1. Ino ty raha tsy maintsy ataontika naho te ho votso-belogne amy andro i Jehovah-y?

 NAHO fa mirehake miomba ty “andro i Jehovah” ty Baiboly, le ty fotoagne hamonovonoa’e o fahavalo’eo naho hagnavota’e ty vahoa’e ty tea’e ho rehafegne. Nisy firenena ila’e zao nisazea i Jehovah tie taloha. (Isaia 13:1, 6; Ezek. 13:5; Zef. 1:8) Naho amo o androntika zao, le hanomboke amy ty fanafihagne i Babilona Lahibey o “andro i Jehovah” iohoe, le ty aly Aramagedona ty hamaragne aze. Amy izao tika le fa mila miomagne naho te ho votso-belogne amo o “andro” iohoe. Tsy nirehake avao ty Jesosy tie, mivognona nareo fa ho avy i “haoreagne lahibeỳ” fa “mivognona lognandro” nareo.​—Mat. 24:21; Lioka 12:40.

2. Ino ty soa rambesentika boake amy ty 1 Tesalonianina?

² Nampiasa fagnoharagne tsiefa ty apostoly Paoly amy ty taratasy nisorate’e voaloha’e hoahy o Tesalonianao. Nagnampe ty Kristiana tamy izay io mba ho vognogne lognandro amy ty andro lahibey hitsarà i Jehovah. Nihay i Paoly tie, tsy le avy le ho avy amy ze fotoagne zay o andro iohoe. (2 Tes. 2:1-3) Faie nandrisike o mpiara-manompo ama’eo reke mba hiomagne amo o andro iohoe, manahake tihoe fa ho avy maray. Azontika ampiharegne ka ty toroheve’e. Andao ho dinehentika ty nagnazava’e iretoa: 1) Akore ty fomba hiavia ty andro i Jehovah? 2) Ia ty tsy ho votso-belogne ama’e? 3) Le ino ty azontika atao mba ho votso-belogne?

3. Nagnino i andro Jehovah-y ro azo ampitoviegne amy ty mpangalatse avy halegne? (Henteo i sarey.)

³ “Manahake o mpangalatse avy halegneo.” (1 Tes. 5:2) Io ty voaloha’e amy ty sarin-drehake telo, irehafagne ty fomba hiavia  ty andro i Jehovah. Mateteke o mpangalatseo ro manao raha malaky sady avy petsakalegne, amy ty fotoagne tsy ampoize o ndatio sady maha gaognen-droro iareo. Hoe izay ka i andro i Jehovah-y, fa ho tampoke amy ty ankamaroa o ndatio ty hiavia’e. Faie tsy hanahake o ndaty raty fagnahio tika satria tsy hanjò antika i famonovonoagney.

4. Nagnino ty andro i Jehovah ro azo ampitoviegne amy ty farare ty ampela mitsongo?

⁴ “Manahake ty farare ty ampela mitsongo.” (1 Tes. 5:3) Tsy tena hay o ampela mivesatseo tie ombia maregne ty fotoagne hiteraha’e. Faie mino reke fa tsy maintsy ho avy eo zay. Naho fa avy ze fotoagne zay, le va’e ho tampoke sady harare tsy misy fitofà’e reke amparake ty hiteraha’e. Hoe izay ka fa tsy haintika ty andro naho ty lera hiavia i andro i Jehovah-y. Faie matoky tika, fa tsy maintsy ho avy i andro hitsaran’Agnaharey sady ho tampoke amy ty ndaty raty fagnahy ro tsy misy afake ilaìsa iareo.

5. Nagnino i haoreagne lahibeỳ ro manahake ty mpangalatse tsy nagnampo tie ho tra i androy?

⁵ Manahake ty mpangalatse tsy nagnampo tie ho tra i androy. Mpangalatse mangalatse amy i halegney ty fagnoharagne fahatelo nirehafe i Paoly. Faie etoa reke, hoe nampitovy i andro i Jehovah-y amy ty mpangalatse tsy nagnampo tie ho tra i androy. (1 Tes. 5:4) Va’e tsy ho tsapa i mpangalatsey tie mandeha i leray. Va’e ho tra i andro manjirikey eo reke, le tsy misy azo’e hietahagne sasa. Tsy ho afake hilay i haoreagne lahibeỳ ka ze ndaty tsy mete miova, manahake ty mpangalatse tra i androy le tsy misy hietahagne sasa. Faie tsy hoe izay tika fa toko’e ho vognogne avao, le handietse ze findesam-batagne tsy mampifale i Jehovah. Ilaentika ty ‘managne i hasoa toetse isan-karaza’e rey, manao raha vantagne naho ty hamarenagne.’  (Efes. 5:8-12) Tafara izay ty Paoly, le nirehake fagnoharagne roe mampiseho tie ia ty ndaty tsy ho votso-belogne.

