TSY MORA ama’o vao ty manao fianaragne raike tsy tapake? Sa tsy mahatrea hafaleagne rehe naho fa mianatse? Sambe mahatsapa hoe izay iaby tika kindraike. Eretsereto moa ty raha hafa fataontika tsy tapake, agnisa izay ohatse ty miandro. Mitake fotoagne naho kezake ty miandro, faie mahatsapa ho velombelogne tikagne afara izay. Mamelombelogne manahake ‘o rano fiandroagneo, zane hoe ty saontsy’ ty fianaragne Baiboly. (Efes. 5:26) Intoa misy soso-kevetse afake magnampe azo:

• Manoa fandaharam-potoagne. Agnisa ty “raha lahibey” tsy maintsy atao o Kristianao ty fianaragne raike. (Fil. 1:10) Sorato ty andro naho ty lera hianara’o, le anò amy ty toeragne mora trea mba ho tadidi’o. Azo’o atao ka ty magnisy faniahiagne amy ty telefoni’o.

• Anò ze hagnampe azo hifantoke. Mahavita mifantoke vao rehe naho mianatse elaela sa mianatse agnate ty fotoagne fohe faie mateteke ty mete ama’o? Anò mifagnarake amy izay areke ty fotoagne ianara’o. Akore naho tsy mahefa hianatse rehe amy i fotoagne natoka’oy? Magnandrama mianatse agnate ty folo minitra hey tie amy izay. Aleo mianatse agnate ty fotoagne fohe hoe izay ta tie tsy hianatse. Sady naho fa agnate ty mianatse ka rehe, le va’e te hanohy lavalava.​—Fil. 2:13.

• Filio mialoha ty raha hianara’o. ‘Tsy mampiasa soa ty fotoa’o’ rehe naho amy i fotoagne toko’e hianara’oy vaho mandineke ty raha toko’e hianara’o. (Efes. 5:16) Magnino naho atao lisita ty lahatsoratse ndra ty foto-kevetse tea’o hianaragne? Isake tie misy fagnonteneagne avy an-tsai’o ao, le avy le sorato. Va’e hampilitse foto-kevetse fagnampe’e hianaragne rehe amy i lisita’oy ao, isake tie avy mianatse.

• Manoa fagnovàgne naho ilaegne zay. Mba hahavy azo ho afake hianatse tsy tapake isan-keregnandro, le azo’o atao ty magnova ty fotoagne ianara’o, ty halava’e ndra ty foto-kevetse ianara’o naho ilaegne zay.

Tena handrambe soa tika naho mianatse tsy tapake isan-keregnandro. Hanjare hifandrambe maifitse amy i Jehovah tikagne, hahay handrambe fanapahan-kevetse soa sady ho velombelogne.​—Jos. 1:8.