1. Nagnino o ndatio ro mivali-doha?

AGN’ALE’E ty fivavahagne mirehake tie Kristiana sady ankasitrahan’Andrianagnahare ty fomba anompoa iareo aze. Tsy mahagaga areke naho mivali-doha o ndatio! Hoe iareo: “Ty aia amo o fivavahagne retoa ty tena maregne, sa ekén’Andrianagnahare iareo iaby?” Faie akore ty amantika? Tena rese lahatse vao tika an-tsaintikagne agne tie ty hamarenagne o raha ampianarentikagneo sady ty fomba anompoantikagne Vavolombelo i Jehovah aze avao ro ankasitraha’e? Tena afake ty ho rese lahatse amy izay vao tika? Andao tika hagnente porofo.

2. Nagnino ty apostoly Paoly ro nirese lahatse tie ty hamarenagne o ninoa’eo? (1 Tesalonianina 1:5)

² Tena nirese lahatse ty apostoly Paoly tie ty hamarenagne o ninoa’eo. (Vakio ty 1 Tesalonianina 1:5.) Faie tsy noho io nahavy aze ho falefale ty nahavy aze ho rese lahatse. Nazoto nianatse soa ty Saontsin’Andrianagnahare ty Paoly. Ty anto’e, nino reke tie ty “Soratse Masigne iaby le boake amy ty hery ty fagnahy masin’Andrianagnahare.” (2 Tim. 3:16) Le ino ty nitrea’e? Nahatrea porofo tsy hay lieregne reke tie i Jesosy, i Mesia nampitamaegney. Faie o mpitarike fivavahagne Jiosio tsy nidare ze porofo zay. Ie amy izao iareo nao solon-tegnan’Andrianagnahare zao faie mandietse aze amy ty atao’e. (Tit. 1:16) Tsy nanahake o ndaty rehoe ty Paoly, sady tsy nifilifilie’e ka ze raha hinoa’e boake amy ty Saontsin’Andrianagnahare ao. Nivognogne hampianatse naho hanao “ze zoton’arofon’Andrianagnahare” reke.—Asa. 20:27.

3. Tsy maintsy mahay ty vale ty fagnonteneantikagne iaby vao tika vaho ho rese lahatse tie nahatrea ty hamarenagne? (Henteo ty efajoro tihoe “ ‘Tsy Hay Iahegne ty Halàko’ ty Asa i Jehovah Naho ty Raha Safirie’e.”)

³ Misy ndaty mieretseretse tie toko’e hahavoavale ze fagnonteneagne iaby ty fivavahagne maregne, ndra o fagnonteneagne  tsy rehafe ty Baiboly mivantagne ty vale’eo aza. Dineho ohatse ty Paoly. Nandrisike o Kristiana nama’eo reke mba ‘hamantatse ze kila raha.’ Faie nagneke ka reke tie maro ty raha tsy fanta’e. (1 Tes. 5:21) Hoe reke: “Ampaha’e avao ty fahalalantikagne. Mahatrea manjavonjavogne amy ty hetsoro metaly tika.” (1 Kor. 13:9, 12) Tsy tihoe ze kila raha le nihay i Paoly iaby. Hoe izay ka tika. Faie nitaka i Paoly soa ty hamarenagne fototse miomba ty raha safirie i Jehovah. Izay le fa ampe haharese lahatse aze tie ty hamarenagne o inoa’eo.

4. Akore ty hahavy antika ho rese lahatse tie ty hamarenagne o inoantikagneo? Le ino ty hodinehentikagne ato?

⁴ Akore ty hahavy antika ho rese lahatse tie ty hamarenagne o inoantikagneo? Azontika atao ty mampitaha ty raha atao ty Vavolombelo i Jehovah amy izao amy ty modely nenga i Jesosy naho fa nanompo an’Agnahare. Ho treantikagne ato tie ty tena Kristiana, le 1) tsy manompo sampy, 2) magnaja ty tahina i Jehovah, 3) tea ty hamarenagne, naho 4) mifankatea amy ty fo.

