1. Ino ty tsapa ty ndaty raike naho voaroake ty raike amy ty keleia’e?

VOAROAKE tsy ho agnisa ty fiangonagne vao ty raike amy ty keleia’o? Mampamoe fo ty raha hoe izay! Hoe ty rahavave Hilda *: “Naho fa nimate ty valiko, 41 taogne tafara ty nifanambalia’ay, le nieretseretse raho tie igne ty raha tena mafe tamako ty niatreke aze. Faie kay mbe lombolombo igne ty alahelo nitsapako naho fa nivoaroake i ana-dahikoy, sady nienga i vali’e naho i ana’e rey.”

2-3. Ino ty tsapa i Jehovah naho fa misy mpanompo’e voaroake, arake ty Salamo 78:40, 41?

² Azo antoke fa tena nalahelo ty Jehovah naho fa nanohetse aze ty ila’e amo o keleia’e an-dagnitse agneo. (Joda 6) Tena nalahelo ka reke naho fa nivalike tama’e i vahoa’e ikokoa’e rey, ndra o Israelitao, ie amy izao tsy indraike avao fa mateteke. (Vakio ty Salamo 78:40, 41.) Matokia areke fa malahelo ka i Raentika bey hatea an-dagnitse agney naho nisintake ama’e ty raike amy ty keleia’o. Taka’e soa ty alahelo tsapa’o. Mitretré azo reke, le hampahery naho hagnampe azo.

³ Voaroake vao ty raike amy ty keleia’o? Ino ty azo’o atao mba hahazoagne ty fagnampea i Jehovah naho hahavita’o hiatreke izay? Ino ty azo o fiangonagneo atao mba hagnampeagne ty ndaty miatreke raha hoe izay? Hodinehentikagne ato ty vale ireo. Faie andao heike tika handineke ty raha tsy toko’e hoeretseretentika naho fa miseho ty raha hoe izay.

4. Ino ty tsapa ty rae aman-drene maro naho fa voaroake ty ana-dahy iareo ndra ty anak’ampela iareo?

⁴ Mateteke ty rae aman-drene ro mieretseretse tie naho nanao ze azo iareo natao iareo, le tsy ho nivoaroake i ana-dahy iareoy ndra i anak’ampela iareo ikokoa iareoy. Naho fa nivoaroake ty ana-dahy i Luke, le izao ty rineha’e: “Nagnomey tsiny ty vatako raho. Nagninofy raty iaby aza raho. Kindraike raho nitagny sady ore mafe.” Mateteke ka ty rahavave Elizabeth ro nieretseretse hoe izao naho fa nivoaroake ty ana-dahi’e: “Va’e tsy nanao soa ty andraikiko amy ty maha rene ty keleiagne ahy raho. Toko’e mba ho nalenteko soa am-po i ana-dahikoy ao ty hamarenagne.”

5. Ia ty tompon’andraikitse naho fa voaroake ty ndaty raike?

⁵ Mila tadidientikagne fa nimea i Jehovah safidy tika tsikiraidraike. Midika zay tie itika tsikiraidraike ro mifily tie hankatò aze sa tsy hankatò. Tsy agnate ty hamarenagne ao ty rae aman-drene ty tanora ila’e faie nifily ty hanompo i Jehovah avao iareo sady tapa-kevetse ty tsy hivalike ama’e. Ty rae aman-drene ila’e ka fa nikezake mafe mba hampianatse ty ana iareo ho tea i Jehovah, faie mbe nisintake amy i Jehovah avao i ana iareo rey naho fa nibey. Naho fa atao ty dineke, le safidy ty ndaty tsikiraidraike ty hanompo i Jehovah ndra tsy hanompo aze. (Josoa 24:15) Ry rae aman-drene, naho malahelo nareo satria nivoaroake ty ana’areo, le ko mieretseretse tie inareo ro diso.

6. Ino ty va’e ho tsapa o tanorao naho fa voaroake ty rae’e ndra ty rene’e?

⁶ Misy fotoagne le ty rae ndra ty rene ro voaroake, sady misy amy iareo aza ty mienga ty keleia’e. (Sal. 27:10) Va’e ho tena kivy ty ana iareo, satria iareo ty mba nitamae’e ho natao modely. Izao ty nirehafe i Esther naho fa nivoaroake ty baba’e: “Mateteke raho ro tomagny satria nitsapako tie tsy tihoe nihatake amy ty hamarenagne avao reke fa ty vata tegna’e ro nifily ty tsy hanompo i Jehovah sasa. Teako ty babako. Naho fa nivoaroake areke reke, le ninekoneko miomba ty fahasalama’e avao raho, hafarako niazo ty finekoneko lava.”

