1-2. Ino ty olagne atrehe ty ankamaroa o Vavolombelo i Jehovah-o?

NANDRISIKE i Timoty ty apostoly Paoly mba hagnatanterake soa ty fanompoa’e. (2 Tim. 4:5) Faie tsy i Timoty avao ty nirisihe’e hanao izay fa ty Kristiana iaby. Izay ty mahavy antika mikezake mafe magnorike o toroheve’e iohoe. Faie kindraike tsy mora amantika ty manao izay. Maro ty rahalahy naho ty rahavaventika matahotse naho fa handeha hitory. (2 Tim. 4:2) Eretsereto zao i rahalahy naho i rahavaventika mitoboke amy ty tane voasakatsakagne naho andraragne ty asantikagne agne rey. Mitory avao iareo, ndra tie va’e ho gadraegne aza.

² Maro ty olagne tsy maintsy atrehe o vahoa i Jehovah-o, le va’e ho kivy iareo. Tsy maintsy miasa mafe agnate ty lera maro ohatse ty ankamaroa iareo mba hahafaha iareo magnomey ze raha paliae ty keleia iareo. Tea iareo zao naho mba manompo maharetse iareo naho fa Sabotsy naho Lahady, faie rokake iareo le tsy mahavita fire. Kede avao ka ty fanompoagne vita ty ila’e, satria managne aretegne miteza, ndra fa mihantetse. Ty ila’e tsy afake miboake. Ty ila’e ka lava mieretseretse avao tie tsy tea aze ty Jehovah. Hoe ty Mary *: “Mialy mafe raho mba tsy hieretsere-draty miomba ty tegnako naho fa kivy. Ty anto’e, mandrerake ty foko ty mieretseretse izay sady manjare tsy managne hery ho entegne manompo raho, hafarako magnamelo-tegna.”

3. Ino ty hodinehentikagne ato?

³ Ndra inogn’ino olagne atrehentika, le afake magnomey hery antika ty Jehovah mba hahavitantika hiatreke izay sady hanompo aze avao arake ze vitantikagne. Akore ty agnampea i Jehovah antika? Aloha ty handinehantika izay, le hohenteantikagne heike tie akore ty nagnampea’e i Paoly naho i Timoty mba  hahavità iareo ty fanompoa iareo, ndra tie teo aza ty olagne natrehe iareo.

4. Ino iaby ty olagne natrehe i Paoly?

⁴ Maro ty olagne natrehe i Paoly. Tena nipay hery boake amy i Jehovah reke naho fa jinera, nitorahegne vato sady ginadra. (2 Kor. 11:23-25) Neké’e tie nisy fotoagne reke nialy mafe mba tsy hieretsere-draty. (Rom. 7:18, 19, 24) Nisy raha hafa ka niareta’e, sady nitea’e naho nafahan’Andrianagnahare tama’e zay. “Fatike amy ty nofotse” ty nirehafa’e aze.​—2 Kor. 12:7, 8.

5. Ino ty raha nivita i Paoly ndra tie teo aza ty olagne natrehe’e?

⁵ Nimey i Jehovah hery ty Paoly mba hahafaha’e manohy ty fanompoa’e avao, ndra tie teo aza ty olagne maro natrehe’e. Mareho ohatse ty raha nivita i Paoly retoagne: Tamy i reke ginadra tamy ty tragno raike ta Roma agney ohatse, le nazoto niaro i talily soay tagnatreha o ndaty manam-pahefàgne tamo o Jiosio eò naho tamo o mpitondra fanjakagneo. (Asa. 28:17; Fil. 4:21, 22) Nitory tamy ty ankamaroa o maramila mpiambegne i Kaisarao naho tamy ze ndaty nitilike aze ka reke. (Asa. 28:30, 31; Fil. 1:13) Tamo o fotoagne nigadra’e iohoe, le nampiasa aze ty Jehovah mba hanoratse taratasy hoahy ty Kristiana tamy izay, sady mbe mahasoa antika amy izao i taratasi’e rey. Nampahery ty fiangonagne ta Roma agne ty tsy fivaliha’e. Ty voka’e, ‘vao mainke sahy nitory ty saontsin’Andrianagnahare tsy nisy tahotse ty ankamaroa iareo.’ (Fil. 1:14) Ndra tie voafetra avao aza ty raha niazo i Paoly natao kindraike, le nanao ze fara’e soa vita’e avao reke. Ty voka’e, ‘vao mainke nandroso i talily soay.’​—Fil. 1:12.

