LAHATSORATSE FIANARAGNE 26
“Miheregna amy i Jehovah”
“Miheregna amako, le hiheregne ama’areo raho, hoe ty Jehovah.”—MAL. 3:7.
HIRA 102 “Ampio Ireo Mila Ampiana”
INO TY HO TREA’O ATO? *
1. Ino ty tsapa i Jehovah naho fa miheregne ama’e indraike ty mpanompo’e raike?
TREANTIKA tamy i lahatsoratse taloha itoỳ fa manahake ty mpiarake agnondry mahay ty Jehovah. Ty anto’e, tena mikarakara soa ty agnondri’e tsikiraidraike reke sady mipay ze montso ka. Hoe ty Jehovah tamo o Israelita tsy nanompo aze sasa reo: “Miheregna amako, le hiheregne ama’areo raho.” Azo antoke fa mbe izay avao ka ty atao’e amy izao satria ‘tsy miova reke.’ (Mal. 3:6, 7) Nirehake ty Jesosy tie tena fale ty Jehovah naho o anjelio naho fa miheregne Ama’e ty mpanompo’e raike nijanogne tsy nanompo Aze.—Lioka 15:10, 32.
2. Ino ty hodinehentikagne ato?
2 Andao tikagne handrambe lesogne boake amy ty fagnoharagne telo nirehafe i Jesosy mba hahaiantika magnampe i ndaty rey. Mirehake ty toetse toko’e hanagnantikagne o fagnoharagne rehoe, sady mampiseho tie tsy montso antoke ty kezake mafe ataontikagne mba hagnampeagne iareo.
FAGNOHARAGNE MIOMBA I VOLA NIMONTSOY
3-4. Nagnino i ampela rehafegne amy Lioka 15:8-10 aoy ro nikezake mafe nipay i vola’e nimontsoy?
3 Mila mikezake mafe tika naho fa mipay ze ndaty te hiheregne amy i Jehovah. Nisy fagnoharagne nirehafe i Jesosy zay ty amy Filazantsara i Lioka ao. Mirehake miomba ty ampela nikodebe ty vola’e raike nimontso atao tihoe drakma o fagnoharagne iohoe. Treantikagne amy io fa tena nikezake mafe i ampelay mba hahitavagne i vola’ey.—Vakio ty Lioka 15:8-10.
4 Nirehafe i Jesosy ao ka ty raha nitsapa i ampelay naho fa nitrea’e i vola’ey. Tamy ty andro i Jesosy, le mey ty rene’e vola drakma folo kindraike ty anak’ampela’e amy i andro anoagne aze mariazey. Va’e ho tena sarobily amo o ampela iohoe areke ty raike amy i drakma’e rey. Nino i ampelay fa nipoke an-tragno’e ao i vola’ey, le namelogne jiro reke mba hipaliagne aze. Faie tsy nahatrea ndra inogn’ino reke. Va’e tsy le nazava soa i jiro’ey, le i volay ka toe kidikidy. Nifafa’e areke i tragno’ey tamy ty fara’e. Le tamy izay reke ro nahatrea i vola’ey namilepiletse tagnate i lemboke nifafa’ey ao naho fa nitarafe i jiro nindese’ey. Tena nifale reke, le nitokave’e ty nama’e naho ty mpiharo tanàgne ama’e mba hiarake mifale ama’e.
5. Nagnino ro va’e ho sarotse ty hahatreavagne i ndaty fa tsy miarake amy fiangonagne sasa rey?
5 Trea amo o fagnohara i Jesosy iohoe fa mila mikezake mafe tika naho fa mipay raha nimontso. Hoe izay ka ty toko’e hataontika naho te hahatrea i ndaty tsy miarake amy fiangonagne sasa rey. Va’e fa ho an-tao’e maro iareo ro tsy niarake amantikagne sasa. Va’e nifindra an-tane hafa aza iareo, le va’e tsy fanta ty mpiara-manompo agne. Faie izao ty azontikagne antoke: Misy amy iareo tena te hiheregne amy i Jehovah amy hinane zao. Ty anto’e, te hanompo i Jehovah miarake amantika indraike iareo faie tsy hahavita izay iareo naho tsy ampeantikagne.
