1. a) Inogne ty fampitamagne nimey i Jehovah antikagne? b) Inogne ty dika tihoe ‘mitamà i Jehovah’? (Henteo tihoe “Fagnazavagne.”)

 NIMEY i Jehovah fampitamàgne fanjaka ze ndaty tea aze. Kede ohatse sisa le ho foagna’e o aretegneo, o raha mampalahelò naho o fateo. (Apok. 21:3, 4) Hampea’e o ndaty “mpandefetse” mitamà azeo mba hagnova ty tane toy ho paradisa. (Sal. 37:9-11) Hatao’e ka ze hahavy antika tsikiraidraike tena hifandrambe maifitse ama’e, ambone ze o fa fifandrambesantikagne ama’e zao. Tena soa ze fampitamàgne zay! Faie nagnino tika ro mino tie ho tanterahe’e o raha nampitamae’e rehoe? Satria lava magnatanterake ze raha ampitamae’e ty Jehovah. Izay ty mahavy antika ‘mitamà’ aze. * (Sal. 27:14) Atorontika tie mitamà i Andrianagnaharentikagney tika naho mandigne am-paharetagne naho am-pifaleagne ty hagnatanteraha’e i raha ampitamae’e rey.​—Isaia 55:10, 11.

2. Inogne ty raha fa natao i Jehovah?

² Fa nisy raha natao i Jehovah mba hanoroagne tie magnatanterake ty raha ampitamae’e reke. Dineho ty ohatse raike miambake toy. Nampitamà ty Jehovah amy ty boke Apokalypsy ao tie hamory ndaty boake amy ty firenena naho foko vaho firehake sambe hafa reke amo ze o androntikagne zao. Hanompo aze am-piraisan-tsaigne o ndaty rehoe. “Vahoake tsy vatse isahegne” ty irehafagne o antoko o ndaty miambake rehoe. (Apok. 7:9, 10) Misy lahilahy naho ampela vaho ajaja  boake amy ty karazagne sambe hafa, firehake sambe hafa naho kolontsaigne sambe hafa o “vahoake” iohoe. Faie ndra tie eo zay, le milongo soa naho miharo saigne manahake o keleian-draikeo iareo. (Sal. 133:1; Jaona 10:16) Mpitory mazoto ka o “vahoake tsy vatse isahegne” iohoe. Lava vognogne hirehake i fiaignagne fanjaka tamae iareo amy ty hoavỳ amy ze ndaty mitsanogne aze iareo. (Mat. 28:19, 20; Apok. 14:6, 7; 22:17) Naho o agnisa o vahoake tsy vatse isahegne iohoe rehe, le azo antoke fa tena sarobily ama’o i raha fanjaka tamaentika rey.

3. Inogne ty tanjo i Satana?

³ Tea i Devoly tsy hanagne raha tamaegne rehe. Tea’e hino rehe tie tsy midare azo ty Jehovah sady tsy ho tanterahe’e zao i raha ampitamae’e rey. Naho tratse i Satana ze tanjo’e zay, le ho kivy tika, sady va’e tsy hanompo i Jehovah sasa. Arake ty hotreantika, le natao i Satana ze hahavy i Joba tsy hanagne raha tamaegne naho tsy hanompo i Jehovah sasa.

4. Inogne ty hodinehentikagne ato? (Joba 1:9-12)

⁴ Hodinehentikagne amy ty lahatsoratse toy ty hafetseagne nampiasae i Satana mba hanereagne i Joba hivalike amy i Jehovah. (Vakio ty Joba 1:9-12.) Hodinehentikagne ato ka ty raha azontika ianaragne boake amy i Joba naho tihoe nagnino tika ro mila mitadidy avao tie tea antika ty Jehovah sady ho tanterahe’e i fampitamà’e rey.

5-6. Inogne ty raha nanjò i Joba tagnate ty fotoagne fohe?

⁵ Nandeha soa ty fiaigna i Joba. Nifandrambe maifitse tamy i Jehovah reke, nanagne keleiagne sambatse, sady ni-mpagnarivo ka. (Joba 1:1-5) Faie tagnate ty andro raike avao, le nafoe i Joba iaby o raha rehoe. Voaloha’e, nirebake ty fanagna’e. (Joba 1:13-17) Naho fa niavy eo nimate iaby i ana’e rey. Mba alao sare an-tsaigne kedekede heike moa zay! Tena ore o rae aman-dreneo naho misy mate ty raike amy ty ana iareo. Mbe ambone lavitse noho izay areke ty alahelo nitsapa i Joba mirovaly naho fa nihay iareo tie nimate iaby i ana iareo rey. Tsy mahalatsa naho nandriatse ty akanjo’e ty Joba mba hanoroagne ty alahelo’e sady nitomentsa.​—Joba 1:18-20.

