“Ndaty saro-kegnatse sady tsy le matoky tegna raho. Tsy le azoko areke ty fiaiko naho fa miharoharo amy ty ndaty vantambantan-drehake naho bey zizo. Faie teako ty miarake amy ty ndaty maleme fagnahy naho miambane satria mora amako ty mirehake ty raha tsapako naho ty olagne mahazo ahy amy iareo. Hoe izay iaby zao ty namako maifitse ahike,” hoe ty Sara. *

Trea amo o reha i Sara iohoe, fa tea o ndaty ty minamagne amy ty ndaty maleme fagnahy. Mampifale i Jehovah ka ty ndaty maleme fagnahy. Hoe ty Saontsi’e tie: ‘Miakanjoa ... fahalemem-pagnahy.’ (Kol. 3:12) Ino ty atao tihoe fahalemem-pagnahy? Akore ty nampisehoa i Jesosy fa naleme fagnahy reke? Nagnino o toetse iohoe ro magnampe antika ho fale amy ty fiaignagne?

Maleme fagnahy ty ndaty raike tsy magnahy, tea filongoagne, soa fagnahy naho fa mifandrambe amy ty hafa, tsy mora boseke sady mahafehe tegna naho fa misy raha mandagìgne.

Ty rehake Grike nadika tihoe fahalemem-pagnahy, le nampiasaegne mba hirehafagne sovala fa nifolahegne, sady fa azo komandiegne soa. Faie tsy midika zay tie nanjare maleme i sovalay. Hoe izay ka fa tsy manjare votro ty ndaty raike naho fa maleme fagnahy. Ireke aza mahavita mifehe ty toetse rati’e naho milongo soa amy ty hafa avao.

Va’e hieretseretse tika tie, ‘Tsy toetse maha ie ahike ze o maleme fagnahy zao.’ Maro ka ty ndaty masiake naho tsy manam-paharetagne magnodidigne antika, le va’e ho sarotse amantikagne ty haleme fagnahy. (Rom. 7:19) Tsy ho vitantika areke ty haleme fagnahy naho tsy mikezake mafe tikagne sady ampea i Jehovah amy ty alala ty fagnahi’e masigne. (Gal. 5:22, 23) Nagnino tikagne ro toko’e hikezake mba haleme fagnahy?

Ho tea o ndaty tikagne naho maleme fagnahy. Manahake i Sara teoy, le teantika ty miarake amy ty ndaty maleme fagnahy. Tsy nisy ndaty maleme fagnahy naho soa fagnahy ambone i Jesosy. (2 Kor. 10:1) Ndra tie ajaja mbe lia’e naho nahatrea aze aza, le tsy nisalasala nagnatogne aze.—Mar 10:13-16.

Mahasoa antika naho ty ndaty magnodidigne antika ty fahalemem-pagnahy. Naho maleme fagnahy tika, le tsy ho mora boseke. (Ohab. 16:32) Voka’e, tsy hanao raha hampanahelo ty hafa tikagne, agnisa izay ty ndaty maifitse antika, le tsy hanegnegne tika naho fa avy eo. Mahavita mifehe ty fihetseham-pontikagne  naho ty raha ataontikagne ka tikagne, le tsy mahatsiaro ho mijale ty ndaty magnodidigne antika.

Tena naleme fagnahy ty Jesosy, ndra tie bey andraikitse naho maro raha nanoegne. Maro ty ndaty nambanegne naho nivali-doha tamy ty andro’e, le nipay famelombelomagne. Azo antoke fa nahatsapa izay iareo naho fa nirehake tamy iareo ty Jesosy tie: ‘Mbamako mbetoa nareo, ... fa maleme fagnahy sady miambane raho.’—Mat. 11:28, 29.

Ino ty hagnampe antika haleme fagnahy manahake i Jesosy? Mila ianarantikagne amy Saontsin’Andrianagnahare ao ty fomba nifandrambesa i Jesosy tamo o ndatio naho ty raha natao’e naho fa niatreke raha sarotse reke. Haleme fagnahy manahake i Jesosy ka tika amy izay naho fa tendreke raha sarotse. (1 Pet. 2:21) Andao tika handineke toetse telo nahavy i Jesosy naleme fagnahy.

