1-2. Ino mateteke ty raha miseho naho fa atao badisa ty ndaty raike, le ino ty raha toko’e hoeretserete’o?

 FA nahatrea ndaty natao badisa vao rehe? Naho fa napetrake tamy iareo i fagnonteneagne roey, le nirei’o tamy ty toin-dreha iareo tie tapa-kevetse ty hatao badisa vata’e iareo. Nitrea’o tamy ty endre ty keleia’e naho ty nama’e ka tie tena fale iareo. Naho fa niakatse boake agnate rano ao amy izay i ndaty natao badisa rey, le naharey tehatehake rehe sady nitrea’o tamy ty endre iareo tie fale iareo. Agn’arivo’e eo ho eo isan-keregnandro ty ndaty manokan-tegna naho atao badisa, le manjare Vavolombelo i Jehovah.

² Naho mieretseretse ty hatao badisa rehe, le agnisa ty ndaty miambake amy ty tontolo raty toy, satria “mipay i Jehovah.” (Sal. 14:1, 2) Natao ho azo ty lahatsoratse toy, ndra tanora rehe ndra fa bey. Faie hagnampe antika fa vita badisao, vao mainke ho tapa-kevetse ty hanompo i Jehovah nainai’e ka ty lahatsoratse toy. Andao handineke anto’e telo mahavy antika te hanompo i Jehovah.

3. Nagnino o mpanompo i Jehovah-o ro tea ty hamarenagne naho raha vantagne? (Salamo 119:128, 163)

³ Nandily o vahoa’eo mba ho “tea ty hamarenagne” ty Jehovah. (Zak. 8:19) Nirisihe i Jesosy ka o mpanonjohy ty lia’eo mba ho tea “ty hamarenagne” ndra raha vantagne. (Mat. 5:6) Midika zay tie mila magniry mafe hanao ty maregne naho hanao ty soa vaho halio agnatrehan’Andrianagnahare eo o ndatio. Tea ty hamarenagne naho tea manao ty maregne vao rehe? Matoky zahay fa tea’o reo. Heje’o o vandeo naho ze kila raha diso vaho ze raha raty. (Vakio ty Salamo 119:128, 163.) Toetse mampiambake i Satana, i mpitondra ty tontolo toỳ, ty vande. (Jaona 8:44; 12:31) Ty tanjo i Satana le ty hagnoso-potake i tahina i Jehovah Andrianagnahare masigney. Nanomboke  ta Edena tagne ty Satana ro nirehake raha vande miomba an’Andrianagnahare. Natao’e ze hahavy o ndatio hieretseretse tie Mpitondra tea tegna naho tsy manao ty maregne ty Jehovah. Misy raha soa ka tsy mei’e o ndatio, hoe reke. (Gen. 3:1, 4, 5) Mbe misy voka’e amo o ndatio ze vande i Satana zay hatrake amy izao. Naho fa o ndatio areke ro tsy “tea ty hamarenagne”, le ho mora amy i Satana ty hitarike iareo ho raty findesam-batagne naho hanao ze kila raha raty.​—Rom. 1:25-31.

4. Akore ty nanoroa i Jehovah tie “Andrianagnahare ty hamarenagne” reke? (Henteo i sarey.)

⁴ “Andrianagnahare ty hamarenagne” ty Jehovah, le tea’e ty mampianatse ty hamarenagne ze ndaty tea aze. (Sal. 31:5) Manao izay reke, satria te hagnampe iareo tsy hino ty vande i Satana sasa. Mampianatse ty mpanompo’e mba tsy havande naho ho tea manao ty maregne ka ty Jehovah. Ty voka’e, manjare hajae o ndaty naho milamin-tsaigne iareo. (Ohab. 13:5, 6) Tsy izay vao ty nitsapa’o naho fa nianatse Baiboly rehe? Nianara’o tie tena natao hahasoa ze kila ndaty naho hahasoa azo manokagne ty lala i Jehovah. (Isa. 48:17) Izay ty mahavy azo te hanao ze raha saontsien’Andrianagnahare tihoe vantagne. (Mat. 6:33) Tea’o ty hiaro ty hamarenagne naho ty hagnaporofo tie vande iaby i raha nirehafe i Satana miomba i Jehovah Andrianagnahare rey. Akore ty hanoa’o izay?