⁶ Nisimbae i Satana ty fahasalama i Joba tafara izay, sady nahamegnatse o aretegne nahazo aze iohoe. (Joba 2:6-8; 7:5) Tena nihajae o ndatio ty Joba tie taloha. Nandeha ama’e agne ohatse iareo naho fa nipay torohevetse. (Joba 31:18) Faie amy izao iareo, tsy midare aze sasa. Nihatakataha o rahalahi’eo naho o nama’e reke. Ndra o mpanompo’eo aza nirihy aze.​—Joba 19:13, 14, 16.

7. a) Inogne ty raha ninoa i Joba fa nahavy aze hijale, faie inogne ty raha tsy natao’e? b) Inogne amo o fitsapagne atoro amo o sareo eò ro va’e hatrehe ty Kristiana raike?

⁷ Nitea i Satana hino ty Joba tie noho ireke tsy ankasitraha i Jehovah o mahavy aze mijaleo. Tamy i ana i Joba folo niarake nifalefale naho nihinagne rey ohatse, le nandefa tiobey ty Satana mba handrava i tragno nisy iareoy. (Joba 1:18, 19) Nandefa afo boake an-dagnitse agne ka reke hamonovonoagne i biby i Joba rey. Faie tsy i biby rey avao ty nimatemate fa ndra i mpanompo’e niambegne aze rey ka aza. (Joba 1:16) Nieretseretse areke ty Joba tie boake amy i Jehovah i tiobeỳ naho i afoy, satria hirike an-dagnitse agne. Ty voka’e, nino reke tie va’e nanao raha nahavignetse i Jehovah. Faie ndra tie teo zay, le tsy nimete hagnozogne i Rae’e an-dagnitse agney reke. Nagneke ty Joba tie boake amy i Jehovah iaby i raha soa nanagna’e tagnate ty taogne maro rey. Izay ty nahavy aze  nieretseretse tie naho nagneke handrambe i raha soa rey reke, le toko’e ho vognogne hagneke i raha raty rey ka. Hoe areke ty Joba: “Ho deraegne lognandro abey ty tahina i Jehovah.” (Joba 1:20, 21; 2:10) Tsy nivalike ty Joba ndra tie nahantra naho nalahelo i ana’e rey vaho narare aza. Faie mbe tsy nado i Satana avao reke.

8. Inogne ka ty hafetseagne hafa nampiasae i Satana?

⁸ Misy hafetseagne hafa ka natao i Satana mba hampivalihagne i Joba. Nagnirake namagne sandoke telo tamy i Joba agne reke mba hahavy i Joba hahatsapa ho tsy misy dika’e. Nirehake o lahilahy rehoe tie noho i Joba nanao raha raty o nahavy aze nijaleo. (Joba 22:5-9) Nikezake nandrese lahatse aze ka iareo tie, ndra tie mikezake manao ty soa avao reke, le tsy ahoan’Andrianagnahare ze kezake atao’e zay. (Joba 4:18; 22:2, 3; 25:4) Natao iareo ze hahavy i Joba hieretseretse tie naho toe tea aze vata’e ty Andrianagnahare, le ho nikarakara aze, sady ho nihevetse ty fanompoagne atao i Joba aze ho sarobily. Va’e nahavy i Joba hieretseretse o rehake rehoe tie tsy misy raha tamaegne sasa ty ama’e.

9. Inogne ty nagnampe i Joba hanagne herim-po naho ho tapa-kevetse ty tsy hivalike?

⁹ Alao sare an-tsaigne heike i tantaray. Mitoboke an-davenoke eo ty Joba sady manaintaigne. (Joba 2:8) I nama’e rey ka mirehake tie ndaty raty reke sady tsy misy dika’e ty raha anoe’e. Tena navesatse tamy i Joba o olagne natrehe’e rehoe, sady le hoe tsinovoke ty fo’e noho ty alahelo’e i ana’e rey. Nitsigne avao heike ty Joba tamy ty voaloha’e. (Joba 2:13-3:1) Naho ohatse i nama’e rey nieretseretse tie hivalike amy i Mpamorogne azey ty Joba kanao tsy nirehake, le nidiso hevetse iareo. Va’e nagnente tamy i nama’e sandoke rey agne aza ty Joba naho fa nirehake tie: “Tsy hagneke hivalike raho, amparake ty imatezako.” (Joba 27:5) Inogne ty nagnampe i Joba  hanagne herim-po naho ho tapa-kevetse ty tsy hivalike ndra tie nijale aza? Ndra tamy i fotoagne tena nahakivy i Jobay aza, le mbe nitamà avao reke tie mbe hofaragna i Andrianagnahare’e bey hateay o fijaleagne mahazo azeo. Nino ka reke tie mbe ho velome i Jehovah naho mate.​—Joba 14:13-15.

