1. Afake mandrambe i Jehovah ho inontikagne tika?

AGNISA ty keleia i Jehovah ty Jesosy, i ‘voaloha’e amy ze kila raha namboaregney’, naho o anjely tsiefao. (Kol. 1:15; Sal. 103:20) Tamy i Jesosy tambone tane etoỳ, le nampea’e o ndaty tsy mivalikeo mba handrambe i Jehovah ho Rae iareo. Naho fa nirehake tamy i mpiana’e rey ka ty Jesosy, le hoe reke tie: ‘Raeko naho Rae’areo ty Jehovah.’ (Jaona 20:17) Manjare eké i Jehovah ho agnisa ty keleia ty rahalahy naho ty rahavave bey hatea magneran-tane ka tika naho fa manokan-tegna ho aze sady atao badisa.​—Mar 10:29, 30.

2. Ino ty hodinehentikagne ato?

² Sarotse amy ty ndaty ila’e ty mandrambe i Jehovah ho Rae bey hatea. Misy ka ty tsy mahay tie akore ty fomba hanehoagne hatea amo o rahalahio naho o rahavaveo. Hodinehentikagne ato tie akore ty agnampea i Jesosy antika mba handrambe i Jehovah ho Rae bey hatea naho hifandrambe am-po ama’e. Hianarantika ato ka ty azontika anahafagne i Jehovah naho fa itika mifandrambe amo o rahalahio naho o rahavaveo.

3. Nagnino i vavake modelỳ ro magnampe antika hifandrambe am-po amy i Jehovah?

³ Rae bey hatea ty Jehovah. Tea i Jesosy naho manahake ty fomba fihevera’e aze ty fiheverantika i Jehovah, le tihoe soa fagnahy naho bey hatea sady mora ifandrambesagne reke fa tsy raty fagnahy naho mikomandikomandy avao. Trea zay naho fa nampianatse i mpiana’e rey hivavake ty Jesosy. Izao ty nirehafe’e voaloha’e amy i vavake modelỳ: “Rae’ay.” (Mat. 6:9) Azo i Jesosy natao ty nanoro antika tie tokavo’areo tihoe “Tompo ty Hery”, “Mpamorogne”, ndra “Mpanjaka nainai’e” ty Jehovah. Tsy diso o rehake rehoe sady ampiasae ty Baiboly reo mba hirehafagne  i Jehovah. (Gen. 49:25; Isaia 40:28; 1 Tim. 1:17) Faie ndra tie eo zay, le ty rehake tihoe “Rae” ro nampiasae i Jesosy hitokavantikagne i Jehovah.

4. Nagnino tika ro mirehake tie te hifandrambe am-po amantika ty Jehovah?

⁴ Sarotse ama’o vao ty mandrambe i Jehovah ho Rae bey hatea? Sarotse amy ty ila’e amantika ty mahatsapa izay, satria tsy le nampiseho hatea iareo ty rae’e niterake aze. Faie tena mampahery ty mahafantatse tie taka i Jehovah soa ty anto’e mahavy antika hahatsapa izay. Te hifandrambe am-po amantika reke. Izay ty mahavy aze mandrisike antikagne tie: “Magnarinea an’Andrianagnahare, le hagnarine anareo reke.” (Jak. 4:8) Tea antika ty Jehovah, le misaontsy amantika reke tie tsy misy Rae fanjaka manahake aze.

5. Nagnino ty Jesosy ro afake magnampe antika hifandrambe am-po amy i Jehovah, arake ty Lioka 10:22?

⁵ Afake magnampe antika hifandrambe am-po amy i Jehovah ty Jesosy. Hay i Jesosy soa ty Jehovah sady nanahake tanterake ty toetse i Jehovah ty toetse’e. Izay ty nahavy aze nirehake tie: “Ze nahatrea ahy, le nahatrea an-dRaeko ka.” (Jaona 14:9) Manahake o talen’anakeo ty Jesosy, le natoro’e antika ty fomba hagnajagne, hampifaleagne naho hahazoagne sitrake amy i Raentikagney vaho ty hankatoavagne aze. Faie nibaribary tamy i Jesosy tan-tane etoỳ tie tena soa fagnahy naho bey hatea ty Jehovah. (Vakio ty Lioka 10:22.) Andao tika handineke porofo tsiampeampe magnamaregne izay.

