Mitovy ty fotoagne isehoa ty faminaniagne ila’e rehafegne ato sady trea amy ireo ka fa miaigne amy ty “fotoa ty fara’e” tikagne.—Dan. 12:4.

• Andinin-teny: Apok. 11:7; 12:13, 17; 13:1-8, 12

  Faminaniagne: Fa agnarivo’e taogne zay ty nifehea i “bibihakoy” ty ndaty magneran-tane. Haratse ty loha fahafito o bibihako iohoe amy ty fotoa ty fara’e. Faie ho sitragne reke, le hagnorike aze “ty tane toy iaby.” I bibihakoy ty ampiasae i Satana mba hialiagne amy ty tarana i ampelay.

  Fahatanteraha’e: Nanjare nisy fitondram-panjakagne nanohetse i Jehovah tafara i safodranoy. Taonjato maro tafara tatoy, le nanjare fanjakagne tena natanjake ty Grande-Bretagne, faie nihegne ty heri’e tamy i Aly Lahibey I. Natanjake indraike reke naho fa niharo tamy i Etazonia. Ampiasae i Satana mba hagnenjeke ty vahoa i Jehovah ty fanjakagne iaby magneran-tane, lohotsie fa amy ty fotoa ty fara’e.

• Andinin-teny: Dan. 11:25-45

  Faminaniagne: Mifaninagne ze ho fara’e matanjake ty mpanjaka i avaratse naho ty mpanjaka i atimo.

  Fahatanteraha’e: Nialy tamy i Grande-Bretagne naho i Etazonia ty Alemaina. Ty Firaisana Sovietika naho ty mpanohagne aze ro nanjare mpanjaka i avaratse tamy 1945. Rava ty Firaisana Sovietika tamy 1991, le i Rosia naho ty mpanohagne aze ro nanjare mpanjaka i avaratse naho fa tafara tatoy.

• Andinin-teny: Isaia 61:1; Mal. 3:1; Lioka 4:18

  Faminaniagne: Handefa ‘irake’ ty Jehovah mba “hikarakara ty lalagne”, aloha ty hioregna ty Fanjakà i Mesia. Hanomboke “hagnambara talily soa amy ty mpandefetse” o irake iohoe.

  Fahatanteraha’e: Nandineke soa o Baibolio ty Russell naho ty nama’e nanomboke tamy 1870, mba hahatreavagne tie ino maregne ty ampianare ty Baiboly. Nihay iareo tamy 1881 tie mila mitory ty mpanompon’Andrianagnahare. Nampiboake lahatsoratse miomba izay areke iareo, agnisa izay tihoe “Mipay Mpitory 1000” naho tihoe “Voahosotse Hitory.”

• Andinin-teny: Mat. 13:24-30, 36-43

  Faminaniagne: Nisy lahilahy raike nitongy voa soa, faie nisy fahavalo nitongy tsimparefare ka tamy i tanembare’ey. Nengàgne hiarake hitiry iareo, le nanjare tsy trea i varey satria nihamaro i tsimparefarey. Naho fa avy ty fijinjagne, le navike ty vare naho ty tsimparefare.

  Fahatanteraha’e: Nanjare nibaribary tie ia ty Kristiana vata’e nanomboke tamy 1870. Tagnate ty fotoa ty fara’e, le navike amy ty Kristiana sandoke ty Kristiana vata’e sady navory raike iareo.

• Andinin-teny: Dan. 2:31-33, 41-43

  Faminaniagne: Managne tomboke vigne miharo tane lietse ty sarevongagne lahibey raike.

  Fahatanteraha’e: Ndaty tsotra ambane fahefà i Grande-Bretagne naho i Etazonia i tane lietsey faie manohetse ty fitondrà iareo. Noho ty raha atao o ndaty rehoe, le tsy mafe manahake o vigneo ty fitondrà i Grande-Bretagne naho i Etazonia.

• Andinin-teny: Mat. 13:30; 24:14, 45; 28:19, 20

  Faminaniagne: Avory ‘agnate i tragno famoriagne vokatsey ao i varey,’ le tinendre hikarakara ty ‘mpanompo an-tragno ao’ ty “mpanompo mahihitse naho mahimbagne.” Nanomboke nitoriegne ‘magneran-tane ty talily soa i Fanjakagney.’

  Fahatanteraha’e: Tinendre hikarakara ty vahoa i Jehovah ty mpanompo mahihitse naho mahimbagne tamy 1919. Tena nazoto nitory o Mpianatse Baibolio nanomboke tamy izay. Mitory amy ty tane 200 mahery ty Vavolombelo i Jehovah amy izao sady mampiboake boke naho gazete amy ty firehake 1000 mahery.

