1. Nagnino ty hafaleagne ro miankigne amy ty fipaliavantikagne an’Andrianagnahare?

 TSY mitovy amy i hafaleagne mihelagne avao rey ty tena hafaleagne. Afake ty haharetse amy ty ndaty raike managne aze io. Fa nagnino? Izao ty nihazavae i Jesosy tamy i Toriteni’e Tam-bohitse teoy: “Sambatse ze mahatsiaro fa mipay an’Andrianagnahare.” (Mat. 5:3) Nihay i Jesosy fa misy fagniriagne voajagnahare anagna o ndatio, le ty fagniriagne mafe te hahafantatse naho hanompo i Mpamorogney, ndra i Jehovah Andrianagnahare. Satria ty Jehovah “Andrianagnahare falefale”, le ho falefale ka ze manompo aze.​—1 Tim. 1:11.

2-3. a) Ia ka ty afake ty ho fale arake ty nirehafe i Jesosy? b) Ino ty hodinehentikagne ato, le ino ty anto’e?

² Afake ty ho falefale avao vao tika ndra tie managne olagne aza? Eka. Misy raha mahaliagne nirehafe i Jesosy tamy i toriteni’ey. Hoe reke: “Sambatse ze malahelo”, ndra ze ndaty malahelo noho ty fahotagne natao’e, ndra noho ty raha sarotse atrehe’e amy ty fiaignagne. Nirehafe i Jesosy ka tie “sambatse ze ndaty enjehegne noho ty hamarenagne” ndra i aze mijale satria “haratiratiegne” noho iareo manonjohy ty lia i Kristỳ. (Mat. 5:4, 10, 11) Akore ty hahavy ty ndaty raike mbe ho falefale avao ndra tie miatreke olagne hoe ireo aza?

³ Nampianare i Jesosy fa tsy tihoe naho fa milamigne soa avao ty fiaignantika vaho izay tika ho falefale. Afake ty ho falefale tika naho mipay an’Andrianagnahare sady mifandrambe maifitse ama’e. (Jak. 4:8) Akore ty azontikagne anoagne izay? Handineke raha telo hagnampe antika hahatrea i tena hafaleagney tika amy ty lahatsoratse toy.

4. Ino ty raha voaloha’e hagnampe antika hahatrea i tena hafaleagney? (Salamo 1:1-3)

⁴ VOALOHA’E: Mila mamaky naho mianatse ty Saontsin’Andrianagnahare tika naho tena te ho falefale avao. Nampitovie i Jesosy tamy ty hanegne ty Saontsin’Andrianagnahare. Tsy maintsy mihinagne o ndatio naho o bibio naho te ho velogne. Faie o ndatio avao ro mila mamaky ty Saontsin’Andrianagnahare. Izay ty nahavy i Jesosy nirehake hoe izao: “Tsy mofo avao ty paliae o ndatio mba hahavelogne aze, fa ze raha iaby saontsie i Jehovah ka.” (Mat. 4:4) Isan’andro areke tika le toko’e hamaky ty Saontsin’Andrianagnahare, le ty Baiboly. Hoe ty mpanao salamo raike toy: ‘Sambatse ze ndaty tea ty lily i Jehovah sady mamaky aze handro halegne.’​—Vakio ty Salamo 1:1-3.

5-6. a) Ino ty raha azontika ianaragne boake amy Baiboly ao? b) Nagnino ty famakiagne Baiboly ro magnampe antika?

⁵ Tea antika ty Jehovah, le natoro’e antika amy Baiboly ao ze raha tsy maintsy ataontika mba hahavy antika ho sambatse amy ty fiaignagne. Treantika ao ohatse tie inogne ty raha irie’e ho antika, akore ty hahavy antika hifandrambe ama’e, le ino ty raha mila ataontika naho te hahazo famelan-keloke. Trea ao ka fa misy raha fanjaka ampitamae’e antika amy ty hoavy. (Jer. 29:11) Mahavy ty fontika tena ho falefale ty fianaragne o raha rehoe boake amy Baiboly ao.

⁶ Haintikagne ka fa misy torohevetse azontika ampiharegne amy ty fiaignagne andavanandro ty amy Baiboly ao. Naho itika magnorike i torohevetse rey, le ho falefale. Naho misy fotoagne rehe kivy noho ty  olagne mahazo azo, le manokàna fotoagne mba hamakiagne ty Saontsy i Jehovah naho hisaintsaignagne aze. Hoe ty Jesosy: “Ze mitsanogne ty saontsin’Andrianagnahare naho miambegne aze ro sambatse.”​—Lioka 11:28.

