1. Nagnino ty Jesosy ro nangatake tamy i Jehovah mba hiaro o mpiana’eo?

TAMY i halegne fara’e taloha ty namonoagne azey ty Jesosy, le nieretseretse ty raha sarotse hatrehe i mpiana’e rey. Tea i Jesosy iareo, le nivavake taman-dRae’e reke “mba hiaro iareo amy i ratỳ.” (Jaona 17:14, 15) Fa nihay i Jesosy tie tsy ho ela reke, le hiheregne an-dagnitse agne. Nihai’e ka tie hanohy hialy amy ze ndaty te hanompo i Jehovah ty Satana Devoly. Mila ty fiarova i Jehovah areke o vahoa’eo.

2. Nagnino tika ro afake matoky fa hamale ty vavake anoentika ty Jehovah?

² Tea i Jehovah i Ana-dahi’ey, le nivalea’e i vavake nanoe’ey. Naho mikezake manao ze fara herintika mba hampifaleagne i Jehovah tika, le ho tea’e ka, sady ho valea’e ty vavake anoentika naho fa itika mangatake fagnampeagne naho fiarovagne ama’e. Amy ty maha Loha ty keleiagne i Jehovah, le vognogne hikarakara o ana’eo aman-katea reke. Ty anto’e, naho tsy manao izay reke, le ho afa-baraka i tahina’ey ndra ho simba ty laza’e.

3. Nagnino tika ro mipay ty fiarova i Jehovah amy hinane zao?

³ Vao mainke tena mipay ty fiarova i Jehovah tika hinane zao. Ty anto’e, “tena boseke” ty Satana naho fa natorake hirike an-dagnitse agne. (Apok. 12:12) Atao’e ohatse ze hahavy o ndaty magnenjeke antikagneo hieretseretse tie “manao fanompoagne masigne ho an’Andrianagnahare iareo.” (Jaona 16:2) Magnenjeke antika ka o ndaty tsy mino an’Andrianagnahareo, satria tsy manahake ty ndaty amy ty tontolo toy tika. Faie ndra inogn’ino anto’e agnenjeha o ndatio antika, le tsy  matahotse tika. Ty anto’e, hoe ty Baiboly: ‘Miaro o ndaty tsy mivalike ama’eo ty Jehovah.’ (Sal. 31:23) Andao tika handineke fomba roe iarova i Jehovah antika.

4. Naho henteagne ty Efesianina 6:13-17, ino ty raha nimey i Jehovah mba hiarovagne antika?

⁴ Nimey i Jehovah fialiagne fiarovagne tika mba hiarovagne antika amy ty fanafihagne atao i Satana. (Vakio ty Efesianina 6:13-17.) Mafe o fitaovagne fialiagne ara-pagnahy iohoe sady tena maharo antika! Faie tsy hiaro antika io naho tsy agnisiantikagne. Andao hodinehentika tie ino iaby ty mahaforogne o fialiagne fiarovagne iohoe, le ino ty tondroe iareo tsikiraidraike.

5. Manondro ino i sentiray, le nagnino tika ro tsy maintsy magnisy aze?

⁵ Anò sentira ambania’areo eo ty hamarenagne amy ty Saontsin’Andrianagnahare ao. Nagnino tika ro tsy maintsy magnisy o sentira iohoe? Satria “rae ty vande” ty Satana. (Jaona 8:44) Fa agn’arivo’e taogne zay reke ro navande naho namitake ‘ty ndaty amy ty tane toy iaby.’ (Apok. 12:9) Faie miaro antika tsy ho voafita’e ty hamarenagne amy Baiboly ao. Magnisy o sentira iohoe areke tika naho fa mianatse ty maregne miomba i Jehovah, manompo aze “arake ty fagnahy naho ty hamarenagne”, sady manao ty maregne amy ze kila raha.​—Jaona 4:24; Efes. 4:25; Heb. 13:18.