5. Akore ty anehoa’o tie tea’o ty hamarenagne agnate Baiboly ao naho ty fanoagne ty maregne?

⁵ Azo’o atoro amy ty fomba fiaigna’o tie tsy inoa’o i vande i Satana rey fa ty hamarenagne ro tohagna’o. Asehò ka fa i Jehovah ro tea’o ho Mpitondra azo, le ze raha saontsie’e tie soa ro anò. Manao izay rehe naho fa manokan-tegna hoahy i Jehovah amy ty alala ty vavake sady atao badisa. Agnisa ty anto’e lahibey toko’e handrisike ty ndaty raike hatao badisa areke, ty hatea’e ty hamarenagne naho ty raha vantagne.

6. Nagnino ty raha rehafe ty Salamo 45:4 ro mahavy azo ho tea i Jesosy Kristy?

⁶ Nagnino rehe ro tea i Jesosy Kristy? Trea amy Salamo 45:4 ao ty anto izay. (Vakio.) Nialy mba hisia ty hamarenagne naho ty fiambaneagne vaho ty raha vantagne ty Jesosy. Naho tea ty hamarenagne naho ty raha vantagne areke rehe, le ho tea’o ka ty Jesosy Kristy. Sahy niaro ty hamarenagne reke.  (Jaona 18:37) Akore ty natao i Jesosy mba hampianaragne antika hiambane?

7. Nagnino ro mahaliagne ty fomba nanehoa i Jesosy fiambaneagne?

⁷ Trea amy ty raha natao i Jesosy fa tena niambane reke. Lava i Baba’e avao ro nimei’e voninahitse fa tsy ty tegna’e. (Mar. 10:17, 18; Jaona 5:19) Ino ty voka izay ama’o? Tsy mandrisike azo ho tea naho hanonjohy i Ana-dahin’Andrianagnaharey vao zay? Azo antoke zay. Fa nagnino ty Jesosy ro niambane? Satria tea’e ty Baba’e sady te hiambane manahake aze ka reke. (Sal. 18:35; Heb. 1:3) Nanahake i Jehovah tanterake ty Jesosy. Tsy mahavy azo te hiharine aze vao zay?

8. Nagnino ro mahafale ty managne i Jesosy ho mpanjakantikagne?

⁸ Mahafale ty managne i Jesosy ho Mpanjakantikagne, satria Mpitondra tena mahay reke. Ty vata-tegna i Jehovah ro nampiofagne naho nanendre o Ana-dahi’eo iohoe ho mpitondra. (Isaia 50:4, 5) Nahafoe ty fiai’e ho antikagne ka reke, satria tena tea’e tikagne. (Jaona 13:1) Fagneva ty ho tea’o ty Jesosy, satria ie ty mpanjaka’o. Nihazavae i Jesosy fa ze ndaty tena tea aze, le mankatò ty lili’e. Tokave’e tihoe ragne’e ze ndaty manao izay. (Jaona 14:15; 15:14, 15) Tena voninahitse lahibey tihoe ragne i Ana-dahy i Jehovah-y.

9. Ino ty itoviza ty badisa i Jesosy naho ty badisa ty mpanonjohy ty lia’e?

⁹ Agnisa ty lily i Jesosy tihoe tsy maintsy atao badisa ty mpanonjohy ty lia’e. (Mat. 28:19, 20) Nagnomey modely amy izay reke. Misy tsy fitoviza’e ty badisa i Jesosy naho o mpanonjohy ty lia’eo. (Henteo ty efajoro tihoe “ Ino ty Tsy Mampitovy ty Badisa i Jesosy Naho ty Badisa o Mpanonjohy ty Lia’eo?”) Faie misy itoviza’e avao ka. Nanolo-tegna hanao ty zoton’arofo i Baba’e ty Jesosy naho fa natao badisa. (Heb. 10:7) Naho fa atao badisa ka o mpanonjohy ty lia’eo, le manoro amo o ndatio tie fa nanokan-tegna hoahy i Jehovah Andrianagnahare iareo. Ty hanao ty zoton’arofon’Andrianagnahare amy izay ro tena lahibey amy iareo, fa tsy ty ahy iareo sasa. Mitsikombe i Tompo’ey iareo naho fa manao izay.

10. Nagnino ty hatea’o i Jesosy ro mandrisike azo hatao badisa?

¹⁰ Eke’o tie i Jesosy ro Ana-dahy i Jehovah bakotokagne sady ie ty tinendre’e ho Mpanjakantikagne. Hai’o tie miambane ty Jesosy sady tena nanahake tanterake an-dRae’e reke. Nianara’o ka tie nagnomey hanegne ty ndaty keré, nampahery ty kivy naho nagnasitragne ty marare reke. (Mat. 14:14-21) Trea’o ka ty fomba itariha’e o fiangona’eo tie amy izao. (Mat. 23:10) Sady hai’o tie mbe hanao mihoatse izay reke amy i tontolo vaovaoy agne. Akore ty hanoroa’o tie tea’o ty Jesosy? Tsikombeo reke. (Jaona 14:21) Manao izay rehe naho manokan-tegna hoahy i Jehovah Andrianagnahare sady atao badisa.