Tena niambane ty Jesosy. Nirehake ty Jesosy tie ‘maleme fagnahy naho miambane’ reke. (Mat. 11:29) Tognone ty Baiboly miarake o toetse roe rehoe satria mifandrambe marine. (Efes. 4:1-3) Nagnino tika ro mirehake izay?

Naho miambane tikagne, le tsy ho mora boseke ndra tafintohigne amy ty raha rehafe ty hafa miomba antika. Akore ty natao i Jesosy naho fa nisy nirehake aze tie “tea hanegne” naho “mpinogne divay” reke? Niambane reke, le tsy nandany lera mba hagnaporofoagne ty mahadiso o reha o ndatio aze zay. Naleme fagnahy ka reke, le nirehake tie “ty fahendrea o ndatio le hamaregne ty raha atao’e.”—Mat. 11:19.

Toko’e hikezake haleme fagnahy avao tikagne naho fa misy ndaty magnambanembane ty karazantikagne naho ty fiaviantikagne ndra noho itika ampela ndra lahilahy. Hoe ty Peter, androanavi-pagnahy a Afrika atimo agne: “Naho fa misy ndaty mirehake raha mahaboseke ahike, le mieretseretse raho tie, ‘Ino zao ty va’e ho natao i Jesosy naho ireke ro nitendreke raha hoe izay?’ Nagnampe ahy tsy ho mora boseke ty fanoako izay.”

Taka i Jesosy soa tie tsy voririke o ndatio. Ndra tie nanagne fagniriagne hanao ty soa i mpiana i Jesosy rey, le nisy fotoagne iareo tsy nahavita nanao izay noho iareo tsy voririke. Tamy i halegne taloha ty nimateza i Jesosỳ ohatse, le nirehafe’e ty Petera naho i Jakoba vaho i Jaona mba tsy hiroro faie tsy nahavita izay iareo. Trea amy ty reha i Jesosy toy fa nitaka’e ty anto’e nahavy izay. Hoe reke: “Mazoto avao i saigney, fa i nofotsey ro maleme.” (Mat. 26:40, 41) Tsy niboseke tamy iareo areke ty Jesosy satria noho iareo tsy voririke ty nahavy iareo hiroro.

Tea nitsikilo naho lava mahatrea raha horehafegne miomba ty hafa avao ty Mandy. Faie nikezake mba haleme fagnahy manahake i Jesosy reke. Hoe ty Mandy: “Nitadidieko avao tie tsy voririke iaby o ndatio sady nikezake raho nifantoke amy ty toetse soa iareo manahake ty atao i Jehovah.” Mikezaha areke hahatakatse tie tsy voririke ty hafa. Naho manao izay rehe, le haleme fagnahy manahake i Jesosy naho fa mifandrambe amy iareo.

Natoky ty Jesosy fa hanao ty rare’e avao ty Jehovah. Maro ty tsy rare’e niareta i Jesosy tamy ireke tan-tane etoy. Niharatiratie o ndatio naho niheje iareo sady nampijalé iareo reke. Ndra tie teo zay, le naleme fagnahy avao ty Jesosy, le ‘nankigne’e tamy i mpitsara maregney avao ty fiaigna’e.’ (1 Pet. 2:23) Natoky ty Jesosy fa hagnampe aze hiaretse naho hagnasaze ze ndaty nanao ty tsy rare’e tama’e i Rae’e an-dagnitse agney.

Vao mainke ho raty ty voka’e, naho ohatse tika le avy le boseke sady tsy mahafehe tegna naho fa misy ndaty manao raha tsy rare’e amantika. Ty anto’e, hoe ty Soratse Masigne: “Ty haboseha o ndatio tsy ahavitagne ty maregne agnatrehan’Andrianagnahare eo.” (Jak. 1:20) Ndra tie hoe ara-drare’e areke ty anto’e mahaboseke antika kindraike, le va’e hahavy antika hanao raha tsy mete zay noho itikagne tsy voririke.

