1. Akore ty nifihevera i apostoly Paoly o mpagnampe amy ty fiangonagneo?

 MANAO asa tena lahibey agnivo ty fiangonagne eo o mpagnampe amy ty fiangonagneo. Mazava hoaze fa nisarobily tamy i apostoly Paoly o lahilahy tsy nivalike reo. Naho fa nanoratse hoahy ty Kristiana ta Filipy agne ohatse reke, le nisalamae’e miarake amo o androanavi-pagnahio o mpagnampe amy ty fiangonagneo.​—Fil. 1:1.

2. Ino ty nitsapa ty rahalahy raike atao tihoe Luis naho fa nivoatendre ho mpagnampe amy ty fiangonagne reke?

² Mahafale ty rahalahy maro vita badisa tihoe mpagnampe amy ty fiangonagne ndra fire taogne reke ndra fire taogne. Nivoatendre ho mpagnampe amy ty fiangonagne zao ohatse ty Devan, tamy tie ireke ni-18 taogne. Faie tamy tie Luis ni-50 taogne mahery ty nivoatendre. Hoe reke: “Tena tombotsoa tihoe manao ty asa ty mpagnampe amy ty fiangonagne sady afake mamale ty hatea naseho o fiangonagneo ahy raho.” Maro ty mpagnampe amy ty fiangonagne mahatsapa hoe izay.

3. Inogne iaby ty fagnonteneagne hodinehentika?

³ Naho rahalahy fa vita badisa rehe faie mbe tsy mpagnampe amy ty fiangonagne, afake magnatratse ze tanjogne zay vao rehe? Ino ty va’e handrisike azo hagniry izay? Le ino ty fepetse také ty Soratse Masigne amy ty mpagnampe amy ty fiangonagne? Handineke ty vale o fagnonteneagne reo tika amy ty lahatsoratse toy. Faie andao hodinehentikagne heike ty asa atao o mpagnampe amy ty fiangonagneo.

INOGNE TY ASA ATAO O MPAGNAMPE AMY TY FIANGONAGNEO?

4. Ino ty asa o mpagnampe amy ty fiangonagneo? (Henteo i sarey.)

⁴ Rahalahy vita badisa tinendre ty fagnahy masigne, mba hagnampe  o androanavi-pagnahio hanao raha lahibey maro agnivo ty fiangonagne eo o mpagnampe amy ty fiangonagneo. Iareo ty mikarakara ty faritane hitoria o mpitorio naho ty boke aman-gazete ilae iareo amy ty fanompoagne. Ty ila’e magnampe amy ty fagnaliovagne naho ty fikojakojagne i Anjomba i Fanjakagney. Misy ka ty mikarakara mpagnatreke naho mikarakara feo naho video agnate ty fivoria ty fiangonagne. Faie ty tena lahibey le tihoe, toko’e ho lahilahy tena tea i Jehovah naho miaigne mifagnarake amy ty fitsipi’e o mpagnampe amy ty fiangonagneo. Tena tea ty rahalahi’e naho ty rahavave’e ka iareo. (Mat. 22:37-39) Ino ty hagnampe ty rahalahy vita badisa raike mba ho mpagnampe amy ty fiangonagne?

5. Ino ty hagnampe ty rahalahy magniry ho mpagnampe amy ty fiangonagne hahatratse ze tanjogne zay?

⁵ Mirehake ty fepetse takegne amy ty rahalahy raike te ho mpagnampe amy ty fiangonagne ty Baiboly. (1 Tim. 3:8-10, 12, 13) Hahazo o tombotsoa iohoe rehe naho mianatse o fepetse reo sady mikezake mafe mba hahafeno aze. Faie mila dinehe’o heike tie nagnino rehe ro te ho mpagnampe amy ty fiangonagne.

NAGNINO REHE RO TE HO MPAGNAMPE AMY TY FIANGONAGNE?

