Niala ta Estonia agne ty rae aman-dreneko tamy fotoa i Aly Lahibey Faha-2, le nifindra an’Alemaigne agne. Tagne raho ty naterake. Ie tafara izay, le niomagne mba hifindra a Kanada agne iareo. Narine i Ottawa, a Kanada agne ty toeragne nisy anay voaloha’e. Tragnon’akoho kedekede zay ty tragno’ay tamy izay. Tena nahantra zahay, le atoly avao ty natao’ay hanegne maraindraigne.

Nisy Vavolombelo i Jehovah namaky ty Apokalypsy 21:3, 4 tamy i reneko tie indraike. Tena nanohigne ty fo’e ty raha nianara’e le nanomboke nitagny reke. Nitiry tam-po i babako naho i reneko tao i voa i hamarenagney le nandroso malaky iareo sady natao badisa.

Tsy le nahay angilé ty rae aman-dreneko, faie tena nafana fo tamy ty hamarenagne iareo. Niasa amy ty orinasa mpanefe vigne a Sudbury ta Ontario agne ty babako. Ndra tie miasa halegne aza reke le mateteke zahay amy i Sylvia, i zokeko ampelay, ro andese’e manompo avao naho fa isake sabotsy. Isan-keregnandro le mianatse Fitalakesan-davitse zahay keleian-draike. Nampea i Baba naho i Nene ho tea i Jehovah raho. Le izay ty nandrisike ahy hanokagne ty fiaignako ho aze tamy ty taogne 1956, tamy tie raho nifolo taogne. Nandrisike ahy mba hanompo aze avao ty fisaintsaignako ty hatea i rae aman-dreneko rey i Jehovah.

Naho fa niafake Baka raho, le nisy raha tsy nampifantoke ahy tamy ty fanompoagne. Hoe raho tie, naho iraho mpisava lalagne le tsy ho afake hipay vola hagnatanterahako ty nofinofiko hitingitse rapolany mba handeha hitete tane. Nahatrea asa tamy radio raho, le mpandefa hira ty niasako tao ndra manao DJ. Teako o asako iohoe. Faie mateteke halegne ty niasako, le nitapatapake ty fagnatrehako fivoriagne sady naman-draty ty niarahako. Tsy nampilamigne ty saiko zay noho ty raha nianarako tamy Baiboly ao, le niova raho.

Nifindra ta Oshawa, a Ontario agne raho, le tagne ty nifankatreavako tamy i Ray Norman naho i Lesli zai’e vaho ty mpisava lalagne hafa. Nirambese iareo soa raho tie tagne. Nagnampe ahy handineke indraike ty tanjoko amy ty fiaignako ty fahatreavako iareo falefale. Nirisihe iareo raho mba hanao mpisava lalagne, le nanao vata’e raho nanomboke tamy Septambra 1966. Tena nifale raho sady nisy tsiro’e ty fiaignako. Faie nisy raha tsy nampoizegne nagnova ty fiaignako, nandigne ahy tafara izay.

Tamy iraho mbe tamy lisé tey, le fa nameno fangatahagne mba hiasa amy Betela a Toronto, a Kanada  ao. Tafara izay, naho fa nanao mpisava lalagne raho, le nivoantso mba hiasa tao tagnate ty efatse taogne. Faie tena niteako ty Lesli, le natahotse raho kera tsy hahatrea aze sasa naho magneke i fanasagney. Nivavake mafe areke raho le nanapa-kevetse hiasa amy Betela ao. Nalahelo raho faie tsy maintsy nanao veloma i Lesli.

Niasa tamy ty fanasan-damba raho tie tao, le tafara izay natao sekretera. Tagnate ze fotoagne zay, le nanjare mpisava lalagne manokagne ta Gatineau, a Québec agne ty Lesli. Mateteke raho ro nieretseretse tie: ‘Mba manao akore ie zay ty agne! Nete vao ty fanapahan-keveko?’ Faie tafara izay, le nisy raha tena nahafale ahy sady tsy nampoizeko, niseho tamy ty fiaignako. Nivoantso hiasa amy Betela ao ka ty Ray, zoke i Lesli sady ni-efetse raike zahay. Nahavy ahy hifandrambe amy i Lesli ze raha zay. Nifanambaly zahay tamy taogne faha-4 fara’e niasako tamy Betela tao tamy 27 Fevrie 1971.

