1. Inogne ty raha tsy mora amy ty ankamaroantika ty magnatratse aze?

 FA NAMETRAKE tanjogne ara-pagnahy vao rehe, faie tsy nimora tama’o ty nagnatratse aze? b Tsy irehe avao ty fa nahatsapa hoe izay. Te hagnasoa ty vavake atao’e naho te hanao izay tsy tapake zao ohatse ty Philip faie nisarotse tama’e ty nahatrea fotoagne mba hivavahagne. Ty nitanjo i Erika ka zao le tihoe ho avy ara-potoagne naho fa magnatreke fivoriagne aloha ty fanompoagne faie mbe nateteke tara avao reke. I Tomas indraike nikezake hahavita hamaky o Baibolio hatrake ampara’e. Hoe reke: “Mahakamo ahy ty mamaky Baiboly. Fa intelo raho ty nikezake nanao izay, faie isake tie avy amy Levitikosy eo raho le mijanogne.”

2. Nagnino tika ro tsy toko’e ho kivy naho misy tanjogne ara-pagnahy tsy mete trantikagne?

² Ko kivy naho misy tanjogne tea’o ho tratraregne amy izao faie tsy mete tratse’o. Ndra tie tanjogne tsotsotra avao aza, le mitake fotoagne naho kezake mafe ty fagnatratraragne aze. Ty kezake atao’o mba hagnatratrara’o ty tanjo’o ro manoro tie sarobily ama’o ty fifandrambesa’o amy i Jehovah sady tea’o homeagne ze fara’e soa reke. Sarobily amy i Jehovah ty kezake atao’o. Mazava hoaze fa tsy hampanao azo raha tsy ho vita’o ty Jehovah. (Sal. 103:14; Mika 6:8) Toko’e hametrake tanjogne mifagnarake amy ty raha ho vita’o naho ty raha iaigna’o areke rehe. Faie ino ty azo’o atao mba hagnatratraragne aze? Andao tika handineke soso-kevetse tsiampeampe.

3. Nagnino ty fanagnagne fagniriagne hagnatratse tanjogne ro tena lahibey?

³ Tena raha lahibey ty hanagnantika fagniriagne hagnatratse tanjogne. Naho managne ze fagniriagne zay ty ndaty raike, le izay ty handrisike aze hikezake hagnatratse i tanjo’ey. Azo ampitoviegne amy ty tioke manoseke o sambo misy lai’eo amy ze toeragne tea’e handenagne ty fagniriagne hagnatratse tanjogne. Naho mitioke avao o andrò, le ho toly amy ty toeragne handenà’e agne i samboy. Vao mainke ho toly tsiela i samboy naho mafe i tiokey. Hoe izay ka, fa naho managne fagniriagne hagnatratse tanjogne tika le ho mora amantika ty hagnatratse i tanjontikagney. Hoe ty Davida, rahalahy raike a Salivadoro agne: “Manjare te hikezake mafe rehe naho fa managne fagniriagne. Tsy misy raha enga’o hikalagne azo tsy hahatratse i tanjo’oy.” Ino areke ty hagnampe azo hanagne fagniriagne hagnatratse tanjogne?

4. Ino ty raha azontika angatahegne amy ty vavake? (Filipianina 2:13) (Henteo i sarey.)

⁴ Mivavaha amy i Jehovah mba hampitombo ty fagniria’o. Afake magnomey fagnahy masigne azo reke mba hanagna’o fagniriagne hagnatratse tanjogne. (Vakio ty Filipianina 2:13.) Kindraike tika mametrake tanjogne satria haintika tie izay ty toko’e hataontika. Tsy raty zay, faie va’e tsy tena managne fagniriagne hagnatratse i tanjogney tikagne. Izay zao ty nanjò i Norina, rahavave a Ogandà agne. Ty hitarike fampianaragne Baiboly ty nitanjo’e faie tsy niampe ty fagniria’e hanao izay satria nihevetse ty vata’e ho tsy mahay mampianatse reke. Ino ty nagnampe aze? Hoe reke: “Nivavake mafe tamy i Jehovah raho isan’andro mba hagnampe ahy hampitombo ty fagniriako hitarike fampianaragne Baiboly. Nanao raha nifagnarake tamy ty vavake nataoko raho, le nikezake mafe nagnasoa ty fahaiako hampianatse. Volagne tsiampeampe tafara izay, le nitsapako fa nihanitombo ty fagniriako hitarike fampianaragne Baiboly. Tamo o taogne iohoe avao raho, le nitarike fampianaragne Baiboly roe.”

