1. Nagnino tika ro tsy toko’e ho gaga naho heje ty ndaty amy ty tontolo toy, arake ty Matio 24:9?

NAMBOARE i Jehovah ho afake haneho hatea naho hahatsapa ho teagne tika. Izay mahavy antika malahelo naho fa heje o ndatio. Va’e hatahotse iaby aza tika. Hoe ty Georgina *, rahavave mitoboke a Eoropa agne: “Niheje i reneko raho naho fa nanomboke nanompo i Jehovah tamy i raho ni-14 taogne. Tena nanahelo naho nahatsiaro ho raike areke raho, sady nisalasala tie kera tsy mete ty raha nataoko.” Hoe ka ty rahalahy Danylo: “Natahotse sady nahatsiaro ho tsy misy dika’e raho naho fa jinera o maramilao, nanoa iareo rehake raty sady nihorohoroe iareo, noho i raho Vavolombelo i Jehovah.” Mamparare fo ty raha hoe ireo. Faie tsy mahalatsa antika zay, satria fa nirehake ty Jesosy tie ho heje o ndatio tika.​—Vakio ty Matio 24:9.

2-3. Nagnino o mpanonjohy ty lia i Jesosio ro heje ty tontolo toy?

² Fa nagnino ty mpanonjohy ty lia i Jesosy ro heje ty tontolo toy? Ty anto’e, “tsy agnisa ty tontolo toy” manahake i Jesosy iareo. (Jaona 15:17-19) Maregne fa magnaja o manam-pahefàgneo tika. Faie tsy magneke hanompo iareo ndra handrambe naho hanao ze raha famantaragne iareo tika, satria i Jehovah raike avao ro tompoentikagne. Manohagne ty zo i Jehovah hinday tika ndra tie manohetse izay aza ty Satana naho ty “tarana’e.” (Gen. 3:1-5, 15) Mitory ka tika tie ty Fanjakàn’Andrianagnahare raike avao ro hahavoavaha ty olagne mahazo o ndatio, sady tsy ho ela io le handringagne ze manohetse aze. (Dan. 2:44; Apok. 19:19-21) Talily soa hoahy o ndaty mpandefetseo zay, fa vaovao raty hoahy ty ndaty raty fagnahy.​—Sal. 37:10, 11.

³ Heje ty tontolo toy ka tika, satria magnorike ty lilin’Andrianagnahare. Ie amy izao mifanohetse tanterake amy ty raha  atao ty ndaty amy ty tontolo toy ty raha takegne amo o lily rehoe. Mieretseretse ohatse ty ankamaroa o ndatio amy hinane zao tie tsy raty ty findesam-batagne nanagna o ndaty ta Sodoma naho ta Gomora agneo, i tanàgne rinavan’Andrianagnaharey! (Joda 7) Noho itika magnorike ty fitsipy ty Baiboly, agnisa izay ty fitsipi’e miomba ty findesam-batagne, le maro ty ndaty mitsikike naho mirehake antika tie saroten-draha!​—1 Pet. 4:3, 4.

4. Ino ty toetse roe hagnampe antika hahavita hiaretse ty falaigna o ndatio antikagne?

⁴ Ino ty hagnampe antika hahavita hiaretse ndra tie malaigne naho magnaratiraty antika aza o ndatio? Mila managne finoagne matanjake tika, ndra matoky fa hagnampe antika ty Jehovah. Azo ampitoviegne amo o ‘fikalagnam-balao’ ty finoagne, satria ‘mahavita mamono ty bala-polesidoro mirehetse atify i ratỳ.’ (Efes. 6:16) Mila managne hatea ka tika. Ty anto’e, ‘tsy ho tsiela boseke’ naho hahavita hiaretse ze raha va’e hahaboseke antikagne tika naho managne hatea. (1 Kor. 13:4-7, 13) Hodinehentika hinane zao tie nagnino ty hateantika i Jehovah naho o mpiara-manompò vaho o ndaty malaigne antikagneo ro magnampe antika hahavita hiaretse fankalaignagne.