Tafara izay, le tinendre amy ty fiangonagne mampiasa firehake frantsay a Québec agne zahay. Nitampoke ahy taogne tsiampeampe tafara izay fa nahazo fanasagne hanao ty asa ty faritse zahay tamy iraho ni-28 taogney. Nitsapako tie mbe nitanora loatse raho sady tsy ampe fahaiagne hanao izay. Faie nampahery ahy ty Jeremia 1:7, 8. Indroe niazo ty aksidà tamy ty tobile ty Lesli, le nanjare tsy nimora azon-droro. Nieretseretse areke zahay tie ho sarotse ama’ay ty hanao ty asa ty faritse. Faie hoe ty Lesli: “Naho fa i Jehovah ro manasa antika hanao raha raike, le tsy toko’e hagnandragne hanao izay vao tikagne?” Neke’ay areke i fanendreagney sady tena nifale zahay ty nanao aze tagnate ty 17 taogne.

Maro raha natao raho, le tsy nanam-potoagne fire hiarahagne amy i Lesli. Nisy lesogne hafa nila nianarako areke. Nagneno ty sonery tamy ty lala-tragno’ay, tamy ze Tinainy maraindray zay. Tsy nisy ndaty ty tao fa harogne nisy voankatae, fromazy, mofo, divay, linety, lamba latabatse vaho taratasy nisy soratse tihoe: “Ndeso manao pikinike ty vali’o.” Nisoa i androy tamy izay. Faie nirehafeko tamy i Lesli tie misy lahajaka mila omanegne raho le tsy ho afake handeha. Nitaka’e zay faie nalahelo reke. Nagnenjeke ahy ty eretsereko naho fa iraho nitoboke tamy i biròkoy ao. Nisaintsaigneko ty Efesianina 5:25, 28. Nandrisike ahy hihevetse ty fihetseham-po i valiko ty raha nisaontsie i Jehovah tao. Naho fa boake nivavake raho, le hoe raho tamy i Lesli tie: “Andao ito.” Tena nifale reke. Nandeha tobile ho amoron-drano ey zahay, le namelatse i lamba latabatsey. Igne ty agnisa ty fotoagne tena nahafale niaraha’ay. Mbe afake nagnomagne i lahajakakoy raho tafara izay.

Tena nahafale anay ty nanao ty asa ty faritse. Maro ty fiangonagne nitilihe’ay nanomboke ta Kolombia Britanike agne hatrake a Terre-Neuve agne. Nitanterake i nofinofiko hitete taney. Nieretseretse ty hanao sekoly i Gileada raho faie tsy nagniry ty ho misionera an-tane hafa agne. Amako, le ndaty miambake ty manao izay, le tsy fagneva izay raho. Natahotse ka raho tsy mone halefa an’Afrika agne satria misy  aretegne naho aly ty agne. Le fa nahafale ahy avao ty ta Kanada tao.

Naho fa nisokake ty asa fitoriagne tamy ty faritse Sovietika agne tamy 1992, le nagnonteneagne zahay naho vognogne hifindra a Estonia agne mba ho misionera. Tsy nampoize’ay i rahay, le nivavake miomba izay zahay. Hoe indraike zahay: “Naho fa i Jehovah ro manasa antika hanao raha raike, le tsy toko’e hagnandragne hanao izay vao tika?” Neke’ay i fanendreagney sady heinhein ty fiai’ay fa tsy nalefa an’Afrika agne zahay.

Le avy le nianatse firehake estoniana zahay. Ie naho fa niafake roe volagne, le tinendre hanao ty asa ty faritse zahay. Nitilike fiangonagne 46 naho antoko mpitory tamy ty faritse Baltike agne zahay, agnisa izay ty Kaliningrad, a Rosia agne. Nila nianatse firehake letoniana, litoaniana naho rosiana areke zahay. Tsy nimora zay. Faie tena nanohigne ty fo ty nama’ay ty kezake natao’ay, le nagnampe anay iareo. Nahazo birò sampagne ty Estonia tamy 1999, le tinendre ho agnisa ty komity ty sampagne raho niarake tamy i Toomas Edur naho i Lembit Reile, vaho i Tommi Kauko.

Nanjare nahafantatse Vavolombelogne voalohandoha’e nindesegne ta Siberia agne zahay tie tagne. Ndra tie nampijalegne iareo tam-pirizò agne sady mbe nilavitse ty keleia’e, le tsy niboseke sady tsy namale fate. Nifalefale avao iareo sady nafana fo tamy ty fanompoagne. Trea’ay boake amy izay fa ho vita’ay ty hiaretse naho falefale avao ndra tie miatreke raha sarotse aza.