6. Miroro amy ty lafi’e ino ty ankamaroa o ndatio? (1 Tesalonianina 5:6, 7)

⁶ “Ze miroro.” (Vakio ty 1 Tesalonianina 5:6, 7.) Nampitovie i Paoly amy ty ndaty azon-droro ze ndaty tsy ho votso-belogne amy i andro i Jehovah-y. Tsy maharendreke ty raha magnodidigne aze ndra ty fandeha o lerao ty ndaty azon-droro. Tsy hay iareo areke ze raha lahibey miseho sady tsy afake manao ndra inogn’inogne iareo. Azon-droro ara-pagnahy ka ty ankamaroa o ndatio ty amy izao. (Rom. 11:8) Tsy inoa iareo tie fa miaigne amy ty andro fara’e tika sady fa marine ho avy i haoreagne lahibeỳ. Naho fa misy fiovagne lahibey miseho magneran-tane vaho izay ty ndaty ila’e tsekake sady mba liagne kedekede amy ty hafatse miomba i Fanjakagney. Faie ndra tie eo zay, le mbe maro ty ndaty miroro ara-pagnahy. Ndra ze ndaty mino i andro fitsaragney aza le mihevetse tie, mbe tsy etoy tane zay. (2 Pet. 3:3, 4) Faie haintika tie tena ilaegne amy hinane zao ty mifoha lognandro amy ty lafi’e ara-pagnahy.

7. Nagnino o ndaty habaibain’Agnahareo ro azo ampitoviegne amo o ndaty mamò?

⁷ “Ze tondregne amy ty finoman-toake.” Nampitovie i apostolỳ amy ty ndaty mamo ze ndaty habaibay. Legnalegna sady tsy mahay ty raha miseho magnodidigne aze ty ndaty mamo ro tsy mahay manapa-kevetse. Hoe izay ka fa tsy midare ty fampitaoan’Agnahare ty ndaty raty fagnahy. Mitarike amy ty famonovonoagne iareo ty fomba fiaignagne jobogne iareo. Faie ty Kristiana, misaigne soa fa tsy manahake o ndaty mamò. (1 Tes. 5:6) Nihazavae ze manam-pahaiagne raike miomba ty Baiboly zay fa tihoe misaigne soa, le “mahay manahatsahatse, tsy taitaitse naho fa mamantatse ty raha tena misy mba handrambesagne fanapahan-kevetse soa.” Tsy toko’e ho taitaitse tika satria naho tsy izay, le va’e ho voatarike hilitse amo o aly hevetse ara-politikeo naho amo o olagne misy amo o fiaraha-monegneo. Arakarake ty iharinea i andro i Jehovah-y ro vao mainke mafe ty fanereagne mba hahavy antika hilitse amo o raha rehoe. Faie tsy toko’e hampinekoneko antika zay. Afake magnampe antika tsy ho taitaitse naho handrambe fanapahan-kevetse soa ty fagnahy masin’Agnahare.​—Lioka 12:11, 12.

8. Nagnino ty toetse amy 1 Tesalonianina 5:8 ao ro magnampe antika hifoha lognandro sady hisaigne soa? (Henteo i sarey.)

⁸ “Agnisio i fiarovan-tratray ... vaho i fiarovan-dohay.” Nampitovie i Paoly amy ty maramila miambegne sady magnisy akanjo findesegne mialy tikagne. (Vakio ty 1 Tesalonianina 5:8.) Tamaegne ho vognogne avao o maramilao naho fa misy aly. Toko’e ho vognogne amy i andro i Jehovah-y avao ka tikagne, le hiakanjo ty finoagne naho ty hatea ho fiarovan-tratra vaho hagnisy ty fiarovan-doha mampiseho i raha tamaentikagney. Tena magnampe antika reo.

