LAHATSORATSE FIANARAGNE 45
Akore ty Agnampea i Jehovah Antika mba Hahavita Soa ty Fanompoantika?
“Ho fanta’e fa nisy mpaminany ty tamy iareo eo.”—EZEK. 2:5.
HIRA 67 “Torio ny Teny”
INO TY HOTREA’O ATO? a
1. Ino ty raha fa ampoizentika, faie inogne ty toky anagnantika?
FA ampoizentika tie hiatreke fagnenjehagne tika naho fa manao ty asa fitoriagne. Va’e vao mainke hitombo aza zay amy ty hoavy. (Dan. 11:44; 2 Tim. 3:12; Apok. 16:21) Faie nagnino tika ro matoky fa hagnomey ze fagnampeagne ilaentika ty Jehovah? Satria lava nagnampe ty mpanompo’e avao reke, le nivita iareo soa ty asa nanendrea’e iareo ndra inogn’inogne ty raha sarotse natrehe iareo. Magnamaregne izay ty ohatse raike hodinehentika toy, le ty raha niseho tamy i Ezekiela mpaminany. Nitory tamo o Jiosy ni-babo ta Babilona agneo reke.
2. Ino ty nisaontsie i Jehovah miomba ty ndaty tamy ty faritane i Ezekiela, le ino ty hodinehentika ato? (Ezekiela 2:3-6)
2 Nanao akore ty ndaty tamy ty faritane nitoria i Ezekiela? Nisaontsie i Jehovah tie ndaty “mafe hatoke,” “mahery loha” naho “mpigoreve” iareo. Mandratse manahake o fatikeo iareo sady magnoho-doza manahake o kalengò. Faie nisaontsy tamy i Ezekiela mateteke ty Jehovah tie: “Ko matahotse!” (Vakio ty Ezekiela 2:3-6.) Nahavita soa ty fanompoa’e avao ty Ezekiela, satria 1) i Jehovah ty nagnirake aze, 2) nahazo hery boake amy ty fagnahy masigne reke, 3) nagnatanjake ty finoa’e ty Saontsin’Andrianagnahare. Akore ty nagnampea o raha telo rehoe i Ezekiela? Nagnino ka o raha telo reo ro afake magnampe antika amy izao?
I JEHOVAH TY NAGNIRAKE I EZEKIELA
3. Ino ty rehake azo antoke fa tsy maintsy ho nagnatanjake i Ezekiela, le akore ty nagnomea i Jehovah toky aze fa hanohagne aze avao Reke?
3 Hoe ty Jehovah tamy i Ezekiela: “Iraheko rehe.” (Ezek. 2:3, 4) Nagnino o rehake rehoe ro tsy maintsy nagnatanjake i Ezekiela? Azo antoke fa nitsiaro’e soa fa hoe io ka ty rehake nampiasae i Jehovah naho fa ireke nagnirake i Mosesy naho Isaia mba ho mpaminani’e. (Eks. 3:10; Isaia 6:8) Fanta i Ezekiela soa ty fomba nagnampea i Jehovah iareo mba hahavita ty asa nanendrea’e iareo. Natoky ty Ezekiela fa hanohagne aze ty Jehovah naho fa Ireke nisaontsy tama’e fagnindroe’e tie: “Iraheko rehe.” Ankoatse izay, le mateteke trea amy boke i Ezekiela ao ty rehake tihoe: “Nisaontsy tamako ty Jehovah.” (Ezek. 3:16) Mateteke ka reke manao hoe izao: “Nisaontsy tamako indraike ty Jehovah.” (Ezek. 6:1) Azo antoke fa tena natoky ty Ezekiela fa i Jehovah ty nagnirake aze. Mpisorogne ka ty baba’e, le azo antoke fa nampianatse aze ty fomba nagnampea i Jehovah ty mpaminani’e taloha naho ty toky nimea’e iareo. Sambe nisaontsia i Jehovah ohatse ty Isaka, i Jakoba naho i Jeremia tie: “Ho ama’o raho.”—Gen. 26:24; 28:15; Jer. 1:8.