• Andinin-teny: Dan. 12:11; Apok. 13:11, 14, 15

  Faminaniagne: Misy bibihako managne tsifa roe mitaogne o ndatio hanao ty “sare i bibihakoy.” Mey i bibihakoy “fofognaigne i sare bibihakoy” naho fa avy eo.

  Fahatanteraha’e: Ty Firenena Matanjake Anglisy-Amerikana ro tena nanangagne ty Fikambanam-pirenena. Nisy firenena hafa ka nanohagne o fikambanagne iohoe, agnisa izay ty mpanjaka i avaratse nanomboke tamy 1926 hatrake tamy 1933. Mitamà o ndatio fa hampisy filaminagne magneran-tane ty Firenena Mikambagne (ONU) manahake ty nitamà iareo tamy ty Fikambanam-pirenena. Faie ty Fanjakan’Andrianagnahare avao ty hahavita izay.

• Andinin-teny: Dan. 8:23, 24

  Faminaniagne: ‘Hinday faharavàgne tanterake’ ty mpanjaka raike mampatahotse.

  Fahatanteraha’e: Nandravarava naho namono ndaty tsiefa ty Firenena Matanjake Anglisy-Amerikana. Nampipoake bomba roe tamy ty firenena raike ohatse, ty Etazonia tamy i Aly Lahibey II, le tena ninday faharavàgne lahibey ze raha zay. Ty anto’e, fahavalo i Etazonia naho i Grande-Bretagne o firenena iohoe.

• Andinin-teny: Dan. 11:31; Apok. 17:3, 7-11

  Faminaniagne: Misy ‘bibihako mena bey’ managne tsifa folo miakatse boake amy i lavake tsikeokeokey ao. Atao tihoe mpanjaka laharagne fahavalo reke. “I raha mampangorìgne mahavy fandravàgney” ty irehafagne aze amy ty boke i Daniela ao.

  Fahatanteraha’e: Tsy nahavita ty asa’e ty Fikambanam-pirenana tamy i Aly Lahibey II. Faie tafara i alỳ, le ‘natsangagne’ ty ONU. Mitamà o ndatio tie hinday filaminagne ty ONU manahake ty nitamae iareo tamy i Fikambanam-pirenenay. Faie ty Fanjakan’Andrianagnahare avao ty hahavita izay. Hanafike o fivavahagneo ty ONU.

• Andinin-teny: 1 Tes. 5:3; Apok. 17:16

  Faminaniagne: Hirehake tihoe “filaminagne naho fiadanagne” o firenenao, le hanafike i ampela “makorelỳ” i “tsifa foloy” naho i “bibihakoy” sady handrava aze. Ho ringagne iaby o firenenao afara izay.

  Fahatanteraha’e: Hirehake o firenena rehoe tie nahavita nampisy filaminagne naho fiadanagne iareo. Handringagne ty fivavahan-diso ty firenena manohagne ty ONU afara izay. Io ty ho fanomboha i haoregne lahibeỳ. Hofoagnagne ty tontolo toy amy i Hara-magedonay, le izay ty hamaragne i haoreagne lahibeỳ.

• Andinin-teny: Ezek. 38:11, 14-17; Mat. 24:31

  Faminaniagne: Hanafike ty tane misy ty vahoan’Andrianagnahare i Goga, le hamory ‘o ndaty jinobogneo’ o anjelio.

  Fahatanteraha’e: Hanafike ty vahoa i Jehovah ty mpanjaka i avaratse naho ty fitondram-panjakagne hafa magneran-tane. Havory ho an-dagnitse agne ze voahosotse mbe an-tane etoy afara ty hanomboha o fanafihagne iohoe.

• Andinin-teny: Ezek. 38:18-23; Dan. 2:34, 35, 44, 45; Apok. 6:2; 16:14, 16; 17:14; 19:20

  Faminaniagne: Hamita ‘ty fandresea’e i nitingitse sovala fotỳ’ naho fa handringagne i Goga naho ty tafi’e. ‘Hatorake amy i antara afoy agne i bibihakoy.’ Ho ravàgne i sarevongagne lahibeỳ.

  Fahatanteraha’e: Hagnavotse ty vahoa i Jehovah ty Jesosy, i Mpanjaka ty Fanjakan’Andrianagnaharey. Haringa i Jesosy naho i 144 000 vaho ty anjely maro ty firenena iaby nanafike ty vahoan’Andrianagnahare. Ho foagne tanterake ty tontolo i Satana tie amy izay.