1-2. Hazavao tie nagnino ty toro lalagne va’e fa haintikagne soa ro manjare tena lahibey amantika naho fa miova ty raha iaignantikagne?

 MITSANOGNE soa i lahajaka Ara-baiboly atao amy i andro anoagne mariaze iareoy i mpagnengay naho i ampela ho vali’ey. Tsy vaovao amy iareo ty toro lalagne hazavaegne amo o lahajaka iohoe. Faie manomboke eo, le hevere iareo ho tena lahibey o andinin-teny rehoe. Inogne ty anto’e? Satria hampihare iareo amy izay rey naho fa mivaly iareo.

² Hoe izay ka ty raha tsapa o rae aman-drene Kristiana vaho samba’e managne anake rey. Va’e fa maro ty lahajaka mirehake miomba ty fitezagne nirey iareo tagnate ty taogne maro. Faie vao mainke hevere iareo ho tena lahibey ty torohevetse tamy i lahajaka rey tie amy izao. Ty anto’e, hiterake amy izay iareo le iareo ka ty hiteza o ana iareo iohoe. Tena andraikitse lahibey zay! Naho fa miova areke ty raha iaignantika, le manjare miova ka ty fiheverantika i andinin-teny fa haintika soa rey. Izay ty anto’e raike mahavy o mpanompo i Jehovah-o mamaky ty Soratse Masigne “amy ze hene andro” iveloma iareo, manahake ty nandrisihagne ty mpanjaka o Israelio, naho hisaintsaigne ze raha ianara iareo ao.​—Deot. 17:19.

3. Inogne ty hodinehentikagne ato?

³ Ry rae aman-drene, managne tombotsoa miambake nareo. Tsy inogne zay fa ty hampianatse ty ana’areo ty miomba i Jehovah. Faie tsy ty hampita fahalalagne miomba an’Andrianagnahare amy ty ana’areo avao ty raha tea’areo hatao. Tea’areo hampeagne mba tena hotea aze ka iareo. Inogne ty hagnampe anareo hahavita izay? Handineke toro lala ty Baiboly efatse hagnampe ty rae aman-drene tika amy ty lahatsoratse toy. (2 Tim. 3:16) Hotreantikagne ato ka ty soa nirambese ty rae  aman-drene ila’e nampihatse ty toroheve ty Baiboly rey.

4. Inogne ty toro lalagne raike afake magnampe ty rae aman-drene mba hagnampeagne ty ana iareo hotea i Jehovah? (Jakoba 1:5)

⁴ Toro lalagne 1: Paliao ty tari-dala i Jehovah. Mangataha amy i Jehovah mba hagnomey anareo ty fahendreagne ilaegne hagnampeagne ty ana’areo hotea aze. (Vakio ty Jakoba 1:5.) Ireke ty tena fagneva ty hagnomey torohevetse antika. Maro ty anto’e mahavy antika mirehake izay. Intoa ty roe ama’e. Voaloha’e, tsy misy rae aman-drene za-draha manahake i Jehovah. (Sal. 36:9) Faharoe, mandrambe soa tika naho fa magnorike ty torohevetse feno fahendreagne mei’e.​—Isaia 48:17.

5. a) Inogne ty raha mea ty fandamina i Jehovah mba hagnampeagne o rae aman-dreneo? b) Inogne ty nianara’o boake amy ty fomba nitezà i Rahalahy naho i Rahavave Amorim ty ana iareo, arake ty trea amy i videoy ao?

⁵ Maro ty hanegne ara-pagnahy mey i Jehovah amy ty alala ty Saontsi’e naho ty fandamina’e afake magnampe anareo mba hahavy ty ana’areo hotea Aze. (Mat. 24:45) Misy torohevetse azo ampiharegne maro ohatse trea amy ty andian-dahatsoratse tihoe “Ho An’ny Fiainakaviana” naboake tamy ty gazete Mifohaza! tagnate ty taogne maro rey. Fa azo henteagne amy i tragnom-porarontikagney ao ka o lahatsoratse rehoe tie amy izao. Maro ka ty video amy jw.org ao afake magnampe ty rae aman-drene mba hampihatse ty toroheve i Jehovah naho fa miteza ty ana iareo. *​—Ohab. 2:4-6.