4. Inogne ty raha tsy maintsy nagnatanjake i Ezekiela?
4 Akore ty ho fandrambesa ty ankamaroa o Israelitao i hafatse hotorie i Ezekielay? Hoe ty Jehovah: “Tsy hitsanogne azo ty tarana o Israelio satria tsy te hitsanogne ahy iareo.” (Ezek. 3:7) Tsy nitsanogne i Jehovah iareo naho fa tsy nitsanogne i Ezekiela. Faie nagnomey toky i Ezekiela o rehake rehoe fa ndra tie tsy mitsanogne aza o ndatio le tsy midika zay tie tsy nanao soa ty asa’e reke. Nagnomey toky aze ka ty Jehovah tie naho fa tanterake i lilim-pitsaragne nirehafe’ey, le ho fanta o vahoakeo “fa nisy mpaminany ty tamy iareo eo.” (Ezek. 2:5; 33:33) Azo antoke fa tena nagnatanjake i Ezekiela zay fa ho vita’e ty hanao soa ty fanompoa’e.
I JEHOVAH KA TY MAGNIRAKE ANTIKA AMY IZAO
Manahake i Ezekiela, le va’e tsy hitsanogne ty hafatse torientika o ndatio ndra hanohetse antika. Faie haintika tie manohagne antika ty Jehovah (Fehentsoratse 5-6)
5. Nagnino ty raha rehafe ty Isaia 44:8 ro mahavy antika tsy hatahotse?
5 Magnatanjake antika ka ty mahafantatse fa i Jehovah ty nagnirake antika. Engegne ho antika ty tokavegne tihoe ‘vavolombelo’e.’ (Isaia 43:10) Tombotsoa tsy misy hoe’e zay! Nisaontsy tamy i Ezekiela ty Jehovah tie: “Ko matahotse.” Le hoe izay ka ty atao’e amantika. Nagnino tika ro tsy toko’e hatahotse o mpanohetseo? Manahake i Ezekiela, le i Jehovah ty nagnirake antika. Hagnampe antika reke.—Vakio ty Isaia 44:8.
6. a) Akore ty atao i Jehovah mba hagnomeagne toky antika tie hanohagne antikagne reke? b) Inogne ty tena mampahery antika?
6 Magnomey toky antika ty Jehovah fa hanohagne antika. Taloha ty nisaontsie i Jehovah, ohatse, tie: “Inareo ro Vavolombeloko” le hoe reke tie: “Naho mitsake rano rehe, le hanohagne azo raho. Tsy ho bey i ranoy sady tsy halente’e rehe naho mitsake ama’e. Naho mandeha amy ty afo rehe, le tsy ho mae, sady tsy hagnoro azo i lelan’afoy.” (Isaia 43:2) Va’e hisy fotoagne tika hiatreke fitsapagne manahake o reneranò naho o afò, naho fa manao ty fanompoantika. Faie ndra tie eo zay, le ho vitantika ty fanompoantika noho ty fagnampea i Jehovah. (Isaia 41:13) Manahake ty tamy i andro i Ezekielay, le maro ka ty ndaty tsy mitsanogne i hafatsey amy izao. Faie toko’e ho tadidientika avao tie tsy tihoe itika ro tsy nanao soa ty asantika. Mampahery antika ty mahafantatse fa mampifale i Jehovah tika naho fa manohy magnambara i hafatsey avao. Hoe ty apostoly Paoly tie: “Sambe hahazo ty valesoa’e iaby ty ndaty tsikiraidraike arakarake ty asa mafe natao’e.” (1 Kor. 3:8; 4:1, 2) Izao ty nirehafe ze rahavave raike mpisava lalagne fa ela zay: “Mahafale ahy ty mahafantatse tie valea i Jehovah soa ty kezake ataontika.”
NAGNOMEY HERY I EZEKIELA TY FAGNAHY MASIN’ANDRIANAGNAHARE
Nahazo fahitagne miomba i sareten-tsovala i Jehovah an-dagnitse agney ty Ezekiela. Nahavy aze vao mainke ho rese lahatse zay tie tena hagnampe aze hahavita soa ty fanompoa’e ty Jehovah (Fehentsoratse 7)
7. Ino ty nitsapa i Ezekiela naho fa nandineke i fahitagne nitrea’ey reke? (Henteo ty sare amy ty fogno ty gazete toy.)
7 Nitrea i Ezekiela fa tsy misy hoe’e ty hery ty fagnahy masin’Andrianagnahare. Nitrea’e tamy ty fahitagne ty fiasa i fagnahy masigney tamo o anjelio naho tamy i sareten-tsovala i Jehovah-y. (Ezek. 1:20, 21) Nanao akore ty fihetse i Ezekiela? Nisorate’e ty raha niseho. Hoe reke: “Naho fa nahatrea izay raho le nihohoke.” Tena nilatsa ty Ezekiela le nihohoke amy i taney. (Ezek. 1:28) Tafara izay ty Ezekiela le nieretseretse miomba i fahitagney. Tsy maintsy nagnomey toky aze zay fa hagnampe aze mba hahavita soa ty fanompoa’e i fagnahy masigney.
