Mirehake toetse sive o andine’e rehoe. “Fa ty voka ty fagnahy, le hatea, hafaleagne, fiadanagne, fitanam-po, hasoa fagnahy, hasoa toetse, finoagne, fahalemem-pagnahy, fifehezan-tegna.” Faie tsy ireo avao ty toetse soa hanagnantikagne naho fa ampea ty fagnahy masigne tika.

Hoe ty apostoly Paoly amy ty andine’e aloha o andinin-teny rehoe: “Ty asa o nofotseo, le fijangajangagne, fahalotoagne, fidadàgne amy ty findesan-tegna raty, fanompoan-tsampy, fihisàgne aoly, fifankalaignagne, fifamaleagne, fialognagne, habosehagne, fifandiedieragne, fivìbihagne, sekta, hatea mena, finoman-toake losotse, fete feno filibagne, naho ze mitovy amy ireo.” (Gal. 5:19-21) Trea amy i reha i Paoly fara’eo fa tsy ireo avao ty agnisa ty “asa ty nofotse.” Mbe misy hafa ka nirehafe’e amy Kolosianina 3:5 ao. Naho fa boake nirehake i toetse sive rey ka reke, le nirehake tie: “Tsy misy lalàna manohetse ireo.” Azo adika hoe izao ka ty rehake grika nandikagne o rehake iohoe: “Tsy misy lalàna manohetse ty toetse mitovy amy ireo.” Tsy i toetse sive rey avao areke ro agnisa ty vokatse ty fagnahy.

Magnamaregne izay ty raha nisorate i Paoly hoahy o fiangonagne ta Efesosy agneo. Hoe reke: “Fa ty vokatse ty mazava le hasoa toetse isan-karaza’e naho hatea raha vantagne vaho hamarenagne.” (Efes. 5:8, 9) Trea eo fa agnisa ty “vokatse ty mazava” ty “hasoa toetse.” Faie agnisa ty “vokatse ty fagnahy” ka io. Midika areke zay fa agnisa ty vokatse ty fagnahy ka ty hatea raha vantagne naho ty hamarenagne.

Nandrisike i Timoty ka ty Paoly mba hikezake hanao raha vantagne, hanagne fahafoezan-tegna ho an’Andrianagnahare, finoagne, hatea, faharetagne, vaho fahalemem-pagnahy. (1 Tim. 6:11) Agnisa ty “vokatse ty fagnahy” ty telo amo o toetse reo (finoagne, hatea naho fahalemem-pagnahy.) Faie nila ty fagnampea ty fagnahy masigne ka ty Timoty mba hanagna’e i toetse ila’e rey. Agnisa izay ty hatea raha vantagne naho ty fahafoezan-tegna ho an’Andrianagnahare vaho ty faharetagne.—Ampitahao amy ty Kolosianina 3:12; 2 Petera 1:5-7.

Tsy i toetse sive amy Galatianina 5:22, 23 ao rey avao areke ro agnisa ty “vokatse ty fagnahy” satria tsy ireo avao ty toetse hanagnantikagne naho fa ampea ty fagnahy masigne tika. Mila managne i toetse soa hafa rey ka tika mba hahavy antika ho Kristiana matotse. Ho vitantikagne amy izay ty “hiakanjo ty toetse vaovao niforognegne mifanandrife amy ty zoton’arofon’Andrianagnahare, amy ty hamarenagne naho ty tsy fivalihagne.”—Efes. 4:24.