5. Inogne ty azontika saintsaignegne mba hampitombo ty fagniriantika hagnatratse tanjogne?

⁵ Saintsaigno ty raha fa natao i Jehovah ho azo. (Sal. 143:5) Nisaintsaigne ty hasoa fagnahy tsy misy hoe’e naseho i Jehovah tama’e ty apostoly Paoly. Izay ty nahavy aze niasa mafe hoahy i Jehovah. (1 Kor. 15:9, 10; 1 Tim. 1:12-14) Hoe izay ka, fa arakarake ty isaintsaigna’o ty raha natao i Jehovah ho azo, ro vao mainke hampitombo ty fagniria’o hagnatratse ty tanjo’o. (Sal. 116:12) Dineho ty raha nagnampe ty rahavave raike a Honduras agne, mba hagnatratrara’e ty tanjo’e ho mpisava lalagne maharetse. Hoe reke: “Nisaintsaigneko ty halahibey ty hatea i Jehovah ahy. Nitaone’e mba ho agnisa ty vahoa’e raho. Mikarakara naho miaro ahy reke. Vao mainke mitombo ty hateako aze naho fa misaintsaigne izay raho sady mitombo ka ty fagniriako hagnatratse tanjogne.”

6. Ino ka ty raha hafa hagnampe antika hanam-pagniriagne hagnatratse tanjogne?

⁶ Mifantoha amy ty fitahiagne ho azo’o.  Mareho indraike ty raha nirehafe i Erika, miomba ty tanjo’e mba tsy ho tara naho fa fivoriagne aloha ty fanompoagne. Hoe reke: “Tsapako fa maro ty raha nanjare tsy niarako noho iraho tara lava naho fa nanompo. Faie naho fa niavy aloha raho le afake nanalama o mpiara-manompò naho nifampirehake amy iareo. Afake naharey soso-kevetse azo ampiharegne raho mba hagnasoako ty fanompoako sady hahatrea hafaleagne ama’e.” Nifantoke amy ty soa ho azo’e naho avy ara-potoagne ty Erika, le izay ty nagnampe aze hagnatratse i tanjo’ey. Ino ka ty fitahiagne azo’o ifantohagne? Naho irehe managne tanjogne mifandrambe amy ty famakiagne Baiboly ndra miomba ty vavake, le saintsaigno tie nagnino ty fanoa’o irey ro magnampe azo hifandrambe maifitse amy i Jehovah. (Sal. 145:18, 19) Naho ty mba hanagne toetse kristiana ka ty tanjo’o, le ty voka’e soa atera izay amy ty fifandrambesa’o amy ty hafa ro ifantoho. (Kol. 3:14) Nagnino naho mba atao’o lisita ty anto’e mahavy azo magniry hagnatratse tanjogne? Ko haligno ka ty magnente mateteke i listay. Hoe ka ty Tomas, i nirehafegne taloha tagney: “Naho fa maro ty anto’e mahavy ahy te hagnatratse tanjogne, le manjare te hikezake mafe ka raho mba hahatratse aze.”

7. Ino ty nagnampe i Julio mirovaly hagnatratse ty tanjo iareo?

⁷ Miaraha amy ty ndaty afake mandrisike azo hagnatratse i tanjo’oy. (Ohab. 13:20) Mareho ty raha nagnampe i Julio mirovaly hagnatratse ty tanjo iareo hifindra amy ty toeragne mipay mpitory maro. Hoe ty Julio: “Ze ndaty nandrisike anay hagnatratse ty tanjo’ay ro natao’ay namagne. I tanjo’aỳ ro natao’ay debà amy iareo. Maro amy iareo ty fa nahatratse tanjogne manahake i tanjo’aỳ, le afake nagnomey soso-kevetse tena nilae’ay. Nagnontenea iareo ka tie mba manao akore hinane zay ty fandeha i tanjo’aỳ, le nirisihe iareo avao zahay mba hagnatratse aze naho fa ilaegne zay.”