6. Ino ty nagnampe i Paoly hahavita hanohy avao ty fanompoa’e, arake ty 2 Korintianina 12:9, 10?

⁶ Nitsapa i Paoly fa tsy ty heri’e manokagne ro nahavità’e ty fanompoa’e, fa noho ty hery nimey i Jehovah aze. Neké’e tie ‘voririke ty fiasa ty herin’Andrianagnahare ama’e naho fa maleme reke.’ (Vakio ty 2 Korintianina 12:9, 10.) Nimey i Jehovah hery tamy ty alala ty fagnahi’e masigne reke mba hahafaha’e hanohy avao ty fanompoa’e, ndra tie nenjehegne naho ginadra vaho niatreke olagne hafa aza reke.

7. Ino iaby ty olagne natrehe i Timoty, le va’e ho nikalagne aze tsy hahavita ty fanompoa’e?

⁷ Nila niantehetse tamy ty herin’Andrianagnahare ka ty Timoty, i tanora nama i Paolỳ,  mba hahavità’e ty fanompoa’e. Niarake nanao lia misionera tamy i Paoly reke. Nirahe i Paoly hitilike naho hampahery o fiangonagneo ka reke. (1 Kor. 4:17) Va’e nahatsiaro ho tsy nahay reke tamy izay, le va’e izay ty nahavy i Paoly hirehake aze tie: “Ko misy engagne hagnambanembane ty hatanora’o.” (1 Tim. 4:12) Nanagne fatike tamy ty nofotse ka ty Timoty tamy izay, satria ‘tsy nisalama mateteke’ reke. (1 Tim. 5:23) Faie nihay i Timoty fa hagnomey hery aze amy ty alala ty fagnahi’e masigne ty Jehovah mba hahavità’e mitory i talily soay naho hanompo o rahalahi’eo.​—2 Tim. 1:7.

8. Akore ty agnomea i Jehovah hery ty mpanompo’e amy izao?

⁸ Magnomey “hery fagnampe’e” o vahoa’eo ty Jehovah amy izao mba hahafaha iareo manohy ty fanompoa iareo avao. (2 Kor. 4:7) Misy fomba efatse retoa agnomea i Jehovah antika hery sady agnampea’e antika mba tsy hivalike ama’e: Vavake, Baiboly, o rahalahio naho o rahavaveo naho ty fanompoagne. Andao tikagne handineke ireo.

9. Nagnino ty vavake ro magnampe antika?

⁹ Mahazo hery tika naho fa mivavake. Hoe ty Paoly amy Efesianina 6:18 ao: “Mivavaha lognandro, ndra ombia ndra ombia.” Hagnomey hery antika ty Andrianagnahare naho manao izay tika. Izay zao ty nitsapa i rahalahy Jonnie, mitoboke a Bolivia agne, naho fa niatreke olagne sambe karaza’e reke. Sambe niarake narare mafe ty vali’e naho ty rae aman-drene’e tie indraike. Nisarotse tamy i Jonnie ty nikarakara ze raha nipaliae iareo telo. Nimate ty rene’e. Ela bey tafara tatoy ka vaho nisitragne ty vali’e naho i baba’e. Hoe ty Jonnie: “Tena ninekoneko raho tamy i fotoagne rey. Faie tena nagnampe ahy ty manao vavake voafaritse soa.” Nimea i Jehovah hery ty Jonnie, le nivita’e ty niatreke o raha rehoe. Nivoa ty kansera ka ty rene i Ronald, androanavi-pagnahy a Bolivia agne. Ie vola’e raike tafara ty nahavoa o kansera iohoe i rene’e, le nimate reke. Ino ty nagnampe i Ronald hiatreke izay? Hoe reke: “Nivoraheko tamy i Jehovah iaby ze raha tam-poko ao naho fa nivavake tama’e raho. Haiko tie i Jehovah avao ro tena mahatakatse ty raha manjò ahy. Ndra i raho aza mbe tsy tena mahatakatse soa ty raha manjò ahy naho oharegne ama’e.” Va’e hahatsapa tika kindraike tie hoe tsy ho vitantika zay ty hiatreke ty olagne manjò antika sady tsy haintika ndra ty raha horehafegne naho fa mivavake. Faie mandrisike antika hivavake ama’e avao ty Jehovah, ndra tie sarotse amantika aza ty hirehake ama’e ze raha tsapantikagne.​—Rom. 8:26, 27.