6. Manondro ino i fiarovan-tratray, le nagnino tika ro tsy maintsy magnisy aze?

⁶ Agnisio i fiarovan-tratray ndra ty fahitsiagne. Tsy ino zay fa ty fitsipy i Jehovah. Nagnino tika ro tsy maintsy magnisy o fiarovan-tratra iohoe? Miaro ty fo o maramilao o fiarovan-tratrao. Miaro antika hoe izay ka ty fahitsiagne mba tsy hisy voka’e amy ty fontika agn’ohatse ty raha raty amy ty tontolo toy eto. (Ohab. 4:23) Také i Jehovah ty hiteavantika naho hanompoantikagne aze amy ty fontika. (Mat. 22:36, 37) Atao i Satana areke ze hahavy ty fontika hizarazara, le ho tea ty raha amy ty tontolo toy naho ty raha heje i Jehovah. (Jak. 4:4; 1 Jaona 2:15, 16) Naho tsy voa’e amy ireo tika, le horohoroe’e, amy izay manao raha mifanohetse amy ty fitsipy i Jehovah.

7. Akore ty ampisehoantika tie magnisy i fiarovan-tratray tika?

⁷ Magnisy i fiarovan-tratra agn’ohatsey ndra ty fahitsiagne tika naho mampihatse ty fitsipy i Jehovah miomba ty soa naho ty raty amy ty fiaignantika. (Sal. 97:10) Misy ndaty mieretseretse tie mamehefehe ty fiaigna’e ty fitsipy i Jehovah. Faie naho itika tsy mampihatse ty toro lala ty Baiboly, le azo ampitoviegne amy ty maramila raike magnafake i fiarovan-tratra’ey amy iareo mialỳ. Va’e mieretseretse reke tie magnavesatse aze i fiarovan-tratray. Faie hagegeagne tsy roe aman-tane zay! Fa ze ndaty tea i Jehovah, le mihevetse tie miaro aze ty lili’e fa ‘tsy magnavesatse’ aze.​—1 Jaona 5:3.

8. Ino ty dika tihoe mikiraro fahavognonagne hitory ty talily soa i filongoagney?

⁸ Nandrisike antika ka ty Paoly tie: ‘Asio kiraro fahavognonagne hitory ty talily soa i filongoagney ty tombo’areo.’ Toko’e ho vognogne hitory ty talily soa miomba i Fanjakagney ndra ty hafatse boake agnate Baiboly ao areke tika. Naho itika manao izay, le hitombo ty finoantika. Tena mampahery ty mahatrea tie mipay hirike hitoriagne i talily soay ty vahoa i Jehovah magneneke ty tane toy iaby. Mitory ohatse iareo ndra ampiasagne agne, an-dakilasy agne, amy ty toeragne maro birò, isan-tragno, a bezara ey, amy ty longo iareo tsy vavolombelogne, naho amy ty ndaty fanta iareo. Mitory avao ka iareo ndra tie tsy afake  miboake ty tragno iareo aza. Naho matahotse tika le tsy mitory sasa, le azo ampitoviegne amy ty maramila raike magnafake ty kiraro’e amy iareo mialỳ. Ty voka’e, va’e haratse ty tombo’e, le tsy hahavita hiaro tegna naho hagnorike ze raha ampanoe i sefo iareoy reke.

9. Nagnino tika ro mila minday i fikalagnam-balantikagne agn’ohatsey?

⁹ Manondro ty finoantika i Jehovah i fikalagnam-bala jabajabay. Mino tika fa ho tanterahe i Jehovah iaby ze raha ampitamae’e. Io ka ty magnampe antika “hamono ze bala-polesidoro mirehetse atify i ratỳ.” Mila minday o fikalagnam-bala jabajaba iohoe tika, satria io ty miaro antika mba tsy ho voafita ty fampianara o mpivalim-pinoagneo sady tsy ho kivy naho fa misy ndaty magnaratiraty ty raha inoantika. Naho tsy manam-pinoagne tika, le tsy hahavita hankatò ty fitsipy i Jehovah naho fa misy ndaty mamoresé antika tsy hankatò aze. Mbe an-tagnantika ey i fikalagnam-balantikagney, kanao tika mahavita miaro ty finoantika naho fa am-piasagne agne ndra an-dakilasy agne. (1 Pet. 3:15) Mbe an-tagnantikagne ey ka io, kanao tika mahavita mandietse tsy hanao asa raike soa karama, faie va’e tsy hahavitantika soa ty fanompoantikagne. (Heb. 13:5, 6) Miaro antika i fikalagnam-balantikagney kanao  tika mahavita manompo i Jehovah avao ndra tie misy manohetse aza.​—1 Tes. 2:2.