8-9. a) Nanao akore ty Ezekiela naho fa nisaontsy tama’e ty Jehovah tie mitsangàna? b) Akore ka ty natao i Jehovah mba hagnatanjahagne i Ezekiela, amy izay ho vita’e ty miatreke ty raha sarotse amy i faritane’ey?
8 Nandily i Ezekiela hoe izao ty Jehovah: “Ry ana o ndaty, mitsangàna fa hirehake ama’o raho.” Ze saontsy i Jehovah zay naho ty fagnampea i fagnahy i masi’ey i Ezekiela ro nagnomey aze hery mba hahafaha’e hitsangagne indraike. Hoe reke: “Niasa tamako i fagnahỳ le nampitsangagne ahy.” (Ezek. 2:1, 2) Nampea ty ‘fitàn’Agnahare’ ndra ty fagnahi’e masigne reke, le nivita’e soa ty fanompoa’e tafara igne. (Ezek. 3:22; 8:1; 33:22; 37:1; 40:1) Ty fagnahy masin’Andrianagnahare ty nagnampe i Ezekiela amy i asa fitoriagne natao’ey, ndra tie “mafe hatoke naho mahery loha aza” ty ndaty niara-niaigne tama’e. (Ezek. 3:7) Hoe ty Jehovah tama’e: “Ataoko mafe mitovy amy ty tarehe iareo ty tarehe’o, le ataoko mafe mitovy amy ty handry iareo ty handri’o. Ataoko mafe manahake o diamào ty handri’o sady mbe ho mafe mihoatse o vatoafò.” (Ezek. 3:8, 9) Hoe nisaontsy tamy i Ezekiela hoe izao ty Jehovah: ‘Ko atao’o hahakivy azo o ndaty mahery loha reo fa hagnatanjake azo raho.’
9 Tafara izay reke, le nandese i fagnahy masigney amy i toeragne nitoria’ey agne tamy ty alala ty fahitagne. Hoe reke tie: “Niasa bey tamako ty hery i Jehovah.” Tagnate ty heregnandro raike ty Ezekiela le nisaintsaigne i hafatsey naho ty fomba hirehafa’e aze. (Ezek. 3:14, 15) Naho fa avy eo ty Jehovah, le nampandeha aze amy ty tane lemake agne, le “niasa [tama’e] i fagnahy masigney.” (Ezek. 3:23, 24) Vognogne hanao ty fanompoa’e amy izay ty Ezekiela.
MAGNOMEY HERY ANTIKA TY FAGNAHY MASIN’ANDRIANAGNAHARE
Manahake i Ezekiela, ino ty hagnampe antika hahavita soa ty fanompoantika? (Fehentsoratse 10)
10. Ino ty raha paliaentika mba hahavitantikagne soa i asa fitoriagney sady ino ty anto’e?
10 Ino ty raha paliaentika mba hahavitantikagne soa i asa fitoriagney? Mba hamaleantika izay, le eretsereto ty raha niaigna i Ezekiela. Taloha ty nanomboha’e ty asa fitoriagne, le nagnomey aze ty hery nilae’e ty fagnahy masin’Andrianagnahare. Manahake i Ezekiela avao, le tsy hahavita i asa fitoriagney tika naho tsy ampea ty fagnahy masin’Agnahare. Ino ty anto’e? Satria mialy amantika ty Satana le manao ze ho afa’e mba hanakanagne ty asa fitoriagne. (Apok. 12:17) Maro ty ndaty mieretseretse tie mahery ty Satana, le tsy ho vita ty handrese aze. Faie mandrese aze tikagne naho fa manao ty asa fitoriagne! (Apok. 12:9-11) Amy ty fomba akore? Naho fa itika mitory le atorontika tie tsy matahotse ty fagnorohoroa i Satana tika. Rese ty Satana isake tie mitory tika. Ino ty raha azontika rehafegne noho itika mahavita mitory i talily soay ndra tie eo aza o fanoheragneo? Managne ty fagnahy masy i Jehovah sady ankasitraha’e tika.—Mat. 5:10-12; 1 Pet. 4:14.
