Tamy 1983 ty niterahagne ahy. Tamy voaloha’e raho, le nitombo soa avao manahake ty ankamaroa o ajajao. Faie nisy aretegne zay nahazo ahy naho fa ni-10 taogne raho. Nanaintaigne iaby ty vatako tamy izay. Ie roe taogne teo hoe eo tafara izay, le tsy afake nihetseke raho naho fa nifoha. Nikezake mafe raho tamo o maraindraigne io mba hagnetseke o tombokò, faie le nitofa avao. Nanomboke tamy izay, le tsy afake nandeha sasa raho sady le lia’e tsy nitombo sasa ka. Mbe manahake o ajajao avao ty habeiko amy izao.

Volagne tsiampeampe tafara ty nahazoa o aretegne iohoe ahy, le tsy afake nandeha niboaboake raho. Faie nisy ampela roe Vavolombelo i Jehovah zay niavy tama’ay agne tie indraike. I Florence ty agnara ty raike amy iareo. Mateteke raho ro mietake naho fa misy ndaty mitilike ahy. Faie nifampirehake tamo o ampela rehoe raho tamy io fa tsy nietake. Nirehake miomba ty Paradisa iareo. Le avy le nitsiaroko i raha nirehafe i Jethro tamako tamy izaho mbe nidime taogney. Misionera ta Suriname a Brezila agne ty Jethro, faie nisy fotoagne reke nitory ta Orealla eto tagnate ty vola’e raike, le nianatse Baiboly tama’e ty babako tamy izay. Tena niteako ty Jethro satria nisoa fagnahy tamako. Niente i ry roazako nivory ka raho kindraike. Naho fa nagnontane ahy areke ty Florence tie: ‘Tea’o vao ty hianatse Baiboly?’, le avy le nagneke raho.

Naho fa niheregne tama’ay agne ty Florence naho i Justus, vali’e, le avy le nanomboke nampianatse ahy Baiboly iareo. Faie nivoamare iareo tie tsy nahay namaky teny raho, le nampianare iareo. Nahay namaky teny soa avao raho naho fa nandeha ty fotoagne. Faie indraike andro zay iareo, le nirehake tamako tie tinendre hanompo a Suriname agne. Tena nanahelo raho tamy izay satria tsy nisy afake hampianatse ahy Baiboly ty a Orealla eto. Faie tsapako fa tsy nihaligno i Jehovah raho.

Tsiela tafara ty nandehana i ry Jethro, le nisy mpisava lalagne atao tihoe Floyd zay niavy ta Orealla teto. Naho fa nitory isan-tragno reke, le nahatrea ahy. Nihehe raho naho fa nagnontenea’e tie: ‘Ihe vao te hianatse Baiboly?’ Le hoe reke: ‘Inogne o mampihehe azò?’ Le hoe raho: “Fa nianatse Baiboly tamy i bokekele tihoe Inona no Takin’Andriamanitra Amintsika? raho sady fa nianatse i boke tihoey ka tie Fahalalana Izay Mitarika ho Amin’ny Fiainana Mandrakizay. * Nihazavaeko tama’e naho fa niavy eo tie nagnino ro nitapake ty fianarako Baiboly. Le nampianare i Floyd tamo o boke Fahalalana iohoe raho. Faie nivoatendre hanompo an-tane hafa agne ka reke, le tsy nisy nampianatse Baiboly hey ka raho.

Tamy 2004, le nisy mpisava lalagne roe atao tihoe Granville naho Joshua zay nivoatendre hanompo ta  Orealla eto. Naho fa nitory isan-tragno ka iareo, le nahatrea ahy. Nihehe ka raho naho fa nagnontane ahy iareo tie: ‘Ihe vao te hianatse Baiboly?’ Hoe raho: ‘Teako naho ampianare’areo ahy boake amboaloha’e agne i boke Fahalalanay.’ Ty anto’e, teako ho trea tie mitovy amy ty raha nampianare i mpitory nampianatse ahy taloha rey vao ty raha hampianare iareo. Hoe ka ty Granville: ‘Misy fivoriagne alamy ty Vavolombelo i Jehovah ty an-tanàgne amantikagne eto.’ Ndra tie fa ho folo taogne mahery aza raho ro tsy niala ty tan-tragnoko ato, le nagniry ty hagnatreke o fivoriagne iohoe. Le nalae i Granville tama’ay agne raho. Natobo’e tamy i sezako misy larò’ey teo raho, le natose’e am-parake ty niavia’ay tamy i Anjomba i Fanjakagney agne.

