Tena tea i Jehovah ho sambatse naho hifandrambe marine ty mpivaly, sady tea’e hitohy nainai’e zay. (Mat. 19:4-6) Naho magniry hanambaly areke rehe, le ino ty hagnampe azo hahatrea valy fanjaka? Amy ty maha Mpamorogne i Jehovah, le i reke ro mahafohigne tie ino ty raha mila ataontika mba hahavy antika ho sambatse naho fa manambaly. Naho magnorike ty toro lalagne mea’e antikagne areke tika, le tena ho sambatse. Dineho ohatse ty toro lalagne ila’e retoagne:

Voaloha’e, mila magneke itoy tika: “Mamitake ambone ze kila raha ty fo, sady sarotse fehégne.” (Jer. 17:9) Naho mifankatrea sady manomboke miarake ty ndaty roe te hanambaly, le mitombo malaky ty fihetseham-po tsapa iareo. Naho fa miseho ty raha hoe izay, le ho sarotse amy iareo amy ze fotoagne zay ty handrambe fanapahan-kevetse aman-kilala. Naho ty fihetseham-po tsapa iareo avao ty mandrisike ty ndaty roe hifanambaly, le va’e ho diso tamà iareo naho fa afara agne. (Ohab. 28:26) Tsy fahendreagne areke ty hifampirehafa ty ndaty roe ty fihetseham-po tsapa iareo ndra manao vava naho mbe tsy mifankafantatse soa iareo.

Hoe ty Ohabolana 22:3: “Mahimbagne ze mamantatse ty loza hiseho le mietake, fa ty tanora fagnahy mbe mizilike avao le voa.” Nagnino ro magnoho-doza ty mipay valy amy Internet ao? Nisy ndaty nanomboke niarake tamy ty ndaty tsy fanta’e tamy Internet ao. Mampalahelo fa kay nihisa ty fihetseham-po’e avao i ndaty nitrea’e taoy fa tsy tena tea aze. Tsy ze tena mombamomba iareo ka ty rehafe o ndatio amy Internet ao mba hahafaha iareo mamitake naho mangalatse ty vola o ndaty mora fitahegneo. Kindraike aza o ndaty raty saigne rehoe, le mirehake ty vata’e ho Vavolombelo i Jehovah.

Misy raha hafa magnoho-doza ka toy. Mampiasa programan’oridinatera i ndaty mipay valy amy Internet ao rey mba hahatreavagne tie ia ty ndaty mete ama’e. Faie mbe tsy misy porofo mampiseho amparake izay tie nahatrea valy mete ama’e vata’e ze ndaty nampiasa io. Tena fahendreagne vao areke ty hatokisantikagne o programa namboare o ndaty iohoe naho fa handrambe fanapahan-kevetse lahibey, agnisa izay ty fipaliagne valy? Le ho azo itokisagne ambone ty toro lala o Baibolio vao o programan’oridinatera iohoe?​—Ohab. 1:7; 3:5-7.

Izao ka ty toro lalagne amy Ohabolana 14:15 ao: “Mino ze rehake rei’e ze mbe tsy nandia fiaignagne, faie mandineke ty lia’e ty mahimbagne.”  Aloha ty hanapaha’o hevetse ty hanambaly ndaty raike, le mila fantare’o soa heike reke. Faie sarotse ty hahavita’o izay amy Internet ao. Afake mirehake vao rehe tie fanta’o soa ty ndaty raike, satria trea’o ty sare’e sady mifampirehake ela bey eo nareo? Nisy nieretseretse tie fa nahatrea valy mete ama’e, faie nidiso tamà naho fa nifankatrea mivantagne tamy i ndatỳ.

Hoe ty mpanao salamo: “Tsy miharo toboke amy ty ndaty tsy maregne raho, sady tsy mifagnosehose amy ze magnetake ty maha ie aze.” (Sal. 26:4) Mieretseretse ty ankamaroa o ndatio tie tsy magnahy ndra tie amboamboare’o soa ty pozi’o amy ty sare’o amy Internet ao mba hahavy o ndatio ho taitse ama’o. Va’e hanao soamiatreke iareo. Va’e tsy ho trea amy ty mesaze alefa iareo ao ndra amy ty raha rehafe iareo ka ty tena toetse iareo ndra satrie iareo zay ndra tsy satrie iareo. Tena ilaegne ka ty mandineke ty fagnonteneagne retoa: ‘Misy ndaty mirehake ty vata’e tie Vavolombelo i Jehovah. Faie tena Kristiana vita badisa vao reke? Mifandrambe soa amy i Jehovah vao reke? Hajae ty ndaty amo o fiangonagneo eo vao reke? Sa manao piso magnaja hoho avao ndra tena “naman-draty”?’ (1 Kor. 15:33; 2 Tim. 2:20, 21) Mahazo manambaly vao reke naho ty Soratse Masigne ro henteagne? Mila mahay ty vale ireo rehe. Faie ho sarotse ama’o ty hahay ty vale ireo naho tsy mifampirehake amy ty mpiara-manompo mahafantatse aze soa rehe. (Ohab. 15:22) Azo antoke fa ty mpanompo i Jehovah tsy mivalike, le tsy hieretseretse ty hiharo baogne amy ty ndaty tsy vavolombelogne.​—2 Kor. 6:14; 1 Kor. 7:39.

Treantika teo fa magnoho-doza ty fipaliagne valy amy Internet ao. Misy fomba tena soa ahafaha’o mahatrea naho mahafantatse soa ty ndaty ho valy fanjaka ho azo. Aia ty va’e hahatreava’o ze ndaty zay? Naho fa afake mivory mivantagne tika, le afake mamantatse ty hafa naho fa am-pivoriagne agne, amo o havoriambey faritseo naho o vondrom-paritseo vaho amy ty fivoriagne hafa.

Naho tsy mete ty anoagne o fivoriagne rehoe mivantagne, le mampiasa varam-baza tika mba hanoagne izay, manahake ty tamy COVID-19. Afake mamantatse ty Vavolombelo i Jehovah hafa tsy manambaly rehe ndra tie mampiasa irey aza. Azo’o atao ty magnente amy irey tie manao akore ty fomba fanoa’e lahajaka naho ty toin-dreha’e. (1 Tim. 6:11, 12) Va’e ho afake mifampirehake ama’e mitokagne ka rehe afara i fivoriagney, satria misy fomba azo anoagne izay ty amy i programay ao naho mampiasa io ty fiangona’areo. Azo’o henteagne amy ty alala i fivoriagne amy i varam-baza rey ka tie akore ty fomba ifandrambesa’e amy ty hafa. Ho trea’o amy izay tie manao akore vata’e ty toetse o ndaty iohoe. (1 Pet. 3:4) Naho fa mandeha ty fotoagne, le ho hai’o soa i ndatỳ. Ho trea’o ka amy izay tie mitovy vao ty tanjo’areo, ty raha hevere’areo ho lahibey sady mifagnentagne vao nareo.

Naho magnorike ty toro lala ty Baiboly ty ndaty raike naho fa mipay valy, le azo antoke fa ho sambatse reke naho ty vali’e. Hieke ty raha rehafe ty Ohabolana toy iareo: “Ze nahatrea valy fanjaka, le nahazo raha soa sady mahazo sitrake amy i Jehovah.”​—Ohab. 18:22.