6. Inogne ty tsapa ty rae raike miomba ty tari-dalagne azo iareo mirovaly boake amy ty fandamina i Jehovah?

⁶ Maro ty rae aman-drene nampiseho ty fankasitraha’e i fagnampeagne mea i Jehovah amy ty alala i fandamina’e rey. Hoe ze rae raike atao tihoe Joe zay: “Tsy mora ze o miteza ajaja telo amy ty hamarenagne ao zao. Lava mivavake amy i Jehovah avao areke zahay mirovaly mba hagnampea’e anay. Le mateteke ka zahay ro mahatsapa tie tena amy ty fotoagne ilae’ay fagnampeagne amy ty olagne atrehe’ay ro misy lahatsoratse ndra video miboake. Fa agnisa ty fiaigna’ay ty mipay ty tari-dala i Jehovah.” Nitrea i Joe naho i vali’e fa nagnampe  i ana iareoy hifandrambe maifitse amy i Jehovah i lahatsoratse naho i video rey.

7. Nagnino ty rae aman-drene ro tena toko’e hikezake mba ho modely soa? (Romanina 2:21)

⁷ Toro lalagne 2: Mikezaha ho modely soa. Magnente soa ze raha atao ty rae aman-drene’e o ajajao, sady mateteke ro tsikombe iareo ty raha anoe i rae aman-drene iareo rey. Mazava hoaze fa tsy misy rae aman-drene voririke. (Rom. 3:23) Faie ndra tie eo zay, le toko’e hanao ze fara heri’areo nareo rae aman-drene mba ho modely soa hoahy ty ana’areo. (Vakio ty Romanina 2:21.) Izao ty nirehafe ze rae raike zay miomba o ajajao: “Tsy mifily raha ho trohegne o eponzio, le hoe izay ka o ajajao.” Hoe ka reke: “Naho fa tsy mifagnarake amy ty raha ampianarentika ty raha ataontikagne, le horehafe iareo tika.” Naho teantika hotea i Jehovah areke ty anantikagne, le mila ataontika trea iareo fa tena teantika Reke.

8-9. Inogne ty ianara’o boake amy ty raha nirehafe i Andrew naho i Emma?

⁸ Maro ty fomba azo ty rae aman-drene atao mba hampianaragne ty ana iareo hotea i Jehovah. Mareho ohatse ty raha nirehafe i rahalahy Andrew 17 taogne: “Mateteke ty babako naho i reneko ro nampianatse ahy tie tena ilaegne ty mivavake. Mivavake miarake amako avao ty babako isake hariva, ndra tie fa nivavake hoahy manokagne aza raho. Lava maniahy anay avao ka ty babako naho i reneko tie: ‘Afake mirehake amy i Jehovah avao nareo ndra impire ndra impire tea’areo hirehafagne ama’e.’ Nanjare nitena raha lahibey amako areke ty vavake. Mora amako ty mivavake amy hinane zao sady manahake ty Rae bey hatea ty fandrambesako i Jehovah.” Ry rae aman-drene, tsiarovo’areo avao fa afake ty hisy voka’e amy ty ana’areo ty hatea’areo i Jehovah.

⁹ Dineho ohatse ty raha niaigna i Emma. Nitrosa vola maro tama o ndaty ty baba’e. Tsy naloan-drae’e i trosa rey, le i rene iareo ty tsy maintsy nandoa aze naho fa nenga’e iareo. Hoe ty Emma: “Mateteke ty reneko ro tsy le nanam-bola fire, faie lava nirehake avao reke tie mikarakara o mpanompo’eo ty Jehovah. Trea amy ty fiaigna’e fa tena nino izay reke. Tena nampihare i reneko ty raha nampianare’e.” Inogne ty lesogne boake amy izay? Afake magnomey ohatse soa avao ty rae aman-drene ndra tie miatreke raha sarotse.​—Gal. 6:9.

10. Naho fa ombia ty rae aman-drene Israelita ro afake nirehake tamy ty ana iareo ty miomba i Jehovah? (Deoteronomia 6:6, 7)

¹⁰ Toro lalagne 3: Mirehafa amy ty ana’areo tsy tapake. Nandily o Israelitao ty Jehovah mba hampianatse tsy tapake ty ana iareo ty miomba aze. (Vakio ty Deoteronomia 6:6, 7.) Maro ty hirike ahafaha o rae aman-drene rehoe nifampirehake tamy ty ana iareo isan’andro mba hagnampeagne iareo hotea i Jehovah. Ty ana-dahy ohatse nagnampe ty rae’e nambole naho namory vokatse. Ty anake ampela ka nagnampe an-drene’e nanjaitse, nanjare naho nanao tolon-draha hafa isan’andro. Maro areke ty raha ara-pagnahy niazo iareo nirehafegne tamy i ana iareo rey naho fa niara-niasa iareo tamy i fotoagne rey. Afake nirehake miomba ty hasoa toetse i Jehovah naho ty fomba nagnampea’e iareo keleian-draike ohatse iareo.