6. Ino ty azo o fiangonagneo iaby atao mba hipaliagne i ndaty tsy miarake amantikagne sasa rey?
6 Ia iaby ty afake mipay i ndaty tsy miarake amy fiangonagne sasa rey? Itika iaby. Agnisa izay ty androanavi-pagnahy, ty mpisava lalagne, ty keleia’e naho ty mpitory iaby agnivo fiangonagne eo. Managne namagne ndra longo tsy miarake amy fiangonagne sasa vao rehe? Ino ty toko’e hatao’o naho mahatrea iareo rehe naho fa mitory isan-tragno ndra mitory amy ty toeragne maro ndaty? Rehafo reke tie fale rehe hampahafantatse ty androanavi-pagnahiareo ty misy aze ndra ty nimerò telefoni’e naho ohatse tea’e ty hotilihegne.
7. Ino ty raha azo’o ianaragne boake amy ty raha nirehafe i Thomas?
7 Ino iaby ty azo ty androanavi-pagnahy atao mba hipaliagne ze ndaty te hiheregne amy i Jehovah? Mareho ty raha natao i Thomas * androanavi-pagnahy raike mipetrake a Espaina agne. Fa 40 mahery ty rahalahy naho rahavave nampea’e mba hiheregne amy i Jehovah. Hoe reke: “Ty raha ataoko voaloha’e, le ty magnontane o rahalahio naho o rahavaveo ty toeragne misy i ndaty tsy miarake amy fiangonagne sasa rey. Ndra agnonteneako o mpitorio tie ia ty mpiara-manompo fa ela tsy nivory. Tena fale ty ankamaroa iareo naho fa agnonteneako hoe izay satria te hagnampe i ndaty rey ka iareo. Naho fa mitilike i ndaty rey raho afara atoy, le agnonteneako ty miomba ty ana iareo naho ty longo iareo. Ty anto’e, misy amy iareo nizatse ninday ty ana’e nivory tie taloha sady va’e fa nitory ka i ajaja rey, le mila ampeagne mba hiheregne amy i Jehovah ka.”
AMPEO MBA HIHEREGNE AMY I JEHOVAH I AGNONDRI’E NIMONTSO REY
8. Arake i fagnoharagne amy Lioka 15:17-24 aoy, ino ty natao i rangahey naho fa niheregne indraike i ana-dahi’ey?
8 Ino ty toetse mila anagnantikagne mba hahafahantika magnampe ze ndaty te hiheregne amy i Jehovah? Andao tikagne handrambe lesogne boake amy ty fagnohara i Jesosy miomba i anake nisintake an-drae’ey. (Vakio ty Lioka 15:17-24.) Nirehafe i Jesosy fa niheregne an-tragno iareo agne avao i ana i rangahey naho fa nitsapa’e tie tsy mete ty natao’e. Ie naho fa nahatrea aze ty rae’e, le nilay mbama’e mbeo hanalaka aze. Naho fa niavy tama’ey reke, le namihigne aze mba hahatsapa’e fa tena tea’e reke. Nenjehe ty eretsere’e i ana-dahi’ey, le nirehake tie: ‘Anò manahake ty mpanompo’o raho fa tsy fagneva ty ho ana’o sasa.’ Nitretré aze ty baba’e, le naseho’e fa mbe nirambese’e ho ana’e reke sady tena fale reke nandrambe aze. Nanao fete areke reke mba hiarahagne mifale amy i ana-dahi’ey, le nasae’e nimeigne akanjo fanjaka ka reke.
9. Ino iaby ty toetse ilaegne naho te hahavita hagnampe i ndaty fa tsy miarake amy fiangonagne sasa rey tika? (Henteo ty efajoro tihoe “ Akore ty Hagnampeagne ze Ndaty Te Hanompo i Jehovah Indraike?”)
9 Manahake o rae iohoe ty Jehovah. Tea’e hiheregne ama’e i mpanompo’e tsy miarake amy fiangonagne sasa rey, satria tena ikokoa’e iareo. Hahavita hagnampe iareo hiheregne tika naho manam-paharetagne, mitretré sady maneho hatea amy iareo manahake ty atao i Jehovah. Nagnino ro tena ilaegne o toetse rehoe, le akore ty hampisehoantikagne aze?
10. Nagnino tika ro mila manam-paharetagne naho fa magnampe ndaty hatanjake ara-pagnahy indraike?
10 Ilaegne ty manam-paharetagne satria va’e ho elaela vaho izay tena hatanjake ara-pagnahy indraike i ndatỳ. Maro ty rahalahy naho rahavave nirehake tie tena nagnampe iareo hanompo i Jehovah indraike ty fitiliha o andronavi-pagnahio naho o mpiara-manompò iareo mateteke. Hoe ty Nancy rahavave boake Azia agne: “Nisy rahavave namako zay tena nagnampe ahy. Tena tea’e manahake ty rahavave’e niharo troke ama’e raho. Nitiahive’e amako ty raha nahafinaritse nanoe’ay taloha. Tena nitsanogne’e soa raho naho fa nirehake ama’e ty raha nitsapako sady tsy nisalasala nanoro hevetse ahy reke. Naseho’e fa tena ragnetse vognogne hagnampe avao reke.”