5. Ino ty ianarantika boake amy ty fomba nanompoa i Jesosy an’Agnahare, le akore ty hampiharantika ty raha nampianare’e?

⁵ Tena tea an’Andrianagnahare ty Jesosy. Izay ty nahavy aze nanompo i Jehovah raike avao ndra tan-dagnitse agne ndra tamy i reke tan-tane etoỳ. (Lioka 4:8) Nampianare’e hanao hoe izay ka o mpiana’eo. Ndra i Jesosy ndra o mpiana’e tsy nivalikeo, le tsy mba nampiasa sare zao naho fa nanompo an’Agnahare. Satria Fagnahy ty Andrianagnahare, le tsy misy ndaty mahavita mamboatse raha mitovy amy i Jehovah, ndra marinerine ty voninahi’e. (Isaia 46:5) Akore ka ty amy i sare hevere o ndatio ho masigne, le ivavahagne rey? Hoe ty Jehovah amy i lily faharoe amy i Lily Foloy ao: “Ko manao sare sokitse ho azo, ndra tarehen-draha  mitovy amy ze raha amy i lagnitse amboney, ndra ze amy ty tane ambane etoy ... Ko mihohoke agnatreha i rey eo.” (Eks. 20:4, 5) Taka ty ndaty te hampifale an’Agnahare areke fa tsy tea’e hanompo sampy iareo.

6. Akore ty atao o Vavolombelo i Jehovah-o tie amy izao naho fa manompo an’Agnahare?

⁶ Nagneke o mpahay tantarao tie Andrianagnahare raike avao ro nivavaha ty Kristiana tamy ty taonjato voaloha’e. Rehafe ty boke Tantara ty Fiangonagne Kristiana (Anglisy) tie nampangorigne o Kristiana tamy ty taonjato voaloha’eo ndra ty nieretseretse avao aza tie hivavake amy i sare rey. Magnorike ty modely o Kristiana rehoe ka ty Vavolombelo i Jehovah amy izao. Tsy mivavake amy ty sare “masigne” ndra amo o anjelio tika. Ndra i Jesosy aza tsy ivavahantikagne. Tsy manao fombafomba mba hanompoagne tanendrazagne ka tika. Ndra inogn’ino hatao o ndatio amantika, le tapa-kevetse ty hagnorike ty reha i Jesosy toy tikagne: “I Jehovah Andrianagnahare’o ro tsy maintsy ilolofa’o.”​—Mat. 4:10.

7. Ino ty tsy mampitovy o Vavolombelo i Jehovah-o amy ty fivavahagne hafa?

⁷ Amy izao, le maro ty ndaty tea mitsanogne o mpitarike fivavahagne malazao. Kindraike aza le i ndaty rey ty manjare hoe andrianagnahare iareo. Miangogne amy ty fivavahagne misy i ndaty rey agne iareo, mivily ty boke iareo sady magnomey vola bey mba hanohagnagne iareo. Misy ndaty ila’e aza mino ze raha rehafe iareo. Milialia iareo hoe raha mahatrea i Jesosy mivantagne zay naho fa mahatrea i mpitarike fivavahagne rey! Faie o mpanompon’Agnahare vata’eo tsy magnorike ndaty. Maregne fa magnaja o rahalahy mitarikeo tika, faie mankatò ty reha i Jesosy toy ka: “Mpirahalahy iaby nareo.” (Mat. 23:8-10) Tsy mivavake ama o ndaty ka tika, agnisa izay o mpitarike fivavahagneo naho o mpitondrao. Tsy manohagne ty fivavaha iareo ndra ty programan’asa iareo ka tika. Itika aza tsy manohagne antoko politike ndra ia ndra ia, sady tsy agnisa ty tontolo toy. Tsy mitovy amo o ndaty mirehake ty vata’e ho Kristianao tika amo o lafi’e iohoe.​—Jaona 18:36.

8. Akore ty ahafantarantikagne tie tea i Jehovah homeagne voninahitse naho ho hay o ndatio i tahina’ey?

⁸ Nivavake hoe izao ty Jesosy tie indraike: “O Baba, omeo voninahitse ty tahina’o.” Le nisaontsy mafe boake an-dagnitse agne ty Jehovah tie homea’e voninahitse i tahina’ey. (Jaona 12:28) Lava nagnomey voninahitse i tahinan-dRae’ey avao ty Jesosy tamy i reke nanao ty fanompoa’e tan-tane etoỳ. (Jaona 17:26) Tsy mahalatsa areke naho rambese ty tena Kristiana ho tombotsoa ty mampiasa ty tahinan’Andrianagnahare naho ty mampahafantatse aze amo o ndatio.

9. Akore ty nampisehoa ty Kristiana tamy ty taonjato voaloha’e tie nagnaja ty tahinan’Andrianagnahare iareo?

⁹ Tafara kede ty nioregna ty fiangonagne Kristiana tamy ty taonjato voaloha’e, le ‘nihevetse ty hafa firenena ty Jehovah mba hangala’e ndaty boake amy iareo ao hinday ty tahina’e.’ (Asa. 15:14) Nirambese o Kristiana rehoe ho voninahitse hoahy iareo ty nampiasa naho nampahafantatse ty hafa ty tahinan’Andrianagnahare. Nampiasae iareo o tahinagne iohoe naho fa nitory ndra nanoratse i boke agnisa ty Baiboly rey. * Naseho iareo tamy ireo fa iareo ty vahoake minday ty tahinan’Andrianagnahare.​—Asa. 2:14, 21.

