1. Inogne iaby ty ila’e amy ty fagnomezagne nimea i Jesosy antikagne?

 TSY MISY matarike manahake i Jesosy naho mbe ndaty avao. Mateteke nanao fahagagagne reke tamy tie ireke mbe tambone tane etoy mba hagnampeagne ty hafa. (Lioka 9:12-17) Nimea’e antikagne ty fiai’e. Io ty fagnomezagne fara izay ty lahibey. (Jaona 15:13) Nanomboke amy ty namelomagne aze tamy ty mate, le nanohy nagnampe antikagne avao reke. Nangatake fagnahy masigne tamy i Jehovah reke mba hampianatse naho hampahery antikagne, arake i fa nampitamae’ey. (Jaona 14:16, 17, f.a.p.; 16:13) Magnomey ze raha ilaentikagne mba hampianaragne Baiboly o ndatio ty Jesosy amy ty alala ty fivoria ty fiangonagne.​—Mat. 28:18-20.

2. Ia iaby ty agnisa i ‘lahilahy natao fagnomezagne’ rehafegne amy Efesianina 4:7, 8 aoy?

² Misy fagnomezagne hafa ka nimea i Jesosy. Nanoratse ty apostoly Paoly tie ‘nagnomey lahilahy fagnomezagne’ ty Jesosy tafara ty nionjogna’e mban-dagnitse mbeo. (Vakio ty Efesianina 4:7, 8.) Nihazavae i Paoly fa nagnomey o fagnomezagne rehoe ty Jesosy mba hagnampe o fiangonagneo amy ty lafi’e sambe hafa. (Efes. 1:22, 23; 4:11-13) Amo ze o fotoagne zao, le agnisa o ‘lahilahy natao’e fagnomezagne’ rehoe ty mpagnampe amy ty fiangonagne, ty androanavi-pagnahy vaho ty mpiandraikitse faritse. a Tsy voririke o lahilahy rehoe, le azo antoke fa hanao hadisoagne. (Jak. 3:2) Faie mampiasa iareo ty Jesosy Kristy Tompo mba hagnampeagne antikagne. Fagnomezagne nimea’e antikagne iareo.

3. Akore ty azontikagne ampisehoagne tie manohagne ty asa atao i ‘lahilahy natao’e fagnomezagne’ rey tikagne? Hazavao amy ty ohatse.

 ³ Nanendre o ‘lahilahy natao’e fagnomezagne’ rehoe ty Jesosy mba hagnatanjake o fiangonagneo. (Efes. 4:12) Faie afake manohagne iareo tikagne iaby naho fa manao o andraikitse lahibey iohoe iareo. Manahake naho fa magnoregne o Anjomba i Fanjakagney io avao. Ty ila’e amantika afake manao i asay mivantagne fa ty ila’e manohagne i asay, le magnomey hanegne ndra fitaovagne ilaegne ndra magnampe amy ty fomba hafa. Hoe izay ka fa afake manohagne ty kezake atao o mpagnampe amy ty fiangonagneo naho o androanavi-pagnahio vaho o mpiandraikitse faritseo amy ty alala ty raha rehafentikagne naho ty raha ataontika tikagne. Andao hodinehentika ty soa rambesentikagne boake amy ty asa mafe atao iareo, naho ty fomba hanehoantika fankasitrahagne iareo naho i Jesosy, i nagnomey antikagne o ‘lahilahy natao’e fagnomezagne’ reoy.

“MAGNAMPE NDATY” O MPAGNAMPE AMY TY FIANGONAGNEO

4. Inogne iaby ty raha natao o mpagnampe amy ty fiangonagneo mba hagnampeagne o Kristiana tamy ty taonjato voaloha’eo?

⁴ Tamy ty taonjato voaloha’e, le tinendre ho mpagnampe amy ty fiangonagne ty rahalahy ila’e. (1 Tim. 3:8) Iareo i nirehafe i apostoly Paoly tie ‘magnampe ndatỳ.’ (1 Kor. 12:28) Miandraikitse raha maro sambe hafa tena ilaegne areke o mpagnampe amy ty fiangonagneo, amy izay o androanavi-pagnahio afake mifantoke amy ty fampianaragne naho ty fitilihagne o agnondrio. Nagnampe tamy ty fanoagne kopỳ o Soratse Masigneo ohatse o mpagnampe amy ty fiangonagneo ndra nivily ze fitaovagne nilaegne.