11. Nagnino ro tena ilaegne ty mitretré ze ndaty boseke amy ty raha natao o mpiara-manompò?
11 Ilaegne ka ty mitretré. Nanjare tsy niarake tamy fiangonagne sasa ty ndaty ila’e satria va’e nisy mpiara-manompo nanao raha nahaboseke aze. Va’e mieretseretse iareo tie tena tsy rare’e ty raha natao tama’e. Le ndra tie fa an-tao’e maro afara atoy aza, le mbe tsy te hiheregne amy i Jehovah avao iareo. Hoe nisy raha nandratse aze iareo, le hoe magnisy fagnafoly i bai’ey tika naho fa mitretré iareo. Mila ndaty hitsanogne aze naho mahatakatse ty fihetseham-po’e areke iareo. (Jak. 1:19) Hoe ty María, rahavave tsy nitory sasa tie taloha: “Ndaty vognogne hitsanogne naho hampahery vaho hagnomey torohevetse ahy ty tena nipaliaeko.”
12. Nagnino ty hatea i Jehovah ro azo ampitoviegne amy ty taly? Hazavao amy ty ohatse.
12 Mirehake ty Baiboly tie ty hatea i Jehovah ty vahoa’e ty mahavy aze mitarike iareo hagnatogne aze. Fa nagnino? Misy ohatse raike magnampe antika hahazo ze hevetse zay toy. Eretsereto tie nipoke agnate ty lavake raike tena laleke rehe. Azo antoke fa ho mate rehe naho mijanogne ao avao. Faie tsy ho vita’o irehe irery avao ka ty hiakatse boake ao naho tsy misy ndaty manorake taly mba hitarihagne azo. Hoe ty Jehovah miomba Israelita nisintake aze rey: ‘Ty hateako iareo ty mahavy ahy hitarike iareo.’ (Hosea 11:4) Mbe hoe izay avao ka ty atao i Jehovah amy i ndaty tsy manompo aze sasa rey. Hoe agnate lavake lalake i ndaty rey. Tea’e ho tsapa iareo fa ikokoa’e iareo sady tea’e hiheregne ama’e indraike ndra tie nisintake aze noho ty olagne maro natrehe’e. Hagneke hampiasae i Jehovah mba haneho ze hatea’e iareo zay vao rehe?
13. Mirehafa tantara mampiseho tie tena ilaegne ty maneho hatea amy i ndaty tsy mitory sasa rey.
13 Mila meigne toky i ndaty tsy manompo i Jehovah sasa rey tie tea i Jehovah naho o mpiara-manompò iareo. Tsy nanompo i Jehovah tagnate ty 30 taogne mahery hey ty Pablo, i nirehafegne tamy i lahatsoratse taloha itoỳ. Hoe reke: “Nisy rahavave raike fa bey zay nifanalaka tamako tamy i maraindraigne zay. Tena soa fagnahy reke sady nitsapako tamy ty reha’e tie bey hatea reke, le nipoke ty ranomasoko. Le hoe raho: ‘Ira i Jehovah rehe ene!’ Nanapa-kevetse areke raho tamy izay fa hiheregne amy i Jehovah.”
AMPEO ZE MALEME ARA-PAGNAHY
14. Naho henteagne ty fagnoharagne amy Lioka 15:4, 5 ao, ino ty natao i mpiarake agnondrỳ naho fa nitrea’e i agnondry nimontsoy?
14 Mila tohagnantikagne avao i ndaty tsy nanompo i Jehovah sasa rey. Ty anto’e, maleme ara-pagnahy iareo noho ty raha niaigna iareo tamy ty tontolo i Satana toy. Va’e hagnamelo-tegna avao iareo manahake i tsitson’anake tamy i fagnohara i Jesosỳ. Mila magnampe iareo areke tika mba hanagna iareo finoagne matanjake indraike. Nirehafe i Jesosy tamy i fagnoharagne miomba ty agnondry raike nimontsoy, fa nitrotroe i mpiarakey i agnondry nimontsoy naho fa nitrea’e, le niente’e tamy ila’e rey agne. Fa nandany fotoagne naho hery reke mba hipaliagne aze. Faie tsapa’e fa mila indesegne amy ila’e rey agne ka reke satria tsy managne hery handehanagne irery mbeo.—Vakio ty Lioka 15:4, 5.