11. Akore ty fomba agnampea o fagnahy masigneo antika, le ino ty toko’e hataontika mba hahazoagne aze avao?
11 Ino ka ty ianarantika naho fa mandineke ty fomba nagnatanjaha i Jehovah i Ezekiela mba hitory avao? Afake magnomey hery antika mba hahavita hiatreke ze olagne treantika amy ty fanompoagne ty fagnahy masin’Andrianagnahare. (2 Kor. 4:7-9) Ino areke ty toko’e hataontika mba hahazoagne ty fagnahy masin’Andrianagnahare? Mila mangatake amy i Jehovah lognandro, sady matoky tie homea’e izay tika. Izao ty nampianare i Jesosy i mpiana’e rey: “Mangataha avao... mipaliava avao... konkogno avao.” Homea i Jehovah ‘fagnahy masigne ze mangatake ama’e.’—Lioka 11:9, 13; Asa. 1:14; 2:4.
NAGNATANJAKE TY FINOA I EZEKIELA TY SAONTSIN’ANDRIANAGNAHARE
12. Arake ty rehafe ty Ezekiela 2:9–3:3, boake aia i horognam-bokey, le ino ty tagnate’e tao?
12 Tsy ty fagnahy masigne avao ty nagnomey hery i Ezekiela fa ty Saontsin’Andrianagnahare ka. Nahita tagna o ndaty mitagne horognam-boke ty Ezekiela tamy i fahitagney. (Vakio ty Ezekiela 2:9-3:3.) Boake aia i horognam-bokey? Ino ty raha tagnate’e tao? Akore ty nagnampea’e i Ezekiela? Boake amy ty sezan-droandrian’Andrianagnahare eo i horognam-bokey. Ty raike amy i anjely efatse nitrea i Ezekielay ty nampiasae i Jehovah mba hagnomey aze i horognam-bokey. (Ezek. 1:8; 10:7, 20) Saontsin’Andrianagnahare ty tagnate i horognam-bokey ao, le mirehake ty hafatse fagnamelohagne hotorie i Ezekiela amo o Jiosy nivalikeo. (Ezek. 2:7) Sambe nisy i hafatsey ty aloha naho ty amboho i horognam-bokey ao.
13. Nampanoe i Jehovah i Ezekiela akore i horognam-bokey, le nagnino i horognam-bokey ro nimamy tama’e?
13 Hoe ty Jehovah tamo o mpaminany iohoe: “Hano ty horognam-boke toy sady fenò itoy i tro’oy.” Nankatò ty Ezekiela, le avy le nihane’e iaby i horognam-bokey. Ino ty tea o fahitagne iohoe horehafegne? Mila mahazo soa i hafatse hambara’ey ty Ezekiela. Mila mino i hafatsey reke, satria izay ty handrisike aze hazoto hitory. Faie nisy raha nahagaga naho fa nihinagne i horognam-bokey reke. Nirehafe i Ezekiela fa “mamy manahake o tanteleo” i horognam-bokey. (Ezek. 3:3) Fa nagnino? Tamy i Ezekiela, le voninahitse tihoe misolo tegna i Jehovah, satria tena mahafale sady tsy misy hoe’e. (Sal. 19:8-11) Nisaotse i Jehovah reke satria neke’e hanompo Aze le hanao ty asa ty mpaminany.
14. Ino ty nagnampe i Ezekiela ho vognogne hanao i asa nampanoegne azey?
14 Tafara izay, le hoe ty Jehovah tamy i Ezekiela: “Tsanogno iaby ty raha horehafeko ama’o.” (Ezek. 3:10) Trea boake amy ze raha nisaontsie’e zay, fa nasae i Jehovah ho tadidie i Ezekiela naho hosaintsaigne’e ty rehake amy i horognam-bokey ao. Nanjare natanjake ty finoa i Ezekiela naho fa nanao izay. Izay ka ty nagnampe aze hahay i hafatse lahibey horehafe’e amo o ndatioy. (Ezek. 3:11) Nivognogne hanao i asa’ey amy izay ty Ezekiela, naho fa nitaka’e soa sady ninoa’e i hafatse boake amy i Jehovah-y.