5. Inogne iaby ty atao o mpagnampe amy ty fiangonagneo tie amy izao?

⁵ Eretsereto moa ty asa lahibey atao o mpagnampe amy ty fiangonagneo, amy ty fiangonagne misy azo. (1 Pet. 4:10) Va’e ho tendregne hikarakara konte ndra faritane ohatse iareo. Misy ka ty tendregne hagnafatse boke aman-gazete ndra mizara irey amo o mpitorio. Ty ila’e mikarakara feo naho video, mikarakara mpagnatreke ndra magnampe amy ty fikarakaragne ty Anjomba i Fanjakagney. Tena ilaegne iaby o andraikitse rehoe mba hampilamigne o fiangonagneo. (1 Kor. 14:40) Fagnampe izay, misy amo o mpagnampe amy ty fiangonagneo manao anjara amy ty fivoriagne andavanandro sady manao lahajaka hoahy ty ndaty maro. Va’e ho tendregne hagnampe ty mpiandraikitse o andiam-pitorio ka ty mpagnampe amy ty fiangonagne raike. Va’e hiarake hanao fitilihagne agnondry miarake amo o androanavi-pagnahio ka ty mpagnampe amy ty fiangonagne mahafeno fepetse amy izay.

6. Nagnino tikagne ro mankasitrake ty asa mafe atao o mpagnampe amy ty fiangonagneo?

⁶ Nagnino ro mahasoa o fiangonagneo ty asa atao o mpagnampe amy ty fiangonagneo? Hoe ty Beberly b rahavave a Bolivia agne: “Noho o mpagnampe amy ty fiangonagneo, le manjare mankamamy o fivoriagneo raho. Afake mihira raho, magnomey toin-drehake, mitsanogne lahajaka sady mandrambe soa boake amy ty video naho sare, noho ty asa atao iareo. Atao iareo azo antoke tie voaro soa o mpagnatreke fivoriagneo sady ampea iareo ze tsy afake mivory mba ho afake hagnorike i fandaharagney an-tragno’e agne. Naho fa rava i fivoriagney, le mitarike ty fagnaliovagne iareo sady mikarakara konte naho ze boke aman-gazete ilaentikagne. Tena misaotse iareo raho.” Hoe ka ty Leslie, valy ty androanavi-pagnahy a Kolombia agne: “Tena mipay ty fagnampea o mpagnampe amy ty fiangonagneo ty valiko. Ho nirempotse reke naho tsy nisy iareo, le tena mankasitrake ty fazotoa iareo naho ty fahavognona iareo hagnampe aze lognandro raho.” Azo antoke fa hoe izay ka ty tsapantikagne.​—1 Tim. 3:13.

7. Akore ty ampisehoantikagne tie mankasitrake o mpagnampe amy ty fiangonagneo tikagne? (Henteo i sarey.)

 ⁷ Ndra tie mahatsapa aza tikagne tie mankasitrake o mpagnampe amy ty fiangonagneo, le mandrisike antikagne ty Baiboly tie: “Asehò fa mahay mankasitrake nareo.” (Kol. 3:15) Izao ty natao i Kristofer androanavi-pagnahy a Failandy agne mba hanoroa’e ty fankasitraha’e: “Nandefa taratasy ndra mesaze raho. Nasiako andinin-teny ty ao. Nisorateko ao ty raha voafaritse soa atao o mpagnampe amy ty fiangonagneo tena nampahery ahike ndra ty anto’e mahavy ahy tena mankasitrake ty raha atao iareo.” Mateteke nivavake hoahy o mpagnampe amy ty fiangonagneo ka ty Pascal naho i Jael, mipetrake a Nouvelle-Calédonia agne. Nagnazava hoe izao ty Pascal tie: “Vaho tsy ela zay, le nivavake mafe hoahy o mpagnampe amy ty fiangona’ay reo zahay. Nisaotse i Jehovah zahay noho ty raha atao iareo sady nangatake aze mba hanohagne naho hagnampe iareo.” Mijanjigne ty vavake hoe izay ty Jehovah, voka’e mandrambe soa o fiangonagneo.​—2 Kor. 1:11.