8. Ino ty raha va’e hiseho naho isake tie manam-pagniriagne avao tikagne vaho izay mikezake magnatratse tanjogne? (Henteo i sarey.)

⁸ Naho ty maregne, le fa nisy fotoagne tika iaby tsy nanam-pagniriagne hagnatratse tanjogne. Faie midika vao zay tie tsy afake magnatratse tanjogne tikagne? Aha’a. O rivotseo zao afake manoseke ty sambo misy lai’e mba handeha amy ze tea’e handenagne. Faie miovaova ty hamafe i rivotsey, le kindraike va’e tena tsy hisy. Faie midika vao zay tie tsy afake mandeha i samboy? Tsy voatere. Ty sambo ila’e zao ohatse managne motera, ty ila’e ka misy famegnagne aze. Afake mampiasa ireo o tan-tsambò mba hampandeha i sambo’ey amy ze tea’e handenagne. Mitovy amy i rivotsey ty fagniriantika hagnatratse tanjogne le va’e hiovaova ka zay. Kindraike ka tika, va’e tsy hanam-pagniriagne hagnatratse ty tanjontika. Naho ohatse areke amy itika manam-pagniriagney avao vaho mikezake hagnatratse tanjogne, le va’e ho sarotse ty hahatratrarantikagne izay. Ndra tie tsy manam-pagniriagne hagnatratse tanjogne tika, le mbe  afake mikezake hagnatratse tanjogne avao manahake o tan-tsambo mipay fomba hafa, mba hiaviagne amy ze tea’e handehanagne agne. Mitake kezake zay, faie ho soa ty voka’e. Aloha ty handinehantika ty raha azontika atao, le andao heike tika hamale fagnonteneagne raike hafa.

9. Toko’e hagnatratse tanjogne ara-pagnahy avao vao tika ndra tie tsy manam-pagniriagne hanao izay aza? Hazavao.

⁹ Tea i Jehovah naho manompo aze am-pifaleagne naho vokatse ty fontika tikagne. (Sal. 100:2; 2 Kor. 9:7) Toko’e hagnatratse tanjogne ara-pagnahy avao vao tika ndra tie tsy manam-pagniriagne hanao izay aza? Dineho ty raha natao i apostoly Paoly. Hoe reke: “Asiako mafe ty vatako le andevozeko.” (1 Kor. 9:25-27) Namorese ty vata’e ty Paoly mba hanao ze raha nitake i Jehovah ama’e ndra tie tsy ni-te hanao izay aza reke. Nankasitraha i Jehovah vao ty fanompoagne natao’e? Azo antoke zay. Namale soa ty kezake mafe natao’e ty Jehovah.​—2 Tim. 4:7, 8.

10. Inogne ty soa rambesentika naho itika mikezake mafe avao hagnatratse tanjogne ndra tie tsy manam-pagniriagne hanao izay aza?

¹⁰ Tena fale ka ty Jehovah naho fa mahavazoho antika magnatratse ty tanjontikagne ndra tie tsy manam-pagniriagne hanao izay aza tika. Ty anto’e, ndra tie tsy teantika aza ty manao i raha ampanoe’ey, le manao izay avao tikagne satria tea aze. Hitahy ty kezake mafe ataontika ka ty Jehovah, manahake ty nitahia’e i Paoly. (Sal. 126:5) Naho fa itika mandineke ty fomba nitahie i Jehovah antika, le izay ty va’e hahavy antika hagniry hagnatratse tanjogne. Izao ty nirehafe i Lucyana, rahavave boake a Polony agne. Hoe reke: “Kindraike raho malaigne hiboake hanompo, lohotsie naho fa rokake. Faie tena latsa raho satria le vata’e mahatsapa ho fale avao naho fa mandeha manompo ndra tie rokake aza.” Andao areke ho henteantika ty raha azontika atao ndra tie tsy manam-pagniriagne hagnatratse tanjogne aza tika.