15. Akore ty azontikagne anohagnagne i ndaty te hiheregne amy i Jehovah rey? (Henteo ty efajoro tihoe “ Bokekele Raike Sarobily”)
15 Va’e mila manokagne fotoagne naho hery tika mba hagnampeagne i ndaty tsy nitory sasa rey handrese ty olagne mahazo aze. Ho vitantikagne ty hagnampe iareo hatanjake ara-pagnahy indraike naho fa ampea ty fagnahy masy i Jehovah tika. Mila mampiasa ty Saontsi’e naho ty boke aman-gazete naboa i fandaminagne ka tikagne. (Rom. 15:1) Akore ty hanoantikagne izay? Hoe ze androanavi-pagnahy raike za-draha zay: “Mila ampianaregne Baiboly indraike ty ankamaroa i ndaty fa tsy nitory sasa rey naho fa miheregne amy i Jehovah. Soa naho mpitory mora ifandrambesagne sady azo’e irehafagne ty raha manjò aze ty mampianatse aze.” * Naho tendré o androanavi-pagnahio hampianatse Baiboly iareo areke rehe, le rambeso ho tombotsoa zay.
MISY HAFALEAM-BEY TY AN-DAGNITSE AGNE NAHO TY AN-TANE ETOY
16. Nagnino tika ro matoky tie magnampe antika o anjelio?
16 Maro ty tantara mampiseho tie magnampe antika hahatrea i ndaty tsy nitory sasa faie te hiheregne rey o anjelio. (Apok. 14:6) Ohatse amy izay zao ty Silvio boake a Ekoatera agne. Nivavake mafe reke mba hagniraha i Jehovah ndaty hagnampe aze hiheregne amo o fiangonagneo. Le ino ty raha niseho? Mbe tsy nitapetse i vavake natao’ey, le fa nisy androanavi-pagnahy roe niavy tama’e tagne. Tena nifale iareo tamy izay nanoro aze boake amy Baiboly ao tie tena tea aze ty Jehovah.
17. Ino ty ho tsapantikagne naho mikezake magnampe i ndaty tsy mitory sasa rey tika?
17 Tena ho fale tikagne naho mikezake mafe magnampe i ndaty tsy mitory sasa rey mba hiheregne indraike. Izay zao ty nitsapa ty mpisava lalagne atao tihoe Salvador. Hoe reke: “Tena milialia raho naho fa mahatrea tie niheregne amy i Jehovah iareo. Tena fale raho satria navota i Jehovah boake amy ty tontolo i Satana toy iareo, le nimea’e tombotsoa hiara-miasa ama’e raho amy ty fagnavotagne iareo.”—Asa. 20:35.
18. Naho nijanogne tsy nanompo i Jehovah rehe, le ino ty raha azo’o atokisagne?
18 Naho ohatse rehe nijanogne tsy nanompo i Jehovah sasa, le matokia fa tena mbe tea azo reke. Tea’e hiheregne ama’e indraike rehe. Maregne fa misy dingagne mila atao’o naho te hiheregne amy i Jehovah rehe faie matokia fa tena tsy ligne’e ty hiheregna’o ama’e. Tena ho fale reke handrambe azo, manahake i rangahe tamy i fagnohara i Jesosỳ!
HIRA 103 Lehilahy ho Fanomezana Ireo Mpiandry
^ feh. 5 Tea i Jehovah hiheregne ama’e ze ndaty tsy miarake amo o fiangonagneo sasa. Maro ty raha azontikagne atao mba handrisihagne iareo hagneke i fanasà i Jehovah tihoey tie: “Miheregna amako.” Hodinehentikagne ato ty fomba azontikagne agnampeagne iareo mba hanao izay.
^ feh. 7 Novagne ty agnaragne ila’e ato.
^ feh. 15 Mila ampianaregne toko maromaro amy ty boke tihoe Mitoera ao Amin’ny Fitiavan’Andriamanitra ty ila’e amy i ndaty tsy nitory sasa rey. Ty ila’e ka nandrambe soa naho fa nandineke ty toko ila’e amy ty boke tihoe Manatona An’i Jehovah. Ty Komity ty Fanompoa ty Fiangonagne ro mijobogne ty mpitory hampianatse Baiboly i ndaty rey.
^ feh. 68 SARE: Rahalahy telo sambe hafa manao raha hagnampeagne rahalahy raike te hiheregne amy i Jehovah. Mifandrambe ama’e mateteke iareo, magnomey toky aze tie teagne reke, naho mitsanogne aze soa.