10. Ino ty porofo fa ty Vavolombelo i Jehovah ro vahoake minday ty tahinan’Andrianagnahare?

¹⁰ Ty Vavolombelo i Jehovah ty vahoake minday ty tahinan’Agnahare. Dineho ty porofo  retoa: Maro ty mpitarike fivavahagne amy izao mampiasa ty fahefà’e mba hagnetahagne ty tahinan’Andrianagnahare. Nafaha iareo tamy ty Baiboly nadika iareo tao i tahina’ey. Nisy fotoagne aza rinara iareo tsy hampiasaegne am-piangona iareo agne o tahinagne iohoe.  * Ia ty ndaty afake handietse tie ty Vavolombelo i Jehovah avao ro magnaja naho magnomey voninahitse ty tahinan’Andrianagnahare? Maro ty fivavahagne faie itika avao ro mampahafantatse ty tahinan’Andrianagnahare amo o ndatio. Mikezake mafe ka tika mba hiaigne mifagnarake amy i agnarantikagne tihoe Vavolombelo i Jehovah-y. (Isaia 43:10-12) Fa losotse ty 240 tapetrisa ka ty Baiboly Dikan-drehake Tontolo Vaovao nataontika pirinty. Mampiasa ty tahinan’Agnahare o Baiboly iohoe, sady naheregne amy ty pilasi’e i ze nafaha i ndaty hafa nandika Baiboly reỳ. Ahatreavagne o tahina i Jehovah iohoe ka ty boke ara-baiboly amy ty firehake 1000 mahery aboantikagne.

11. Akore ty nampisehoa ty Kristiana tamy ty taonjato voaloha’e fa tea iareo ty hamarenagne?

¹¹ Nitea ty hamarenagne ty Jesosy. Tsy inogne zay fa ty hamarenagne miomba an’Andrianagnahare naho ty raha safirie’e. Niaigne nifagnarake tamo o hamarenagne iohoe ka ty Jesosy, sady nampahafantatse aze tamy ty ndaty hafa. (Jaona 18:37) Tena tea o mpanonjohy ty lia i Jesosio ka ty hamarenagne.  (Jaona 4:23, 24) “Lala ty hamarenagne” aza ty nirehafa i apostoly Petera ty fivavaha o Kristianao. (2 Pet. 2:2) Noho iareo tena tea ty hamarenagne ty nahavy ty Kristiana tamy ty taonjato voaloha’e tsy nagnorike ty heve-diso o fivavahagneo naho ty fomban-drazagne vaho ty heve o ndaty tsy mifagnarake amy ty hamarenagneo. (Kol. 2:8) Mikezake mafe ka ty tena Kristiana mba ‘handeha lognandro amy ty hamarenagne ao.’ Mitao areke iareo mba hifagnarake soa amy ty Saontsy i Jehovah ty raha inoa iareo naho ty fomba fiaigna iareo.​—3 Jaona 3, 4.

12. Ino ty atao o rahalahy mitarikeo naho fa mahatsapa iareo tie mila ahitsy ty fahatakarantikagne ty raha ila’e, le nagnino iareo ro manao izay?

¹² Tsy mirehake o vahoa i Jehovah-o tie taka iareo soa iaby ze raha rehafe o Baibolio. Kindraike, le diso ty fomba agnazava iareo ty fampianara ty Baiboly naho ty fomba andamina iareo ty fiangonagne. Faie tsy toko’e hahagaga antika zay. Ty anto’e, rehafe ty Soratse Masigne mazava soa fa mitombo arakarake ty andehana ty fotoagne ty fahalalagne maregne. (Kol. 1:9, 10) Ampahafantare i Jehovah tsikedetsikede o hamarenagneo, le tsy maintsy mandigne tika amparake ty hazava’e soa amantika. (Ohab. 4:18) Naho fa tsapa o rahalahy mitarikeo areke tie mila ahitsy ty fahatakarantikagne ty hamarenagne ila’e, le tsy misalasala manao izay iareo. Maro ty fivavahagne magnova ty fampianara’e tie amy izao. Faie ty hampifale ty mpiangogne amy iareo ao ndra noho iareo te halaza amy ty tontolo toy eto ty mahavy iareo manao izay. Fa ty antika, le noho itika te hifandrambe marine aman’Andrianagnahare naho te hanompo aze mifagnarake amy ty modely nenga i Jesosy ty mahavy antika hagnitsy ty fampianarantikagne. (Jak. 4:4) Noho ty fahatakarantikagne ty raha ampianare ty Soratse Masigne ro mahavy antika manao fagnovàgne, fa tsy tihoe izay ka ty fampianaragne malaza ndra lamody. Teantika vata’e ty hamarenagne.​—1 Tes. 2:3, 4.