6. Ino ty toko’e handrisike azo hagnampe o rahalahy naho o rahavaveo? (Matio 20:28; Henteo i sare amy i fogno’ey.)

⁶ Ohatse fanjaka ho antika ty Jesosy. Ty hatea, zane hoe ty hatea’e i Rae’ey naho ty hatea’e o ndatio ty nahavy aze nanao raha. Nahavy aze hiasa mafe naho hanao raha hevere ty hafa ho ambane ze hatea’e zay. (Vakio ty Matio 20:28; Jaona 13:5, 14, 15) Naho hatea ty mahavy azo te ho mpagnampe amy ty fiangonagne, le hitahy naho hagnampe azo ty Jehovah mba hahafeno i fepetse takegne rey.​—1 Kor. 16:14; 1 Pet. 5:5.

7. Nagnino o rahalahio ro tsy toko’e hihevetse ty tegna’e ho ambone noho ty hafa?

⁷ Manao ze raha hahavy iareo hisongadigne ty ndaty amy ty tontolo toy eto. Faie tsy hoe izay ty amy ty fandamina i Jehovah eo. Ty rahalahy raike tea ty hafa manahake i Jesosy, le tsy magniry ty hanagne fahefagne ambone noho ty hafa ndra hihevetse ty tegna’e ho lahibey. Naho ohatse voatendre agnivo ty fiangonagne eo ty ndaty raike te ho ambone, le va’e tsy hagneke hanao asa ambane reke mba hikarakaragne o agnondry i Jehovah sarobilio.  Va’e hieretseretse reke tie, magnambane aze ty fanoagne asa hoe izay. (Jaona 10:12) Tsy hitahy ty kezake mafe atao ty ndaty te hirehareha ndra te ho ambone hoe izay ty Jehovah.​—1 Kor. 10:24, 33; 13:4, 5.

8. Ino ty torohevetse nimea i Jesosy i apostoli’e rey?

⁸ Ndra o mpiana i Jesosy naifitse azeo aza, le nanagne anto’e manoseke raty naho fa nagniry ty hahazo fanendreagne. Dineho ohatse ty raha niseho tamy i apostoly Jakoba naho i Jaona. Nangatake tamy i Jesosy iareo mba homea’e fanendreagne manokagne amy i Fanjakà’ey ao. Tsy nirehake ty Jesosy tie, tena soa i fangataha iareoy fa ndra nagnazava tamy i apostoly 12 rey iaby reke tie: “Ze te ho ambone ama’areo, le ho mpanompo’areo. Le ze te ho voaloha’e ama’areo, le ho ndevo’areo.” (Mar. 10:35-37, 43, 44) Ty rahalahy managne anto’e manoseke soa, zane hoe te hanompo ty hafa, le ho fitahiagne hoahy o fiangonagneo.​—1 Tes. 2:8.

INO TY HAGANAMPE AZO HAGNIRY HO MPAGNAMPE AMY TY FIANGONAGNE?

9. Ino ty hagnampe azo hagniry ty ho mpagnampe amy ty fiangonagne?

⁹ Azo antoke fa tea’o ty Jehovah sady te hanompo ty hafa rehe. Faie va’e tsy irie’o ty ho mpagnampe amy ty fiangonagne. Akore ty hahavy azo hanagne ze fagniriagne zay? Fa nieretseretse miomba ty hafaleagne ho tsapa’o boake amy ty fanompoagne o rahalahy naho o rahavaveo vao rehe? Hoe ty Jesosy: “Ty magnomey ro tena mahasambatse noho ty mandrae.” (Asa. 20:35) Nampihatse io ka ty Jesosy. Nahatrea fifaleagne reke naho fa nagnampe ty hafa, le azo antoke fa hahatsapa hoe izay ka rehe.