5. Nagnampe i Jesosy hahavita inogne ty hatea’e an-dRae’e?

⁵ Hoe ty Jesosy tamo o mpiana’eo, tamy i halegne taloha ty namonoa o fahavalo’eo azey: “Mba hahafantara ty tontolo toy fa teako ty Rae, le ze nandilia i Rae ahy ro ataoko.” (Jaona 14:31) Nagnampe i Jesosy hahavita hiaretse ty raha sarotse nahazo aze ty hatea’e i Jehovah. Hahavita hiaretse hoe izay ka tika naho tea i Jehovah.

6. Ino ty tsapa o mpanompo i Jehovah-o naho fa miaretse ty falaigna ty tontolo toy, arake ty Romanina 5:3-5?

⁶ Nahavita niaretse ty fagnenjehagne nahazo iareo o mpanompo i Jehovah-o amparake izay, satria nanagne hatea aze. Naho fa rinara o Fitsaragne Ambone Jiosio tsy hitory sasa ohatse o apostolio, le hoe iareo: “Andrianagnahare ro mpitondra anay le ie ro orihe’ay fa tsy ndaty.” Noho ty hatea iareo i Jehovah ty nahavità iareo izay. (Asa. 5:29; 1 Jaona 5:3) O hatea iohoe ka ty magnampe o rahalahio hiaretse ty fagnenjeha o mpitondra raty fagnahio vaho o fitondram-panjakagne matanjake amy hinane zaò. Faie ndra tie malaigne antika aza ty tontolo toy, le tsy kivy tika fa vao mainke fale.​—Asa. 5:41; vakio ty Romanina 5:3-5.

7. Ino ty toko’e hataontika naho fa magnenjeke antika o keleiantikagneo?

⁷ Ty fagnenjeha o longontikagneo antika varagne ty agnisa ty raha raike tena mafe amantika ty miaretse aze. Naho fa trea iareo ohatse tie te hianatse miomba i Jehovah tika, le va’e hieretseretse ty ila’e amy iareo tie voafitake tika. Va’e hisy amy iareo hirehake tie minegne tika. (Ampitahao amy ty Marka 3:21.) Va’e hampijale antika aza iareo. Faie tsy toko’e hahagaga antika zay, satria fa nirehake ty Jesosy tie: ‘Ty keleia o ndatio avao ro ho rafelahi’e.’ (Mat. 10:36) Faie ndra inogn’ino fihevera o longontikagneo antika, le tsy toko’e ho rambesentika ho rafelahintikagne iareo. Mila mampitombo ty hateantikagne i Jehovah tika, amy izay hitombo ka ty hateantika o ndatio. (Mat. 22:37-39) Faie tsy mete naho tsy magnorike ty fitsipy ty Baiboly naho ty toro lala’e tika, satria te hampifale ndaty.

8-9. Ino ty nagnampe i Georgina hahavita hiaretse, ndra tie mafe aza ty fagnenjehagne nahazo aze?

⁸ Nahavita tsy nivalike ty Georgina, i rahavave nirehafegne taloha teoy, ndra tie nagnenjeke aze aza ty rene’e. Hoe reke: “Niarake nianatse Baiboly zahay amy i reneko tamy ty voaloha’e. Faie ie enem-bolagne tafara izay, le niova hevetse reke sady nanohetse ahy naho fa ni-te hivory raho. Ty anto’e, kay reke namaky ty raha  aboa o mpivalim-pinoagneo, le nirehafe’e tamako i heve-diso iareo rey. Niharatiratie’e ka raho, niriridririte’e ty voloko, nifeoze’e sady nariaria’e iaby i bokeko rey. Natao badisa raho naho fa ni-15 taogne. Faie le mbe nataon-dreneko avao ze hahavy ahy tsy hanompo i Jehovah sasa. Nasese’e amo o toeragne fitezagne ajaja marengerengeo agne areke raho. Ampela mpifoke rongony naho tea aly ty niarake nitoboke tamako tey. Mafe ty miaretse o fagnenjehagneo, lohotsie naho ndaty tamae’o ho tea azo naho hikarakara azo ro manao izay azo.”

