1. Ino ty tsapa i Jehovah miomba o mpanompo’eo?

 MAHAONIGNE ze kila raha mahazo ty mpanompo’e ty Jehovah. Oni’e tika naho fa fale ndra kivy. (Sal. 37:18) Tena mahafale aze ty mahavazoho antika manao ze fara’e soa vitantika amy ty fanompoagne aze ndra tie kivy aza! Tsy izay avao fa vognogne hagnampe naho hampahery antikagne ka reke.

2. Ino ty atao i Jehovah hoahy ze torotoro fo, le akore ty hahafahantika handrambe soa boake amy ty fitretréza’e?

² Rehafe ty Salamo 147:3 tie “mamehe ty fere” ze torotoro fo ty Jehovah. Treantikagne boake amo o andine’e iohoe ty fomba agnampea’e ze ndaty kivy. Inogne areke ty tsy maintsy ataontika mba hahavy antika handrambe soa boake amy izay? Dineho ty ohatse toy. Manao ze fara heri’e hitsaboagne ty ndaty raike naratse ty dokotera mahay raike mba hahavy i ndatỳ ho sitragne. Faie mba haha sitragne aze, le tsy maintsy magnorike ze toromareke rehafe i dokoteray reke. Hotreantika amy ty lahatsoratse toy ato ze raha saontsie i Jehovah amy Baiboly ao hoahy ty ndaty kivy. Hodinehentika ka tie akore ty fomba hampiharagne ty torohevetse feno hatea boake ama’e.

MAGNOMEY TOKY ANTIKA TY JEHOVAH TIE SAROBILY AMA’E TIKA

3. Nagnino ty ndaty ila’e ro mahatsapa ho tsy misy dika’e?

³ Mampalahelo fa tsy manan-katea ty ankamaroa ty ndaty amy ty tontolo toy eto. Mampijale ty hafa iareo, le manjare mahatsapa ho tsy misy dika’e ty hafa. Hoe ty rahavave raike atao tihoe Helen a: “Tsy mba nanan-katea ty rae aman-dreneko.  Mpiarotegne ty babako sady lava nirehake tamako avao tie tsy misy dika’e raho.” Va’e misy mampijale, misy magnakiagne ndra mahatsapa ho tsy misy dika’e manahake i Helen ka rehe. Naho izay ty raha miseho, le va’e ho sarotse ama’o ty hino tie misy ndaty tena tea azo.

4. Arake ty Salamo 34:18, ino ty toky mea i Jehovah antika?

⁴ Ndra tie mampijale azo aza ty hafa, le afake matoky rehe tie tena tea azo ty Jehovah sady sarobily ama’e rehe. “Marine ze torotoro fo” reke. (Vakio ty Salamo 34:18.) Naho mahatsapa ho “kivy” areke rehe, le tadidio fa nahavazoho raha soa tam-po’o ao ty Jehovah kanao nitaogne azo hagnatogne aze. (Jaona 6:44) Vognogne hagnampe azo lognandro reke satria tena sarobily ama’e rehe.

5. Ino ty azontika ianaragne boake amy ty fomba nindesa i Jesosy ze ndaty nahatsapa ho tsy misy dika’e?

⁵ Hahafantatse ty raha tsapa i Jehovah tika naho mandineke ty modely i Jesosy. Tena nisoa fagnahy tamy ze ndaty nahatsapa tsy nisy dika’e noho ty fagnambanea ty hafa ty Jesosy, tamy ireke tan-tane etoỳ. (Mat. 9:9-12) Nisy ampela raike zay niazo ty areten-draty, le nitsapa ty akanjo i Jesosy mba ho sitragne. Nampahery naho nidera aze ty Jesosy noho ty finoa’e. (Mar. 5:25-34) Satria tena manahake i Jehovah ty Jesosy, le afake matoky areke tika tie manahake ty natao i Jesosy tamy i ampelay avao ka ty atao i Jehovah amantikagne. (Jaona 14:9) Ony i Jehovah ty toetse soa’o, agnisa izay ty finoa’o naho ty hatea’o aze.

