1. Inogne ty raha natao i Jehovah tafara kede ty nanotà i Adama naho i Eva? (Genesisy 3:15)

 TAFARA kede ty nanotà i Adama naho i Eva, le nagnomey raha tamaegne hoahy ty tarana iareo ty Jehovah tamy ty alala ty faminaniagne miambake raike. Voarehake amy Genesisy 3:15 ao ty raha nisaontsie’e tamy izay.​—Vakio.

2. Ino ty anto’e mahalahibey i faminaniagne amy Genesisy 3:15 aoy?

² Amy ty boke voaloha’e amy Baiboly ao ty misy o faminaniagne iohoe, sady tena lahibey io. Ty anto’e, ty raha rehafe ty Genesisy 3:15 ty foto-keve o Baibolio, sady misy ifandrambesa’e ama’e iaby ty faminaniagne amy ty boke hafa amy Baiboly ao. Rehafe o faminaniagne iohoe tie hisy Mpagnavotse raike hirahen’Andrianagnahare mba handringagne i Devoly naho o mpanohagne aze raty fagnahio. * Tena fitahiagne hoahy ze ndaty tea i Jehovah zay.

3. Inogne ty hodinehentikagne ato?

³ Handineke ty fagnonteneagne miomba ty faminaniagne amy Genesisy 3:15 ao toa tikagne amy ty lahatsoratse toy: Ia iaby ty mandrambe anjara agnate’e ao? Akore ty nahatanteraha o faminaniagne iohoe? Inogne ty soa rambesentikagne boake ama’e?

4. Manondro an’ia “i menaragney”, le akore ty ahafantarantikagne izay?

⁴ Intoagne iaby ty mandrambe anjara amy i fitantaragne amy Genesisy 3:14, 15 aoy: I “menaragney”, ty ‘tarana’ i menaragney, i “ampelay” naho ty ‘tarana’ i ampelay. Ampahafantare ty Baiboly antika tie ia iaby ty tondroe o raha reo. *  I menaragney heike ty ho rehafentika voaloha’e. Tsy afake mahatakatse ty raha tea i Jehovah ho saontsiegne ta Edena taoy ty menaragne ara-bakiteny. Tsy maintsy ho raha misaigne areke o nagnambarà i Jehovah lilim-pitsaràgneo. Ia zane io? Magnampe antika hahay izay ty Apokalypsy 12:9. Rehafe’e mazava soa ao tie i Satana Devoly, i “menaragne tam-boaloha’e tagney.” Faie ia iaby ty tarana i menaragney?

5. Ia iaby ty mahaforogne ty tarana i menaragney?

⁵ Kindraike ty Baiboly le mampiasa ty rehake tihoe taranake mba hirehafagne ndaty mitsikombe ty toe-tsaigne naho ty raha fatao i baba’e agn’ohatsey. Ty tarana i menaragney areke, le ze anjely naho ze ndaty manohetse i Jehovah Andrianagnahare naho o Vahoa’eo manahake i Satana ka. Agnisa izay i anjely ‘niala tamy ty andraikitse nampanoegne aze tan-dagnitse tagne’ tamy ty andro i Noa rey naho ze ndaty manao raha manahake i Devoly baba iareo.​—Gen. 6:1, 2; Jaona 8:44; 1 Jaona 5:19; Joda 6.

6. Nagnino ro tsy i Eva ty tondroe i ampelay?

⁶ Izao tika le hamantatse i ampelay. Tsy i Eva o ampela iohoe. Fa nagnino? Intoy misy anto’e raike. Rehafe i faminaniagney tie “handemondemoke” ty loha i menaragney ty tarana i ampelay. Arake ty nidinehentikagne teo, le i Satana, i anjely nivalikey i menaragney. Tsy hisy hahavita “handemondemoke” aze naho mbe ndaty tsy voririke avao. Ia areke ty handringagne i Satana?