7. Akore ty hahavy azo tena handrambe soa naho fa mamaky ty Saontsin’Andrianagnahare?

⁷ Naho fa mamaky ty Saontsin’Andrianagnahare rehe, le anò ze hahavy azo ho tea ty raha vakie’o. Intoy misy ohatse raike. Va’e fa nisy fotoagne rehe nahandroa ty ndaty raike i hanegne tena tea’oy. Faie va’e nisy raha nahameke azo rehe, ndra nisy raha nampiasa loha azo, hafara’e nihane’o tsielatsiela avao i hanegney. Naho fa nilany i hanegney vaho izay rehe nahatsapa tie toko’e ho nihane’o miadagne i hanegney amy izay rehe mba naharey ty tsiro’e naho fa nihinagne aze. Fa nisy fotoagne ka vao rehe namaky Baiboly, faie nività’o tsielatsiela avao hafara’e tsy nitaka’o soa ty raha nivakie’o? Anò areke ze hahavy azo ho tea ty raha vakie’o amy ty Saontsin’Andrianagnahare ao. Alao sare an-tsaigne i tantaray, anò hoe rei’o ty feo amy i tantaray ao, le saintsaigno ze nivakie’o. Vao mainke ho falefale rehe naho manao izay.

8. Akore ty agnatanteraha o “mpanompo mahihitse naho mahimbagneo” i andraiki’ey? (Henteo ka ty fagnamarehagne ambane peje.)

⁸ Nanendre o “mpanompo mahihitse naho mahimbagneo” ty Jesosy mba hagnomey hanegne ara-pagnahy antika amy ty fotoagne mete. Mahazo hanegne ara-pagnahy maro areke tika. b (Mat. 24:45) Boake amy ty Soratse Masigne ao ze kila raha iaby aboa o mpanompo iohoe. (1 Tes. 2:13) I hanegne ara-pagnahy rey ty magnampe antika hahay ty fomba fiheve i Jehovah trea agnate Baiboly ao. Izay ty mahavy antika mamaky ty gazete Fitalakesan-davitse naho Mifohaza! vaho i lahatsoratse amy jw.org ao rey. Magnomagne i fivoriagne andavanandro naho amy i fara i heregnandroy ka tika. Ankoatse izay, le magnente i Tele JW isam-bolagney tika. Naho itika mazoto mihinagne hanegne ara-pagnahy, le ho vitantika ty hanao i raha faharoe mila ataontika mba hahavy antika hanagne i tena hafaleagneỳ.

9. Ino ty raha faharoe hagnampe antika hahatrea i tena hafaleagney?

⁹ FAHAROE: Mila magnorike ty lily i Jehovah tika naho tena te ho falefale avao. Izao ty nisorate ty mpanao salamo raike: “Sambatse ze matahotse i Jehovah naho mandeha amy ty lala’e.” (Sal. 128:1) Matahotse i Jehovah tika naho tena magnaja aze sady mitao mba tsy hanao raha hampalahelo aze. (Ohab. 16:6) Midika zay fa mila mikezake lognandro tika mba hiaigne mifagnarake amy ty fitsipy i Jehovah miomba ty soa naho ty raty trea amy Baiboly ao. (2 Kor. 7:1) Vao mainke ho sambatse tika naho manao ze raha tea i Jehovah le tsy manao ze raha heje’e.​—Sal. 37:27; 97:10; Rom. 12:9.

10. Ino ty raha mila ataontika ankoatse tihoe mahay ty zoton’arofon’Andrianagnahare? (Romanina 12:2)

¹⁰ Vakio ty Romanina 12:2. Va’e hay ty ndaty raike tie managne zo hamaritse ty atao tihoe soa naho ty raty ty Jehovah, faie mila magnorike i fitsipy i Jehovah rey ka reke. Ohatse, va’e hay ty ndaty raike tie manan-jò hamaritse ty falaky ndra ty vitesy toko’e handehanagne amy ty lalagne raike o manam-pahefagneo. Faie va’e tsy te hagnorike izay reke, hafara’e mandeha mafe avao. Toko’e hotrea amy ty findesam-batantikagne fa tena mino tika tie le vata’e mahasoa ty magnorike  ty lily i Jehovah. (Ohab. 12:28) Izay zao ty nitsapa i Davida. Hoe reke miomba i Jehovah: “Hampahafantare’o ahy ty lala i fiaignagney. Fifaleagne tsy misy hoe’e ty agnatreha’o eo, sady fahafinaretagne nainai’e ty ankavana’o eo.”​—Sal. 16:11.