Naho fa nandeha ty fotoagne, le nandrisike ahike handrambe anjara amy ty Sekoly ty Fanompoagne ty Granville. Hoe reke: “Maregne fa tsy afake mihetseke rehe, faie afake mirehake. Indraike andro agne, le hanao lahajaka hoahy ty ndaty maro rehe. Tena matoky raho fa ho vita’o zay.” Tena nampahery ahy o reha’e iohoe.

Le nanomboke nitory isan-tragno niarake tamy i Granville raho. Nisarotse tamako zay tamy ty voaloha’e satria raty ty ankamaroa ty lalagne an-tanàgne ama’ay eto, le tsy tena mete amy i sezako misy larò’ey. Nirehake tamy i Granville areke raho tie ndra aleo raho atoseho amy ty laborete. Tena nimete soa zay ndra tie tsy mora aza. Natao badisa raho tamy Avrily 2005. Tsiela tafara izay, le nampiofagne ahy hiandraikitse boke naho gazete vaho sonò ty ry Granville.

Faie nisy raha tena nampanahelo anay keleian-draike tamy 2007. Nimate noho ty loza nanjò aze tamy ireke nandeha lakagne ty babako. Nivavake niarake tama’ay ty Granville tamy izay sady namakia’e andinin-teny ka zahay mba hampaherezagne anay. Roe taogne tafara izay ka, le nisy raha tena nampanahelo anay indraike. Nisy loza nanjò aze ka ty Granville tamy tie nandeha lakagne, le nimate.

Tsy nisy androanavi-pagnahy sasa areke ty tamy i fiangonagne’ay teo fa le fa ze mpagnampe amy ty fanompoagne raike zay avao. Tena nanahelo raho naho fa nimate ty Granville satria tena ni-mpiragnetse zahay. Tena nagnampe ahy hifandrambe maifitse amy i Jehovah reke ro sady nagnampe ahy ara-nofo ka. Tinendre hamaky fehentsoratse amy ty fianaragne Fitalakesan-davitse raho, tamy ty andro fivoriagne tafara i nimateza i Granville-ỳ. Faie naho fa namaky ty fehentsoratse roe voaloha’e raho, le nitagny. Hafarako niala boake amy i tafiagney tey.

Faie nifalefale indraike raho naho fa nisy rahalahy roe zay tinendre hagnampe anay a Orealla eto. Tinendre i sampagne ho mpisava lalagne manokagne ho ama’ay eto ka ze rahalahy raike atao tihoe Kojo zay. Tena nifale ka raho satria nanomboke nianatse Baiboly ty reneko naho ty zaiko lahilahy raike, le natao badisa. Nivoatendre ho mpagnampe amy ty fanompoagne raho tamy Marsa 2015. Nanao lahajaka hoahy ty ndaty maro raho tsiela tafara izay. Sady nisomimoke raho ro nitagny tamy izay satria nahatsiaro i reha Granville tamakoy. Hoe reke: “Indraike andro agne, le hanao lahajaka hoahy ty ndaty maro rehe. Tena matoky raho fa ho vita’o zay.”

Niana-draha boake amo o rahalahy naho o rahavave manan-kandra aseho amy i Tele JW rey ao ka raho. Ndra tie eo aza ty aretegne mahazo iareo, le mbe maro avao ty raha vita iareo sady falefale avao ka iareo. Hoe izay ka raho. Mbe misy avao ty raha azoko atao. Teako homeigne i Jehovah iaby ze fara heriko. Nanomboke nanao mpisava lalagne maharetse areke raho. Tamy Septambra 2019, le tsy nampoizeko fa nivoatendre ho androanavi-pagnahy raho. Eo ho eo amy ty 40 ty mpitory tagnivo fiangona’ay teo tamy izay.

Tena mankasitrake i rahalahy naho i rahavave nampianatse Baiboly naho nagnampe ahy hanompo i Jehovah rey raho. Fa ambone izay, le tena mankasitrake i Jehovah ka raho noho ireke tsy nagnaligno ahike.