Niasa mafe avao zahay tagnate ty taogne maro sady zara’e naho mba nitofa, le niazo ty harokafam-bey ty Lesli. Tsy le avy le nitaka’ay tie nisy ifandrambesa’e amy ty areten-kozatse i harokafagney. Nieretseretse ty hienga i fanendreagne anaỳ areke zahay le hiheregne a Kanada agne. Naho fa nivoasa hiofagne a Patterson, a New York, a Etazonia agne zahay, le nisalasala tie tsy ho afake hagnatreke izay. Faie naho fa boake nivavake mafe zahay, le nagneke i fanasagney. Nitahie i Jehovah i fanapahan-kevetsey. Nahazo ty fitsaboagne tena nimete tama’e avao ty Lesli tamy ty fara’e tamy izahay nanao i sekolỳ. Ty voka’e, afake nanao soa ty asa’ay indraike zahay.

Indraike hariva zay tamy ty taogne 2008, tamy izahay fa niheregne a Estonia agney, le nahazo antso boake amy i foibey agne. Nagnontenea iareo raho tie: ‘Mete vao naho tendregne a Kongo agne nareo?’ Nitampoke ahy i rahay sady nila nivaleako ty hamaray igne avao. Tsy nambarako i Lesli i rahay satria tsy hampahazon-droro aze zay. Faie naho ty maregne, iraho ro tena tsy niazon-droro tamy izay. Nivavake miomba i raha mampinekoneko ahy an’Afrika agney avao raho.

Nambarako i Lesli i rahay ty maray igne, le hoe zahay tie: “Manasa antika ho an’Afrika agne ty Jehovah. Akore moa ty ahafantarantika tie tsy ho vitantikagne zay sady tsy hahafale antika naho tsy andramantika?” Tafara ty 16 taogne nihova’ay ta Estonia agne, le nandeha a Kinshasa a Kongo agne zahay. Feno  raha mitiry soasoa ty tamy birò sampagne tagne sady bangigne soa. Ty raha napetra i Lesli voaloha’e tamy ty efetse nisy anay tao, le ty kadira nindese’e boake a Kanada agne, nisy soratse tihoe: ‘Mifalea avao ndra aia aia ty misy azo.’ Nihanitombo avao ty hafalea’ay tamy ty fanompoagne tafara ty nifankatreava’ay tamo o rahalahio naho ty nitariha’ay fampianaragne Baiboly. Vao mainke fale ka zahay naho fa nahatrea tsiro’e tamy ty asa misionera. Tagnate ze fotoagne zay, le nahazo tombotsoa hitilike sampagne 13 amy ty tane hafa an’Afrika agne zahay. Nagnampe anay zay mba hahatrea ndaty sambe karaza’e naho ty mampiambake iareo. Tsy nampatahotse ahy sasa ty an’Afrika agne sady nisaotse i Jehovah zahay satria nalefa hanompo agne.

Maro ty karazan-kanegne nazotso ho anay ta Kongo tagne. Agnisa izay o bibibiby madinekeo, i aze tsy nieretserete’ay ho hanegne rey. Faie naho fa nitrea’ay nihinagne aze o rahalahio sady falefale, le mba nagnandragne ka zahay. Kay nitea’ay avao i rahay.

Afake nampahery naho ninday fagnampeagne ara-nofo hoahy ty mpiara-manompo amy ty faritse antignana i Afrika agne zahay. Nisy antoko o ndaty mpanafike nandrava tanàgne sady nampijale o ajaja aman’ampelao ty tagne. Nahantra ty ankamaroa o rahalahio. Faie tena nino iareo fa mbe hovelomegne o mateo, le nanohigne ty fo’ay ty nahatrea izay. Eo ka ty hatea iareo i Jehovah naho ty tsy fivaliha iareo amy ty fandamina’e. Nandrisike anay zay mba handineke sady hagnatanjake ty finoa’ay. Nisy tamy iareo ro nijale satria nisimba ty tragno’e naho ty vole’e. Naniahy ahy zay fa tsiela rava o raha ara-nofò fa ty fifandrambesantika amy i Jehovah ty raha tena lahibey. Tsy mba nigneogneogne zao o rahalahio ndra tie teo aza ty raha sarotse natrehe iareo. Nandrisike anay hanagne herim-po mba hiatrehagne ty olagne nanjò anay naho ty tsy fahasalamagne ty toe-tsaigne nanagna iareo.