11. Ombia ty fotoagne raike azo ty rae aman-drene hararaotegne hirehafagne amy ty ana iareo?

¹¹ Faie fa miova ty fiaignagne amy izao. Amy ty tane maro agne, le tsy mba manam-potoagne hifampirehafagne ty rae aman-drene naho ty anake isan’andro. Ty anto’e, ty rae aman-drene va’e miasa, le ty ana iareo va’e mianatse. Tsy maintsy mipay hirike areke i rae aman-drene rey mba hahafaha iareo hifampirehake amy ty ana iareo. (Efes. 5:15, 16; Fil. 1:10) Agnisa ze hirike zay ty fotoam-pivavaha  ty keleiagne. Hoe ze rahalahy tanora atao tihoe Alexander zay: “Lava manao fandaharagne avao ty babako mba hahafaha’ay hanao fotoam-pivavaha ty keleiagne tsy tapake, sady tsy misy raha enga’e hanembatsembagne o fotoagne iharoa’ay iohoe. Midebà zahay naho fa vita i fianaragney.”

12. Inogne ty raha toko’e hatao ty loha ty keleiagne an-tsaigne naho fa iareo manao fotoam-pivavaha ty keleiagne?

¹² Naho loha ty keleiagne rehe, inogne ty azo’o atao mba hahavy ty fotoam-pivavaha ty keleia’areo hahafinaritse ty ana’areo? Azo’areo atao zao ty miara-mianatse i bokentikagne vaovao tihoey Ankamamio Nainai’e o Fiaignagneo! Tena hagnampe anareo miroanake hifampirehake soa ty fianaragne o boke iohoe. Tea’o zao naho mirehake ty raha am-po’e naho an-tsaigne agne ty ana’areo. Tsy soa areke naho amo o fotoagne anoa’areo fotoam-pivavaha ty keleiagne iohoe ro agnararaotagne magninje ndra magnitsy iareo. Mikezaha ka tsy hasiake naho mirehake raha tsy mifagnarake amy ty toro lala ty Baiboly iareo. Toko’e hisaora’o aza iareo naho fa mirehake ze raha tena am-po iareo agne, sady ampeo iareo tsy hatahotahotse ty hanao izay. Ty anto’e, tsy tena ho afake hagnampe i ana’areo rey rehe naho tsy tena hai’o ty raha tsapa iareo.

13. Ombia ka ty fotoagne hafa azo ty rae aman-drene hararaotegne mba hagnampeagne ty ana iareo hifandrambe maifitse amy i Jehovah?

¹³ Ry rae aman-drene, mipaliava hirike hafa mba hahafaha’areo magnampe ty ana’areo hifandrambe maifitse amy i Jehovah isan’andro. Ko mandigne tie isake tie hianatse Baiboly avao nareo vaho izay hampianatse iareo ty miomba i Andrianagnaharentikagne bey hateay. Mareho ty nirehafe ty rene raike atao tihoe Lisa toy: “Nampiasae’ay o raha finorogneo mba hampianara’ay i ana’ay rey ty miomba i Jehovah. Naho fa manao raha mampihehe o ajajao ohatse i amboa’aỳ, le rehafe’ay iareo tie Andrianagnahare falefale i Mpamorogne antikagney, le manao raha reke mba hampiheheagne antika.”

14. Nagnino ty rae aman-drene ro tena mila magnampe ty ana iareo mba hahay hijobogne soa ty nama iareo? (Ohabolana 13:20)

¹⁴ Toro lalagne 4: Ampeo ty ana’areo mba hahay hijobogne namagne soa. Rehafe  ty Saontsin’Agnahare mazava soa tie afake ty hisy voka’e soa ndra raty amantika ty namantikagne. (Vakio ty Ohabolana 13:20.) Ry rae aman-drene, hai’areo vao ty nama ty ana’areo? Fa nitrea’areo vao ty nama iareo, sady mba fa nanokagne fotoagne hiarahagne tamy iareo vao nareo? Inogne ty azo’areo atao mba hagnampe ty ana’areo hinamagne amo o ndaty tea i Jehovah-o? (1 Kor. 15:33) Magnampe ty ana’areo mba hijobogne namagne soa nareo naho taone’areo hanao raha miarake ama’areo miroanake i ndaty mifandrambe soa amy i Jehovah rey.​—Sal. 119:63.