Nieretseretse hoe izao avao ty Cathy, rahavave a Alemaina agne: ‘Naho tsy miaro tegna rehe, le tsy hisy ndaty hiaro azo.’ Faie niova ze toe-tsai’e zay naho fa nikezake hatoky i Jehovah reke. Hoe ty Cathy: “Nanjare haiko tie tsy mila miaro tegna sasa raho satria hagnafake ty raha raty iaby ambone tane etoy ty Jehovah. Izay ty nahavy ahy haleme fagnahy.” Tahafo areke ty Jesosy naho fa irehe ihara ty tsy rare’e. Ty anto’e, naho matoky i Jehovah manahake aze rehe, le ho vita’o ty haleme fagnahy.

Nihamafese i Jesosy fa naho te ho sambatse tikagne, le toko’e haleme fagnahy. Hoe reke: “Sambatse ty maleme fagnahy.” (Mat. 5:5) Ino ty ho voka’e naho itika maleme fagnahy?

Hifandrambe soa o mpivalio. Hoe ty Robert rahalahy boake a Aostralia agne: “Nirehake raha maro nampanahelo i valiko raho ndra tie tsy satrieko aza zay. Faie tsy azo’o aheregne sasa ze raha rineha’o nahaboseke ty hafa. Tena nanahelo raho naho fa nahatrea tie nampanahelo i valiko ty raha rinehako.”

‘Sambe manao hadisoagne’ amy ty raha rehafentikagne tika. (Jak. 3:2) Va’e hampisy olagne amy ty mpivaly zay. Faie hagnampe antika tsy ho taitaitse naho hahafehe ty raha rehafentikagne ty fahalemem-pagnahy, naho fa miseho ty raha hoe izay.—Ohab. 17:27.

Ino ty voka’e naho fa nikezake mafe mba tsy ho taitaitse naho hifehe tegna ty Robert? Hoe reke: “Naho fa misy raha tsy mampitovy hevetse anay amy i valiko, le mikezake raho mba hitsanogne soa aze, hirehake aman-kasoa fagnahy sady mifehe tegna mba tsy ho boseke. Nanjare nifandrambe soa mihoatse ty taloha areke zahay mirovaly hinane zao.”

Hifandrambe soa amy ty hafa tikagne. Mateteke ro tsy ampe avao ty nama ty ndaty tsiela boseke. Faie magnampe antika “hitagne mafe ... ty filongoagne, i fehe mampiharo raikey” ty fahalemem-pagnahy. (Efes. 4:2, 3) Hoe indraike ty Cathy: “Nagnampe ahy ho fale avao ty fahalemem-pagnahy naho fa mifandrambe amy ty hafa ndra tie tsy mora ifandrambesagne aza ty ndaty ila’e.”

Hilamin-tsaigne tikagne. Rehafe ty Baiboly fa agnisa ty “hilala boake ambone agne” ty fahalemem-pagnahy naho ty filongoagne. (Jak. 3:13, 17) ‘Tsy taitaitse’ ty ndaty maleme fagnahy. (Ohab. 14:30) Nikezake mafe ty Martin mba haleme fagnahy. Izao ty nirehafe’e: “Fa tsy mamoresé ty hafa hagnorike ty heveko sasa raho tie amy izao. Manjare milamin-tsaigne sady fale areke raho.”

Va’e ho sarotse amantika ty haleme fagnahy. Hoe ze rahalahy raike zay: “Tsoreko aloha ty maregne fa misy fotoagne raho tena boseke fara tampo’e.” Faie naho fa miseho ty raha hoe izay, le afake magnampe antika mba haleme fagnahy ty Jehovah sady toe izay ka ty andrisiha’e antikagne. (Isaia 41:10; 1 Tim. 6:11) Afake ‘mamita ty fampiofagnagne antika’ reke sady vita’e ty ‘hampaozatse’ antikagne. (1 Pet. 5:10) Naho fa mandeha ty fotoagne, le hahavita hitsikombe ty fahalemem-pagnahy naho ty hasoa fagnahy i Kristy, manahake ty natao i apostoly Paoly tikagne.—2 Kor. 10:1.