13. Ino ty toetse tena lahibey amantaragne ty tena Kristiana, le ino ka ty porofo fa mampiseho o toetse iohoe o Vavolombelo i Jehovah-o?

¹³ Maro ty toetse soa nanagna ty Kristiana tamy ty taonjato voaloha’e fa ty hatea ro tena nahafantaragne iareo. Hoe ty Jesosy: “Naho mifankatea nareo, le izay ty hahafantara ze kila ndaty fa mpianako nareo.” (Jaona 13:34, 35) Mifankatea naho miharo saigne ka ty Vavolombelo i Jehovah magneran-tane amy izao. Tsy manahake ty fikambanagne hafa tika, satria tena mifankatea manahake ty keleiagne raike ndra tie sambe hafa foko naho fiaviagne vaho kolontsaigne aza. Mahatrea izay tika naho fa am-pivoriagne agne, amo o havoriambey faritseo naho o vondrom-paritseo. O porofo iohoe le magnampe antika tena ho rese lahatse fa ankasitraha i Jehovah ty fomba anompoantikagne aze.

14. Akore ty fomba lahibey ampisehoantika fa mifankatea amy ty fo tika, arake ty Kolosianina 3:12-14?

¹⁴ Risihe ty Soratse Masigne tika tie “mifankateava amy ty fo.” (1 Pet. 4:8) Akore ty fomba lahibey ampisehoantikagne izay? Mamela ty hadisoa ty hafa tika sady miaretse ty tsy fahavoririha iareo. Mipay fomba hampisehoagne ka tika tie matarike naho tea mandrambe ambahiny, ndra amo o ndaty nanao raha nahaboseke antikagneo aza. (Vakio ty Kolosianina 3:12-14.) Ze fifandrambesagne am-po zay ro tena amantaragne ty Kristiana vata’e.

15. Akore ka ty ampisehoantika fa magnorike ty modely o Kristiana tamy ty taonjato voaloha’eo tika?

¹⁵ Misy raha hafa ka mampiseho tie magnorike ty modely nenga o Kristiana tamy ty taonjato  voaloha’eo tika. Agnisa izay ty rafitse misy amy ty fandaminantikagne eo. Misy mpiandraikitse faritse, androanavi-pagnahy naho mpagnampe amy ty fanompoagne zao ty amantikagne eo manahake ty tamy ty andro o apostoly tamy ty taonjato voaloha’eo avao. (Fil. 1:1; Tit. 1:5) Trea amy ty fomba fiheverantika o firaisagneo naho o fanambaliagneo, ty fagnajantikagne ty fahamasigna o liò, vaho ty fiarovantikagne o fiangonagneo amo o ndaty nanao fahotagne lahibey faie tsy mibebakeo fa magnorike ty modely nengà o Kristiana tamy ty taonjato voaloha’eo ka tikagne.​—Asa. 15:28, 29; 1 Kor. 5:11-13; 6:9, 10; Heb. 13:4.

16. Ino ty ianarantika amy ty rehake amy Efesianina 4:4-6 ao?

¹⁶ Nirehake ty Jesosy tie maro ty ndaty hirehake tie mpiana’e, faie tsy ze mirehake izay le tena ie vata’e. (Mat. 7:21-23) Fa nampitao ka ty Soratse Masigne tie amy ty andro fara’e, le maro ty ndaty “tsy ho tea an’Andrianagnahare.” (2 Tim. 3:1, 5) Faie magnomey toky antika ka ty Baiboly tie misy “finoagne raike”, ndra fivavahagne raike ankasitrahan’Agnahare.​—Vakio ty Efesianina 4:4-6.

17. Ia ty manonjohy ty lia i Jesosy naho magnorike ty fivavahagne maregne tie amy izao?

¹⁷ Ia o fivavahagne raike maregne iohoe? Ty Vavolombelo i Jehovah. Misy porofo nidinehentika tato magnamaregne izay. Nandineke ty modely nenga i Jesosy naho fa nanompo an’Andrianagnahare naho ty fomba nagnoriha ty Kristiana tamy ty taonjato voaloha’e izay tika. Tena tombotsoa lahibey tihoe agnisa ty vahoa i Jehovah naho mahafantatse ty hamarenagne miomba aze vaho ty raha safirie’e. Lonike areke tika tena ho rese lahatse amy i hamarenagney!