11-12. a) Ino ty raha mila itaoantikagne naho fa itika minekoneko ndra kivy? b) Nagnino ty rehake amy Filipianina 4:8 ao ro magnampe antika hahay hijobogne ty fihisagne ataontikagne?

¹¹ Naho fa mivali-doha tika ndra kivy, le va’e hieretseretse tie misy raha mila ataontika mba hiafaha i olagney. Ara-dalàna zay, faie mila mitao tika mba tsy hanao raha haintika fa heje i Jehovah.​—Efes. 5:10-12, 15-17.

¹² Tamy i taratasi’e hoahy o Filipianaoy ty apostoly Paoly, le nandrisike o Kristianao tie, ‘ze raha vantagne, malio, mahafinaritse, naho fanjaka’ ro dineho lognandro. (Vakio ty Filipianina 4:8.) Maregne fa tsy nirehake miomba ty fihisagne ty Paoly naho fa nanoratse io, faie toko’e hisy voka’e amy ty fihisagne jobognentikagne o raha nisorate’e rehoe. Anò ohatse toy: Ze rehake tihoe “ndra ino raha atao tihoe” amo o andine’e iohoe, le ovao tihoe “hira”, “filma”, “boke” ndra “jeux.” Ty fanoagne izay le hagnampe azo hahay hagnambake tie ty raha manao akore ty va’e hampifale an’Andrianagnahare, le ty manao akore ty va’e tsy hampifale aze. Teantika ty hiaigne mifagnarake amy ty fitsipy i Jehovah. (Sal. 119:1-3) Ty anto’e, halio ty eretserentikagne amy izay, le hanagne i tena hafaleagney tika.​—Asa. 23:1.

13. Ino ty raha fahatelo hagnampe antika hahatrea i tena hafaleagney? (Jaona 4:23, 24)

¹³ FAHATELO: Ty fanompoagne i Jehovah ro anò voalohan-draha amy ty fiaigna’o. Tena fagneva ty ho tompoentika ty Jehovah satria ireke ty Mpamorogne antika. (Apok. 4:11; 14:6, 7) Ty raha lahibey toko’e hataontika amy ty fiaignagne areke le ty hanompo i Jehovah amy ty fomba ankasitraha’e, “arake ty fagnahy naho ty hamarenagne.” (Vakio ty Jaona 4:23, 24.) Toko’e hagnorike ty tari-dala ty fagnahy masin’Andrianagnahare tika naho fa manompo aze, amy izay hifagnarake amy ty hamarenagne trea amy ty Saontsi’e ao ty fomba anoantika izay. Mila ataontika voalohan-draha avao ty fanompoagne i Jehovah ndra tie amy ty tane andraragne ty asantikagne agne aza ty misy antika. Amy izao, le misy 100 mahery ty rahalahy naho ty rahavaventikagne gadraegne noho iareo Vavolombelo i Jehovah. c Faie ndra tie eo zay, le mbe fale avao iareo satria mikezake manao ty raha retoa: Mivavake, mianatse ty Saontsin’Andrianagnahare, mirehake amy ty hafa ty miomba i Andrianagnaharentikagney naho i Fanjakà’ey. Naho fa haratiegne tika ndra enjehegne, le mbe afake ty ho falefale avao satria haintika tie manohagne antika ty Jehovah sady hamale soa antika reke.​—Jak. 1:12; 1 Pet. 4:14.