7. Ino ty tsapa i Jehovah naho fa voaroake ty rae ndra ty rene ty tanora raike?

⁷ Ry tanora, naho nivoaroake ty rae’o ndra ty rene’o, le ko haligno fa tena malahelo manahake anareo ka zahay. Matokia ka fa tena ony i Jehovah soa ty alahelo tsapa’o. Tena tea’e rehe sady ankasitraha’e ty tsy fivaliha’o ama’e, le hoe izay ka zahay rahalahi’o naho rahavave’o. Tsiarovo ka fa tsy ihe ty tompon’andraikitse amy ty nahavoaroake aze. Fa nirehafegne taloha teo tie nimey i Jehovah safidy ty ndaty tsikiraidraike. Le tsy maintsy sambe “hinday ty enta’e” ze ndaty nanokan-tegna naho natao badisa.​—Gal. 6:5

8. Ino ty azo ty keleiagne atao amparake ty hiheregna i ndaty voaroakey amy i Jehovah? (Henteo ty efajoro tihoe “ Miheregna amy i Jehovah.”)

⁸ Naho nivoaroake ty raike amy ty keleia’o, le ara-dalàna naho mitamà rehe tie mbe hiheregne amy i Jehovah reke indraike andro agne. Ino ty azo’o atao amparake ty hiheregna’e? Anò ze hampatanjake avao ty finoa’o. Naho ihe manao izay, le ho modely soa hoahy ty ila’e amo o keleia’ò. Va’e hatao i ndaty voaroakey modely ka aza rehe. Hahazo hery ka rehe mba  hahavita’o hiatreke ty alahelo’o. Andao areke tika handineke ty raha ila’e azo’o atao.

9. Ino ty azo’o atao mba hagnatanjahagne avao ty finoa’o? (Henteo ty efajoro tihoe “ Andinin-teny Afake Mampahery Azo Naho Nisintake amy i Jehovah ty Raike amy ty Keleia’o.”)

⁹ Ko ovagne ty fandaharagne ara-pagnahy atao’areo. Tena ilaegne ty magnatanjake ty finoa’o naho ty finoa ty ila’e amo o keleia’ò. Amy ty fomba akore? Hahazo hery boake amy i Jehovah nareo naho mamaky tsy tapake ty Saontsi’e, misaintsaigne ty raha vakie’areo sady magnatreke fivoriagne tsy tapake. Nivoaroake ty baba i Joanna naho ty rahavave’e. Hoe reke: “Milamin-tsaigne raho naho fa mamaky tantara amy Baiboly ao, agnisa izay ty tantara i Abigaila, i Estera, i Joba, i Josefa naho i Jesosy. Mampahery naho magnampe ahy hifantoke amy ty lafesoan-draha ty modely iareo. Mampahery ahy ka i hirantikagne amy Tele JW rey.”

10. Nagnino ty Salamo 32:6-8 ro magnampe antika hiatreke ty alahelontikagne?

¹⁰ Voraho amy i Jehovah ze raha tsapa’o. Isake tie malahelo rehe, le mivavaha. Mangataha amy i Andrianagnaharentikagne bey hateay mba hagnampe azo hanagne ty fomba fiheve’e miomba i olagne atrehe’oy naho ‘hampahiratse vaho hanoro azo ze lalagne handehana’o.’ (Vakio ty Salamo 32:6-8.) Maregne fa va’e tsy ho trea’o ty fomba hirehafagne amy i Jehovah ty raha tsapa’o. Faie matokia rehe fa oni’e soa ty raha am-po’o ao. Tena tea azo reke, le izay ty mahavy aze mandrisike azo hirehake ama’e ty raha tsapa’o.​—Eks. 34:6; Sal. 62:7, 8.

11. Naho henteagne ty Hebreo 12:11, nagnino tika ro matoky fa porofo ty hatea i Jehovah o fandroahagneo? (Henteo ty efajoro tihoe “ Porofo ty Hatea i Jehovah Antika o Fandroahagneo.”)