11. Naho ty ama’o, ino ty anto’e lahibey toko’e handrisike ty ndaty raike hatao badisa?

¹¹ Ino ty anto’e lahibey mandrisike ty ndaty raike hatao badisa? Ty hatea i Jehovah. Satria izao ty lily lahibey voaloha’e hoe ty Jesosy: “Teao amy ty fo’o iaby naho amy ty tegna’o iaby naho amy ty sai’o iaby vaho amy ty heri’o iaby ty Jehovah Andrianagnahare’o.” (Mar. 12:30) Hoe izay vao ty hatea’o an’Andrianagnahare?

12. Nagnino ro tea’o ty Jehovah? (Henteo i sarey.)

¹² Maro ty anto’e mahavy azo toko’e ho tea i Jehovah. Nianara’o ohatse tie ireke ty nifotora o aigneo, sady boake ama’e “ze fagnomezagne soa naho ze fagnomezagne voririke.” (Sal. 36:9; Jak. 1:17) Boake amy i Andrianagnahare  matarike naho bey hateay ka ze kila raha soa ankamamie’o.

13. Nagnino ro fagnomezagne sarobily i solovoigney?

¹³ I solovoigney ty fagnomezagne fara’e fanjaka nimey i Jehovah antika. Nagnino tika ro mirehake izay? Dineho ty fifandrambesa i Jehovah naho i Ana-dahi’ey. Hoe ty Jesosy: “Tea ahy ty Baba.” Hoe ka reke: “Teako ty Baba.” (Jaona 10:17; 14:31) Vao mainke nifandrambe maifitse iareo, arakarake ty haela ty taogne niharoa iareo. (Ohab. 8:22, 23, 30) Tsy maintsy ho nampikoretse ty arofon’Andrianagnahare areke ty nahavazoho i Ana-dahi’ey nampijalegne naho vinono. Faie tea i Jehovah ze kila ndaty, le agnisa izay rehe, le izay ty nahavy aze nahafoe i ana-dahi’e ikokoa’ey hatao sorogne. Ho afake hiaigne nainai’e rehe naho ty ndaty hafa amy izay. (Jaona 3:16; Gal. 2:20) Io ty anto’e lahibey mahavy antika ho tea i Jehovah.

14. Ino ty tanjogne tena soa azo’o tratseregne amy ty fiaignagne?

¹⁴ Nitombo ty hatea’o i Jehovah arakarake ty nahafantara’o aze. Azo antoke fa te hiharine aze rehe amy izao, sady tea’o hitohy nainai’e zay. Azo’o tanterahegne zay! Risihe i Jehovah rehe mba hampifale ty arofo’e. (Ohab. 23:15, 16) Tsy amy ty raha rehafe’o avao ty ahafaha’o mampifale aze, fa amy ty raha atao’o ka. Miankigne amy ty fomba  fiaigna’o areke ty hahatreavagne tie tea’o vata’e ty Jehovah. (1 Jaona 5:3) Ty hampifale i Jehovah amy ty fiaigna’o ty tanjogne tena soa azo tratseregne.

15. Akore ty hanehoa’o tie tea’o ty Jehovah?

¹⁵ Akore ty hanoroa’o fa tea’o ty Jehovah, i Andrianagnahare Maregney? Voaloha’e, manokàna tegna ho aze amy ty alala ty vavake. (Sal. 40:8) Afara izay, le mila atao badisa rehe mba hanoro amo o ndatio ze fanokanan-tegna’o zay. Nitreantika tamy i fehentsoratse voaloha’ey fa mahafale ty atao badisa sady fotoagne lahibey amy ty fiaignagne io. Manomboke fiaignam-baovao rehe boake eo, satria fa ahy i Jehovah fa tsy azo sasa. (Rom. 14:8; 1 Pet. 4:1, 2) Maregne fa fanapahan-kevetse lahibey io, faie tena hahasoa azo ty manao aze. Ino ty anto’e?