10. Akore ty nanehoa i Jesosy tie nahafale aze ty nanompo ty hafa? (Marka 6:31-34)

¹⁰ Andao tika handineke ohatse raike mampiseho tie, tena nahafale i Jesosy ty nanompo ty hafa. (Vakio ty Marka 6:31-34.) Nirokake ty Jesosy naho i apostoli’e rey tie indraike. Nandeha tamy ty toeragne raike bangigne areke iareo mba hitofa. Faie ndra fa nisy vahoake niavy taloha iareo ty teo mba hampianare i Jesosy. Afake nandietse ty Jesosy satria “ndra ty fotoagne ho nitofà iareo naho ho nihinana iareo aza tsy nisy.” Afake nampianatse hamaregnagne raike ndra roe avao ka reke, le nampandehane’e i vahoake rey. Faie satria hatea ty nanoseke aze hanao raha, le “nanomboke nampianatse iareo raha maro reke.” Nampianatse iareo avao reke amparake ty naha ‘folakandrokandro i androy.’ (Mar. 6:35) Tsy tihoe noho ireke tsy maintsy nanao izay ty nahavy aze nanao izay fa noho ireke ‘niferenaigne iareo.’ Nagniry hampianatse iareo reke satria tea’e iareo. Nahafale i Jesosy areke ty nanompo ty hafa.

11. Akore ty fomba nagnampea i Jesosy i ndaty nitsanogne aze rey? (Henteo i sarey.)

¹¹ Nampianatse i vahoakey ty miomba an’Agnahare ty Jesosy faie nagnomey ze nilae iareo ara-nofo ka. Nagnomey hanegne iareo reke, le i mpiana’e rey ty nasae’e nizara aze. (Mar. 6:41) Nanao izay ty Jesosy mba hampianaragne i mpiana’e rey hanompo ty hafa. Natoro’e iareo ka fa tena lahibey ze asa o mpagnampe amy ty fiangonagneo zay. Nanao fahagagagne ty Jesosy mba hampitomboagne i mofoy. Alao sare an-tsaigne moa ty hafalea i apostoli’e rey naho fa nizara aze amy i vahoake rey amparake ty ‘nihinana iareo naho naha vontsigne iareo iaby.’ (Mar. 6:42) Vaho ohatse raike avao amy ty raha natao i Jesosy, mba hanoagne voalohan-draha ze raha nipaliae ty hafa fa tsy ze nipaliae’e io. Nampiasae’e mba hanompoagne o ndatio ty fiaigna’e tambone tane etoy. (Mat. 4:23; 8:16) Nahatrea fifaleagne naho nahatsiaro ho afa-po ty Jesosy noho  ireke nampianatse ty hafa vaho nikarakara ze raha nilae iareo. Tsy isalasalagne fa hahatrea fifaleagne maro ka rehe naho magniry ty ho mpagnampe amy ty fiangonagne.

12. Nagnino ty tsikiraidraike amantikagne ro tsy toko’e hieretseretse tie tsy mahay?

¹² Ko kivy naho mahatsapa rehe tie tsy mahay. Azo antoke fa managne toetse ilaegne agnivo ty fiangonagne eo rehe. Dineho ty raha nirehafe i Paoly amy 1 Korintianina 12:12-30 ao, le mangataha amy i Jehovah mba hagnampea’e azo hahatrea ty fomba hampihara’o io. Trea boake amy ty raha rehafe i Paoly ao fa sambe ilaegne naho sarobily ty ndaty amo o fiangonagneo eo. Naho mbe tsy mahafeno fepetse ho mpagnampe amy ty fiangonagne rehe tie amy izao satria mbe misy toetse mila ikezaha’o, le ko kivy. Anò avao heike ze azo’o atao amy ty fanompoagne i Jehovah naho amy ty fagnampeagne o mpiara-manompò. Matokisa fa handineke ty miomba azo o androanavi-pagnahio, le hagnomey ze tombotsoam-panompoagne azo’o atao iareo.​—Rom. 12:4-8.