6. Mirehafa ohatse mampiseho tie nijanjigne i Jehovah ty vavake nanoe i Jesosy.

⁶ Mijanjigne o ana’eo ty Jehovah. Tena nijanjigne soa ty vavake nanoe i Talen’ana’ey ty Jehovah, isake tie nivavake tama’e reke tamy i reke tan-tane etoỳ. (Lioka 5:16) Naho fa ho nandrambe fanapaha-kevetse lahibey ty Jesosy, le nijanjigne’e naho fa nivavake tama’e. Agnisa izay, ohatse, tamy i Jesosy nijobogne i apostoli’e 12 rey. (Lioka 6:12, 13) Naho fa ninekoneko mafe ty Jesosy, le nijanjigne’e naho fa nivavake tama’e. Taloha ty namalihagne aze ka, le nivavake mafe taman-dRae’e miomba ty raha hanjò aze reke. Faie tsy tihoe nijanjigne ty vavake nanoe i Jesosy avao ty Jehovah fa nagnirake  anjely ka reke mba hampahery i Ana-dahi’e ikokoa’ey.​—Lioka 22:41-44.

7. Ino ty toko’e ho tsapantika noho ty fahafantarantika tie mijanjigne ty vavake anoentika ty Jehovah?

⁷ Mijanjigne ty vavake anoe o mpanompo’eo ka ty Jehovah tie amy izao, sady amy ty fotoagne mete naho amy ty fomba tena miambake tsy arake ty eretsereta iareo aze ty amalea’e aze. (Sal. 116:1, 2) Magnamaregne izay ty tantara ty rahavave raike a Inde agne toy. Lava ninekoneko mafe avao reke, le nivavake tamy i Jehovah mateteke miomba izay. Hoe reke: “Nirehake ty fomba hiatrehagne o finekonekò ty fandaharagne tamy ty Tele JW volagne Mey 2019. Tena tamy ty fotoagne nipaliako aze i fandaharagney. Tsapako tie namale ty vavake nanoeko ty Jehovah.”

8. Akore ty nampisehoa i Jehovah fa tea’e ty Jesosy?

⁸ Anehoa i Jehovah hatea naho karakarae’e tika, nanahake ty fomba nanehoa’e hatea naho nikarakarae’e i Jesosy, tamy i reke nirahe’e tan-tane etoỳ. (Jaona 5:20) Nagnomey ze raha nipaliae i Jesosy ara-pagnahy naho ara-nofo reke, sady nampahereze’e ty Jesosy naho fa nikivy. Tsy mba nahamegnatse i Jehovah ka ty nirehake tie tea’e naho ankasitraha’e i Ana-dahi’ey. (Mat. 3:16, 17) Mbe lia i Jesosy naho nahatsiaro ho irerike, satria natoky reke fa ho eo avao i Rae’e bey hatea an-dagnitse agney hagnampe aze.​—Jaona 8:16.

9. Ino ty porofo fa tea antika ty Jehovah?

⁹ Manahake i Jesosy, le maro ty fomba nampisehoa i Jehovah tie tea’e tika. Dineho zao: Nitaone i Jehovah hiharine aze tika sady nimea’e keleiagne bey hatea naho miray saigne mba hagnampe antika ho fale sady hampahery antika naho fa kivy tika. (Jaona 6:44) Mea’e hanegne ara-pagnahy maro ka tika. Ampea’e aza tika mba hahazo ze raha paliaentika isan’andro. (Mat. 6:31, 32) Naho itika misaintsaigne ty hatea i Jehovah antika, le hitombo ty hateantikagne aze.

10. Ino ty azontika ianaragne amy i Jehovah naho ty fomba ifandrambesa’e amo o rahalahy naho o rahavaventikagneo ro henteagne?

¹⁰ Teà i Jehovah o rahalahy naho o rahavaventikagneo. Faie va’e tsy ho mora amantika ty ho tea naho haneho ty hateantika iareo kindraike, satria tsy mitovy ty kolontsaigne naho ty fomba nitezagne antika. Manao hadisoagne ka tika, le va’e hahaboseke ndra hahasoregne iareo zay. Faie azontika atao ty mikezake mafe mampitombo ty hateantika o keleiantika ara-pagnahy rehoe. Amy ty fomba akore? Mila mitsikombe i Raentikagney tika, le mampiseho ty hateantika iareo. (Efes. 5:1, 2; 1 Jaona 4:19) Andao tika handineke ty raha azontika ianaragne amy i Jehovah.

11. Akore nampisehoa i Jesosy fa ‘mitretré’ manahake i Jehovah reke?

¹¹ ‘Mitretré’ ty Jehovah. (Lioka 1:78) Ty ndaty raike mitretré le malahelo naho fa mahatrea ndaty mijale, sady mipay fomba hagnampeagne naho hampaherezagne i ndaty mijaley. Nanahake i Jehovah ty Jesosy, le nitretré o ndatio. (Jaona 5:19) Naho fa nahatrea vahoake maro ohatse ty Jesosy tie indraike, le ‘niferegnesa’e iareo, satria nampijalegne naho namparaitake manahake ty agnondry tsy misy mpiarake.’ (Mat. 9:36) Tsy tihoe nitretré iareo avao ty Jesosy fa nanao raha hagnampeagne iareo ka. Nisitragne’e ty marare, le nimea’e famelombelomagne ze ‘miasa mafe naho mavesatse entagne.’​—Mat. 11:28-30; 14:14.