9. Nagnino ty fanagnagne finoagne ro miaro antikagne?

⁹ Miaro ty fo o maramilao ty fiarovan-tratra. Miaro ty fontika agn’ohatse ka ty finoagne naho ty hatea. Magnampe antika hanompo i Jehovah naho hanonjohy ty lia i Jesosy avao reo. Ty finoagne ro mahavy antika hatoky fa hamale soa antika ty Jehovah naho mipay aze amy ty fo tika. (Heb. 11:6) Mahavy antika tsy hivalike amy i Jesosy, i mpitarike antikagney ka io, ndra tie miaretse raha sarotse aza tika. Hatanjake ty finoantika naho mandineke ty ohatse nenga ty mpanompon’Agnahare amy izao. Niatreke fagnenjehagne ndra olagne ara-bola  iareo faie nahavita tsy nivalike. Tsy ho voafandry ty hatea vola naho fanagnagne ka tika naho mitsikombe i aze nagnatsotra ty fiaigna’e rey, le nanao voalohan-draha i Fanjakagney. b

10. Nagnino ty hateantika an’Agnahare naho o ndatio ro magnampe antika hiaretse?

¹⁰ Tena ilaegne ty hatea mba hahavy antika hifoha lognandro naho hisaigne soa. (Mat. 22:37-39) Magnampe antika hahavita hitory avao le hiaretse ze olagne miseho ty hateantika an’Agnahare. (2 Tim. 1:7, 8) Teantika ka ndra ze ndaty tsy manompo i Jehovah aza, le mitory avao tika sady miasa ty faritane misy antikagne, ndra an-telefony zay ndra an-taratasy. Tsy kivy tika sady mitamà fa mbe hiova naho hanao ty soa o ndatio indraike andro agne.​—Ezek. 18:27, 28.

11. Nagnino ty hateantika o mpiara-manompò ro magnampe antika? (1 Tesalonianina 5:11)

¹¹ Teantika o mpiara-manompò. Mampiseho izay tika naho fa ‘mampahery sady magnampe iareo lognandro.’ (Vakio ty 1 Tesalonianina 5:11.) Mila mifanohagne tika ndra mifampahery, manahake o maramila agn’aly agneo. Faie va’e handratse ty maramila nama’e ty maramila raike naho fa agn’aly agne faie tsy satrie’e zay. Hoe izay ka fa tsy hisatry hanao raha va’e hamparare fo o mpiara-manompò tika ndra ka hamale fate iareo. (1 Tes. 5:13, 15) Atorontika ka tie teantika iareo naho fa itika magnaja o rahalahy voatendreo. (1 Tes. 5:12) Tamy i Paoly nanoratse taratasy hoahy o Tesalonianao, le mbe tsy niampe herentaogne ty niforogna i fiangonagney. Va’e mbe tsy le za-draha loatse ty lahilahy tinendre tao sady va’e ho nanao diso. Faie nifagneva ty hajaegne iareo. Noho i haoreagne lahibey fa mariney, le amy izao tika ro tena mila miantehetse amo o androanavi-pagnahintikagneo mba hahazoagne tari-dalagne. Ty anto’e, va’e tsy ho afake hahazo izay boake amy ty rahalahy amy foibey agne naho amy ty birò i sampagne agne tika. Tena ilaegne areke ty mianatse ho tea naho hagnaja o androanavi-pagnahintikagneo manomboke amy izao. Ndra inogn’inogne olagne miseho, le toko’e  hatorontika tie misaigne soa tika. Ko mifantoke amy ty tsy fahavoririha iareo fa ty fomba itariha i Jehovah o lahilahy tsy mivalike rehoe amy ty alala i Kristy.

12. Nagnino ty raha tamaentika ro miaro ty saintika?

¹² Miaro ty loha o maramilao o fiarovan-dohao. Miaro ty saintika ka ty fanantenantika famonjeagne. Naho mafe ty fanantenantika, le ho heverentika ho tsy misy dika’e ty raha atolo ty tontolo toy. (Fil. 3:8) Magnampe antika ho tony ty fanagnantika raha tamaegne. Mieke izay ty Wallace naho i Laurinda, manompo Afrika agne. Tagnate ty telo heregnandro nifanese, le nimate ty rene i Laurinda naho ty baba i Wallace. Noho i COVID-19-oy, le tsy afake namonje i fatey niarake tamy ty keleia’e iareo. Hoe ty Wallace: “Nagnampe ahy halake sare an-tsaigne i rae aman-drene’ay rey ty fampitamaegne famelomagne ty mate. Tsy ty andro fara’e niaigna iareo tamy ty tontolo toy eto ty nisaintsaigneko, fa ty andro voaloha’e hamelomagne iareo amy i paradisay ao. Nagnampe ahy ho tony zay naho fa malahelo iareo raho.”