“MIASA MAFE” O ANDROANAVI-PAGNAHIO

8. Nagnino ty Paoly ro nanoratse tie “niasa mafe” o androanavi-pagnahy tamy ty taonjato voaloha’eo? (1 Tesalonianina 5:12, 13)

⁸ Niasa mafe hoahy o fiangonagneo o androanavi-pagnahy tamy ty taonjato voaloha’eo. (Vakio ty 1 Tesalonianina 5:12, 13; 1 Tim. 5:17) “Mitarike” amo o fiangonagneo eo iareo, zane hoe mitarike fivoriagne naho mandrambe fanapahan-kevetse. Magnomey torohevetse aman-katea o rahalahy naho o rahavaveo ka iareo mba hagnampeagne iareo hanagne finoagne matanjake avao. (1 Tes. 2:11, 12; 2 Tim. 4:2) Miasa mafe ka iareo mba hamelomagne ty keleia’e sady mikezake hatanjake ara-pagnahy lognandro.​—1 Tim. 3:2, 4; Tit. 1:6-9.

9. Inogne iaby ty ila’e amy ty andraikitse atao o androanavi-pagnahio tie amy izao?

⁹ Tena miasa mafe o androanavi-pagnahio ty amy izao. Mpitory i talily soay iareo. (2 Tim. 4:5) Modely soa amy ty fahazotoagne mitory iareo sady mandamigne ty fitoriagne an-toeragneo naho mampiofagne antikagne mba hahay hitory vaho hampianatse. Mpitsara mamindra fo sady tsy magnavakavake ka iareo. Naho misy Kristiana raike nanao fahotagne lahibey, le mikezake magnampe aze mba hifandrambe soa amy i Jehovah indraike o androanavi-pagnahio. Manao izay iareo mba hahavy o fiangonagneo halio avao. (1 Kor. 5:12, 13; Gal. 6:1) Faie mpiarake ty tena ahafantaragne o androanavi-pagnahio. (1 Pet. 5:1-3) Manao lahajaka voaomagne soa mioregne amy ty Baiboly iareo, mikezake hahafantatse ty tsikiraidraike amo o fiangonagneo eo sady manao fitilihagne agnondry. Manao andraikitse fagnampe’e ka iareo agnisa izay ty fagnamboaragne naho fikojakojagne ty Anjomba i Fanjakagney. Ty ila’e ka mandamigne havoriambey, agnisa ty Komity Mifandrae amy ty Lapotaly naho Antoko Mpitilike Marare. Tena miasa mafe o androanavi-pagnahio!

10. Nagnino tikagne ro mankasitrake ty asa mafe atao o androanavi-pagnahio?

¹⁰ Fa nisaontsie i Jehovah mialoha tie hikarakara antikagne o mpiarakeo amy izay tika “tsy hatahotse sasa sady tsy hihondrahondra.” (Jer. 23:4) Tena nahatsapa ty hamaregna o rehake reo ty Johanna, rahavave mipetrake a Failandy agne naho fa narare mafe ty rene’e. Hoe reke: “Sarotse amako ty mirehake ty raha tsapako amy ty hafa. Faie nanam-paharetagne nitsanogne ahy ty androanavi-pagnahy raike naho fa nivognogne hirehake ty raha nampinekoneko ahy raho. Niarake nivavake amako reke sady nagnomey toky ahy tie tea ahy ty Jehovah. Ie aloha tsy tadidiko tie inogne iaby ty raha nirehafe’e, faie tadidiko fa tsy ninekoneko sasa raho tamy izay. Matoky raho fa nagnirake aze mba hagnampe ahike amy ty fotoagne mete ty Jehovah.” Akore ka ty mba fa nagnampea ty androanavi-pagnahy amy ty fiangonagne misy azo eo azo?