12. Mirehafa ohatse azontika ampisehoagne fa mitretré tikagne.

¹² Mila mandineke ty olagne atrehe o rahalahio naho o rahavaventikagneo tika naho te hitretré iareo. Akore zao naho misy rahavave raike marare mafe? Va’e tsy hirehake miomba ty raha manjò aze reke. Faie azo antoke fa ho fale  reke naho misy ndaty magnampe aze. Va’e ho vita’e vao ty mikarakara ze raha paliae ty keleia’e? Afake magnampe aze vao tika, ohatse mahandro ho aze ndra magnambigne ty tragno’e? Akore ka naho misy rahalahy raike montso asa? Va’e ho azontika atao ty magnomey vola kede aze mba hagnampeagne aze amparake ty hahatreava’e asa, sady tsy rehafegne tie boake amantika i volay.

13-14. Akore ty azontika ampisehoagne tie matarike manahake i Jehovah tika?

¹³ Matarike ty Jehovah. (Mat. 5:45) Tsy toko’e handigne o rahalahio naho o rahavaventikagneo hangatake fagnampeagne tika vaho izay hitretré iareo. Azontika atao ty manao raha voaloha’e manahake i Jehovah. I reke zao mampiboake i masoandroy isan’andro ndra tie tsy mangatake io ama’e aza tika. Mandrambe soa amy io ka ty ndaty tsikiraidraike, fa tsy ze mankasitrake aze avao. Tsy eké’o amy ty fagnomea i Jehovah i raha paliaentikagne rey vao tie tea antika reke? Le vata’e teantika ty Jehovah, satria tena soa fagnahy naho matarike.

¹⁴ Manahake i Jehovah o rahalahio naho o rahavaventikagneo, le manao raha voaloha’e iareo mba hampisehoagne tie matarike. Nisy tiobey ohatse nandrava ty tanà i Philippines tamy 2013. Maro tamo o rahalahio naho o rahavaveo ro nisimba ty tragno’e naho ty fanagna’e. Faie le avy le nanao raha malaky o keleia iareo ara-pagnahy magneran-taneo mba hagnampeagne iareo. Maro tamy iareo ty nagnomey vola ndra nagnampe tamy ty famboaragne i tragno iareo rey. Tragno eo ho eo amy ty 750 latsake ty nihavaozegne ndra namboaregne tagnate ty tao’e raike. Niasa mafe ka o Vavolombelo i Jehovah-o mba hagnampeagne o rahalahy naho o rahavave iareò agnate i arete-manjamagne COVID-19. Naho itika manao raha malaky mba hagnampeagne o keleiantika ara-pagnahio, le mampiseho amy iareo tie teantika iareo.

15-16. Ino ty fomba raike lahibey azontika anahafagne i Raentikagne an-dagnitse agney, arake ty Lioka 6:36?

¹⁵ Mamindra fo naho mamela heloke ty Jehovah. (Vakio ty Lioka 6:36.) Isan’andro tika, le mahatsapa tie mamindra fo amantikagne i  Raentika an-dagnitse agney. (Sal. 103:10-14) Tsy voririke i mpanonjohy ty lia i Jesosy rey, faie naseho i Jesosy tamy iareo fa namindra fo naho namela ty helo iareo reke. Ty fiai’e aza le hamake nafoe’e ho antika mba hahavy antika hahazo famelan-keloke. (1 Jaona 2:1, 2) Tsy mandrisike azo hifandrambe am-po amy i Jehovah naho i Jesosy vao ty fahaia’o tie mamindra fo naho mamela ty helo’o iareo?

¹⁶ Vao maike hitombo ty fifankateavantikagne naho ‘mifamela heloke tanterake’ tika. (Efes. 4:32) Faie tsy mora ty manao izay kindraike, le izay ty mahavy antika mila mikezake mafe. Nirehake ty rahavave raike tie ty lahatsoratse tihoe “Aoka Isika Hifamela Heloka Tanteraka” naboake tamy Tilikambo Fiambenana ro nagnampe aze hahavita izay. * Hoe reke: “Nagnova ty fieretseretako tihoe mamela heloke ty fianarako o lahatsoratse iohoe. Hazavaegne ao fa tihoe mamela heloke, le tsy midika tie mete ty raha raty natao i ndatỳ ndra hamaivagne’o ty voka-draty i raha natao’ey. Fa tihoe mamela heloke, le tsy mitagne am-po, sady mikezake tsy mieretseretse i olagney sasa.” Naho itika mamela ty helo o rahalahy naho o rahavaventikagneo tanterake, le mampiseho amy iareo tie teantika iareo sady manahake i Raentikagney, ndra i Jehovah tika.