10. Manondro ino i fiarovan-doha ty famonjeagney, le nagnino tika ro tsy maintsy magnisy aze?

¹⁰ Ty fiarovan-doha i famonjeagney le manondro ty raha ampitamae i Jehovah antika. Tsy ino zay fa ty fampitamà’e hagnavotse antika amy ty fate naho hamale soa ze ndaty manao ty zoton’arofo’e. (1 Tes. 5:8; 1 Tim. 4:10; Tit. 1:1, 2) Miaro ty loha o maramilao o fiarovan-dohao. Hoe izay ka fa miaro ty fahaiantika misaigne i fiarovan-doha ty famonjeagney. Ty anto’e, magnampe antika hifantoke amy ty raha ampitamae i Jehovah naho amy ty lafesoan-draha io naho fa itika miatreke olagne. Magnisy o fiarovan-doha iohoe tika naho fa mikezake mampifagnarake ty fomba fiheventika amy ty fomba fiheve i Jehovah. Tsy mametrake ty fanantenantika amy ty harena tsy azo antoke ohatse tika, fa aman’Andrianagnahare.​—Sal. 26:2; 104:34; 1 Tim. 6:17.

11. Manondro ino i mesabey i fagnahỳ, le nagnino tika ro tsy maintsy mampiasa aze?

¹¹ Ty mesabey i fagnahỳ le manondro ty Saontsin’Andrianagnahare, ndra ty Baiboly. Mahery o mesabey iohoe, le mahavita mampibaribary ty vande ampianare o ndatio sady magnafake o ndatio amo o fampianaran-disò naho amy ty fahazaran-draty. (2 Kor. 10:4, 5; 2 Tim. 3:16, 17; Heb. 4:12) Mizatse mampiasa o mesabey iohoe tika naho fa mianatse raike sady mandrambe ty fampiofagnagne mey i fandaminagne. (2 Tim. 2:15) Faie mbe misy fitaovagne hafa tena mahery ka mey i Jehovah antika. Ino zay?

12. Ino ka ty raha paliaentikagne, le ino ty anto’e?

¹² Eké ty maramila raike za-draha tie tsy ho vita’e irerike ty handrese i maramila maro fahavalo iareoy. Mila ty fagnampea o maramila nama’eo reke. Tsy ho vitantika raike avao ka ty hanohetse i Satana naho ty mpanohagne aze. Mila ty fagnampea o mpiara-manompo amantikagneo tika. Nimey i Jehovah o rahalahy magneran-taneo tika mba hanohagne antika.​—1 Pet. 2:17.

13. Ino ty soa azontika naho fa magnatreke fivoriagne tika, arake ty Hebreo 10:24, 25?

¹³ Fomba raike ahazoantika ty fagnampea o rahalahio naho o rahavaveo ty fagnatrehagne fivoriagne. (Vakio ty Hebreo 10:24, 25.) Kindraike tika kivy. Faie hahazo fampaherezagne tika naho magnatreke fivoriagne amy i fotoagne rey. Mampahery antika ohatse ty toin-drehake mey o mpiara-manompò naho ty lahajaka vaho ty anjara atao iareo, satria magnampe antika ho tapa-kevetse hanompo i Jehovah avao. Mahazo fampaherezagne ka tika naho fa mirehake amy iareo aloha naho afara i fivoriagney. (1 Tes. 5:14) Manjare fale ka tika naho fa mivory, satria afake magnampe ty hafa tika naho fa agne. (Asa. 20:35; Rom. 1:11, 12) Misy soa azontika ka naho fa mivory. Mihasoa ohatse ty fahaiantika mitory naho mampianatse, satria atoro antikagne agne ty fomba fampiasagne o Fitaovagne Fampianaragneo. Omano soa areke o fivoriagneo. Mifantoha soa ka naho fa agne, le ampiharo ze raha nianara’o. Naho manao izay rehe, le hanjare ho “maramila fanjaka i Kristy Jesosy.”​—2 Tim. 2:3.