¹¹ Tohagno ty fanapaha-keve o androanavi-pagnahio. Fandaharagne boake amy i Jehovah  o fandroahagneo. Tena magnampe o ndaty voaroakeo naho mahasoa o fiangonagneo ty fisia io. (Vakio ty Hebreo 12:11.) Va’e hirehake ty ndaty ila’e tie tsy mete ty fanapaha-kevetse nirambese o androanavi-pagnahio nandroake ty ndaty raike nanao fahotagne lahibey. Faie ko haligno, fa mateteke ty ndaty hoe izay, le tsy te hirehadrehake ty raha raty natao i ndaty nanao fahotagne lahibeỳ. Tsy haintika amy ty pitsopitso’e ty raha iaby. Fahendreagne areke ty matoky tie naho fa nanao komity i ndatỳ o androanavi-pagnahio, le nikezake nagnorike soa ty toro lala ty Baiboly sady nitsara “hoahy i Jehovah.”​—2 Tan. 19:6.

12. Ino ty soa nirambese ty ndaty ila’e naho fa nanohagne ty fandahara i Jehovah miomba ty voaroake iareo?

¹² Va’e hagnampe i keleia’o voaroakey hiheregne amy i Jehovah ty fanohagna’o ty fanapaha-keve o androanavi-pagnahio handroake aze. Hoe ty Elizabeth, i nirehafegne taloha tagney: “Tena mafe tama’ay ty tsy nifandrambe ndra kidikidy tamy i ana-dahi’ay fa beỳ. Faie naho fa niheregne amy i Jehovah reke, le nagneke tie mete soa ty nandroahagne aze. Nirehake reke naho fa tafara tatoy tie maro ty lesogne nianara’e. Agnisa izay tihoe mahasoa ty fagnanara i Jehovah.” Hoe ka ty Mark valy i Elizabeth: “Nirehake tama’ay i ana-dahi’aỳ tie agnisa ty nahavy aze hagniry mafe hiheregne amy i Jehovah ty tsy fifandrambesa’ay ama’e. Tena misaotse i Jehovah raho nagnampe anay hankatò aze.”

13. Ino ty hagnampe azo hahavita hiatreke ty alahelo’o?

¹³ Mirehafa amy ty nama’o hai’o tie hahatakatse ty raha tsapa’o. Miaraha amo o Kristiana matotseo, satria afake magnampe azo tsy ho kivy iareo. (Ohab. 12:25; 17:17) Hoe ty Joanna, i nirehafegne taloha tagney: “Nahatsiaro ho irerike raho. Faie tena nagnampe ahy ty firehafako amy ty namagne azo atokisagne.” Faie akore naho mirehake raha va’e hagnindra ty alahelo’o ty ndaty ila’e amo o fiangonagneo eo?

14. Nagnino tika ro mila ‘mifankatante lognandro sady mahay mifamela heloke tanterake’?

¹⁴ Mamelà ty helo o rahalahi’ò naho o rahavave’ò. Naho ty maregne, le va’e sambe hirehake raha tsy mete tika iaby satria tsy voririke. (Jak. 3:2) Tsy toko’e ho gaga areke rehe, naho tsy hay ty ndaty ila’e ty raha ho rehafegne ama’o ndra va’e hampalahelo azo ty raha rehafe iareo ndra tie tsy satrie iareo aza. Tsiarovo ty toroheve i apostoly Paoly toy: “Mifankatanteza lognandro sady mahaia mifamela heloke tanterake, naho misy managne anto’e hitaraignagne miomba ty ila’e.” (Kol. 3:13) Hoe ze rahavave raike nivoaroake ty raike amy ty keleia’e zay: “Nisy mpiara-manompo ila’e te hampahery ahike faie ndra nampalahelo ahy ty raha nirehafe iareo. Faie nagnampe ahy hamela ty helo iareo ty Jehovah.” Ino ty azo o fiangonagneo atao mba hagnampeagne ty keleia i ndaty voaroake rey?

15. Ino ty azontika atao mba hagnampeagne o ndaty managne keleiagne voaroakeo?

¹⁵ Manehoa hasoa fagnahy amo o ndaty managne keleiagne voaroakeo. Hoe ty rahavave  Miriam: ‘Naho fa nandeha nivory raho tafara ty nahavoaroake i zaiko lahilahỳ, le ninekoneko miomba ty raha horehafe o ndatio. Faie kay maro ty rahalahy naho ty rahavave nalahelo ka noho i raha niseho igne sady tsy niboseke tamy i zaikoy iareo. Misaotse iareo raho, satria tsy nahatsiaro ho mialy raike amy i alahelokoy.’ Izao ka ty nirehafe ty rahavave raike: “Tafara ty nahavoaroake i ana-dahi’aỳ, le nisy ragne’ay niavy tama’ay agne mba hampahery anay. Ty ila’e nirehake tie tsy hay iareo ty raha horehafegne. Ty ila’e niarake nitagny tamako, le ty ila’e nandefa hafatse mampahery. Tena nagnampe ahy ty raha natao iareo.”

