te hagnomey voninahitse i Andrianagnaharentika fara’e lahibeỳ tikagne.​—Sal. 86:12.

7. Ino ty tombotsoa miambake anagnantikagne?

⁷ Magnomey voninahitse i Jehovah tika satria teantikagne hahafantatse aze ty hafa. Maro ty ndaty tsy mahafantatse ty maregne miomba i Jehovah. Ino ty anto’e? Satria mino ty vande aparita i Satana miomba i Jehovah iareo. (2 Kor. 4:4) Nandrese lahatse o ndatio ty Satana tie masiake ty Jehovah, tsy midare antikagne, sady nao zao boake ama’e  iaby o fijaleagne mahazo antikagneo. Faie haintikagne ty maregne miomba i Andrianagnaharentikagney! Managne tombotsoa hampahafantatse ty maregne miomba aze amy ty hafa tika, amy izay iareo midera aze ka. (Isaia 43:10) Mifantoke amy ty fagnomezagne voninahitse i Jehovah ty Salamo faha-​96. Naho fa mandineke ty andine’e ila’e amo o salamo iohoe tika, le eretsereto ty fomba azo’o agnomeagne i Jehovah ty voninahitse fagneva aze.

AKORE TY AZONTIKA AGNOMEAGNE I JEHOVAH TY VONINAHITSE FAGNEVA’E?

8. Ino ty fomba raike azontika agnomeagne voninahitse i Jehovah? (Salamo 96:1-3)

⁸ Vakio ty Salamo 96:1-3. Afake magnomey voninahitse i Jehovah tika amy ty raha rehafentikagne miomba aze. Mandrisike antika ‘hihira hoahy i Jehovah,’ ‘hidera ty tahina’e,’ ‘hagnambara ty talily soa ty famonjea’e isan’andro,’ naho ‘hirehake amo o firenenao miomba ty habey ty voninahi’e’ o andine’e rehoe. Fomba ahafahantikagne magnomey voninahitse i Babantikagne an-dagnitse agney amy ty raha rehafentika reo. Tsy nisalasala nirehake ty raha soa natao i Jehovah hoahy iareo amy ty hafa o Jiosy tsy nivalikeo naho o Kristiana tamy ty taonjato voaloha’eo. Tsy nisalasala niaro ty laza i Jehovah ka iareo. (Dan. 3:16-18; Asa. 4:29) Akore ty azontika anahafagne iareo?

9-10. Ino ty ianara’o boake amy ty raha niaigna i Angelena? (Henteo ka i sarey.)

⁹ Dineho ty raha niaigna i rahavave Angelena, a mitoboke a Etazonia agne. Nibey herim-po reke, le niaro ty laza i Jehovah tamy i orinasa niasa’ey ao. Navory raike ze mpiasa vaovao tao, le agnisa izay reke. Sambe nampahafantatse ty miombamiomba aze ty tsikiraidraike tamy iareo tamy izay. Nagnomagne sare maromaro ty Angelena mba hanoroa’e amy iareo tie, falefale reke noho ireke Vavolombelo i Jehovah. Faie taloha ty nirehafa i Angelena, le nisy mpiara-miasa ama’e zay nirehake tie, Vavolombelo i Jehovah ty rae aman-drene’e, le tineza tao reke. Nanomboke nagnaratiraty antika naho ty raha inoantikagne o ndaty iohoe. Hoe ty Angelena: “Nidobodoboke ty foko. Faie hoe raho tam-poko agne tie: ‘Tsy hitsigne avao raho. Tsy maintsy hirehake ty maregne miomba i Jehovah amy iareo raho.’”

¹⁰ Naho fa nitapetse ty reha i mpiara-miasa ama’ey, le nivavake tsielatsiela hey ty Angelena.  Nirehake tamy i ndatỳ taman-kasoa fagnahy reke naho fa niavy eo tie: “Nitezaegne tamo o Vavolombelo i Jehovah-o manahake azo avao ka raho sady le mbe ao avao hatrake amy izao.” Ndra tie nandangigne aza i raha nisehoy, le nitony avao ty Angelena. Natoro’e i mpiara-miasa ama’e rey ty sare’e naho ty sare i nama’e rey falefale manompo i Jehovah, sady nihazavae’e tamy iareo tam-pagnajagne ka ty raha inoa’e. (1 Pet. 3:15) Ino ty nivoka’e? Naho fa nitapetse ty reha i Angelena, le nihatony i ndatỳ. Nanjare nitadidi’e iaby ty raha nahafale aze tamy ireke mbe nifandrambe tamo o Vavolombelo i Jehovah-oy, le nitantarae’e. Hoe ty Angelena: “Fagneva ty harovagne ty Jehovah. Voninahitse tihoe mirehake ty maregne miomba aze amy ty hafa.” Afake midera i Jehovah ka tikagne sady magnomey voninahitse aze ndra tie tsy manao izay aza ty hafa. Voninahitse lahibey zay!

