Misy Kristiana ila’e mampiasa varam-bazaha mba hifandrambesagne amy ty longo’e naho amo o mpiara-manompò. Faie mitadidy ty torohevetse amy Baiboly ato toy ty Kristiana matotse naho fa manao izay: “Mahafantatse mialoha ty loza hiseho ty mahimbagne le mietake, fa ty tanora fagnahy mbe mizilike mbeo avao vaho mijale.”​—Ohab. 27:12.

Te hiaro antika ty Jehovah, le rarà’e tika mba tsy hifandrambe amy i ndaty tsy mampiharo saigne antika rey naho amy i ndaty voaroake rey, ndra mampianatse heve-diso rey. (Rom. 16:17; 1 Kor. 5:11; 2 Jaona 10, 11) Misy Kristiana ila’e ka ndra ty ndaty mifandrambe ama’e va’e tsy tena magnorike soa ty lily i Jehovah. (2 Tim. 2:20, 21) Tsiarontika reo naho fa itika mijobogne ty ndaty ho namantika. Fa naho fa itika mampiasa i programa fandefasagne mesaze rey, le va’e ho sarotse ty hamantatse tie ndaty soa ndra raty ty ndaty inamagnantika.

Misy goropy ila’e amy i programa rey ao tena maro ty ndaty agnate’e ao. Mila dinehe ty Kristiana raike soa areke tie fahendreagne vao ty hizilihagne amo o goropy iohoe. Va’e tsy raty ty anto’e mandrisike ty Kristiana ila’e hizilike amy i goropy rey. Faie ho vita’e vao ty hitao soa naho ndaty an-jato’e ndra agn’arivo’e ty mifandrambe ama’e ao? Fa sarotse ama’e aloha ty hamantatse tie manao akore o ndaty reo, le manao akore ka ty ara-pagnahy iareo. Hoe ty Salamo 26:4: “Tsy miharo toboke amy ty ndaty tsy maregne raho, sady tsy mifagnosehose amy ze magnetake ty maha ie aze.” Tsy te hirehake vao io tie ze ndaty fantantika soa avao ro toko’e hifandrambesantika naho fa mampiasa i programa fandefasagne mesaze rey tika?

Faie mila mitao ka ty Kristiana raike ndra tie tsy ampe avao aza ty ndaty amy ty goropy iziliha’e. Ty anto’e, va’e ho tondregne hamale ndra hamaky ze raha alefa iareo eo avao reke. Tsy toko’e hieretseretse tika tie tsy maintsy valeantika ze mesaze alefa iareo, ndra inogn’ino zay, le ndra amy fire ndra amy fire. Nampitao i Timoty amo o ndaty ‘tea tolom-bolagneo’ ka ty Paoly. (1 Timoty 5:13) Tsy sarotse ty manao ireo naho fa mampiasa varam-bazaha.

Tsy magnaraty ndra mirehake ty tsiambaratelo ty mpiharo finoagne ama’e ty Kristiana matotse. (Sal. 15:3; Ohab. 20:19) Tsy toko’e hitsanogne ndra hampiparitake tantara tsy maregne ndra vaovao tsy azo antoke ka reke. (Efes. 4:25) Maro zao ty hanegne ara-pagnahy naho vaovao azo antoke azontika boake amy ty tragnom-porarontikagne jw.org ao naho amy i fandaharagne Tele JW isam-bolagney.

Misy Kristiana ila’e ka mampiasa i programa fandefasagne mesaze rey mba hivarotagne, hivilianan-draha, naho hanoagne dokam-barotse ndra hagnomeagne asa hoahy ze mipay asa. Raharaham-barotse reo, le tsy toko’e hafangaro amy ty fanompoantikagne i Jehovah. ‘Tsy tea vola’ areke ty Kristiana raike naho tsy manao o rahalahio naho o rahavaveo ho fitaovagne fipaliavam-bola.​—Heb. 13:5.

Toko’e hampiasa i programa fandefasagne mesaze rey ka vao tika mba hamoriagne vola hagnampeagne o Kristiana sahiragne ndra niazom-boigneo? Maregne fa teantika iareo, le te hanohagne naho hampahery iareo tika. (Jak. 2:15, 16) Faie naho amy ty alala i programa fandefasagne mesaze rey ty anoantika izay, le ho sarotse amy i sampagne ndra o androanavi-pagnahy amo o fiangonagneo eò ty hagnampe iareo, satria fa misy lamigne natao mba hagnampeagne iareo. (1 Tim. 5:3, 4, 9, 10, 16) Tsy teantika ka naho misy ndaty lasa mieretseretse tie itika ty nahazo fanendreagne manokagne mba hikarakara o agnondry i Jehovah-o.

Teantika naho lava magnomey voninahitse i Jehovah avao ze raha ataontika. (1 Kor. 10:31) Mila mitao areke rehe naho fa mampiasa i programa fandefasagne mesaze rey, amy izay tsy ho azon-doza.