16. Ino ty azo o fiangonagneo atao mba hampaherezagne naho hagnampeagne avao o ndaty managne keleiagne voaroakeo?

¹⁶ Ampaherezo naho ampeo avao o ndaty managne keleiagne voaroakeo. Amy izao iareo ro tena mipay ty hatea’o naho fampaherezagne boake ama’o. (Heb. 10:24, 25) Kindraike ty keleia o ndaty voaroakeo mahatsikaritse tie manjare tsy mifampirehake amy iareo sasa ty ndaty ila’e, ndra kitra’e hoe iareo ka o voaroakeo. Tsy teantika ty hisia ty raha hoe izay! Tena toko’e ho deraentikagne naho ampaherezentikagne ohatse o tanora nivoaroake ty rae’e ndra ty rene’eo. Hoe ty Maria naho fa nivoaroake ty vali’e sady nienga iareo miroanake: “Niavy an-tragno’ay agne ty namako ila’e, le nahandro ho anay sady nagnampe anay tamy ty fianara ty keleia’ay. Nitretré ahy iareo sady niarake nitagny tamako. Niaro ahy iareo naho fa nisy ndaty nitalily raha tsy maregne miomba ahy. Tena nagnampe ahy tsy ho kivy iareo.”​—Rom. 12:13, 15.

17. Akore ty azo o androanavi-pagnahio ampaherezagne ze kivy?

¹⁷ Ry androanavi-pagnahy, ampiasao ze fahafahagne anagna’areo mba hagnatanjahagne avao ty finoa o ndaty managne keleiagne voaroakeo. Managne andraikitse manokagne hampahery iareo nareo. (1 Tes. 5:14) Akore ty azo’areo ampaherezagne iareo? Mirehafa amy iareo aloha ndra afara i fivoriagney. Tiliho’areo an-tragno iareo agne iareo, sady mivavaha miarake amy iareo. Miaraha manompo amy iareo, ndra taono hiarake hanao fotoam-pivavaha ty keleiagne miarake ama’areo iareo. Mila mikarakara naho mitretré vaho maneho hatea o agnondry  i Jehovah kivio nareo ry androanavi-pagnahy.​—1 Tes. 2:7, 8.

18. Ino ty fagniria i Jehovah amo o ndaty voaroakeo, arake ty 2 Petera 3:9?

¹⁸ ‘Tsy tea i Jehovah hisy hibaibay o ndatio fa sambe hisoloho iaby.’ (Vakio ty 2 Petera 3:9.) Mbe sarobily amy i Jehovah avao ty fiay ty ndaty raike, ndra tie nanao fahotagne lahibey aza reke. Ko haligno fa nivilie’e lafo, tamy ty sorogne nanoe i Ana-dahi’e ikokoa’ey, ty fiaintika tsikiraidraike. Bey hatea reke, le manao raha mba hagnampeagne ze ndaty voaroake hiheregne ama’e indraike. Mitamà reke fa mbe hiheregne avao i ndaty rey, arake ty treantika amy i fagnohara i Jesosy miomba i anake nimontsoy. (Lioka 15:11-32) Niheregne amy i Rae iareo bey hatea an-dagnitse agney ty ankamaroa i ndaty voaroake rey naho fa tafara tatoy. Tena nifale ka o fiangonagneo nandrambe iareo. Tena nifale ty Elizabeth, i rahavave nirehafegne taloha tagney, naho fa niheregne amy i Jehovah i ana-dahi’ey. Hoe reke: “Tena fale raho fa maro ty nampahery naho nagnampe anay tsy ho kivy.”

19. Nagnino tika ro afake matoky i Jehovah avao?

¹⁹ Afake matoky i Jehovah avao tika. Tsy ombia hanoro vilagne antika zao reke. Rae matarike naho mitretré hoahy ze ndaty tena tea naho manompo aze reke. Matokia fa tsy hienga azo reke naho ore mafe rehe. (Heb. 13:5, 6) Hoe ty Mark, i nirehafegne taloha tagney: “Tsy nienga anay zao ty Jehovah. Teo avao reke nagnampe anay naho fa niatreke raha sarotse zahay.” Ho eo avao ka ty Jehovah hagnomey “hery fagnampe’e” azo. (2 Kor. 4:7) Matokia areke fa ho vita’o ty tsy hivalike naho tsy ho kivy ndra tie nisintake amy i Jehovah aza ty raike amy ty keleia’o.