⁹ Ino ty nagnampe i Georgina? Hoe reke: “Tamy i reneko nanomboke nagnenjeke ahỳ, le fa nahavita vaky Baiboly hatrake ampara’e raho. Nirese lahatse areke raho fa nahatrea ty hamarenagne sady nitsapako tie nifandrambe marine amy i Jehovah raho. Nivavake mateteke tama’e raho, le tsapako tie nijanjigne ahy reke. Nisy rahavave raike zay nitaogne ahy ho ama’e agne tamy i raho tamy i toeragne fitezagne ajaja marengerengey agney, le niarake nianatse ty Saontsin’Andrianagnahare zahay. Nampahery ahy ka o mpiara-manompò tamy i fotoagne rey. Nirambese iareo manahake ty ana iareo raho. Tena rese lahatse raho fa mahery mandikoatse o mpanohetse antikagneo ty Jehovah, ndra ia reke ndra ia.”

10. Ino ty raha atokisantika fa hatao i Jehovah, i Andrianagnaharentikagney?

¹⁰ Nirehake ty apostoly Paoly fa tsy hisy “hahasarake antikagne amy ty hatean’Andrianagnahare, aseho amy ty alala i Kristy Jesosy Tompontikagney.” (Rom. 8:38, 39) Matokia fa ho agnilantika eo avao ty Jehovah hampahery naho hagnatanjake antika, ndra tie va’e hisy ndaty hampijale antika aza. Treantika amy ty raha niaigna i Georgina fa magnampe antika amy ty alala o mpiara-manompò ka ty Jehovah.

11. Nagnino ty hatea nirehafe i Jesosy amy Jaona 15:12, 13 ao ro nagnampe i mpiana’e rey? Mirehafa ohatse raike.

¹¹ Tamy i halegne taloha ty nimateza’ey ty Jesosy, le nandily o mpiana’eo indraike mba hifankatea. (Vakio ty Jaona 15:12, 13.) Hay i Jesosy fa hagnampe iareo hiharo saigne naho hahavita hiaretse ty falaigna ty tontolo toy o hatea feno fahafoezan-tegna iohoe. Dineho ohatse ty raha niaigna ty Kristiana ta Tesalonika agne. Vaho nanomboke nioregne o fiangonagne iohoe, le fa nisy nagnenjeke. Faie nahavita niaretse naho nifankatea avao iareo ndra tie teo zay. (1 Tes. 1:3, 6, 7) Nandrisike iareo mba hifankatea avao ty Paoly sady “hampitombo”  izay. (1 Tes. 4:9, 10) O hatea iohoe ty nandrisike iareo hanao rehake mampahery ty kivy naho hanohagne ze miatreke raha sarotse. (1 Tes. 5:14) Nagnorike i raha nandrisiha i Paoly hatao iareoy iareo, kanao ty Paoly afake nirehake hoe izao tamy i taratasy faharoe nisorate’e hoahy iareoy: “Mihamitombo ty fifampikokoa’areo.” (2 Tes. 1:3-5) Nagnampe iareo hahavita hiatreke raha sarotse naho fagnenjehagne ty hatea nanagna iareo.

12. Akore ty nampisehoa ty rahalahy naho rahavave tamy ty tane raike fa nifankatea iareo naho fa nisy aly ty tamy iareo tagne?