17. Akore ty azontika agnomeagne voninahitse i Raentikagne an-dagnitse agney, arake ty Matio 5:16?

¹⁷ Tombotsoa lahibey tihoe agnisa ty keleia ty rahalahy naho ty rahavave bey hatea magneran-tane. Teantika naho misy ndaty maro manompo i Andrianagnaharentikagney miarake amantika. Toko’e hitao areke tika mba tsy hanao raha hahavy o ndatio hanagne hevetse diso miomba o vahoa i Jehovah-o ndra i Raentika an-dagnitse agney. Mikezake ty ho soa findesam-batagne avao tika, amy izay o ndatio liagne amy i talily soay.​—Vakio ty Matio 5:16.

18. Ino ty hagnampe antika tsy hatahotse hitory?

¹⁸ Faie misy ndaty mitsikilo antika ndra magnenjeke antika noho itika mankatò i Raentika an-dagnitse agney. Le akore naho matahotse hirehake ty raha inoantikagne ama o ndaty  tika? Matokia fa hagnampe antika ty Jehovah naho i Ana-dahi’ey. Nirehake tamy i mpiana’e rey ty Jesosy mba tsy hinekoneko miomba ty raha horehafe iareo naho ty fomba hirehafagne izay. Fa nagnino? Hoe ty Jesosy: “Homeigne anareo amy ze fotoagne zay ty raha toko’e horehafe’areo. Ty anto’e, tsy tihoe inareo avao ro mirehake, fa ty fagnahy i Rae’areo ro mirehake amy ty alala’areo.”​—Mat. 10:19, 20.

19. Mirehafa ndaty raike bey herim-po naho fa nagnambara ty raha inoa’e.

¹⁹ Dineho ohatse ty tantara i Robert. Taogne tsiampeampe lasa zay, tamy i reke vaho nanombotomboke nianatse Baibolỳ, le tsy maintsy nandeha tamy ty Fitsaragne Afrika Atimo agne reke mba hagnazava ty anto’e tsy anoa’e maramila. Bey herim-po reke naho fa nagnazava tie ty hatea’e o rahalahi’eo ty anto’e. Tena sarobily ama’e tihoe agnisa ty keleiantika ara-pagnahy. Le avy le nagnontane aze ty zizy raike tie: “Ia o rahalahi’o zao?” Tsy nampoize i Robert ze fagnonteneagne zay, faie le avy le nitsiaro’e ty andinin-teny hoahy ty andro tamy izay, le ty Matio 12:50: “Ze manao ty zoton’arofo i Raeko an-dagnitse agney, le ie ro rahalahiko naho rahavaveko vaho reneko.” Maregne fa vaho nanomboke nianatse Baiboly ty Robert tamy izay, faie nagnampe aze hamale ty fagnonteneagne maro tsy nieretserete’e ty fagnahy masy i Jehovah. Tsy maintsy ho nampifale i Jehovah ty raha natao i Robert. Hampifale i Jehovah ka tika naho mangatake herim-po ama’e mba hahavita hitory ndra tie agnate ty raha sarotse aza.

20. Toko’e ho tapa-kevetse ty hanao inogne tika? (Jaona 17:11, 15)

²⁰ Lonike tika hihevetse ho sarobily avao i tombotsoantikagne agnisa ty keleiagne ara-pagnahy bey hateay. Managne Rae fanjaka tsy misy hoe’e tika. Managne rahalahy naho rahavave bey hatea maro ka tika. Toko’e hisaorantika i Jehovah lognandro rey. Atao i Satana naho i mpanohagne aze raty fagnahy rey ze hahavy antika hisalasala miomba ty hatea i Raentika an-dagnitse agney antika naho ze handravàgne ty firaisan-tsaintikagne. Faie fa nangatake aman-dRae’e ty Jesosy hiaro antika mba hahavy antika hiharo saigne avao. (Vakio ty Jaona 17:11, 15.) Mamale ze vavake zay ty Jehovah. Lonike areke tika hanahake i Jesosy, le hatoky fa tea naho magnampe antika i Raentika an-dagnitse agney. Lonike ka tika ho tapa-kevetse ty hampitombo avao ty hateantika o keleiantikagne ara-pagnahio.