1. Ino ty tsapa’o miomba ty hamarenagne?

 TEA o vahoa i Jehovah-o ty hamarenagne amy ty Saontsin’Andrianagnahare ao. Mioregne amy io ty finoantika. (Rom. 10:17) Rese lahatse tika fa naore i Jehovah mba ‘hanohagne ty hamarenagne’ o fiangonagne Kristianao. (1 Tim. 3:15) ‘Mankatò naho magneke ze mitarike’ antikagne am-pifaleagne ka tika satria iareo ty magnazava ty hamarenagne agnate Baiboly ao amantika naho magnomey toromareke hagnampe antika hanao ty zoton’arofon’Andrianagnahare.​—Heb. 13:17.

2. Arake ty Jakoba 5:19, ino ty raha hiseho ndra tie fa mahafantatse ty hamarenagne aza tika?

² Faie ndra tie fa mahafantatse ty hamarenagne naho matoky ty fitariha ty fandaminan’Andrianagnahare aza tika, le va’e mbe ho voafitake avao. (Vakio ty Jakoba 5:19.) Tena tea i Satana naho tsy matoky ty Baiboly vaho ty toromareke omey ty fandaminan’Andrianagnahare sasa tikagne.​—Efes. 4:14.

3. Nagnino tika ro mila mikezake mafe mba hankatò ty hamarenagne avao? (Efesianina 6:13, 14)

³ Vakio ty Efesianina 6:13, 14. Tsy ho ela ty Devoly le hamorogne vande handreseagne lahatse o ndatio, mba hahavy iareo hanohetse i Jehovah. (Apok. 16:13, 14) Fantantika ka fa vao mainke hikezake mafe ty Satana mba hitaogne o vahoa i Jehovah-o. (Apok. 12:9) Izay ty mahavy antika toko’e hikezake mafe mba hahay hamantatse ty tsy mampitovy ty hamarenagne amy ty vande naho toko’e hikezake hankatò ty hamarenagne. (Rom. 6:17; 1 Pet. 1:22) Tena ilaegne ty manao izay, mba hahavy antika ho votso-belogne amy i haoreagne lahibeỳ.

4. Ino ty hodinehentikagne atoa?

 ⁴ Handineke toetse roe hagnampe antika hahay hamantatse ty hamarenagne boake amy Baiboly ao naho hagneke ty toromareke boake amy ty fandaminan’Andrianagnahare tika amy ty lahatsoratse toy. Misy raha telo ka tsy maintsy atao mba hahavy antikagne hitagne mafe ty hamarenagne, le izay ty hodinehentika naho fa avy eo.

TOETSE HAGNAMPE ANTIKA HAHAY HAMANTATSE TY HAMARENAGNE

5. Nagnino ty fatahoragne i Jehovah ro hagnampe antika hahafantatse ty hamarenagne?

⁵ Fatahoragne i Jehovah. Tihoe matahotse i Jehovah, le tea aze sady tsy manao raha mahavignetse aze. Te hamantatse ty tsy mampitovy ty mete naho ty tsy mete vaho ty hamarenagne amy ty vande ka tika amy izay ankasitraha’e. (Ohab. 2:3-6; Heb. 5:14) Tsy toko’e hatahotse ndaty mandikoatse ty fatahorantikagne i Jehovah tika satria mateteke le tsy mampifale i Jehovah ty raha mampifale o ndatio.

