TENA mino tika fa mitarike naho magnomey hanegne ara-pagnahy ty vahoa’e ty Jehovah amo ze o “andro fara’e” zao. (2 Tim. 3:1) Faie hankatò naho hihinagne amy i hanegne ara-pagnahy rey vao tika? Miankigne amantika tsikiraidraike zay. Nila nanao raha o Israelitao tamy iareo tan-tane efetse agne naho fa naharey ty feo i trompetra nitiofe i mpisorogne reỳ. Misy raha mitovy amy izay ka ty amy izao.

Nandily i Mosesy ty Jehovah mba hagnamboatse trompetra volafotsy roe ‘hamoriagne o vahoakeo naho hagnambaragne amy iareo tie mila mifindra tobe iareo.’ (Nom. 10:2) Arakarake ty toromareke teagne hampitaegne amy i vahoakey ty isa ty trompetra tiofe i mpisorogne rey naho ty fomba itiofa iareo aze. (Nom. 10:3-8) Maro ka ty fomba agnomea i Jehovah tari-dalagne ty vahoa’e amy izao. Agnisa izay retoagne: amy ty alala ty havoriambey, naho toromareke mirehake fagnitsiagne ndra fagnovàgne vaho fampiofagnagne o mpiandraikitseo. Azo ampitoviegne amy ty feo i trompetra sambe hafa tamo o andro o Israelio rey o fomba telo rehoe. Andao tika hirehake ty miomba ireo.

Naho fa tea i Jehovah hovoriegne atignana i fizilihagne amy i tragnolay fihaognagney eo i “vahoakey iaby”, le sambe tiofe o mpisoregneo i trompetra roey (Nom. 10:3) Sambe naharey naho nahafantatse ty teagne hambara amy ze feo i trompetray zay ty foko iaby nagnodidigne i tragnolaỳ. Azo antoke fa tsy ela avao le fa niavy eo ze narine ty eo ty nisy aze. Fa tsy hoe izay ze lavitse satria va’e ho elaela vaho avy sady mila mikezake mafe. Faie ndra lavitse iareo ndra marine, le sambe tea i Jehovah ho avy eo iaby mba hitsanogne ty raha tea’e hambara amy iareo.

Tsy asaegne hivory amy i tragnolay fihaognagney eo sasa tikagne amy izao. Faie mbe asae i Jehovah hiarake hivory ty vahoa’e. Agnisa izay naho fa havoriambey naho fotoagne manokagne hafa. Mey i Jehovah tari-dalagne tena iankigna ty aigne tika amy ty fotoagne hoe irey. Mitovy avao ty raha ampianaregne ty vahoa i Jehovah magneran-tane amy i fotoagne rey, faie sambe fale iareo naho fa magnatreke i fandaharagne rey. Ho fale miarake amy iareo ze magneke i fanasa i Jehovah-y, le magnatreke i fotoagne lahibey rey. Ty ila’e amy iareo boake lavitse fa ty ila’e marine avao. Faie sambe mahatsapa iareo fa tsy montso antoke ty kezake natao iareo.

Afake mandrambe soa amy i fandaharagne lahibey rey ka vao ty mpanompo i Jehovah ila’e amy ty toeragne mitokagne agne? Eka. Afake magnorike i fandaharagne rey amy ty alala ty teknolojia moderina iareo. Naho fa nitilike ty sampa i Benin ohatse ty solon-tegna i foibey, le nalefa mivantagne amy ty  alala ty video ta Arlit a Niger agne i fandaharagney. Mitokagne o tanàgne iohoe sady an-tane efetse i Sahara agne ty misy aze. Vavolombelogne 5 naho ndaty liagne 16 ty nagnatreke i fandaharagney tagne. Faie le hoe niarake tamy i mpagnatreke 44131 rey avao iareo tamy izay. Hoe ty rahalahy raike: “Tena misaotse anareo amy ty foko raho nandefa i fandaharagne ignehoe. Tsapa’ay tamy igne fa tena tea anay nareo.”

Naho fa ty raike amy trompetray avao ro tiofe o mpisorogneo, le ty lahibey mpifehe ty arivo avao ty niavy amy i tragnolay fihaognagney teo. (Nom. 10:4) Nisy raha nampahafantare i Mosesy naho nampiofagna’e iareo naho fa niavy agne iareo. Nagnampe iareo hahavita soa ty andraiky iareo amy ty foko misy iareo zay. Naho ohatse rehe ni-agnisa o mpifehe rehoe, le azo antoke fa ho nikezake mafe mba ho niavy agne satria te handrambe soa amy ze raha hatoro agne.