11. Akore ty nampihara ty mpanompon’Agnahare i toro lalagne amy Salamo 96:8 aoy amparake izay?

¹¹ Vakio ty Salamo 96:8. Afake magnomey voninahitse i Jehovah amy ty raha sarobily anagnantikagne tika. Fa nagnomey voninahitse i Jehovah tamy ze fomba zay avao ty mpanompo’e amparake izay. (Ohab. 3:9) Nagnomey vola naho raha sarobily ohatse o Israelitao mba hamboaragne naho hikojakojagne i tempolỳ. (2 Mpanj. 12:4, 5; 1 Tan. 29:3-9) Nisy tamy i mpanonjohy ty lia i Jesosy rey ka “nampiasa ty fanagna iareo”, mba hikarakaragne i Jesosy naho i apostoli’e rey. (Lioka 8:1-3) Nandefa fagnampeagne hoahy ty rahalahy naho ty rahavave sahiragne ka ty Kristiana tamy ty taonjato voaloha’e. (Asa. 11:27-29) Magnomey voninahitse i Jehovah ka tikagne tie amy izao naho manao fagnomezagne an-tsitrapo.

12. Nagnino i fagnomezagne ataontikagne rey ro magnomey voninahitse i Jehovah? (Henteo ka i sarey.)

¹² Hotreantika amy ty raha niseho raike toy tie, magnomey voninahitse i Jehovah o fagnomezagne ataontikagneo. Nirehake ty tatetse raike tie, tsy nisy oragne tagnate ty fotoagne lava ty ta Zimbabwe agne tamy 2020. Ndaty an-tapetrisa’e mahery ty natahoragne ho nimate ty keré, agnisa izay ty rahavave Prisca. Faie ndra tie teo aza ze raha sarotse zay, le nanohy ty fahazara’e nitory isake Larobia naho Joma avao ty Prisca. Nanao izay reke ndra tie tagnate ty fotoam-pamboleagne aza. Nitsikike aze o mpiharo tanàgne ama’eo noho ireke nandeha nitory fa tsy nandeha an-teteke  agne. Hoe iareo: “Ho mate ty keré an’iheo!” Natoky ty Prisca tie hikarakara aze ty Jehovah, le hoe reke tamy iareo: “Tsy ombia hienga ty mpanompo’e ty Jehovah.” Tsy ela tafara izay, le nahazo fagnampeagne boake amy i fandaminagne reke. Noho i fagnomezagne ataontikagne rey ty nahafahagne nagnomey i fagnampeagney. Nilatsa i mpiharo tanàgne amy i Prisca rey, le nivaky rehake hoe izao: “Tsy nienga azo vata’e ty Andrianagnahare, le te hahafantatse ty miomba aze zahay.” Nanomboke nagnatreke fivoriagne ty fito amy i mpiharo tanàgne ama’e rey.

13. Arake ty Salamo 96:9, ino ty toko’e hataontika mba hagnomeagne voninahitse i Jehovah?

¹³ Vakio ty Salamo 96:9. Afake magnomey voninahitse i Jehovah tika naho “masigne” ndra malio ty findesam-batantika. Nila nanao malio ze mpisorogne nanompo i Jehovah tamy i tempolỳ ao. (Eks. 40:30-32) Maregne fa tsy maintsy mikezake mba halio hoe izay ka tikagne, faie ty fanagnagne findesam-batagne malio ro tena lahibey mandikoatse ty fahaliovagne ara-batagne. (Sal. 24:3, 4; 1 Pet. 1:15, 16) Mila mikezake mafe tika mba hagnafake ty ‘toetsentikagne taloha,’ tafilitse amy izay ty eretsere-draty naho ty fomba fiaignagne raty, le hiakanjo “ty toetse vaovao,” zane hoe hanagne fomba fisaignagne mifagnarake amy ty ahy i Jehovah sady hanao raha mifagnarake amy izay. (Kol. 3:9, 10) Noho ty fagnampea i Jehovah, le afake miova sady miakanjo i toetse vaovaoy ty ndaty raike ndra tie niraty findesam-batagne naho ni-mpiarotegne bey aza.