11. Akore ty ampisehoantikagne ty fankasitrahantika o androanavi-pagnahio? (Henteo i sarey.)

 ¹¹ Tea i Jehovah hanoro ty fankasitrahantikagne o androanavi-pagnahio tika iaby “noho ty asa atao iareo.” (1 Tes. 5:12, 13) Izao ty nirehafe i Henrietta, mipetrake a Failandy agne: “Vognogne hagnampe ty hafa lognandro o androanavi-pagnahio. Faie tsy midika zay tie manam-potoagne maro naho hery noho itikagne iareo ndra tsy miatreke olagne. Mirehake hoe izao amy iareo raho kindraike: ‘Hai’o ein, tena androanavi-pagnahy bey hatea vata’e rehe. Teako ho fanta’o zay.’” Izao ka ty nirehafe ze rahavave a Torkia agne atao tihoe Sera zay: “Mila fampaherezagne o androanavi-pagnahio mba hahafaha iareo hanohy ty asa atao’e. Afake manoratse taratasy hoahy iareo areke tikagne, manasa iareo hiarake hihinagne amantika ndra miarake manompo amy iareo.” Misy androanavi-pagnahy vao tena ankasitraha’o manokagne ty asa atao’e amy fiangonagne eo? Mipaliava fomba hanoroa’o ze fankasitraha’o zay.​—1 Kor. 16:18.

MAMPAHERY O MPIANDRAIKITSE FARITSEO

12. Ino ka ty fandaharagne natao i Jesosy mba hampaherezagne ty fiangonagne tamy ty taonjato voaloha’e? (1 Tesalonianina 2:7, 8)

¹² Nimey i Jesosy ‘lahilahy natao fagnomezagne’ manompo amy ty fomba hafa ka o fiangonagneo. Nampiasa ty androanavi-pagnahy ta Jerosalema agne reke handefa i Paoly naho i Barnabasy vaho ty hafa mba hanao ty asa ty mpiandraikitse faritse. (Asa. 11:22) Ino ty anto’e? Ndra o mpagnampe amy ty fiangonagneo ndra o androanavi-pagnahio ndra o mpiandraikitse faritseo, le mitovy avao ty anto’e nanendreagne iareo, le ty hampahery o fiangonagneo. (Asa. 15:40, 41) Manao sorogne raha maro o lahilahy rehoe mba hampianaragne naho hampaherezagne ty hafa.​—Vakio ty 1 Tesalonianina 2:7, 8.

13. Inogne ty ila’e amy ty andraiky o mpiandraikitse faritseo?

 ¹³ Mifindrafindra toeragne o mpiandraikitse faritseo. Mifankalavitse ty fiangonagne tilihe ty ila’e. Manao lahajaka maro, manao fitilihagne agnondry, mitarike ty fivoria o mpisava lalagneo, miarake mivory amo o androanavi-pagnahio vaho mitarike fivoriagne aloha ty fanompoagne iareo isan-keregnandro. Magnomagne lahajaka sady mandamigne havoriambey faritse naho vondrom-paritse ka iareo. Ankoatse izay, mampianatse amy ty sekoly ty mpisava lalagne, mandamigne fivoriagne manokagne iarahagne amy ty mpisava lalagne amy ty faritse tilihe’e ka iareo. Kindraike aza misy asa meke hafa ampanoe i birò i sampagne iareo.

14. Nagnino tikagne ro mankasitrake ty asa mafe atao o mpiandraikitse faritseo?

¹⁴ Ino ty soa rambese o fiangonagneo boake amo o mpiandraikitse faritseo? Izao ty nirehafe ze rahalahy mitoboke a Torkia agne zay miomba ty fitiliha o mpiandraikitse faritseo: “Mandrisike ahy hanokagne fotoagne maro hagnampeagne o rahalahy naho o rahavaveo ty fitiliha iareo. Nahafantatse mpiandraikitse faritse maro raho. Naho fa nitilike anay iareo, le tsy natao iareo ze hahatsapako tie tena rempotse iareo le tsy toko’e hotsoboregne.” Niarake nitory tamy ty mpiandraikitse faritse raike ty Johanna, i nirehafegne taloha teoy, faie tsy nahatrea ndaty iareo. Hoe reke: “Ndra tie teo zay, le tsy halignoko i andro ignehoe. Vaho nifindra an-tane hafa agne ty rahavaveko roe, le tena nimanigne iareo raho. Nampahery sady nagnampe ahy i mpiandraikitse faritsey tie va’e mbe tsy ho afake hiarake hipetrake marine ty keleiantikagne naho ty namantika tikagne ty amy zao. Faie amy i tontolo vaovaoy ao, le tsy hisy fetra’e ty fotoagne hiharoantika amy iareo.” Maro amantikagne ty mahatsiaro ty fomba nagnampea ty mpiandraikitse faritse aze hoe izay.​—Asa. 20:37–21:1.