10. Nagnino ty famakiagne Baiboly naho ty fisaintsaignagne ze raha vakientika ro tena ilaegne, arake ty Hebreo 4:12?

¹⁰ Mahazo hery tika naho fa mamaky Baiboly. Nahazo hery naho fampionognagne ty Paoly naho fa namaky ty Soratse Masigne, le azontika atao ka ty mitsikombe aze. (Rom. 15:4) Naho fa mamaky naho misaintsaigne ty Saontsin’Andrianagnahare tika, le hagnampe antika amy ty alala ty fagnahi’e masigne ty Jehovah mba hahatakarantikagne tie afake magnampe antika o Soratse Masigneo. (Vakio ty Hebreo 4:12.) Hoe ty Ronald, i nirehafegne taloha teoy: “Fale raho fa nikezake nanohy avao i fahazarako mamaky Baiboly isan-karivay. Maro ty toetse i Jehovah naho ty fomba nikarakara’e o vahoa’eo nisaintsaigneko. Nahazo hery raho naho fa nanao izay.”

11. Akore ty nagnampea ty Baiboly i rahavave raike vantotsey?

¹¹ Hiova ty fomba fagnentea’o ty olagne atrehe’o naho misaintsaigne ty Saontsin’Andrianagnahare rehe. Mareho ohatse ty soa niazo ty rahavave vantotse raike toy naho fa namaky Baiboly reke. Nanoro hevetse aze ze  androanavi-pagnahy raike zay mba hamaky ty boke i Joba, satria misy lesogne maro azo’e ianaragne ty ao. Naho fa nanao izay i rahavavey, le avy le nitsaratsara i Joba noho i reke nanagne heve-diso. Hoe i rahavavey tan-tsai’e tagne: ‘O Joba! Ko i olagne mahazo azo rey avao ro ifantoha’o!’ Faie nitsapa’e naho fa niavy eo tie nanagne toe-tsaigne manahake i Joba ka reke. Nagnampe aze hagnitsy ty toe-tsai’e zay, sady nagnampe aze hahazo hery mba hahavità’e hiatreke ty alahelo’e i vali’e nimatey.

12. Akore ty fomba ampiasà i Jehovah o rahalahio naho o rahavaveo mba hagnomeagne hery antika?

¹² Mahazo hery boake amy i Jehovah tika naho fa miarake amo o rahalahio naho o rahavaveo. Nirehake tamy i Kristiana nama’e rey ty Paoly tie magniry hahatrea iareo, mba hahafaha iareo ‘hifampahery.’ (Rom. 1:11, 12) Hoe ty Mary, i nirehafegne taloha teoy: ‘Tena teako ty miarake amo o mpiara-manompò. Iareo ty ampiasae i Jehovah mba hagnampe ahy, ndra tie tsy tena hay iareo aza ty olagne atreheko. Mirehake raha mampahery iareo, ndra mandefa taratasy ho ahike, sady tena amy ty fotoagne nipaliaeko aze ty nanoa iareo izay. Nagnampe ahy tsy hisalasala hirehake amy ty rahavave managne olagne manahake ahy naho hiana-draha amy iareo zay. Natao o androanavi-pagnahio ka ze hahatsapako tie tena sarobily raho amo o fiangonagneo eo.”

13. Ino ty azontika atao mba hampaherezagne ty hafa naho fa am-pivoriagne agne?

¹³ Am-pivoriagne agne tika ro tena afake mifampahery amo o rahalahio naho o rahavaveo. Naho fa magnatreke fivoriagne areke tika, le azontika atao ty mirehake tie teantika iareo, sady ankasitrahantikagne ty raha atao iareo. Izao ohatse ty nirehafe i Petera, androanavi-pagnahy raike, tamy ze rahavave raike manambaly tsy vavolombelogne zay, taloha ty hanomboha i fivoriagney: “Tena mampahery anay ty mahatrea azo rahavave. Lava vita’o avao ty mampiomagne soa i ana’o enegne rey naho fa hivory, sady ampea’o iareo mba ho vognogne hagnomey toin-drehake ka.” Nipopoke ty ranomaso i rahavavey tafara izay, le hoe reke: “Naho mba fanta’o moa rahalahy tie tena paliaeko ze raha nirehafe’o zay!”

14. Ino ty soa azontika naho fa manompo?

¹⁴ Mahazo hery tika naho fa manompo. Mahatsiaro ho velombolo tika naho fa mitory, ndra mitsanogne o ndatio ndra tsy mitsanogne. (Ohab. 11:25) Nitsapa ty rahavave raike atao tihoe Stacy toy, fa magnampe aze hahazo hery ty fanompoagne. Tena nalahelo reke naho fa nivoaroake ty raike amy ty keleia’e, le mateteke reke ro nirehake tie: ‘Kera mbe nisy raha hafa toko’e ho nataoko mba ho nagnampeagne aze?’ Lava nieretseretse izay avao ty Stacy. Ino ty nagnampe aze hiatreke ze raha mahakivy zay? Ty fanompoagne. Ty anto’e, naho fa nanompo reke, le nanjare nifantoke tamo o ndaty mipay ty fagnampea’e amy i faritaney eio. Hoe reke: “Nimey i Jehovah fampianaragne Baiboly raike nandroso malaky zay raho tamy i fotoagne rey. Tena nagnomey hery ahy zay. Ty fanompoagne ty raha fara’e ze tena nagnampe ahy.”