Nisy raha tsy nampoizegne hafa ka niseho. Tinendre hifindra amy ty sampa i Hong Kong agne zahay. Tsy nieretserete’ay ty hipetrake Azia agne. Faie neke’ay i fanendreagney naho fa nandineke ty fomba nanehoa i Jehovah hatea anay tamy ty fanendreagne maro hafa fa niazo’ay zahay. Tamy 2013, le nipoke ty ranomaso’ay naho fa nienga ty ragne’ay naho ty raha  fanjaka tan’Afrika agne zahay. Tsy nihai’ay ka ty raha mbe hiseho afara ao.

Toeragne maro ndaty sady misy ndaty sambe karaza’e ty a Hong Kong agne, le nivaovao tama’ay ka ty niaigne tao. Tsy mora ka ty nianatse firehake sinoa. Faie nirambese o rahalahio soa zahay naho fa niavy agne sady nitea’ay ka ty hane iareo. Nitombo ty asa nila natao. Nila nitaregne amy ty toeragne hafa i asay, faie sarotse ty vily o tane naho o tragnò hagnitaragne i asay. Le nanapa-kevetse areke ty Filan-keve-pitantanagne fa ho avily ty ankamaroa ty fanagna i sampagne mba hahafahagne manao izay. Tafara kede izay tamy 2015, le nafindra ta Korea Atimo agne zahay mba hanohy ty fanompoa’ay. Nila nianatse firehake hafa tena sarotse ka zahay tie etoa. Faie ndra tie tsy le mahay mirehake soa zahay le mampahery anay ty reha o mpiara-manompò tie, mba fa mihasoa ty fahaia’ay i rehake koreanay.

Tsy mora tihoe hahazo namagne vaovao naho fa mifindra an-tane hafa agne. Faie nitrea’ay tie naho fa manao raha voaloha’e tika mba handrambesagne o ndatio, le tsiela avao le fa mahazo namagne maro. Nitrea’ay tie ndra tie ndaty sambe hafa karaza’e aza o rahalahio le maro ka ty raha mampitovy iareo. Finoro i Jehovah mba ho afake hanokake ty fontika tika sady haneho hatea amy ty namantikagne iaby.​—2 Kor. 6:11.

Nitrea’ay ka tie ilaegne ty magnaja o ndatio manahake ty atao i Jehovah amy iareo. Ilaegne ka ty mamantatse ty hatea i Jehovah antika naho ty tari-dala’e. Naho fa kivy zahay ndra misalasala naho tea anay ty hafa, le vakie’ay indraike ty karta naho ty taratasy mampahery boake amy ty nama’ay. Nitsapa’ay fa namale ty vavake natao’ay, nagnomey toky anay, naho nagnatanjake anay ty Jehovah.

Nianara’ay amy i Lesli tagnate ty taogne maro fa tena raha lahibey ty manokagne fotoagne ho anay ndroroe ndra manao akore akore ty hamaro ty raha atao’ay. Nitaka’ay tie tena ilaegne ty mba mihehe naho fa manao hadisoagne lohotsie naho fa mianatse firehake vaovao. Mikezake misaintsaigne ty raha fanjaka azo’ay isaoragne i Jehovah ka zahay isake hariva.

Tsy mba nieretsereteko ze o misionera ndra hipetrake an-tane hafa agne zao. Faie nitreako tie tsy misy raha tsy ho tanterake noho ty fagnampea i Jehovah. Tena nahafale ahy ty nahatrea izay. Tadidiko ty reha i Jeremia mpaminany manao tihoe: “O Jehovah, nifitahe’o raho.” (Jer. 20:7) Ie, maro ty raha mahafale tsy nampoizegne naho fitahiagne tsy nieretserete’ay faie nimea i Jehovah anay. Agnisa izay ty fagniriako hitingitse rapolany le handeha an-tane hafa agne. Maro ty toeragne fa nomba’ay faie tsy nieretsereteko tamy iraho mbe niajajay. Fa nitilike sampagne dime tamy ty tane sambe hafa zahay. Tena ankasitrahako ty nifahavognona i Lesli hanohagne ahy avao, tamy ze fanendreagne niazo’ay.

Tadidie’ay avao tie, ze kila raha atao’ay le hatao’ay hoahy i Jehovah sady noho ty hatea’ay aze. Ty fitahiagne azontika amy izao, le mampiseho fa mbe maro ty raha fanjaka ho azontika nainai’e naho fa ‘hamelatse i fità’ey ty Jehovah, le hagnomey fahafaham-po ty fagniria ze raha miaigne.’​—Sal. 145:16.