13. Naho ty maregne, le takegne amy ia iaby ty ankamaroa i fepetse hoahy ty mpagnampe amy ty fiangonagne rey?

¹³ Misy anto’e hafa ka mahavy azo toko’e hikezake ty ho mpagnampe amy ty fiangonagne. Takegne amy ty Kristiana iaby i toetse toko’e hanagna ty mpagnampe amy ty fiangonagne rey. Toko’e hagnarine i Jehovah, ho fale magnampe ty hafa naho hanagne fomba fiaignagne mampifale i Jehovah ohatse tikagne iaby. Naho izay areke, le fa feno’o ty ankamaroa i fepetse takegne rey. Inogne areke ty fepetse manokagne takegne amy ty mpagnampe amy ty fiangonagne?

AKORE TY HAHAVY AZO HO MPAGNAMPE AMY TY FIANGONAGNE?

14. Ino ty dika tihoe “mato-tsaigne”? (1 Timoty 3:8-10, 12)

¹⁴ Andao hodinehentika ty fepetse voarehake amy 1 Timoty 3:8-10, 12 ao. (Vakio.) Ty mpagnampe amy ty fiangonagne, le tsy maintsy “mato-tsaigne.” Va’e ho azo adika tihoe “fagneva ty ho hajaegne” naho “homeagne voninahitse” zay. Tsy midika zay tie tsy mihehe ndra tsy mifalefale rehe. (Mpito. 3:1, 4) Fa ty dika izay le tihoe, miasa mafe rehe mba hamita ze andraikitse nankinegne tama’o. Naho fa fanta ty rahalahy naho ty rahavave agnivo ty fiangonagneo tie, lava vitae’o soa avao ze raha nanendreagne azo, le hanjare hatoky naho hagnaja azo iareo.

15. Ino ty dika tihoe “tsy miovaova rehake” naho tihoe “tsy tea tombo’e azo boake amy ty tsy maregne”?

 ¹⁵ Tihoe “tsy miovaova rehake,” le midika tihoe mirehake ty maregne naho azo atokisagne. Mitagne ty rehake nanoe’e sady tsy mavande. (Ohab. 3:32) Tihoe tsy “tea tombo’e azo boake amy ty tsy maregne” ka, le midika tihoe manao ty maregne naho fa miara-miasa amy ty hafa sady tsy manao dramotse. Tsy toko’e ho hararaote’o mba hahazoam-bola ka ty fifandrambesa’o amo o mpiara-manompò.

16. a) Ino ty dika tihoe “tsy mpinogne divay losotse loatse”? b) Ino ty dika tihoe “managne feo ty fieretseretagne malio”?

¹⁶ Tihoe “tsy mpinogne divay losotse loatse,” le midika tie tsy toko’e hinogne toake maro ndra malaza ho mpanao izay. Tihoe managne “feo ty fieretseretagne malio” ka, le miaigne mifagnarake amy ty fitsipy i Jehovah. Ndra tie tsy voririke aza rehe, le afake ty hilamin-tsaigne satria mifandrambe soa amy i Jehovah.

17. Akore ty ahatreavagne tie ‘azo tsapaegne toetse kera hahafeno fepetse’ ty rahalahy raike? (1 Timoty 3:10; henteo i sarey.)

¹⁷ “Tsapaegne toetse reke mba hotrea tie kera mahafeno fepetse.” Hotrea o androanavi-pagnahio tie amy izay tie, mahavita soa ty andraikitse nankinegne ama’e reke sady azo ianteheragne. Naho fa mea o androanavi-pagnahio andraikitse rehe, le oriho soa ty toromareke mea iareo naho ty tari-dalagne boake amy fandaminagne. Anò azo antoke tie, hai’o soa i raha ampanoegne azoy naho tihoe ombia ty toko’e hamitagne aze. Naho fa manao soa ty asa ampanoegne azo rehe sady mazoto, le ho voamare ty ndaty hafa agnivo ty fiangonagne eo zay sady hankasitrake azo iareo noho ty fandrosoagne soa vita’o. Ry androanavi-pagnahy, mivognona hampiofagne o rahalahy vita badisao. (Vakio ty 1 Timoty 3:10.) Misy rahalahy tanora eo amy ty 10-14 taogne fa vita badisa vao ty amy ty fiangona’areo eo? Manao fianaragne raike naho magnomagne soa vao reke naho fa mivory? Mazoto magnomey toin-drehake naho manompo vao reke? Naho izay, le meo andraikitse mifagnarake amy ty tao’e naho ty raha iaigna’e reke. Azo ‘tsapaegne toetse mba hotrea tie kera mahafeno fepetse’ ty rahalahy manao ireo. Ndra tie agnelagnela ty 17-19 taogne aza reke, le fa afake ty hahafeno fepetse ho mpagnampe amy ty fiangonagne.