6. Ino ty azo’o atao naho mahatsapa ho tsy misy dika’e rehe?

⁶ Ino ty azo’o atao naho mahatsapa ho tsy misy dika’e rehe? Vakio naho saintsaigno ze andinin-teny amy Baiboly ao magnomey toky azo tie sarobily amy i Jehovah rehe. b (Sal.  94:19) Ko mampitaha ty tegna’o amy ty hafa sady ko mifantoke amy ze raha tsy vita’o. Tsy mitake ty raha tsy ho vita’o ty Jehovah. (Sal. 103:13, 14) Naho nisy ndaty nampijale azo tie taloha, le tsy tihoe boake ama’o ty nahavy izay! Tadidio fa hitsara ze mampijale ty hafa ty Jehovah, faie hanohagne ze nampijalegne. (1 Pet. 3:12) Nampijalé ty rae aman-drene’e ty Sandra tamy tie ireke mbe nikede. Hoe reke: “Nivavake tsy tapake tamy i Jehovah raho mba hagnampe ahy hahatrea ty toetse soa anagnako manahake ty fivazohoa’e ahy.”

7. Amy ty fomba akore ty azontika ampiasagne ty raha niaignantika taloha, amy ty fanompoagne i Jehovah?

⁷ Matokia fa azo i Jehovah ampiasaegne mba hagnampe ty hafa rehe. Nimea’e tombotsoa hiara-miasa ama’e amy ty asa fitoriagne ohatse rehe. (1 Kor. 3:9) Satria rehe fa niatreke raha sarotse, le va’e ho mora ama’o ty mahatakatse ty raha tsapa ze ndaty miatreke raha hoe izay ka. Afake magnampe iareo soa rehe. Nampea i Jehovah naho o rahalahio ty Helen, i nirehafegne taloha tagney, le afake magnampe ty hafa ka reke ty amy izao. Hoe reke: “Nahatsapa ho tsy nisy dika’e raho. Faie natao i Jehovah ze hahavy ahike hahatsapa ho teagne. Nampiasae’e mba hagnampe ty hafa ka raho.” Mpisava lalagne maharetse ty Helen ty amy izao sady tena fale.

TEA I JEHOVAH HAGNEKE TIKA TIE NAMELA ANTIKA REKE

8. Ino ty toky mey i Jehovah antika amy Isaia 1:18 ao?

⁸ Mbe manegnegne noho ty fahotagne natao’e taloha avao ty ila’e amo o mpanompo i Jehovah-o, ndra taloha ndra afara ty badisa’e ty nanoa’e izay. Faie ko haligno fa nagnomey i solovoigney ty Jehovah mba hahafaha’e hamela ty fahotantika noho ty hatea’e antikagne. Azo antoke fa tea’e hagneke o fagnomezagne iohoe tika. Magnomey toky reke tie hamela tanterake ty fahotantika naho fa boake ‘nifandamigne’ c ama’e tika. (Vakio ty Isaia 1:18.) Tena mankasitrake i Jehovah, i Raentika bey hateay tikagne noho ireke tsy mitadidy ty fahotagne nataontika taloha! Tsy ombia ho haligno’e ka ty soa vitantikagne.​—Sal. 103:9, 12; Heb. 6:10.

9. Tsy toko’e hifantoke amy ty hadisoagne nataontikagne taloha tikagne. Ino areke ty toko’e hifantohantikagne?

⁹ Naho magnamelo-tegna miomba ty raha natao’o taloha rehe, le mikezaha mafe mba hifantoke amy ze fa atao’o amy izao naho ze mbe azo’o atao amy ty hoavy. Dineho ty modely i apostoly Paoly. Nanegnegne reke noho ireke nagnenjeke o Kristianao faie nifanta’e ka tie namela ty fahota’e ty Jehovah. (1 Tim. 1:12-15) Mbe nieretseretse bey miomba ze fahotagne natao’e taloha zay avao vao reke? Azo antoke fa tsy nanao izay reke. Tsy nieretseretse ty raha natao’e mba hahavy aze ho Fariseo manan-kaja ka ohatse reke. (Fil. 3:4-8, 13-15) Nafana fo tamy ty fanompoagne ty Paoly sady nifantoke amy ty hoavy. Manahake i Paoly, le tsy afake magnova ty raha niseho taloha rehe. Faie afake magnomey voninahitse i Jehovah rehe amy ze raha iaigna’o amy izao. Afake mifantoke amy i hoavy fanjaka ampitamae’ey ka rehe.

10. Ino ty azontika atao naho nampalahelo ty hafa ty raha nataontikagne taloha?

¹⁰ Va’e kivy rehe satria nisy raha natao’o taloha nampalahelo ty hafa. Ino ty azo’o atao? Afake manao raha mba hagnaregnagne i raha natao’o tsy nimetey rehe, tafilitse amy izay tihoe miala tsiny. (2 Kor. 7:11) Angataho ka ty Jehovah mba hagnampe i ndaty nanoa’o raha tsy metey. Afake magnampe azo naho ze ndaty  nanoa’o raha tsy mete hanohy hanompo aze avao sady hilamin-tsaigne reke.