11. Akore ty fomba agnampea i Jehovah antika mba hahavita hifehe tegna?

¹¹ Mivavaha mba hahafehe tegna. Tihoe mifehe tegna, le ty fahaiagne mifehe ty fihetseham-po naho ty raha atao. Mateteke o rehake iohoe le ampiasaegne mba hirehafagne ndaty raike mifehe tegna mba tsy hanao raha raty. Faie misy fotoagne tika mila mifehe tegna mba hikezake hanao ty soa, lohotsie naho sarotse amantika ty manao aze ndra tsy manam-pagniriagne hanao izay tika. Tadidio fa agnisa ty vokatse ty fagnahy ty fifehezan-tegna. Angataho areke ty Jehovah mba hagnomey ty fagnahi’e masigne mba hanagna’o o toetse lahibey iohoe. (Lioka 11:13; Gal. 5:22, 23) Nihazavae i Davida i nirehafentika vao tsiela teoy ty fomba nagnampea ty vavake aze. Te hanao fianaragne raike tsy tapake reke. Hoe reke: “Nangatake tamy i Jehovah raho mba hagnampe ahy hahavita hifehe tegna. Noho ty fagnampea i Jehovah, le nanjare nanagne fandaharam-potoagne soa mba hanoagne fianaragne raike raho sady tsy niovaova.”

12. Nagnino ty toro lalagne amy Mpitoriteny 11:4 ao ro magnampe antika hagnatratse ty tanjontika?

¹² Ko mandigne ty hilamina ty fiaigna’o. Tsy ombia hahatrea fiaignagne milamigne zao tika naho mbe amy ty tontolo toy eto avao. Naho izay ty ho lignisantika, le tsy hahatratse ty tanjontika tika. (Vakio ty Mpitoriteny 11:4.) Hoe ty rahalahy Dayniel: “Naho amy izao, le tsy hisy o fiaignagne milamigne zao. Toko’e le avy le manomboke tika naho fa hanao raha fa tsy hagnorik’andro lava avao.” Nirehake anto’e hafa tsy toko’e hagnorihantika andro ka ty rahalahy Paul boake a Ogandà agne. Hoe reke: “Magnenga i Jehovah hitahy antika tika, naho fa manomboke manao raha ndra tie eo aza ty olagne atrehentika.”​—Mal. 3:10.

13. Ino ty mahasoa tihoe mametrake tanjogne tsotsotra heike?

¹³ Tanjogne mora tratraregne hey ty anombohagne aze. Tsy hagniry hagnatratse ty  tanjontika tika naho mametrake tanjogne sarotse loatse. Naho izay ty raha misy, ke soa naho tanjogne mora tratraregne hey ro ikezaha’o atao? Naho ty mba hanagne toetse soa ohatse ty tanjo’o, nagnino naho raha tsotsotra avao hey ty hanomboha’o aze? Naho te hahavita vaky Baiboly hatrake ampara’e ty tanjo’o, nagnino naho agnate ty fotoagne kedekede avao hey ty hanomboha’o aze? Nikezake mafe ty Tomas i nirehafegne taloha agney mba hahavita vaky Baiboly agnate ty tao’e raike. Hoe reke: “Tsapako tie nametrake tanjogne sarotse tratraregne raho. Nanapa-kevetse areke raho fa hamaky Baiboly indraike, faie andine’e tsiampeampe avao hey ty nivakieko isan’andro le igne ro nisaintsaigneko. Ty voka’e, nanomboke nahatrea hafaleagne raho naho fa nanao izay.” Naho fa nanomboke nahatrea hafaleagne amy ty famakiagne aze reke, le nampitomboe’e ty fotoagne namakia’e aze. Tamy ty fara’e le nivita’e vaky iaby i Baibolỳ. c

14. Inogne ty olagne va’e hikalagne antika tsy hagnatratse tanjogne?

¹⁴ Ndra tie fa manam-pagniriagne hagnatratse tanjogne tika, sady fa mikezake mifehe tegna le va’e mbe hisy avao ty olagne hikalagne antika tsy hahatratse i tanjogney. Va’e hisy raha tsy ampoizegne hiseho ohatse, le manjare mandany ty fotoagne toko’e hagnatratraragne i tanjogney. (Mpito. 9:11) Va’e hiatreke raha sarotse mahakivy ohatse tika, le hanjare tsy hanagne hery. (Ohab. 24:10) Noho itika tsy voririke ka, le va’e hanao fahadisoagne mahavy antika tsy hahatratse ty tanjontikagne. (Rom. 7:23) Ndra tika va’e ho rokake. (Mat. 26:43) Inogne areke ty hagnampe antika hahavita handrese o olagne rehoe?