¹² Dineho ka ty raha nanjò i Danylo, i rahalahy nirehafegne taloha teoy, naho i vali’e. Nisy aly ty tamy iareo tagne. Naho fa nitatse tamy i tanàgne nisy iareoy agne i alỳ, le mbe nivory avao iareo sady nitory arake ze vita iareo. Nizarae iareo tamo o mpiara-manompò ka ty hanegne nanagna iareo. Nisy maramila niavy ty tan-tragno amy iareo tao tie indraike. Hoe ty Danylo: “Nirehake iareo tie: ‘Isintaho o fivavaha’ò.’ Faie nandietse raho, le jinera iareo. Nihorohoroe iareo ho tifiregne raho, le natao iareo tandrife i lohakoy i basỳ. Mbe nagnorohoro ahy ka aza iareo naho fa ho nandeha tie mbe hiheregne eo, le hamahotse i valiko. Faie le avy le nalefa o mpiara-manompò an-tane hafa agne malaky zahay, le nampandehane iareo lamasina. Tsy hohaligno’ay ty hatea naseho iareo anay. Naho vaho niavy amy i tanàgne nifindra’aỳ agne zahay, le nisy rahalahy nagnomey hanegne anay naho nagnampe ahy hahatrea asa vaho tragno hitoboha’ay. Ty voka’e, afake nandrambe ze mpiara-manompo nilay boake amy i tanàgne nisy anay talohay agne zahay.” Treantika boake amy igne fa magnampe antika hahavita hiaretse fankalaignagne ty hateantika o mpiara-manompò.

13. Nagnino ty fagnahy masigne ro magnampe antika hiaretse fankalaignagne?

¹³ Hoe ty Jesosy tamo o mpanonjohy ty lia’eo: ‘Teao ty rafelahi’areo.’ (Mat. 5:44, 45) Maregne fa tsy mora zay. Faie ho vitantika zay naho fa ampea ty fagnahy masigne tika. Agnisa ty vokatse ty fagnahy ty hatea, manahake o faharetagneo, o hasoa fagnahio, o fahalemem-pagnahio naho o fifehezan-tegnao ka. (Gal. 5:22, 23) Magnampe antika hiaretse fankalaignagne o toetse rehoe. Maro amy i ndaty nanohetse antika rey zao ro niova naho fa naneho o toetse rehoe tama’e ty vali’e, ndra ty ana’e, ndra ty mpiharo tanàgne ama’e  Vavolombelogne. Maro amy iareo aza ty fa nanjare rahalahy naho rahavaventika amy izao. Naho sarotse ama’o areke tihoe ho tea ty ndaty malaigne azo noho i rehe manompo i Jehovah, le mangataha fagnahy masigne. (Lioka 11:13) Matokia ka fa lava mahasoa avao ty tari-dala i Jehovah, le oriho.​—Ohab. 3:5-7.

14-15. Nagnino ty Romanina 12:17-21 ro nagnampe Yasmeen hahavita haneho hatea amy i vali’e, ndra tie nanohetse aze aza reke?

¹⁴ Dineho ohatse ty raha nanjò Yasmeen. Naho fa nanjare Vavolombelo i Jehovah reke, le nieretseretse ty vali’e tie voafitake reke. Natao’e areke ze hikalagnagne Yasmeen tsy hanompo i Jehovah. Niharatiratie’e ty Yasmeen. Nirisihe’e o longo’eo naho ze mpitarike fivavahagne vaho ze ambiasa raike zay hagnorohoro Yasmeen naho hirehake tie nao zao manimba ty fiaigna iareo mirovaly reke. Nandeha tam-pivoriagne agne aza reke tie indraike, le nikorakorahe’e naho niharatiratie’e o rahalahio naho o rahavaveo. Mateteke ty Yasmeen ro nitagny, satria tsy mba nisoa fagnahy tama’e ty vali’e.

¹⁵ Faie nampahery naho nagnatanjake Yasmeen o rahalahio naho o rahavaveo naho fa tam-pivoriagne tagne. Nandrisike aze hampihatse ty Romanina 12:17-21 ka o androanavi-pagnahio. (Vakio.) Hoe ty Yasmeen: “Tsy mora ty nampihatse io, faie nangatake fagnampeagne tamy i Jehovah raho. Nikezake mafe areke raho mba hampihatse o toroheve ty Baiboly iohoe. Naho fa napopo i valiko an-dakozi’ay ao avao areke o fakò, le niraofeko. Naho fa nagnaratiraty ahy reke, le nivaleako aman-kasoa fagnahy. Naho fa narare ka reke, le karakaraeko soa.”