10. Inogne ty ianarantika boake amy ty tantara i Joba?

¹⁰ Ianarantikagne boake amo o tantara i Joba iohoe fa tsy afake mamoresé antika hiala amy i Jehovah ty Satana, sady vazoho i Jehovah iaby ze kila raha mahazo antika. Mampianatse antika lesogne sarobily hafa ka ty tantara i Joba. Intoagne misy lesogne azontika ianaragne boake ama’e.

11. Inogne ty raha atokisantika naho itika matoky i Jehovah avao? (Jakoba 4:7)

¹¹ Niporofoe i Joba fa naho itika matoky i Jehovah avao, le ho vitantika ty hiaretse ze fitsapagne mahazo antika naho ty hanohetse i Satana. Le inogne ty hiseho naho fa manao izay tika? Magnomey toky ty Soratse Masigne tie hilay antika ty Devoly.​—Vakio ty Jakoba 4:7.

12. Nagnino ty finoagne ty famelomagne ty mate ro nagnampe i Joba?

¹² Mila mino mafe ty famelomagne ty mate tika. Nitreantika tamy i lahatsoratse taloha itoỳ tie ampiasae i Satana ty tahotse o fateo mba hanereagne antika hivalike. Tamy i Joba niazon-draha sarotsey, le nirehake ty Satana tie nao hatao i Joba iaby ze raha azo’e atao, ndra ty hivalike amy i Jehovah aza zay, mba hamonjeagne ty fiai’e. Faie nidiso hevetse ty Satana. Satria ndra tie nieretseretse aza ty Joba tie ho mate reke, le tsy nampivalike aze zay. Nagnampe aze hiaretse ty fatokisa’e ty hasoa toetse i Jehovah naho ty fanantena’e tie mbe hatao i Jehovah milamigne ty fiaigna’e. Nino ka ty Joba tie naho tsy manao raha ty Jehovah amy ie mbe velogney, le hanao raha Reke naho fa ho velomegne amy ty mate ty Joba amy ty hoavy. Tena nino ty famelomagne ty mate ty Joba. Naho tena mino izay ka tika, le tsy hivalike ka ndra tie horohoroegne hovonoegne aza.

13. Nagnino tika ro mila mamantatse i hafetseagne nampiasae i Satana tamy i Joba rey?

¹³ Mila mamantatse i hafetseagne nampiasae i Satana tamy i Joba rey tika, satria mbe irey avao ka ty ampiasae’e amantikagne. Mareho ty kitomboke natao i Satana toy: “Ze raha anagna o ndatio [fa tsy i Joba raike avao] le homei’e hiarovagne ty fiai’e.” (Joba 2:4, 5) Te hirehake areke ty Satana tie tsy teantikagne ty Jehovah, sady hisintake aze tika naho ohatse izay ty hahavoavonje ty fiaintikagne. Ankoatse izay, le nirehake ty Satana tie nao tsy tea antika ty Andrianagnahare sady tsy darea’e ty kezake ataontika mba hampifaleagne Aze. Faie naho itika mitamà i Jehovah, le tsy ho voafita i Satana amy i hafetsea’e rey.

14. Mampibaribary ty inontikagne o fitsapagneo? Hazavao.

¹⁴ Toko’e ho hararaotentikagne mba hamantaragne ty tegnantika i fitsapagne mahazo antika rey. Nagnampe i Joba hahay ty fahaleme’e naho hagnitsy irey i fitsapagne nahazo aze rey. Nianara’e zao fa nila nikezake mba hiambane noho ty taloha reke. (Joba 42:3) Afake mianatse raha maro miomba ty tegnantikagne ka tika naho fa miatreke fitsapagne. Nigadraegne ohatse ty rahalahy Nikolay *, ie amy izao reke tamy izay narare mafe. Le hoe reke: “Hoe natao radio raho naho fa ginadra, satria nanjare nitreako tie inogne iaby ty toetse Kristiana mila ikezahako  hanagnagne.” Naho fa haintika amy izay i fahalementika rey, le afake mikezake tika mba hagnitsy aze.