11. Ino ty azontika ianaragne boake amy ty ohatse nenga i Jona mpaminany? (Henteo i sarey.)

¹¹ Mandrambesa lesogne boake amy ty hadisoa’o, le engao ty Jehovah hampiasa azo amy ze fomba iteava’e aze. Mareho ty modely i Jona mpaminany. Nilay an-tane hafa agne reke naho fa nandily aze handeha a Ninive agne ty Andrianagnahare. Nagnasaze aze ty Jehovah, le nandrambe fianaragne boake amy i hadisoa’ey reke. (Jona 1:1-4, 15-17; 2:7-10) Faie mbe nampiasa i Jona avao ty Jehovah. Nisaontsy tama’e indraike reke mba handeha a Ninive agne, le avy le nankatò ty Jona. Tsy nenga’e hikalagne aze tsy hanao ty asa nampanoe i Jehovah aze ty fanegnena’e noho ty raha tsy mete natao’e taloha.​—Jona 3:1-3.

MAMPAHERY ANTIKA AMY TY ALALA TY FAGNAHY MASIGNE TY JEHOVAH

12. Akore ty agnomea i Jehovah fiadanagne antika naho misy raha sarotse mahazo antika? (Filipianina 4:6, 7)

¹² Mampiasa fagnahy masigne ty Jehovah mba hampionognagne antika naho fa miatreke raha tena sarotse tikagne. Dineho ty raha niaigna i Ron naho i Carol. Namono tegna ty ana-dahy iareo, le hoe iareo: “Fa niatreke raha sarotse zahay tie taloha faie igne ty fara izay ty nimafe. Mateteke tsy niazon-droro zahay isan-kariva, le hafara’ay nivavake tamy i Jehovah. Tena nahatsapa i fiadanagne rehafegne amy Filipianina 4:6, 7 aoy zahay tafara izay.” (Vakio.) Naho kivy bey rehe noho ty raha raty nahazo azo, le rehafo amy i Jehovah iaby ze raha tsapa’o. Afake mivavake mateteke naho maharetse rehe naho izay ty tea’o. (Sal. 86:3; 88:1) Mangataha fagnahy masigne mateteke, amy i Jehovah. Lava vognogne hagnomey azo izay avao reke.​—Lioka 11:9-13.

13. Akore ty agnampea ty fagnahy masigne antika mba hahavita hanohy hanompo i Jehovah avao sady tsy hivalike? (Efesianina 3:16)

¹³ Miatreke raha sarotse vao rehe, le mahatsiaro ho tsiampe hery ty amy izao? Afake magnomey ze hery ilae’o mba hahavita’o hanohy manompo i Jehovah avao, le tsy hivalike ty fagnahy masigne. (Vakio ty Efesianina 3:16.) Dineho ty tantara ty rahavave raike atao tihoe Flora. Niarake nanao ty asa ty misionera iareo mirovaly faie nivalike ama’e ty vali’e, le nisarake iareo. Hoe reke: “Tena nikivy raho naho fa nivalike tamako reke, le tsy te ho nieretseretse raha hafa sasa raho. Nangatake fagnahy masigne tamy i Jehovah raho mba hahavitako hiaretse. Tamy ty voaloha’e, le tsy nivitako ty niatreke i olagney. Faie nampahery ahike ty Jehovah, le nanjare natanjake naho afake niaretse raho noho ty fagnampea’e.” Nitsapa’e tie nampean’Agnahare vao mainke hatoky Aze reke. Matoky ka reke fa mbe hagnampe aze ty Andrianagnahare amy ze fitsapagne mbe hahazo aze. Hoe indraike reke: “Tena nihatse tamako ty rehake amy Salamo 119:32 toy: ‘Meke hampihatse ty lili’o raho amy ty fiaignako satria halalahe’o ty foko mba ho afake handrambe izay.’”

14. Ino ty azontikagne atao mba hagnampea ty fagnahy masigne antika?

¹⁴ Naho fa boake nangatake fagnahy masigne tamy i Jehovah rehe, le ino ty toko’e hatao’o? Anò ze raha hahavy azo hahazo fagnahy masigne maro. Agnisa izay tihoe magnatreke fivoriagne naho mitory. Vakio isan’andro ty Saontsy i Jehovah fa hagnampe azo hahafantatse ty fomba fiheve’e ty fanoagne izay. (Fil. 4:8, 9) Naho fa mamaky Baiboly rehe, le mareho ze ndaty niatreke raha sarotse rehafegne ao sady saintsaigno ty fomba nagnampea i Jehovah iareo mba hahavita hiaretse. Niatreke olagne tamy ty fiaigna’e ty Sandra, i nirehafegne taloha tagney. Hoe reke: “Tena nanohigne ty foko  ty tantara i Josefa. Tsy nenga’e hanimba ty fifandrambesa’e tamy i Jehovah ty raha sarotse naho ty tsy rare’e natrehe’e.”​—Gen. 39:21-23.