MAGNATANJAKE TY FINOANTIKA TY SAONTSIN’ANDRIANAGNAHARE
15. Ino ty raha mila ‘alententikagne am-pontikagne ao’ naho itika te hahavita hiaretse?
15 Mila engantika hagnatanjake ty finoantikagne ka ty Saontsin’Agnahare naho teantika ty hamita ty fanompoantika. Mila “mandeteke am-pontikagne ao” ze raha saontsie i Jehovah amantikagne tika. Amy ty alala ty Saontsi’e ndra ty Baiboly ty isaontsia i Jehovah amantika amy izao. Nagnino tika ro afake matoky fa misy voka’e amy ty raha eretseretentika, ty fihetseham-pontika naho ty anto’e mandrisike antika hanao raha ty Saontsin’Agnahare?
16. Mila ataontika akore ty Saontsin’Andrianagnahare, le akore ty fomba handetehantikagne aze agnate fontikagne ao?
16 Hatanjake ty vatantika naho itika mihinagne sady mandevogne soa ty raha hanentikagne. Hoe izay ka fa hatanjake ty finoantika naho itika mianatse ty Saontsin’Andrianagnahare sady misaintsaigne ty raha vakientika. Mila tadidientika avao i lesogne miomba i horognam-bokeỳ. Tea i Jehovah “hameno ty trontika” ndra hianatse soa ty Saontsi’e tika. Manao izay tika naho fa mivavake sady mamaky naho misaintsaigne ty raha vakientika. Voaloha’e, mila mivavake tika mba hagnomanagne ty fontika handrambe ty fampianaragne boake amy i Jehovah. Afara izay vaho mamaky andine’e amy Baiboly ao. Mila mijanogne hey tika naho fa avy eo mba hisaintsaigne laleke ty raha vakientika. Ino ty ho voka izay? Ho azontika soa ty raha rehafe ty Saontsin’Andrianagnahare sady hatanjake ty finoantika.
17. Nagnino ro tena raha lahibey ty misaintsaigne ty raha vakientika amy Baiboly ao?
17 Nagnino ro tena ilaegne ty mamaky Baiboly naho misaintsaigne ty raha vakientika? Naho manao izay tika le hanagne herim-po mba hitoriagne ty hafatse miomba i Fanjakagney. Tsy hatahotse ty hagnambara i lilim-pitsaragne ho rehafentika tsy ho elay ka tikagne. Naho fa misaintsaigne ty toetse soa i Jehovah tika, le vao mainke ho mafe ty fifandrambesantika ama’e. Ty voka’e, ho fale naho hilamin-tsaigne sady ho afa-po tika. Tsy misy raha fanjaka mandikoatse izay.—Sal. 119:103.
VOGNOGNE HIARETSE TIKA
18. Inogne ty raha tsy maintsy ho fanta o ndaty amy i faritanentikagney ey io, le ino ty anto’e?
18 Tsy mitovy amy i Ezekiela tika satria ireke mpaminany. Faie tapa-kevetse avao tika ty hagnambara i hafa i Jehovah nampanorate’e agnate ty Saontsi’e aoy, amparake ty hività i asa fitoriagney arake ze mahafa-po aze. Naho fa avy ty fotoagne hampihara i Jehovah i lilim-pitsara’ey le tsy hisy ndaty afake hirehake sasa tie mbe tsy naharey i fampitaoagney iareo ndra tsy nidare iareo ty Andrianagnahare. (Ezek. 3:19; 18:23) Tsy maintsy ho fanta iareo amy ze fotoagne zay fa boake aman’Andrianagnahare i hafatsey.
19. Ino ty raha magnatanjake antika mba hahavitantika soa ty fanompoantika?
19 Ino ty raha magnatanjake antika mba hahavitantika soa ty fanompoantika? Mitovy amy i raha telo nagnampe i Ezekielay avao. Mitory avao tika satria haintika tie i Jehovah ty nagnirake antika. Mahazo hery boake amy ty fagnahy masigne tika sady magnatanjake ty finoantika ty Saontsin’Andrianagnahare. Noho ty fagnampea i Jehovah, le vognogne avao tika hanao soa ty fanompoantika sady hiaretse avao “hatrake ampara’e.”—Mat. 24:13.
HIRA 65 Mandrosoa Foana!
a Hodinehentika ato ty fomba telo nagnampe i Ezekiela mpaminany hahavita soa ty asa fitoriagne nanendreagne aze. Naho fa mandineke ty fomba nagnampea i Jehovah aze tika, le vao mainke hatoky fa hagnampe antika mba hahavita soa ty fanompoantika ty Jehovah.