14. Ino ty ianara’o boake amy ty tantara i Jack? (Henteo ka i sarey.)

¹⁴ Dineho ty raha niaigna i Jack. Mpiarotegne naho ndaty tena nagnoho-doza reke, le nitokave o ndaty tihoe Demonia. Nanao asa raty reke, le nivoaheloke ty ho mate. Tamy tie ireke mbe nandigne i saze’eỳ, le nanasa aze hianatse Baiboly ty rahalahy raike nitilike i pirizò nisy azey. Nagneke reke tamy izay. Nikezake nagnafake i toetse’e taloha rey ty Jack ndra tie nanao raha raty maro aza, le nahafeno fepetse hatao badisa naho fa tafara tatoy. Tena niova ty Jack, le nipoke ty ranomaso ty ila’e amy i mpiambegne gadra rey naho fa nanao veloma aze, amy ireke ho vonoegney. Izao ty nirehafe ty maramila raike niasa tamy i pirizòy ao: “I Jack ty fara izay ty natahoragne  tatoagne tie taloha. Faie amy hinane izao, le ireke ka ty nanjare fara izay ty mahafinaritse.” Heregnandro tafara ty namonoagne i Jack, le niheregne tam-pirizò agne indraike o rahalahy mpitarike fivoriagne agneo. Nisy lahilahy vaho samba’e nagnatreke fivoriagne nitrea iareo tao tamy izay. Ino ty nahavy o lahilahy iohoe hagnatreke fivoriagne? Nahalatsa aze ty nifiovà i Jack, le nitea’e ho fantatse ty raha toko’e hatao’e mba hahavy aze hanompo i Jehovah. Trea boake amy izay fa tena magnomey voninahitse i Babantikagne an-dagnitse agney ty findesam-batantikagne!​—1 Pet. 2:12.

AKORE TY HAGNOMEZA I JEHOVAH VONINAHITSE I TAHINA’EY NAHO FA AFARAFARA AO?

15. Akore ty hagnomea i Jehovah voninahitse i tahina’ey tanterake naho fa afarafara ao? (Salamo 96:10-13)

¹⁵ Vakio ty Salamo 96:10-13. Rehafe o andine’e fara’e amy ty Salamo faha-​96 rehoe, fa Mpitsara naho Mpanjaka manao ty rare’e ty Jehovah. Akore ty hagnomea’e voninahitse i tahina’ey naho fa afarafara ao? Hanao izay reke naho fa hitsara o ndatio. Kede sisa, le handrava i Babilona Lahibey reke satria manalatse i tahina’e masigney io. (Apok. 17:5, 16; 19:1, 2) Va’e hanompo i Jehovah miarake amantikagne ty ndaty ila’e hahatrea ty fandravagne i Babilona Lahibey. Amy i Haramagedonay, le handrava ty tontolo i Satana toy ty Jehovah, agnisa izay ze manohetse aze naho ze manivetive i tahina’ey. Faie hagnavotse ze tea naho mankatò sady magnomey voninahitse aze ka reke. (Mar. 8:38; 2 Tes. 1:6-10) Afara i fitsapagne fara’e amy ty fara i Fanjakàgne Arivo Tao i Kristỳ, le hagnamasigne i tahina’ey tanterake ty Jehovah. (Apok. 20:7-10) Amy ze fotoagne zay, le “ho feno fahafantaragne ty voninahy i Jehovah ty tane toy, manahake ty rano mandrongogne ty fara’e ambane amy i riakey agne.”​—Hab. 2:14.

16. Tapa-kevetse ty hanao ino rehe? (Henteo ka i sarey.)

¹⁶ Tena hahafale ty hahatrea ze kila ndaty, hagnomey i Jehovah ty voninahitse fagneva i tahina’ey amy ty hoavy. Faie amparake ty hiavia izay, le afake magnomey voninahitse an’Andrianagnahare amy ze kila raha tika. Ty Salamo 96:8 ty andinin-teny hoahy ty taogne 2025 nifilie o Filan-keve-pitantanagneo, mba hagnampeagne antika hifantoke amo o andraikitse lahibey iohoe. Izao ty rehafegne ao: “Omeo voninahitse ty Jehovah fa fagneva izay ty tahina’e.”