7. Naho henteagne ty Apokalypsy 12:1, 2, 5, 10, ia ty tondroe i ampela amy Genesisy 3:15 aoy?

⁷ Magnampe antika hamantatse i ampela rehafegne amy Genesisy 3:15 aoy ty raha rehafe ty boke fara’e amy Baiboly ao. (Vakio ty Apokalypsy 12:1, 2, 5, 10.) Tsy ambone tane etoa o ampela iohoe. Ty anto’e, tambane tombo’e  eo i volagney, le nisy satroboninahitse kintagne 12 ty tan-doha’e tey. Niterake ka reke faie tsy ajaja ty ana’e fa i Fanjakàn’Andrianagnaharey. An-dagnitse agne ty misy o Fanjakagne iohoe. Tsy maintsy an-dagnitse agne ka zane ty misy i ampelay. Manondro i fandamina i Jehovah ampaha’e an-dagnitse agney areke i ampelay. I anjely i Jehovah tsy nivalike rey ty mahaforogne aze.​—Gal. 4:26.

8. Ia ty tarana i ampelay voaloha’e, le ombia reke nanjare tarana i ampelay? (Genesisy 22:15-18)

⁸ Magnampe antika hamantatse ty tarana i ampelay voaloha’e ka ty Saontsin’Agnahare. Nirehafe ty Baiboly mialoha tie ho tarana i Abrahama o taranake iohoe. (Vakio ty Genesisy 22:15-18.) Le niavy eo vata’e ze faminania ty Baiboly zay, satria tarana o lahilahy tsy nivalike iohoe ty Jesosy. (Lioka 3:23, 34) Faie mila mahery ambone o ndatio o taranake iohoe, satria ie ty handringagne i Satana Devoly. Nanjare anan’Andrianagnahare ara-pagnahy ty Jesosy naho fa nihosoragne fagnahy masigne tamy ireke ni-30 taogne teo ho eoy. Tamy izay reke ro nanjare agnisa ty tarana i ampelay voaloha’e. (Gal. 3:16) Tafara ty namonoagne naho namelomagne i Jesosy tamy ty mate, le ‘nisatrohan’Andrianagnahare haja naho voninahitse reke’ sady nimei’e aze “ze fahefàgne iaby ... an-dagnitse agne naho an-tane etoy”, agnisa izay ty fahefàgne “handrava ty asa i Devoly.”​—Heb. 2:7; Mat. 28:18; 1 Jaona 3:8.

9-10. a) Ia ka ty agnisa ty tarana i ampelay, le ombia iareo ro manjare agnisa ty tarana i ampelay? b) Inogne ty hodinehentikagne amy izao?

⁹ Faie tsy i Jesosy raike avao ty ho agnisa ty tarana i ampelay. Nampahafantatse izay ty apostoly Paoly naho fa nirehake tamo o Kristiana Jiosy naho hafa firenena voahosotseo hoe izao: “Naho ahy i Kristy nareo, le tarana i Abrahama vata’e sady handova ze nampitamaegne aze.” (Gal. 3:28, 29) Naho fa hosora i Jehovah fagnahy masigne ty Kristiana raike, le manjare agnisa ty tarana i ampelay. I Jesosy Kristy naho i 144000 hiara-manjaka ama’e rey areke ty mahaforogne o tarana i ampelay iohoeke. (Apok. 14:1) Mitovy amy ty ahy i Jehovah Andrianagnahare, i Baba iareoy, ty toe-tsay naho ty raha atao o ana’e rehoe.

¹⁰ Haintika iaby hinane zay tie ia ty mandrambe anjara amy i faminaniagne amy Genesisy 3:15 aoy. Andao areke tika hinane zao handineke tie akore ty nagnatanteraha i Jehovah o faminaniagne iohoe naho ty soa rambesentikagne boake ama’e.

11. Ino ty tea i faminaniagney ho rehafegne amy tihoe haratse ty tomy ty tarana i ampelay?

¹¹ Rehafe i faminaniagne amy Genesisy 3:15 aoy tie handratse ty tomy i tarana i ampelaỳ i menaragney. Nitanterake zay naho fa nampiasa o Jiosio naho o Romanao ty Satana mba hamono i Ana-dahin’Andrianagnaharey. (Lioka 23:13, 20-24) Naho fa maratse ty tomy ty ndaty raike, le tsy mahavita mandeha heike reke agnate ty fotoagne kedekede amparake ty hahasitragne aze. Hoe izay ka fa tsy afake nanao inogn’ino ty Jesosy tagnate i fotoagne kedekede nimateza’e tan-kibory aoy.​—Mat. 16:21.

