Va’e hampipoke ze fagnonteneagne zay vata’e ty ndaty ila’e naho mamaky o andinin-teny rehoe memeke avao. Faie naho ty maregne le tsy raike avao ty Mefiboseta rehafegne ao fa roe, sady misy lesogne azontika ianaragne boake amo o raha niseho iohoe.

Sive ty niana i Saoly Mpanjaka: Lahilahy fito, le ampela roe. I Jonatana ty ana-dahi’e voaloha’e. Niterake ana-dahy tamy i Rizpa, i valy masai’ey ty Saoly naho fa tafara tatoy, le natao’e Mefiboseta ty agnara’e. Mahaliagne fa naho fa niterake ana-dahy ka ty Jonatana, le natao’e Mefiboseta ty agnara’e. Midika areke zay tie ana-dahy i Saoly Mpanjaka ty Mefiboseta raike, le zafe’e ty raike.

Nisy fotoagne ty Saoly Mpanjaka nanomboke nalaigne o Gibeonita nipetrake tamo o Israelio eò sady nitea’e ho vonovonoegne agne iaby iareo. Va’e fa maro aza ty vinonovono’e tamy iareo. Tena tsy mete ze raha natao’e zay. Fa nagnino? Satria nanao vava tamo o Gibeonitao ty lahibey ty foko tamo o Israelio eo fa tsy hamono iareo.​—Jos. 9:3-27.

Mbe nanan-kery o fifagnekeagne iohoe tamy ty andro i Saoly Mpanjaka. Faie nifanipake amy i fifagnekeagney ty raha natao i Saoly, satria ndra nivonovonoe’e o Gibeonitao. Nahavy i ‘Saoly naho ty keleia’e ho meloke nampité lio’ ze raha natao’e zay. (2 Sam. 21:1) Nanjare mpanjaka avao ty Davida tamy ty fara’e. Nirehake tama’e miomba i hadisoagne lahibey natao i Saolỳ ze Gibeonita tsy nimate tamy i famonovonoagney. Le nagnontane iareo ty Davida tie akore ty hatao mba handrongonagne ze hakeo natao i Saoly zay, sady mba hahavy i Jehovah hitahy i tane iareoy. Faie tsy mba vola ty nangatahe iareo fa le ty ana-dahy i lahilahy fa ‘ho nanjamagne’ iareoy. Tea iareo hatolotse iareo i ana-dahi’e fito rey mba ho vonoegne ka. (Nom. 35:30, 31) Nagneke ze fangataha iareo zay ty Davida.​—2 Sam. 21:2-6.

Fa nimate agn’aly agne ty Saoly naho i Jonatana tamy ze fotoagne zay. Faie i Mefiboseta i ana-dahy i Jonatanay mbe nivelogne. Nisy loza nahazo aze ty Mefiboseta tamy ireke mbe nikedey, le nanjare nanan-kandra. Azo inoagne areke fa tsy nandrambe anjara tamy ty famonoa i dadabei’ey o Gibeonitao reke. Nanao fifagnekeagne tamy i Jonatana ka ty Davida fa ho mpiragnetse avao iareo. Afake nandrambe soa tamy io ty tarana i Jonatana, agnisa izay ty Mefiboseta ana-dahi’e. (1 Sam. 18:1; 20:42) Hoe ty Baiboly: “Faie niferegnesa i mpanjakay [Davida] ty Mefiboseta, i ana-dahy i Jonatana, i ana-dahy i Saolỳ, noho i fifagnekeagne natao’e tamy i Jonatana tagnatreha i Jehovah eoy.”​—2 Sam. 21:7.

Faie ndra tie teo zay, le mbe nitanterahe i Davida avao i fangataha i Gibeonita reỳ. Natolo’e iareo i ana-dahy i Saoly roe rey naho i zafe’e dime lahy rey. I Mefiboseta ty agnara ty raike amo o ana-dahy i Saoly reo. (2 Sam. 21:8, 9) Ze raha natao i Davida zay ty nahavy i tane iareoy tsy ho meloke nampité lio.

Tsy tihoe tantara tsotra avao o raha niseho iohoe. Mazava ty lilin’Agnahare toy: “Tsy toko’e hovonoegne noho ty fahotan-drae’e ty anake.” (Deot. 24:16) Tsy ho nankasitraha i Jehovah areke ty famonoagne i ana-dahy i Saoly roe rey naho i zafe’e dimey naho ohatse tsy nanan-tsiny iareo. Hoe ka i lily i Jehovah-y: “Fa noho ty fahotagne nivita’e avao ty hamonoagne ty ndaty tsikiraidraike.” Azo inoagne areke fa nandrambe anjara tamy ty famonoagne i Gibeonita rey ka i tarana i Saoly fito lahy rey kanao nivonoegne. Nimate noho ty fahota’e avao iareo.

Trea amo o fitantaragne iohoe ka fa naho manao raha raty ty ndaty raike, le tsy afake atao’e fialan-tsiny ty fieretseretagne ndra firehafagne tihoe nagnorike ty maro avao reke. Tompon’andraikitse amy ty raha atao’e reke. Hoe ty boke Ohabolana: “Anò mahitsy soa ze andehana ty tombo’o, le ho azo antoke soa ty lala’o iaby.”​—Ohab. 4:24-27; Efes. 5:15.