6. Nagnino ty tahotse ndaty ro nahavy i lahilahy folo rey hagnova ty maregne?

⁶ Naho ndaty ty atahorantika mandikoatse i Jehovah, le ho voafitake tika sady hiala amy ty hamarenagne. Dineho moa ty ohatse nimey i lahilahy 12 nitsikilo i tane nampitamae i Jehovah o Israelitaoy. Nandikoatse ty hatea i folo lahy rey i Jehovah ty taho iareo o Kananitao. Hoe iareo tamo o Israelita nama iareo reo: “Tsy hovitantika ty handeha hialy amo o firenena iohoe satria mahery mandikoatse antika iareo.” (Nom. 13:27-31) Naho ty fomba fiheve o ndatio le tena natanjake o Kananitao naho ampitoviegne amo o Israelitao. Faie magnaligno i Jehovah ze mirehake tie tsy hahavita hialy amy ty fahavalo’e o Israelitao. Toko’e ho nifantoke amy ty raha tea i Jehovah hatao o Israelitao i mpitsikilo folo rey. Toko’e ho nisaintsaigne iareo ka ty raha fa natao i  Jehovah hoahy iareo vaho tsiela. Naho nanao izay iareo, le ho nahatrea tie tsy ampahafire ty hery i Jehovah, i fara izay ty maherỳ ty tanja o Kananita reo. Tsy nanahake i mpitsikilo tsy nanam-pinoagne rey ty Josoa naho i Kaleba satria te hahazo ty fankasitraha i Jehovah. Hoe iareo tamy i vahoakey: “Naho ankasitraha i Jehovah tika, le hindese’e hilitse amo o tane iohoe ao vata’e sady homea’e antika o tane iohoeke.”​—Nom. 14:6-9.

7. Ino ty hagnampe antika vao mainke hatahotse i Jehovah? (Henteo i sarey.)

⁷ Vao mainke hatahotse i Jehovah tika naho mifantoke amy ze raha mampifale aze amy ze fanapahan-kevetse rambesentika. (Sal. 16:8) Naho fa mamaky tantara Ara-baiboly rehe, le magnontenea tegna tie: ‘Ino ty ho nataoko naho iraho ty niatreke raha hoe izay?’ Alao sare an-tsaigne ohatse tie teo rehe tamy i mpitsikilo folo rey nirehake tie tsy hahavita hialy amo o Kananitao o Israelioy. Ho nino i reha iareoy vao rehe le ho natahotse, sa ho nanao ze raha nampifale i Jehovah satria tea aze? Le o Israelitao iaby ro tsy nino tie maregne i reha i Josoa naho i Kalebay. Voka’e tsy nanagne fahafahagne hilitse amy i Tane Nampitamaegney ao iareo.​—Nom. 14:10, 22, 23.

8. Ino ty toetse toko’e hikezahantikagne mafe hanagnagne, le ino ty anto’e?

⁸ Fiambaneagne. Ze ndaty miambane ro ampahafantare i Jehovah ty hamarenagne. (Mat. 11:25) Niambane tika le nagneke hampianaregne ty hamarenagne. (Asa. 8:30, 31) Mila mitao tika mba tsy hirehareha. Naho mirehareha tika, le va’e hanomboke hieretseretse tie maregne mitovy amy ty toro lala ty Soratse Masigne naho ty toromareke omey ty fandamina i Jehovah ty heventika.

9. Ino ty hagnampe antika hiambane avao?

⁹ Hahavita hiambane avao tika naho mitadidy tie tsy misy dika’e tika naho ampitahaegne amy i Jehovah. (Sal. 8:3, 4) Azontika atao ka ty mangatake amy i Jehovah mba hampea’e hahavita hiambane naho hagneke hatoro. Mampianatse antika ty fomba fiheve’e amy ty alala ty Baiboly naho ty fandamina’e ty Jehovah. Hagnampe antika hihevetse ty fomba fiheve’e ho sarobily mandikoatse ty antikagne reke. Naho fa mamaky Baiboly rehe, le mipaliava porofo magnamaregne tie tea i Jehovah ty ndaty miambane fa ze mirehareha, miavognavogne naho magnambone tegna heje’e. Mikezaha mafe ka mba hiambane avao naho ohatse rehe nahazo tombotsoam-panompoagne mahavy azo hanagne fahefagne ndra ho voamare ty hafa.

INO TY HAGNAMPE ANTIKA HITAGNE MAFE TY HAMARENAGNE?