13. Ino ty azontikagne atao mba hahazoagne fagnahy masigne?

¹³ “Ko engagne ho mate ty afo ty fagnahy.” (1 Tes. 5:19) Nampitovie i Paoly amy ty afo agnatentikagne ao ty fagnahy masigne. Naho fa managne io tika, le manjare mafana fo sady mazoto manao ty soa vaho mahazo hery hanoagne ty asa i Jehovah. (Rom. 12:11) Akore ty hahazoantika fagnahy masigne? Amy ty alala ty vavake, ty fianaragne ty Saontsin’Agnahare naho ty fiarahagne amy ty fandamina i Jehovah tarihe ty fagnahy masigne. Magnampe antika hanagne “i vokatse ty fagnahy masigne” rey ty fanoagne ireo.​—Gal. 5:22, 23.

14. Ino ty raha mila itaoantika naho teantika ty hahazo ty fagnahy masin’Andrianagnahare avao? (Henteo i sarey.)

¹⁴ Naho fa mahazo ty fagnahy masin’Andrianagnahare tika, le mila mitao mba “tsy hamono ty afo i fagnahỳ.” Ze ndaty mikezake tsy hieretsere-draty naho halio findesam-batagne avao ty homean’Agnahare ty fagnahi’e masigne. Tsy hagnomey antika io reke naho mbe manohy mieretsere-draty naho magnatanterake  izay tika. (1 Tes. 4:7, 8) Toko’e ho heverentika ho raha lahibey ty “faminaniagne” naho teantika ty hahazo fagnahy masigne avao. (1 Tes. 5:20) Tihoe “faminaniagne” rehafegne eo, le manondro ty hafatse boake amy ty fagnahy masin’Agnahare, agnisa izay ty miomba i andro i Jehovah-y naho tihoe fa marine ty hiavia ty fara’e. Toko’e ho tadidientika avao fa antitotse i andro i Jehovah-y sady tsy toko’e hieretseretse tika tie mbe tsy ho amy ty androntikagne ty hiavia i Aramagedonay. Mikezake areke tika mba halio findesam-batagne naho “hahafoe tegna lognandro hoan’Agnahare.”​—2 Pet. 3:11, 12.

15. Ino ty hagnampe antika tsy le avy le hino ze raha rehafe o ndatio naho ty fagnambaragne boake amy demonia? (1 Tesalonianina 5:21)

¹⁵ Tsy ho ela, le hanao fagnambaragne tihoe: “Fiadanagne naho filaminagne!” o mpanohetse an’Andrianagnahareo. (1 Tes. 5:3) Ho rey amy ty tane toy iaby ty fagnambaragne boake amy demonia, le maro ty ho voafitake. (Apok. 16:13, 14) Faie tsy ho voafitake tika naho “magnamaregne soa ze kila raha.” (Vakio ty 1 Tesalonianina 5:21.) Ty rehake grike nandikagne tihoe “magnamaregne soa”, le irehafagne ty fomba hagnamarenagne naho volamena ndra volafotsy vata’e ty ravake raike. Mila hamaregnentika soa ty raha reintika naho vakientikagne. Raha lahibey tamo o Tesalonianao zay. Vao mainke areke toko’e ho heverentika ho lahibey ty fanoagne izay satria fa mihamarine i haoreagne lahibeỳ. Tsy toko’e le avy le hino ze raha rehafe o ndatio tika, fa mila mampiasa ty saintika, le mampitaha ze raha vakientika naho reintikagne amy ty Baiboly naho amy ze raha rehafe i fandaminagne. Tsy ho voafita ty fagnambaragne boake amy demonia tika naho manao izay.​—Ohab. 14:15; 1 Tim. 4:1.

16. Ino ty fampitamaegne azo antoke anagnantikagne, sady tapa-kevetse hanao inogne tika?

¹⁶ Haintika fa ty vahoa i Jehovah amy ty fitambara’e ro ho votso-belogne amy i haoreagne lahibeỳ. Faie tsy haintika ty raha hanjò antika tsikiraidraike naho maray. (Jak. 4:14) Ndra ho tra i haoreagne lahibeỳ tika ndra ho mate aloha izay, le afake mitamà fa hahazo havelogne nainai’e naho tsy mivalike. O voahosotseo zao, mitamà hiarake amy i Kristy an-dagnitse agne. Le o agnondry hafao, mitamà hiaigne amy ty paradisa an-tane etoy. Lonike tika iaby mba hifantoke amy i raha fanjaka tamaentikay, naho ho vognogne amy i andro i Jehovah-y!