18. Ino ty dika tihoe “tsy misy tsiko’e”?

¹⁸ Tihoe “tsy misy tsiko’e,” le midika tie tsy toko’e hisy ndaty hanao kitomboke azo ho nanao  raha raty. Ie aloha, va’e hisy hanao kitomboke tika Kristiana. Nisy nanao kitomboke zao ohatse ty Jesosy. Fa nirehake mialoha ka reke tie, hihara izay ty mpanonjohy ty lia’e. (Jaona 15:20) Faie naho mikezake halio findesam-batagne manahake i Jesosy avao rehe, le hanagne laza soa agnivo ty fiangonagne eo.​—Mat. 11:19.

19. Ino ty tafilitse amy tihoe “tsy mampirafe”?

¹⁹ “Tsy mampirafe.” Naho manambaly rehe, le tsy maintsy ankatoave’o ty fitsipy i Jehovah miomba ty fanambaliagne tihoe, raike avao ty valy ty lahilahy raike ndra ty ampela raike. (Mat. 19:3-9) Tsy toko’e ho raty findesam-batagne ka ty lahilahy Kristiana. (Heb. 13:4) Maro ty raha tafilitse amy izay. Tsy toko’e hivalike amy ty vali’e reke sady tsy toko’e hagniry ampela hafa.​—Joba 31:1.

20. Akore ty atao ty lahilahy manambaly ‘minday soa’ ty keleia’e?

²⁰ “Mahay minday soa ty ana’e naho ty keleia’e.” Naho loha ty keleiagne rehe, le tsy maintsy manao soa ze andraikitse lahibey zay. Manoa fotoam-pivavaha ty keleiagne tsy tapake. Miaraha ka manompo amy ty tsikiraidraike amy ty keleia’o mateteke arake ze azo’o atao. Ampeo mba hifandrambe soa amy i Jehovah ty ana’o. (Efes. 6:4) Naho mahavita mikarakara soa ty keleia’e ty lahilahy raike, le trea boake amy izay tie ho vita’e soa ka ty hikarakara o fiangonagneo.​—Ampitahao amy ty 1 Timoty 3:5.

21. Naho mbe tsy mpagnampe amy ty fiangonagne rehe, ino ty azo’o atao?

²¹ Ry rahalahy, naho mbe tsy mpagnampe amy ty fiangonagne rehe tie amy izao, le vakio soa ajafady ty lahatsoratse toy sady mivavaha miomba o tanjogne iohoe. Ianaro i fepetse takegne amy ty mpagnampe amy ty fiangonagne rey sady mikezaha mafe mba hahafeno irey. Dineho tie manao akore ty hatea’o i Jehovah vaho o rahalahy naho o rahavaveo. Ampitombò ka ty fagniria’o hanompo iareo. (1 Pet. 4:8, 10) Mikezaha mafe areke hahafeno fepetse ho mpagnampe amy ty fiangonagne, amy izay rehe hahatrea fifaleagne boake amy ty fanompoagne ty hafa. Lonike abey ty Jehovah hitahy ty kezake mafe atao’o mba hahafeno fepetse ho mpagnampe amy ty fiangonagne!​—Fil. 2:13.