10. Ia ty ampiasae i Jehovah mba hagnomey toromareke naho tari-dalagne ty vahoa’e?

¹⁰ Atokiso lognandro ty toromareke boake amy ty fandamina i Jehovah. Tamy ty andro o Israelio, le i Mosesy ty nampiasae i Jehovah mba hitarike o vahoa’eo, le avy eo i Josoa ty nandimbe aze. (Jos. 1:16, 17) Nahazo fitahiagne o Israelitao naho fa nankatò o lahilahy tinendre i Jehovah reo. Taonjato maro tafara tatoy, le i apostoly 12 rey ty nagnomey toromareke o Fiangonagne Kristianao naho fa niforogne. (Asa. 8:14, 15) Tafara izay, le nagnampe iareo ka ty androanavi-pagnahy ta Jerosalema agne. “Nihamafe ty finoa i fiangonagne rey sady nihamaro isan’andro ty ndaty tagnate’e ao” naho fa nagnorike ty toromareke boake amy i lahilahy nanam-pinoagne rey iareo. (Asa. 16:4, 5) Mahazo fitahiagne ka tika amo ze o fotoagne zao naho fa magnorike ty toromareke omey ty fandamina i Jehovah. Faie ino ty ho tsapa i Jehovah naho ohatse tsy mankatò i lahilahy tinendre’e rey tika? Mba  hamaleagne ze fagnonteneagne zay, le andao tika handineke ty raha niseho, tamo o Israelitao hilitse i Tane Nampitamaegneỳ.

11. Ino ty nanjò ze Israelita tsy nagnaja i Mosesy, i tinendre i Jehovah hitarike iareoy? (Henteo i sarey.)

¹¹ Tamo o Israelitao handeha mbamy i Tane Nampitamaegney mbeoy, le nisy lahilahy nandietse i Mosesy naho ty anjara asa nanendrea i Jehovah aze. Hoe iareo: “Masigne iaby nio ty vahoake toy [fa tsy i Mosesy avao] sady ama’e eo ty Jehovah.” (Nom. 16:1-3) Maregne fa masigne tagnatreha i Jehovah eo i ‘vahoakey iaby’, faie i Mosesy ty finily i Jehovah mba hitarike iareo. (Nom. 16:28) I Jehovah naho ty maregne ty niharatie i ndaty tsy nankatò rey fa tsy i Mosesy. Ty raha tea iareo ro nifantoha iareo, zane hoe ty hanagne fahefagne naho laza, fa tsy ty raha tea i Jehovah. Naringa i Jehovah i ndaty nitarike goreve rey naho ty ndaty an-jato’e nanohagne iareo. (Nom. 16:30-35, 41, 49) Afake matoky ka tika fa tsy ankasitraha i Jehovah ze ndaty tsy magnaja ty toromareke omey ty fandamina’e amy hinane zao.

12. Nagnino tika ro toko’e hatoky ty fandamina i Jehovah avao?

¹² Afake matoky ty fandamina i Jehovah lognandro tikagne. Naho fa trea tie mila ahitsy ty fahatakarantika ty hamarenagne ila’e amy Baiboly ao, ndra ty raha ila’e ataontikagne mifandrambe amy ty fanompoagne i Jehovah, le tsy misalasala manao fagnovàgne i ndaty tinendre i Jehovah hitarike ty fandamina’e rey. (Ohab. 4:18) Manao izay iareo satria te hanao raha mampifale i Jehovah. Manao ze azo atao ka iareo mba hioregne amy ty Saontsin’Andrianagnahare ty fanapahan-kevetse rambese iareo, satria agnisa ty raha také i Jehovah amy ty vahoa’e zay.

13. Inogne i ‘modely ty rehake mahasoay,’ le tsy toko’e hataontikagne akore io?

¹³ “Ko ialagne ty modely ty rehake mahasoa.” (2 Tim. 1:13) Ty rehake tihoe “modely ty rehake mahasoa,” le irehafagne ty  raha ampianare ty Kristiana trea agnate Baiboly ao. (Jaona 17:17) Mioregne amo o fampianaragne iohoe ty raha inoantika. Mampianatse antika ty fandamina i Jehovah tie mila hamaregnentika soa tie mioregne amy ty Baiboly ty raha inoantika ndra tsy izay. Hahazo fitahiagne tika naho manao izay lognandro.