Tsy natao ho lahibey mpifehe ndra hikomandikomandy o agnondrin’Andrianagnahareo ty androanavi-pagnahy. (1 Pet. 5:1-3) Faie manao ze fara heri’e iareo mba hikarakaragne o agnondrio. Tena vognogne areke iareo naho fa asaegne handrambe fampiofagnagne. Agnisa izay ohatse amy ty Sekoly ty Fanompoagne i Fanjakagney. Magnampe iareo mba hahay soa ty andraiky iareo o sekoly iohoe, sady magnampe iareo naho ty ndaty amo o fiangonagne eo hatanjake ara-pagnahy. Ndra tie mbe tsy nagnatreke ty raike amy i sekoly rey rehe, le afake mandrambe soa boake amy ze fa nagnatreke.

Naho fa tiofe i mpisorogne rey mba hamoake feo miovaova i trompetra rey, le midika zay fa mila mifindra tobe o Israelitao. (Nom. 10:5, 6) Tena voalamigne soa iareo naho fa mifindra. Faie tena tsy mora hoahy ty tsikiraidraike amy iareo zay satria misy asa maro mila atao. Misy amy iareo aza va’e tsy te ho nifindra. Fa nagnino?

Va’e mahatsapa iareo fa mateteke mifindrafindra zay sady amy izay ka tampotampoke. Hoe ty Baiboly: “Kindraike, le manomboke amy tsofots’androy hatrake maraindray avao ty ijanogna i rahogney. Fa nisy fotoagne tagnate ty roe andro, ndra vola’e raike, ndra mihoatse izay ty ijanogna’e.” (Nom. 9:21, 22) Hai’o vao tie impire nifindrafindra tobe iareo? Rehafe ty Nomery toko 33 fa in-40 eo ho eo nifindra tobe iareo.

Nisy fotoagne ka va’e nitendreke toeragne soasoa ty ila’e amy iareo ndra tie “tan-tane efetse” agne. Va’e nitea iareo avao i toeragney ndra tie “nampatahotse” ka aza ty agne. (Deot. 1:19) Va’e ho nieretseretse areke iareo tie soa naho mijanogne eo avao.

Va’e ho nisarotse amy ty foko ila’e ka ty nandigne ty toro’e satria tsy miarake mifindra iaby iareo naho fa maharey ty feo i trompetray. Naho fa tiofe i mpisorogne rey hamoake feo miovaova i trompetra rey, le ty foko nitobe atignana i tragnolay fihaognagney eo hey ro mandeha voaloha’e. Tsy ia zay, fa ty foko i Joda, Isakara, naho i Zebolona. (Nom. 2:3-7; 10:5, 6) Naho fa tiofe i mpisorogne rey fanindroe’e i trompetra rey, le ty foko telo atimo i tragnolaỳ teo ka ty mandeha. Le tiofe i mpisorogne rey hoe izay avao i trompetra rey amparake ty andehana i foko rey iaby.

Va’e ho nisarotse ama’o ka ty nagneke ty fagnovàgne ila’e natao i fandaminagne. Va’e nieretseretse aza rehe tie, ‘Mateteke anio ze o fagnovàgne zao!’ Ndra hoe fa tena mete soa zay ty fagnentea’o ty fomba fiasa ila’e taloha, le tsy tea’o naho hovagne. Va’e ho elaela ka rehe vaho ho zatse i fomba fiasa vaovaoy, le mitake faharetagne zay. Faie naho fa magneke i fagnovàgne rey tika, le hahatsapa tie tena mahasoa antika rey. Naho manao izay ka tika, le hitahy antikagne ty Andrianagnahare.

I Jehovah ty tena nitarike o Israelitao tamy iareo tan-tane efetse agney. Va’e ho nimatemate tagne iaby o ndaty an-tapetrisa’e rehoe naho tsy teo reke nikarakara naho nagnomey tari-dalagne iareo. Mey i Jehovah tari-dalagne ka tika mba hahavy antika hatanjake ara-pagnahy avao amo o andro fara’e zao. Lonike areke tika iaby mba ho tapa-kevetse hankatò naho fa maharey ty feo i trompetray, manahake ty natao i Israelita tsy nivalike tamy i Jehovah rey.