15. a) Arake ty 3 Jaona 5-8, akore ty ampisehoantikagne tie mankasitrake o mpiandraikitse faritseo tikagne? (Henteo i sarey.) b) Nagnino tikagne ro toko’e hankasitrake ty valy i rahalahy miasa mafe amo o fiangonagneo eo rey, le akore ty fomba hanoantika izay? (Henteo ty efajoro tihoe “ Tadidio ty Valy Iareo.”)

 ¹⁵ Nandrisike i Gaio ty apostoly Jaona mba handrambe soa ze rahalahy mitilike o fiangonagneo. ‘Toko’e hokarakarae’e soa arake ty iteavan’Andrianagnahare aze ka iareo naho fa mandeha.’ (Vakio ty 3 Jaona 5-8.) Agnisa ty fomba raike azontika anoagne izay tihoe manasa o mpiandraikitse faritseo mba hiarake hihinagne amantikagne. Manohagne iareo ka tika naho fa magnatreke fivoriagne aloha ty fanompoagne amy iareo mitilikey. Nampiseho ty fankasitraha’e hoe izao ty Leslie, i nirehafegne taloha teoy: “Nivavake raho mba hagnomey ze raha ilae iareo ty Jehovah. Nanoratse taratasy hoahy iareo zahay mirovaly, le nirehafe’ay tao tie tena nagnampe anay i fitiliha iareoy.” Ko haligno fa miatreke raha sarotse naho mahatsiaro ho rokake manahake antikagne avao ka o mpiandraikitse faritseo. Misy fotoagne iareo marare, minekoneko sady kivy. Faie va’e ho vale ty vavake natao iareo ty rehake mamy ndra ty fagnomezagne kede boake ama’o.​—Ohab. 12:25.

ILAENTIKA I ‘LAHILAHY NATAO FAGNOMEZAGNE’ REY

16. Arake ty Ohabolana 3:27, ino iaby ty fagnonteneagne toko’e hoeretserete o rahalahio?

¹⁶ Magneran-tane, le mbe maro ty ‘lahilahy natao fagnomezagne’ paliaventikagne. Naho rahalahy vita badisa rehe, ‘azo’o atao vao ty magnampe’ amy ze lafi’e zay? (Vakio ty Ohabolana 3:27.) Magniry ty ho mpagnampe amy ty fiangonagne vao rehe? Naho fa mpagnampe amy ty fiangonagne rehe, magniry ty ho androanavi-pagnahy vao rehe, mba hanompo o rahalahi’o naho o rahavave’ò? c Afake manao fagnovàgne amy ty fiaigna’o vao rehe mba ho afake hagnatreke ty Sekoly ty Mpitory i Fanjakagney? Hampiofagne azo sady hagnampe azo mba hampiasae i Jesosy amy ty fomba maro o sekoly iohoe. Mivavaha amy i Jehovah, naho mahatsapa rehe tie tsy mahafeno fepetse hanao ireo. Angataho reke mba hagnampe azo hahavita ze andraikitse fa anoe’o amy izao.​—Lioka 11:13; Asa. 20:28.

17. Magnaporofo ino miomba i Kristy Jesosy Mpanjakantikagney i ‘lahilahy natao’e fagnomezagne’ rey?

¹⁷ Ty asa mafe atao o rahalahy tinendre i Jesosy ho ‘lahilahy natao’e fagnomezagne’ reo ty porofo fa mitarike antikagne vata’e reke amo ze o andro fara’e zao. (Mat. 28:20) Tena velom-pakasitrahagne tikagne managne Mpanjaka bey hatea sady matarike, mahafantatse ty raha ilaentika sady magnomey rahalahy hagnampe antikagne. Mipaliava fomba areke mba hanoroa’o ty fankasitraha’o ty asa mafe atao o lahilahy rehoe. Ko haligno ty misaotse i Jehovah satria ireke ty Foto “ze fagnomezagne soa naho ze fagnomezagne voririke.”​—Jak. 1:17.