15. Ia ty toko’e hotsanognantika, le inogne ty anto’e?

¹⁵ I Jehovah ro toko’e hotsanognantika fa tsy i fahavalontikagney. Nitsanogne i Joba soa ty Jehovah naho fa nisaontsy tama’e. Nampisaintsaigne aze ty Jehovah, le nisaontsy tie: ‘Mba fa nandineke o raha namboarekò vao rehe? Tsy misy mietake amako ze kila raha mahazo azo. Mihevetse vao rehe fa tsy vitako ty mikarakara azo?’ Niambane ty Joba naho fa namale i Jehovah sady tena nankasitraha’e ty hasoa toetse’e. Hoe ty Joba: “Honohono avao ty naharezako ty miomba azo, fa hinane zao le ty masoko ro mahatrea azo mivantagne.” (Joba 42:5) Tamy i Joba mbe nitoboke tan-davenoke teo naho nifeno baebae ty vata’ey, sady mbe nalahelo i ana’e reỳ ty nirehake o raha rehoe. Faie ndra tie teo rezay, le nihamafese i Jehovah tamy i Joba fa tea’e reke sady ankasitraha’e.​—Joba 42:7, 8.

16. Inogne ty raha toko’e ho tadidientikagne naho fa itika miatreke fitsapagne, arake ty Isaia 49:15, 16?

¹⁶ Amy izao ka o ndatio, le va’e hagnaratiraty antika naho hanao raha mba hanoroagne tie tsy misy dika’e tika. Va’e hanao ze hanimbagne ty lazantikagne tsikiraidraike ndra ty laza i fandaminagne ohatse iareo, sady ‘amorogna iareo vande le rehafe iareo tie nanao ze hene raha raty zao.’ (Mat. 5:11) Ianarantika boake amy ty tantara i Joba, fa matoky ty Jehovah tie tsy hivalike ama’e tika ndra tie miatreke fitsapagne aza. Tea i Jehovah tika sady tsy hienga ze mitamà aze reke. (Vakio ty Isaia 49:15, 16.) Ko mitsanogne ty fagnaratiratiagne  atao o fahavalon’Andrianagnahareo areke. Niatreke raha sarotse maro ty keleia i rahalahy James. Hoe reke: “Nitsapa’ay tie ho kivy zahay naho mitsanogne ty vande rehafe o ndatio miomba o vahoa i Jehovah-o. Nifantoke amy ty raha ampitamae i Fanjakagney avao areke zahay sady nikezake hazoto amy ty fanompoagne i Jehovah. Izay ty nahavy anay ho falefale avao.” Naho itika mitsanogne i Jehovah manahake i Joba, le hirebareba am-pontikagne ao i raha tamaentika rey ndra tie eo aza i vande i fahavalontikagne reỳ.

17. Inogne ty ianara’o boake amy i lahilahy naho i ampela nanam-pinoagne rehafegne amy Hebreo toko faha-​11 ao rey?

¹⁷ Tsy i Joba raike avao ty mpanompo i Jehovah tsy nivalike tama’e ndra tie niatreke fitsapagne maro aza. Naho fa nanoratse taratasy hoahy o Hebreò ty apostoly Paoly, le nirehake mpanompo i Jehovah tsy nivalike hafa ka. “Vavolombelogne hoe rahogne” ty irehafa’e aze. (Heb. 12:1) Sambe niatreke raha sarotse iaby iareo, faie tsy nivalike tamy i Jehovah hatrake ampara’e. (Heb. 11:36-40) Montso antoke avao vao ty fiaretagne naho ty asa mafe natao iareo? Oho’o. Ndra tie tsy nitrea iareo maso aza ty fahatanteraha i raha nampitamaen’Agnahare iareo rey, le mbe natoky i Jehovah avao iareo. Natoky ka iareo tie mbe hotrea iareo avao ty fahatanteraha irey, satria tena nirese lahatse iareo tie nankasitraha i Jehovah. (Heb. 11:4, 5) Ty modely iareo le magnampe antika ho tapa-kevetse ty hitamà i Jehovah avao.

18. Tapa-kevetse ty hanao ino rehe? (Hebreo 11:6)

¹⁸ Miharatimiharaty avao ty tontolo iaignantikagne toy. (2 Tim. 3:13) Tsy hado i Satana o vahoa i Jehovah-o fa lava ho tsapae’e avao ty finoa iareo. Lonike abey tika mba ho tapa-kevetse ty hiasa mafe hoahy i Jehovah, naho ‘hitamà i Andrianagnaharentikagne velogney’ ndra inogn’inogne fitsapagne hahazo antika amy ty hoavy. (1 Tim. 4:10) Tsiarovo fa ty fitahiagne nimey i Jehovah i Joba le porofo tie ‘bey hatea naho mamindra fo’ Reke. (Jak. 5:11) Lonike ka areke tika ho tapa-kevetse ty tsy hivalike amy i Jehovah, le hatoky tie hamale soa ‘ze mikodebe aze mafe’ ty Jehovah.​—Vakio ty Hebreo 11:6.