14. Ia ka ty magnampe antika?

¹⁴ Magnampe antika ka o anjely mahery an-tapetrisa’eo. Anjely raike avao zao, le fa mahavita raha miambake. (Isaia 37:36) Saintsaigno areke tie hanao akore ty raha ho vita o tafy i Jehovah an-tapetrisa’eo! Tsy misy ndaty ndra demonia mahavita mandrese o tafy i Jehovah tena mahery reo. Naho fa ampea i Jehovah ty mpanompo’e raike, le manjare  hoe tsy ampe o mpanohetse aze marò. (Mpits. 6:16) Tena maregne zay! Tadidio o hevetse rehoe naho fa tsikihe ty mpiara-miasa ama’o ndra ty mpiara-mianatse ama’o ndra ty longo’o tsy vavolombelogne rehe. Matokia fa tsy mialy raike rehe, satria magnorike ty tari-dala i Jehovah.

15. Nagnino ro tsy misy mahavita mikalagne ty vahoa i Jehovah tsy hanao i asa i fitoriagney, arake ty Isaia 54:15, 17?

¹⁵ Ino iaby ty anto’e mahavy ty tontolo fehe i Satana toy halaigne antika? Tsy manohagne antoko polotike naho tsy mandrambe anjara amy ty aly tika. Magnambara ty tahinan’Andrianagnahare ka tika, mitory tie ty Fanjakà’e avao ro hinday fiadanagne an-tane etoy sady magnorike ty fitsipy i Jehovah. Atorontika o ndatio fa mpavande biby raty naho mpamono ndaty i mpifehe ty tontolo toỳ. (Jaona 8:44) Ambarantika ka fa ho ravaegne ty tontolo i Satana toy tsy ho ela. Faie ndra tie atao i Satana naho ty mpanohagne aze ty hikalagnagne antika tsy hagnambara izay, le mipay fomba hideragne i Jehovah arake ze vitantikagne avao tika. Ndra tie mahery aza ty Satana, le tsy nivita’e ty nikalagne i hafatse miomba i Fanjakagney tsy ho rey ty ndaty magneran-tane. Ty anto’e, eo avao ty Jehovah miaro antika.​—Vakio ty Isaia 54:15, 17.

16. Ino ty raha hatao i Jehovah hoahy o vahoa’eo amy i haoreagne lahibeỳ?

¹⁶ Akore amy ty hoavy? Ino zao ty raha hatao i Jehovah hoahy o vahoa’eo amy i haoreagne lahibeỳ? Hiaro ze mpanompo’e tsy mivalike reke naho fa handrisike ty mpanjaka amy ty tane toy iaby mba handrava i Babylona Lahibey ndra ty fivavahan-diso iaby magneran-tane. (Apok. 17:16-18; 18:2, 4) Hiaro iareo ka reke naho fa handrava ze sisa’e amy ty tontolo i Satana toy amy i Hara-magedonay.​—Apok. 7:9, 10; 16:14, 16.

17. Ino ty soa ho rambesentika naho mifandrambe marine amy i Jehovah avao tika?

¹⁷ Naho itika mifandrambe marine amy i Jehovah avao, le tsy hisy raha azo i Satana atao mba hampijaleagne antika nainai’e. I reke ro ho ringagne nainai’e. (Rom. 16:20) Agnisio avao areke i fitaovagne fialiagne rey iaby, le ko misy engagne ndra raike. Ko mialy raike. Tohagno o rahalahi’o naho o rahavave’o reo, le oriho avao ty tari-dala i Jehovah. Naho ihe manao ireo, le afake matoky fa hagnomey hery naho hiaro azo i Baba’o bey hatea an-dagnitse agney.​—Isaia 41:10.