12. Akore ty handemondemohagne ty loha i menaragney, le ombia ty hahatanteraha izay?

¹² Faie mba hahatanterake i faminaniagne amy Genesisy 3:15 aoy le tsy toko’e hijanogne an-kibory ao avao ty Jesosy. Ino ty anto’e? Satria rehafe i faminaniagney tie handemondemoke ty loha i menaragney i tarana i ampelaỳ. Midika zay tie mila sitragne i tomy i Jesosỳ, ndra mila velomegne amy ty mate reke. Le izay vata’e ty raha nisy, satria  nivelomegne tamy ty mate reke telo andro tafara i namonoagne azey, sady nanjare anjely tsy mete mate. Handringagne i Satana areke ty Jesosy amy ty fotoagne fa tinondro i Jehovah hanoagne izay. (Heb. 2:14) Handringagne o fahavalon’Andrianagnahare ambone tane etoao ndra i tarana i menaragney rey, miarake amy i Kristy i hiarake hanjaka ama’e rey.​—Apok. 17:14; 20:4, 10. *

13. Inogne ty soa rambesentikagne boake amy ty fahatanteraha o faminaniagne iohoe?

¹³ Mandrambe soa boake amy ty fahatanteraha o faminaniagne iohoe rehe naho agnisa ty mpanompo i Jehovah nanokan-tegna ho aze. Ni-ndaty ty Jesosy tamy ireke tan-tane etoỳ sady nitovy tanterake tamy ty toetoe i Baba’e ty toetse’e. (Jaona 14:9) Hahafantatse i Jehovah naho ho tea Aze areke tika naho mianatse ty miomba i Jesosy. Mandrambe soa boake amy ty fampianara i Jesosy naho ty tari-dalagne mei’e mba hitarihagne ty fiangonagne Kristianagne amy izao ka tika. Nampianare’e antika ohatse tie akore ty toko’e ho fomba fiaignantikagne mba hahavy antika hampifale i Jehovah. Mandrambe soa ka tika iaby noho i Jesosy naratse tamy ty tomi’ey ndra noho ireke nimatey. Ty anto’e, naho fa nivelomegne tamy ty Jesosy, le nanolotse ty vily ty fiai’e voririke ndra i solovoigney tamy i Jehovah, mba “hagnafahagne antika amy ze hene ota.”​—1 Jaona 1:7.

14. Nagnino o ndatio ro tsy toko’e hieretseretse tie tsy le avy le ho tanterake eo naho eo iaby i faminaniagne ta Edena tagney?

¹⁴ Trea amy ty raha nisaontsie i Jehovah amy i faminaniagne ta Edena taoy tie tsy ho tanterake eo naho eo iaby o faminaniagne iohoe. Mitake fotoagne zao ty hiteraha i ampelay i taranake nampitamaegney, ty hamoria i Devoly o mpanohagne azeo naho ty hitomboa ty fifandrafea o taranake roe rehoe. Tena mahasoa antika ty mahatakatse o faminaniagne iohoe. Ty anto’e, mampitao antika zay tie halaigne o mpanompo i Jehovah-o ty tontolo fehe i Satana toy. Nirehake fampitaoagne mitovy amy izay tamy i mpiana’e rey ty Jesosy tafara tatoy. (Mar. 13:13; Jaona 17:14) Treantika amy izao fa tena tanterake ty ampaha’e amy i faminaniagney, lohotsie fa tagnate ze 100 taogne fara’e teo zay. Amy ty fomba akore?

15. Nagnino ty tontolo toy ro vao mainke malaigne ty tarana i ampelay tie amy izao, le nagnino tika ro tsy toko’e hatahotse i Satana?