15. Naho misy ty olagne, le midika vao zay fa tsy afake magnatratse tanjogne sasa rehe? Hazavao. (Salamo 145:14)

¹⁵ Tadidio fa mbe afake magnatratse tanjogne rehe, ndra tie misy olagne aza. Fa nirehafe ty Baiboly tie va’e hiatreke olagne mateteke tika.  Faie rehafe’e ka tie noho ty fagnampea i Jehovah le ho vitantika ty hagnatratse ty tanjontika. (Vakio ty Salamo 145:14.) Hoe ty rahalahy Philip i nirehafegne taloha teoy: “Ty raha ifantohako le tsy tihoe iraho tsy nahatratse i tanjokoy, fa ty kezake mafe nataoko mba hagnatratraragne i tanjokoy indraike.” Hoe ka ty Davida, i nirehafentika taloha tagney: “Tsy ataoko hikalagne ahy tsy hagnatratse i tanjokoy ty olagne miseho, fa fahafahagne ho ahy mba ampisehoako ty hateako i Jehovah.” Naho manohy magnatratse i tanjo’oy avao rehe, le porofoe’o boake amy izay fa te hampifale aze rehe. Alao sare an-tsaigne ty hafalea i Jehovah mahavazoho azo mikezake magnatratse i tanjo’oy!

16. Ino ty raha azontika ianaragne naho nisy raha nikalagne antika tsy hahatratse ty tanjontikagne?

¹⁶ Fantaro tie ino ty nikalagne azo tsy hahatratse i tanjo’oy le mandrambesa lesogne. Saintsaigno ty anto’e nahavy i tanjogney tsy nitratse. Eretsereto tie: “Misy raha azoko ovagne vao mba tsy hiheregna izay sasa?” (Ohab. 27:12) Naho sarotse ama’o ty hagnatratse i tanjo’oy, le midika zay tie tsy mete ama’o. Naho izay ty raha manjò azo, le dineho indraike tie, tena mete ama’o vata’e vao i tanjogney. d Tsy tihoe tsy mahomby ty fivazohoa i Jehovah azo naho tsy tratse’o i tanjo’oy.​—2 Kor. 8:12.

17. Nagnino tika ro mila mitadidy ty tanjogne fa nitrantika taloha?

¹⁷ Tadidio ty tanjogne fa nitratse’o. Hoe ty Baiboly: “Fa tsy mba manao ty tsy rare’e ty Andrianagnahare le tsy ho haligno’e ty asa natao’areo.” (Heb. 6:10) Tsy toko’e hohaligno’o ka areke ze raha fa nivita’o. Saintsaigno ze tanjogne fa nitratse’o. Agnisa izay ohatse tihoe nahavita nifandrambe soa tamy i Jehovah rehe, nirehake ty miomba aze tamy ty hafa naho natao badisa. Irehe zao fa nahavita nanao fandrosoagne ara-pagnahy sady nahatratse ty tanjo’o tie taloha, le matokia fa ho tratse’o ka ty tanjo’o amy hinane zao.​—Fil. 3:16.

18. Ino ty toko’e hataontikagne amy itika mbe mikezake magnatratse i tanjontikagney? (Henteo i sarey.)

¹⁸ Ho afake hagnatratse ty tanjo’o rehe noho ty fagnampea i Jehovah, manahake i sambo avy amy ty tane tea’e handenagne agney. Tsiarovo ka zao: Mankamamy i lia atao’ey ty ankamaroa o tan-tsambò. Hoe izay ka fa amy irehe mikezake magnatratse tanjogne ara-pagnahỳ, le ko haligno ty mandineke ty fomba agnampea i Jehovah azo naho ty itahia’e azo amparake ty hahatratsera’o i tanjogney. Hagnampe azo ho fale ty fanoagne izay. (2 Kor. 4:7) Naho tsy kivy rehe, le ho maro ty fitahiagne ho azo’o.​—Gal. 6:9.