16-17. Ino ty ianara’o boake amy ty raha niaigna Yasmeen?

¹⁶ Nisy voka’e soa ty fanehoa Yasmeen hatea tamy i vali’e. Hoe reke: “Vao mainke nanjare natokisa i valiko raho, satria lava mirehake ty maregne avao. Nanjare nagnaja ahy reke naho fa nirehake ama’e miomba ty fivavahagne raho. Tsy nasiake tamako sasa ka reke. I reke aza mandrisike ahy hivory amy hinane zao. Vao mainke mifandrambe soa ka zahay mirovaly sady milamigne ty fiaigna’ay an-tragno ao. Mitamà raho fa mbe hagneke ty hamarenagne avao reke indraike andro agne, le hanompo i Jehovah miarake amako ka.”

¹⁷ Trea amy ty raha niaigna Yasmeen fa “mandefetse ze kila raha, mitamà ze kila raha, naho miaretse ze kila raha ty hatea.” (1 Kor. 13:4, 7) Misy voka’e raty naho mamparare fo o fankalaignagneo. Faie mahery ambone io ty hatea, satria  mahavita magnova ty fo o ndatio. Ho fale ka ty Jehovah naho maneho hatea tika. Faie ndra tie tsy miova aza o mpanohetseo, le afake ty ho fale avao tika. Fa nagnino?

18. Nagnino tika ro afake ho fale avao ndra tie heje o ndatio aza?

¹⁸ Hoe ty Jesosy: “Haha nareo naho heje o ndatio.” (Lioka 6:22) Tsy teantika tihoe heje o ndaty naho enjehegne noho ty finoantika. Nagnino areke tika ro afake ho fale avao ndra tie heje o ndatio aza? Intoa misy anto’e telo: Voaloha’e, mahazo ty fankasitrahan’Andrianagnahare tika naho fa miaretse. (1 Pet. 4:13, 14) Faharoe, mihamatanjake ty finoantika. (1 Pet. 1:7) Fahatelo, hahazo valesoa tika, le i havelogne nainai’ey.​—Rom. 2:6, 7.

19. Nagnino o apostolio ro nifale tafara ty nijeragne iareo?

¹⁹ Nahatsapa i hafaleagne nirehafe’e tamy iareoy o apostolio tafara ty namelomagne i Jesosy tamy ty mate. Tafara ty nijeragne naho nandraragne iareo tsy hitory sasa, ohatse, le nifale iareo. Fa nagnino? “Satria natao fagneva ty ho salaregne noho ty agnara [i Jesosy] iareo.” (Asa. 5:40-42) Ambone ty taho iareo o rafelahy iareò ty hatea iareo i Tompo iareoy. Trea zay naho fa “tsy nitofa” iareo fa nagnambara i talily soay avao. Maro ka ty rahalahy naho rahavaventika amy izao manohy ty fanompoa iareo avao, ndra tie miatreke raha sarotse aza. Hay iareo tie tsy hagnaligno ty asa mafe natao iareo naho ty hatea naseho iareo hoahy ty tahina’e ty Jehovah.​—Heb. 6:10.

20. Ino ty hodinehentika amy ty lahatsoratse magnarake?

²⁰ Tsy maintsy halaigne antika avao ty tontolo toy amparake ty handravàgne aze. (Jaona 15:19) Faie tsy toko’e hatahotse tika, satria arake ty hodinehentika amy ty lahatsoratse magnarake, le ‘hiaro o ndaty tsy mivalike ama’eo ty Jehovah.’ (Sal. 31:23) Lonike areke tika mba hampitombo ty hateantika i Jehovah naho ty hateantika o mpiara-manompò vaho ty hateantika o ndaty malaigne antikagneo. Naho itika manao izay, le hiharo saigne sady hatanjake ty finoantika. Hagnomey voninahitse i Jehovah ka tika sady hagnaporofo tie mahery ambone o fankalaignagneo ty hatea.