¹⁵ Tafara kede ty nanjarea i Jesosy Mesia Mpanjaka tamy 1914, le navokovoko hirike an-dagnitse agne ty Satana. Tsy afake mandeha an-dagnitse agne reke tie amy izao fa le fa an-tane etoy avao mandigne ty handringanagne aze. (Apok. 12:9, 12) Faie tsy tihoe mandremandre avao reke fa miasa mafe. Tena boseke mafe reke, le tsy ado’e o vahoa i Jehovah-o. (Apok. 12:13, 17) Izay ty mahavy ty tontolo toy vao mainke malaigne o vahoa i Jehovah-o tie amy izao. Faie tsy misy anto’e toko’e hatahorantikagne i Satana naho o mpanohagne azeo. Itika aza rese lahatse manahake i apostoly Paoly tie: “Naho manohagne antika ty Andrianagnahare, ia ty hahavita hanohetse antika?” (Rom. 8:31) Afake matoky i Jehovah tanterake tika, satria arake ty nitreantika teo, le fa nitanterake iaby ty ankamaroa ty raha rehafe i faminaniagne amy Genesisy 3:15 aoy.

16-18. Inogne ty soa nirambese i Edward, Ursula naho i Jessica boake amy ty fahatakara iareo ty Genesisy 3:15?

¹⁶ Magnampe antika hahavita hiatreke ty raha sarotse atrehentika i fampitamà i Jehovah amy Genesisy 3:15 aoy. Izao ohatse ty nirehafe  i Edward, misionera a Goama agne: “Nisy fotoagne raho niatreke fitsapagne naho nidiso tamà, le nitsapa ty tsy fivalihako amy i Jehovah ze raha rezay. Faie nagnampe ahy hatoky i Babako an-dagnitse agney avao ty fisaintsaignako i faminaniagne amy Genesisy 3:15 aoy.” Fa tsy ligne i Edward ty hiavia i andro hamoagna i Jehovah o raha mampijale antikagne iabio.

¹⁷ Nirehake ty Ursula rahavave a Bavaria agne tie ty fahatakara’e ty Genesisy 3:15, le nagnampe aze ho rese lahatse tie boake aman’Andrianagnahare vata’e o Baibolio. Nitrea’e tie mifandrambe amo o faminaniagne iohoe ze faminaniagne hafa amy Baiboly ao, le tena nahalatsa aze zay. Nirehake ka reke tie: “Nitohigne ty foko naho fa nihaiko tie le avy le nanao raha ty Jehovah mba hahavy o ndatio hanagne raha tamaegne.”

¹⁸ Hoe ka ty Jessica, rahavave boake a Mikronezia agne: “Tadidiko fa tena nifale raho tamy iraho nahatsapa tie nahatrea ty hamarenagney. Fa nitanterake ty ampaha’e amy i faminaniagne amy Genesisy 3:15 aoy. Izay ty nagnampe ahy hitadidy tie tsy hoe izao ty fiaignagne nirie i Jehovah hiaignantikagne. O faminaniagne iohoe ka le nahavy ahy vao mainke hatoky tie ho soa ty fiaignako amy izao naho iraho manompo i Jehovah, sady mbe ho ambonembone izay aza ty hasoa’e amy ty hoavy.”

19. Nagnino tika ro matoky fa tsy maintsy ho tanterake i tapa’e fara’e amy i faminaniagneỳ?

¹⁹ Nitreantikagne teo tie fa tanterake ty ila’e amy i faminaniagne amy Genesisy 3:15 aoy amy izao. Mazava soa hinane zay tie ia ty tarana i ampelay naho ty tarana i menaragney. Fa nisitragne i tomy i Jesosỳ, i tarana i ampelay voaloha’ey, le amy izao reke fa Mpanjaka mahery sady tsy mete mate. Kede sisa le ho feno ty isa i hiara-manjaka amy i Jesosy rey, i agnisa i tarana i ampelaỳ. Fa nitanterake ty tapa’e voaloha’e amo o faminaniagne iohoe. Matoky areke tika tie ho tanterake ka i tapa’e fara’e tihoey tie hodemodemohegne ty loha i menaragney. Tena ho fale o mpanompo i Jehovah tsy mivalikeo naho fa horinganegne ty Satana. Faie ko kivy amparake ty hiavia izay. Azo atokisagne i Andrianagnaharentikagney. Hinday fitahiagne tsiefa “hoahy ty firenena iaby ambone tane eto” amy ty alala ty tarana i ampelay reke.​—Gen. 22:18.