14. Nagnino ty Kristiana ila’e ro tsy nipiteke sasa amy ty “modely ty rehake mahasoa”?

¹⁴ Ino ty raha va’e hiseho naho miala amy “ty modely ty rehake mahasoa” tikagne? Dineho ty ohatse toy. Nagnely vande ty Kristiana ila’e tamy ty taonjato voaloha’e tie fa niavy i andro i Jehovah-y. Va’e nisy taratasy ty tamy izay, le nieretseretse o ndatio tie i Paoly ty nanoratse aze. Tsy nagnamaregne soa ty Kristiana ila’e ta Korinto tagne fa le avy le nino sady nagnely i vandey kagne. Tsy ho nivoafitake iareo naho nitadidy ty raha nampianare i Paoly iareo, tamy ireke mbe niarake tamy iareoy. (2 Tes. 2:1-5) Nanoro hevetse i rahalahi’e rey ty Paoly tie tsy toko’e hino ze rehake rey iareo iareo. Mba hagnampeagne iareo amy ty afara, le izao ty namaragna i Paoly i taratasy faharoe nisorate’e hoahy o Tesalonianaoy: “Intoy ro veloma nisorate ty tagnako, izaho Paoly, le intoy ro famantaragne amy ze taratasy iaby, fa sora-tagnako io.”​—2 Tes. 3:17.

15. Akore ty hiarovantika tegna amy ty vande mifanohetse amy ze raha nianarantika boake amy Baiboly ao? Magnomeza ohatse. (Henteo i sarey.)

¹⁵ Ino ty azontika ianaragne boake amy ty reha i Paoly tamo o Tesalonianao? Naho fa maharey raha mifanohetse amy ze nianarantika boake amy Baiboly ao tika ndra maharey vande, le mila mampiasa soa ty fahaiantika misaigne. Tamy ty fitondra o Firaisagne Sovietikao, le nampiparitake taratasy hoe boake amy foibey agne o fahavalontikagneo. Nandrisike o rahalahio mba hamorogne fikambanagne mahaleo tegna i taratasỳ. Le hoe raha maregne zay ty raha rehafe i taratasỳ. Faie tsy nivoafitake o rahalahy tsy nivalike reo. Nitrea iareo fa tsy nifagnarake amy ty raha nampianaregne iareo ty raha tagnate i taratasỳ ao. Amy izao ka o fahavalontikagneo, le mampiasa ty internet naho  ty tragnom-porarotse fifandrambesagne mba hampisaratsarahagne antika. Toko’e hodinehentika soa hey areke tie mifagnarake amy ty hamarenagne nianarantika vao ty raha reintika ndra ty raha vakientika, fa tsy toko’e ‘le avy le hikorontan-tsaigne ndra ho taitaitse’ tika.​—2 Tes. 2:2; 1 Jaona 4:1.

16. Arake ty Romanina 16:17, 18, ino ty toko’e hataontika naho misy ndaty mampiparitake vande?

¹⁶ Miaraha avao amy ze ndaty tsy mivalike amy i Jehovah. Tean’Andrianagnahare hiharo saigne ty mpanompo’e. Hiharo saigne avao tika naho mitagne soa ty hamarenagne. Ndra ia ndra ia areke mampiparitake raha mba hampisaratsarake o fiangonagneo, le manoro hevetse antika ty Andrianagnahare mba “hagnalavitse iareo.” Naho tsy izay, le va’e hiala amy ty hamarenagne tika.​—Vakio ty Romanina 16:17, 18.

17. Ino ty soa hoazontika naho mahafantatse sady mipiteke amy ty hamarenagne tika?

¹⁷ Naho mahafantatse soa ty hamarenagne tika sady mitagne soa izay, le hatanjake ty finoantika sady hifandrambe soa amy i Jehovah avao tika. (Efes. 4:15, 16) Ho voaro amy ty vande ampianare i Satana naho ty raha tsy maregne aparita’e tika sady hiaro antika ka ty Jehovah naho fa agnate i haoreagne lahibeỳ. Mipiteha mafe amy ty hamarenagne avao areke le ‘ho ama’o i Andrianagnahare ty fiadanagney.’​—Fil. 4:8, 9.