Nagnino i lahilahy tsy fantatse agnaragne longo i ry Naomỳ ro nirehake tie “ho simba ty lova’e” naho manambaly i Rota reke? (Rota 4:1, 6; f.a.p.)

Tamy ty andro ty Baiboly, le nipetrake ty fagnonteneagne retoa naho nisy lahilahy mate tsy niterake: Ia ty handova ty tane’e? Ho mate raike agnaragne vao reke? Magnampe antika hahay ty vale ireo ty Lalà i Mosesy.

Naho mate tsy niterake ty lahilahy raike, le ty rahalahi’e ndra ty longo’e maifitse aze ty nandova i tane’ey. Fa naho nanjare nahantra ty lahilahy raike, le namarotse ty tane’e, le ty rahalahi’e ndra ty longo’e maifitse aze ty nivily ndra nagnavotse i tane’ey. Tsy nifindra amy ty keleiagne hafa i lova’ey amy izay.​—Nom. 27: 8-11; Lev. 25:23-28.

Faie akore ty hahavy i lahilahỳ tsy ho mate raike agnaragne? Mila manambaly i ampela nivali’ey ty rahalahi’e ndra ty longo’e maifitse aze mba tsy hahamontso i agnara’ey ndra ty lova’e. Hoe izay zao ty raha niseho tamy i Rota. Nandrambe soa amo o lamigne feno hatea iohoe ka i ampela mate valỳ.​—Deot. 25: 5-7; Mat. 22:23-28.

Dineho ty raha niaigna i Naomy. Nanambaly ze lahilahy raike atao tihoe Elimeleka zay reke. Naho fa nimate ty Elimeleka naho i ana-dahi’e roe rey, le tsy nisy namelogne naho nikarakara sasa ty Naomy. (Rota 1: 1-5) Naho fa noly ta Joda agne ty Naomy, le nirehafe’e ty Rota vinanto’e, mba hiangavy i Boaza hivily i tane iareoy. Longo i Elimeleka maifitse ty Boaza. (Rota 2: 1, 19, 20; 3:1-4) Faie nitsiaro i Boaza tie mbe misy lahilahy raike tena maifitse i Naomy mandikoatse aze. O lahilahy iohoe areke ro managne zo voaloha’e hivily i tane iareoy.​—Rota 3:9, 12, 13.

Te ho nagnampe heike i lahilahy tsy fantatse agnaragney tamy ty voaloha’e. (Rota 4:1-4) Vognogne ho nagnampe i ry Naomy reke ndra tie ho nandania’e vola bey aza zay. Ty anto’e, nihai’e fa tsy misy afake handova i taney sasa, satria fa antetse ty Naomy le tsy afake hiterake sasa. Nieretseretse areke o lahilahy iohoe tie hahazo tombo’e reke satria hitombo ty lova’e.

Faie naho fa nihai’e tie tsy maintsy manambaly i Rota ka reke, le niova hevetse reke. Hoe reke: “Tsy afake magnavotse areke raho naho izay reke, tsy mone ho simba ty lovako.”(Rota 4:5, 6; f.a.p.) Ino ty nampiova hevetse aze?

Ze manambaly i Rota ndra zay o lahilahy tsy fantatse agnaragne iohoe ndra ndaty hafa sady miterake lahilahy ama’e ka, le ze ajaja zay ty handova i tane i Elimelekay. Nagnino zay ro “hanimba ty lova” i lahilahy tsy fantatse agnaragney? Tsy rehafe ty Baiboly ty anto’e. Faie intoa misy anto’e va’e nahavy aze nirehake izay.

• Voaloha’e, ho montso avao ty vola niviliana’e i tane i Elimelekay, satria tsy ho aze i taney fa hoahy ty ana-dahy i Rota.

• Faharoe, tsy maintsy ireke ka ty hamelogne i Naomy naho i Rota.

• Fahatelo, naho mbe terake amo o lahilahy tsy fantatse agnaragne io indraike ty Rota, le mbe mahazo lova miarake amy ty ana i lahilahỳ hafa i ana’ey.

• Fahaefatse, naho tsy nanagne anake hafa o lahilahy tsy fantatse agnaragne iohoe, le ty ana i Rota iaby ty handova i tane i Elimelekay naho i tane’ey. Hafoe’e hoahy i ajaja tsy hinday ty agnara’ey i tane’ey. Tsy nifoe’e hagnampeagne i Naomy areke i lova’ey. Ndra aleo’e i Boaza ro nenga’e hagnavotse iareo. Nagneke hanao izay ty Boaza “mba tsy ho montso ty agnara i matey naho ty lova’e.”​—Rota 4:10.

Trea tie tsy te ho montso agnaragne naho lova i lahilahy tsy fantatse agnaragney. Tena tea tegna reke. Nanao ze tsy hahamontso i agnara’ey reke. Faie nimontso avao i agnara’ey satria tsy fantantikagne amy izao. Nisy tombotsoa miambake toko’e ho niazo’e ka nanjare niazo i Boaza. Agnisa ty razambey i Mesia ndra i Jesosy Kristy ty Boaza. Raty areke ty voka’e naho tea tegna tika, le tsy magneke hagnampe ty ndaty mila fagnampeagne.​—Mat. 1:5; Lioka 3: 23, 32.