16. Arake ty Salamo 41:12, ino ty valesoa omey Jehovah ze ndaty manokan-tegna ho aze?

¹⁶ Tsy misy matarike manahake i Jehovah. Naho fa itika ohatse magnomey raha aze, le lava mihoatse lavitse i nimeintikagne azey avao ty avale’e antika. (Mar. 10:29, 30) Naho manokan-tegna hoahy i Jehovah rehe, le homei’e valesoa lahibey naho fiaignagne mahafa-po, ndra tie mbe amy ty tontolo raty toy eto aza. Faie vaho fanomboha’e avao zay. Afake manompo i Rae’o bey hateay nainai’e rehe, le hihamitombo avao ka ty fifankateava’areo. Ho velogne nainai’e manahake aze ka rehe.​—Vakio ty Salamo 41:12.

17. Ino ty raha tsy anagna i Jehovah le toko’e homea’o aze?

¹⁷ Magnomey raha sarobily hoahy i Jehovah rehe, naho fa manokan-tegna sady atao badisa. Nimei’e raha fanjaka maro naho nampea’e ho sambatse amy ty fiaignagne rehe. Le inogne ty havale’o aze? Misy raha mbe tsy anagna i Tompo ty lagnitse naho ty taney azo’o meigne aze. Tsy ino zay fa ty fagniria’o tsy hivalike ama’e naho hanompo aze. (Joba 1:8; 41:11; Ohab. 27:11) Tsy misy fomba fiaignagne soa mandikoatse izay. Azo antoke fa ty hatea’o i Jehovah ty anto’e lahibey mandrisike azo hatao badisa.

18. Ino iaby ty fagnonteneagne toko’e hapetra’o amy ty vata’o?

¹⁸ Akore areke ty havale’o ty fagnonteneagne toy: ‘Hatao badisa vao rehe?’ Ihe tompom-batagne avao ty mahay ty vale izay. Faie soa naho mametrake ty fagnonteneagne toy amy ty vata’o rehe: ‘Ino ty mbe lignasako?’ (Asa. 8:36) Tadidio i anto’e telo toko’e handrisike antika hatao badisa, nidinehentikagne teo rey. Voaloha’e, toko’e ho tea ty hamarenagne naho raha vantagne rehe. Saintsaigno areke zao: ‘Teako vao naho eo raho amy i fotoagne hirehafa ze kila o ndaty ty maregne naho hanoa iareo raha vantagney?’ Faharoe, ty hatea’o i Jesosy Kristy. Saintsaigno areke zao: ‘Teako vao naho i Ana-dahin’Andrianagnaharey ty ho Mpanjakako? Teako ka vao ty hitsikombe aze?’ Fahatelo, ty hatea’o i Jehovah sady io ty anto’e tena lahibey. Saintsaigno areke zao: ‘Noho iraho te hampifale i Jehovah vao ro mahavy ahy te hanompo aze?’ Naho eka iaby ty avale’o o fagnonteneagne rehoe, le nagnino rehe ro tsy atao badisa? Ino ty mbe lignase’o?​—Asa. 16:33.

19. Nagnino rehe ro tsy toko’e hisalasala ty hatao badisa? Hazavao. (Jaona 4:34)

¹⁹ Naho misalasala ty hatao badisa rehe, le dineho ty fampitahagne natao i Jesosy toy. (Vakio ty Jaona 4:34.) Mareho fa nampitovie i Jesosy tamy ty hanegne ty fanoagne ty zoton’arofon-dRae’e. Ino ty anto’e? Mahasoa antika ty mihinagne. Nihay i Jesosy fa mahasoa antika ze kila raha andilia i Jehovah antika. Tsy hampanao raha hagnoho-doza antika ty Jehovah. Agnisa ty raha také i Jehovah amantikagne ka vao tihoe atao badisa? Ie. (Asa. 2:38) Matokisa areke rehe fa hahasoa azo ty fagnorihagne o lily iohoe. Ihe zao tsy misalasala ty hihinagne hanegne mafiry, le nagnino rehe ro misalasala ty hatao badisa?

20. Ino ty raha hodinehentikagne amy ty lahatsoratse magnarake?

²⁰ Ino ty mbe lignisa ty ndaty ila’e? Maro ty va’e hamale hoe izao: “Mbe tsy vognogne raho.” Tena fanapahan-kevetse lahibey tihoe manokan-tegna hoahy i Jehovah naho ty atao badisa. Mitake fandinehagne naho fotoagne vaho kezake ty fahavognonagne amy ty badisa. Faie naho ohatse rehe tena magniry hatao badisa, le ino ty raha azo’o atao amy izao mba hahavy azo ho vognogne? Hovaleantika amy ty lahatsoratse magnarake ty vale izay.