15. Inogne ty raha azo ty rae aman-drene atao mba hagnampeagne ty ana iareo hahay hijobogne namagne soa?

¹⁵ Nirehake ze rae raike atao tihoe Tony zay tie nisy raha natao iareo mirovaly mba hagnampeagne ty ana iareo hijobogne namagne soa. Hoe reke: “Nanasa rahalahy naho rahavave sambe hafa taogne naho fiaviagne zahay tagnate ty taogne maro. Niarake nihinagne naho nanao fotoam-pivavaha ty keleiagne tama’ay iareo. Izay ty fomba lahibey raike nagnampe anay hahafantatse soa o ndaty tea i Jehovah naho manompo aze am-pifaleagneo. Nisy tamy i ndaty rey mpiandraikitse ty faritse naho misionera, le nisy ka ty ambahiny nivantagne tama’ay tao. Tena nisy voka’e lahibey tamy i ana’ay rey ty raha niaigna iareo, ty zotom-po iareo, naho ty fahafoezan-tegna iareo, sady nagnampe iareo hifandrambe maifitse amy i Jehovah ka.” Ry rae aman-drene, ampeo areke ty ana’areo mba hahay hijobogne namagne soa.

16. Akore naho mirehake ty ajaja raike tie tsy te hanompo i Jehovah reke?

¹⁶ Akore naho mirehake ty raike amy ty ana’areo tie tsy te hanompo i Jehovah, ie amy izao nareo fa nikezake mafe? Ko mieretseretse tie tsy nahay niteza nareo. Nimey i Jehovah safidy tika iaby, le agnisa izay ka i ana’areoy. Afake mijobogne areke tika ndra hanompo an’Andrianagnahare ndra tsy hanompo Aze. Naho nijobogne ty hisintake amy i Jehovah areke ty ana’o, le managna fanantenagne avao tie mbe hiheregne reke indraike andro agne. Tsiarovo i fagnoharagne miomba i anake  nimontsoy. (Lioka 15:11-19, 22-24) Nihalavitse i lala ty hamarenagney o ajalahy iohoe, faie nimpoly avao tamy ty fara’e. Va’e hisy hirehake tie: “Fagnoharagne avao igne. Le tena hisy vao ty raha hoe igne?” Ie. Magnamaregne izay ty tantara ty tanora atao tihoe Elie zay.

17. Nagnino ty tantara i Elie ro mampahery azo?

¹⁷ Izao ty nirehafe i Elie miomba ty rae aman-drene’e: “Nanao ze fara heri’e iareo mba hagnampeagne ahy hotea i Jehovah naho ty Saontsi’e ndra ty Baiboly. Faie nanomboke tsy nitsanom-bolagnegne raho naho fa nitanora.” Nanomboke nanao raha raty tambalimbalike agne ty Elie. Nikezake nagnampe aze tamy ty lafi’e ara-pagnahy avao ty baba’e naho i rene’e faie niliere’e. Nanjare niraty findesam-batagne reke naho fa niala ty tamy iareo agne. Faie nisy andro reke nirehake raha ara-baiboly tamy ze nama’e raike zay. Izao ty nirehafe i Elie: “Arakarake ty nirehafako ty miomba i Jehovah tamy i namakoy, ty vao mainke nahavy ahy hieretseretse ty miomba Aze. Niheregne tan-tsaiko tao tsikedetsikede i raha nampianare i babako naho i reneko ahy tamy Baiboly ao rey.” Niheregne tamy i Jehovah avao ty Elie tamy ty fara’e. * Mba alao sare an-tsaigne heike tie nanao akore ty nihafalea i rae aman-drene rey noho iareo nikezake nampianatse i ana iareoy ty miomba i Jehovah tamy ireke mbe nikedey!​—2 Tim. 3:14, 15.

18. Inogne ty tsapa’o miomba ty raha atao o rae aman-dreneo mba hampianaragne ty ana iareo hotea i Jehovah?

¹⁸ Ry rae aman-drene, nimey i Jehovah tombotsoa miambake nareo, le ty hiteza ty ana’areo mba hanjare mpanompo’e. (Sal. 78:4-6) Faie tsy mora zay, le tena midera anareo amy ty fo’ay zahay noho ty kezake atao’areo amy ty fagnampeagne ty ana’areo! Naho inareo mikezake avao manao ze fara heri’areo mba hagnampeagne ty ana’areo hotea i Jehovah sady miteza iareo arake ty fagnanara’e naho ty fanoroa’e, le matokia fa ho fale i Raentika bey hatea an-dagnitse agney.​—Efes. 6:4.