14. Ino ty raha nanjò i rahalahy raike tanora ta Tajikistan agney, le ino ty anto’e?

¹⁴ Ty raha niaigna o rahalahy naho o rahavaventikagneo le magnamaregne tie afake ty ho falefale avao tika naho manao i raha telo rey ndra inogn’ino raha sarotse atrehentika. Dineho ohatse ty raha nanjò ty rahalahintikagne tanora 19 taogne ta Tajikistan agne toy. Tsy nimete hanao maramila reke. I Jovidon Bobojonov ty agnara’e. Nalaegne an-tragno’e  agne reke tamy 4 Oktobra 2019, le ginadra tagnate ty volagne maromaro sady natao manahake o mpamono ndatio. Niparitake tamy ty vaovao tamy ty tane maro ze tsy rare’e nanjò aze zay. Nirehafe i vaovaoy tie jinera reke mba hamoresegne aze hagneke hanao maramila naho hagnisy akanjo maramila. Tafara izay reke, le nirehafe ty fitsaragne raike tie voaheloke, le ginadra amparake ty nagnomea i filohay lily tie mila votsoragne reke. Faie tsy nivalike ty Jovidon tagnate ze fotoagne rezay, sady nifalefale avao. Ino ty nagnampe aze? Nikezake hatanjake ara-pagnahy avao reke.

15. Akore ty fomba nianara i Jovidon ty miomba i Jehovah tamy ireke tam-pirizò agney?

¹⁵ Nianatse ty miomba i Jehovah avao ty Jovidon tamy ie tam-pirizò agney, ndra tie tsy nanagne Baiboly ndra boke naho gazete aza. Amy ty fomba akore ty nanoa’e izay? Nisy rahalahy naho rahavave tompo-tane nagnatetse hanegne ho aze, le nisorate iareo tamy i raha namognosagne hanegney ty andinin-teny hoahy i androy. Afake namaky Baiboly naho nisaintsaigne igne isan’andro areke ty Jovidon. Naho fa nivotsotse reke, le izao ty torohevetse nimei’e i aze mbe tsy le niatreke fitsapagne mafe rey: “Tena ilae’areo ty mianatse  soa ty miomba i Jehovah, le mamaky ty Saontsi’e naho o boke aman-gazetentikagneo.”

16. Ino ty raha nifantoha i Jovidon?

¹⁶ Nagnorike ty lily i Jehovah i rahalahintikagney. Tsy nifantoke tamy ty fagnirian-draty sady tsy nanao raha raty reke, fa nifantoke tamy i Jehovah naho ze raha tea’e. Nahalatsa aze ty nahatrea ty hasoa o raha finoro i Jehovah-o. Maharey feom-borogne reke isake tie mifoha maraindray. Le naho fa hariva reke magnente i volagney naho o kintagneo. Hoe reke: “Mahafale naho mampahery ahy i fagnomezagne boake amy i Jehovah rey.” Naho itika mankasitrake ty raha ara-pagnahy naho ty raha ara-nofo mey i Jehovah antika, le ho falefale avao, sady hahazo hery hagnampe antika hahavita hiaretse.

17. Naho itika miatreke raha sarotse mitovy amy ty nahazo i Jovidon, ino ty ho voka’e naho itika miaretse? (1 Petera 1:6, 7)

¹⁷ Nanao voalohan-draha ty fanompoagne i Jehovah avao ty Jovidon. Nihai’e fa tena ilaegne ty tsy mivalike amy i Andrianagnahare maregney. Hoe ty Jesosy: “I Jehovah Andrianagnahare’o ro tsy maintsy iankohofa’o, le ireke raike avao ka ro tsy maintsy tompoe’o.” (Lioka 4:8) Tea o lahibey maramilao naho o maramilao hiala tsy ho Vavolombelo i Jehovah ty Jovidon. Faie tsy nimete reke, le nivavake naho nitagny handro halegne tamy i Jehovah mba hampea’e hahavita hiaretse, naho tsy handiso tamà aze. Tsy nivalike reke ndra tie teo aza ty tsy rare’e nanjò aze. Ty voka’e, tena fale reke amy izao satria managne i raha tsy nanagna’e taloha i nitsepahegne naho nijeragne vaho nampigadragne azey, le ty finoagne vita sedra.​—Vakio ty 1 Petera 1:6, 7.

18. Akore ty hahavy antika ho falefale avao?

¹⁸ I Jehovah ro tena mahaonigne ze raha tena hahasambatse antika. Naho manao i raha telo mahavy antika hanagne i tena hafaleagney rey rehe, le ho falefale avao ndra tie miatreke raha sarotse aza. Ho afake hirehake hoe izao ka rehe: “Sambatse ty ndaty managne i Jehovah ho Andrianagnahare’e!”​—Sal. 144:15.