MAMPAHERY ANTIKA AMY TY ALALA O MPIARA-MANOMPÒ TY JEHOVAH

15. Ia ty afake mampahery antikagne, le akore ty fomba ampahereza iareo antika? (Henteo i sarey.)

¹⁵ Naho fa mijale tika, le o mpiara-manompò ty ‘tena magnampe naho mampahery antika.’ (Kol. 4:11) Agnisa ty fomba raike anoroa i Jehovah ty hatea’e antika o rahalahy naho rahavaveo. Mampahery antika iareo naho fa miarake amantikagne vaho mitsanogne ty fihetseham-pontika. Va’e hirehake andinin-teny mampahery boake amy i Baiboly ao iareo ndra hivavake miarake amantikagne. d (Rom. 15:4) Va’e haniahy antika ty fomba fiheve i Jehovah ka ty rahalahy ndra rahavave raike, le izay ty hagnampe antika hahavita hiaretse. Magnampe antika amy ty fomba hafa ka o rahalahy naho rahavaveo mateteke. Magnomey hanegne ohatse iareo naho fa sahiragne tika.

16. Ino ty va’e mila ataontika mba hahazoantika ty fagnampea ty hafa?

¹⁶ Kindraike, le va’e mila mangatake fagnampeagne amy ty hafa tikagne. Tea sady te hagnampe antika o rahalahy naho rahavaventikagneo. (Ohab. 17:17) Faie va’e tsy ho fanta iareo ty raha tsapantika ndra ty raha ilaentikagne.  (Ohab. 14:10) Naho kivy areke rehe, le azo’o atao ty mirehake ty raha tsapa’o amy ty namagne matotse. Ampahafantaro iareo ze fagnampeagne paliae’o. Va’e hirehake ty raha tsapa’o amy ty androanavi-pagnahy raike ndra roe tena mifankazatse ama’o ka rehe. Misy rahavave ila’e mahatsapa tie mampahery ty mirehake amy ty rahavave matotse.

17. Inogne iaby ty raha ila’e va’e hikalagne antika tsy hahazo fampaherezagne boake amy ty hafa, le akore ty handreseantikagne irey?

¹⁷ Miaraha mateteke amo o rahalahy naho o rahavaveo. Naho fa itika kivy, le va’e tsy te hiharoharo ama o ndaty. Kindraike, le va’e tsy hahatakatse ty raha tsapantika o rahalahy naho rahavaveo ndra va’e hanao rehake mampalahelo antika. (Jak. 3:2) Faie ko mihalavitse iareo satria iareo ty ampiasae i Jehovah mba hampahery azo. Nisy fotoagne ty androanavi-pagnahy raike atao tihoe Gavin nikivy. Izao ty raha nirehafe’e: “Mateteke raho ro tsy te hirehake ndra tsy te hiarake amy ty namako.” Faie nikezake niarake tamo o rahalahio avao ty Gavin, le nahatsapa ho velombelogne. Hoe ka ty rahavave atao tihoe Amy: “Noho ty raha niaignako taloha, le sarotse amako ty matoky ndaty. Faie mianatse ho tea naho hatoky o rahalahy naho o rahavavekò manahake ty atao i Jehovah raho ty amy izao. Fantako fa mampifale i Jehovah zay sady mahafale ahy ka.”

MAMPAHERY ANTIKA TY FAMPITAMÀ I JEHOVAH MIOMBA TY HOAVY

18. Ino ty raha hiseho tsy ho ela, le ino ty toko’e hataontika ty amy izao?

¹⁸ Tsy ho ela ty Jehovah le hagnafake ze raha iaby mahavy antika ho kivy naho hijale. (Apok. 21:3, 4) Amy ze fotoagne zay, le “tsy handrerake fo” sasa ze raha nampalahelo iaby niaignantika. (Isaia 65:17) Faie nitreantika tato fa naho fa miatreke olagne tikagne, le magnampe antika ty Jehovah ndra tie amy izao aza. Manao raha maro mba hampaherezagne naho hagnampeagne antika ty Jehovah ty amy izao, le rambeso zay. Matokia fa ‘hikarakara azo reke.’​—1 Pet. 5:7.