15. Ino ty ianara’o amy ty raha nirehafe i Mary?

¹⁵ Va’e hahatsapa ty ndaty ila’e tie tsy afake mahavita bey amy ty fanompoagne noho ty raha iaigna iareo. Naho izay ka ty tsapa’o, le tsiarovo fa fale ty Jehovah naho fa magnomey ze fara’e soa vita’o rehe. Mareho indraike ty raha natao i Mary. Nahatsapa reke tie hoe tsy nisy raha nipaliagne aze zay ty tamy i fiangonagne nampiasa firehake hafa nifindrà’ey tagne. Hoe reke: “Nagnomey i toin-drehake tsotsotra rey, ndra namaky andinin-teny, ndra nanolotse taratasy milimpy avao ty mba niazoko natao tamy ty voaloha’e.” Nahatsiaro ho tsy nahay reke naho oharegne amy i ndaty mahay soa i firehake nampiasaegne tagney. Faie nagnova ty  toe-tsai’e reke, le nanomboke nahatsapa tie vita i Jehovah avao ty mampiasa aze ndra tie tsy mahay soa i firehakey aza reke. Hoe reke: “Tsotra avao ty raha rehafe o Baibolio, sady i hamarenagne agnate’e ao rey ro afake magnova ndaty fa tsy ty fahaia’o.”

16. Ino ty hagnampe i mpitory tsy afake miboake faie te hitory rey?

¹⁶ Vazoho i Jehovah sady ankasitraha’e ty fagniriantika hitory, ndra tie tsy afake miboake aza tika. Afake magnampe antika reke mba hahavita hitory amo o ndaty mikarakara antikagneo, ndra amo o dokoterao naho o rasazeo. Va’e ho kivy tika naho mampitaha ty fanompoagne vitantika amy izao amy ze nivitantika taloha. Faie naho mifantoke amy ty fomba agnampea i Jehovah antika amy izao tikagne, le hahazo hery mba hahavitantika hiaretse sady ho falefale avao.

17. Nagnino tika ro toko’e hanohy avao ty fanompoantika, ndra tie hoe tsy misy voka’e eo naho eo zay aza ty fanompoantika, arake ty Mpitoriteny 11:6?

¹⁷ Tsy haintika tie ty aia amy i voa ty hamarenagne nitongisentikagne rey ro hitiry. (Vakio ty Mpitoriteny 11:6.) Mitory an-telefony naho an-taratasy ohatse ty Barbara, rahavave raike 80 taogne mahery zay. Nisy taratasy raike nalefa’e zay, nisia’e gazete Fitalakesan-davitse 1 Marsa 2014 ty tagnate i valopy nasia’e azey tao. Izao ty lohaheve o gazete iohoe “Nahavita Be Taminao Andriamanitra.” Tsy nihai’e tie ze mpivaly raike nivoaroake tagnate ty 27 taogne mahery zay ty nahazo i taratasy nalefa’ey. Le naherenkere iareo nivakiegne i gazetey. Nitsapa i lahilahỳ tie hoe nisaontsy tama’e mivantagne ty Jehovah tamy izay. Ty voka’e, nanomboke nivory iareo mirovaly, le nivoarae ho Vavolombelo i Jehovah indraike. Tena nifale ty Barbara sady nahatsiaro ho velombolo naho fa nahatrea tie nisy voka’e soa ty fitoriagne an-taratasy natao’e.

18. Ino ty raha tsy maintsy ataontika naho te hahazo hery boake aman’Andrianagnahare tika?

¹⁸ Maro ty fomba agnomea i Jehovah hery antika. Agnisa izay ty vavake, ty Baiboly, o mpiara-manompò naho ty fanompoagne. Naho mikezake magnararaotse o raha mea i Jehovah antika rehoe tika, le asehontika tie matoky aze tika sady mienga aze hagnampe antika. Lonike areke tika mba hiantehetse amy i Babantikagne an-dagnitse agney avao, satria mahafale aze ‘ty magnomey hery ze ndaty mipiteke ama’e amy ty fo’e.’​—2 Tan. 16:9.