1-2. a) Akore ty toko’e ho fiheverantikagne o rahalahy naho o rahavave fa antetseo, arake ty Ohabolana 16:31? b) Ino iaby ty fagnonteneagne hovaleantikagne ato?

VA’E hahatrea diamà midodoke an-taneo ty ndaty mitilike ze toeragne fagnenteagne biby Arkansas, a Etazonia agne zay. Faie mbe tsy soasoa manahake i treantika amy i ravake rey i diamà-y. Ty voka’e, maro ty ndaty tsy midare i diamà rey naho fa mahatrea aze, sady le andriogna iareo avao o raha sarobily rehoe.

² Sarobily manahake o diamà rehoe ka o rahalahy naho o rahavave fa antetse amo o fiangonagneo eò. Ampitovie ty Saontsin’Andrianagnahare amo o satroboninahitseo i volo foty iareo rey. (Vakio ty Ohabolana 16:31; 20:29) Faie mora amantika ty magnaligno tie sarobily iareo. Ze tanora mihevetse o rahalahy naho o rahavave fa antetseo ho sarobily, le hahatsapa tie tena managne raha sarobily ambone o vola aman-karenao. Hamale ty fagnonteneagne retoa tika amy ty lahatsoratse toy: Nagnino o rahalahy naho o rahavave fa antetseo ro hevere i Jehovah ho sarobily? Nagnino ro tena ilaegne amy ty fandamina i Jehovah eo ty fisia iareo? Ino ty azontika ianaragne amy iareo?

3. Nagnino o rahalahy naho o rahavave fa antetseo ro sarobily amy i Jehovah, arake ty Salamo 92:12-15?

³ Sarobily amy i Jehovah Andrianagnahare o rahalahy naho o rahavave fa antetseo. Fohy i Jehovah soa ty tena maha ie iareo naho ty toetse soa anagna iareo sady sarobily ama’e. Fale ty Jehovah naho zarae iareo amo o tanorao ty fahaiagne anagna iareo noho iareo fa ela nanompoagne aze. (Joba 12:12; Ohab. 1:1-4) Sarobily amy i Jehovah ka ty fiareta iareo. (Mal. 3:16) Ndra  tie niatreke olagne maro aza iareo tamy ty fiaigna’e, le nikezake hanagne finoagne matanjake avao. Vao maike aza tena mafe ty fanantena iareo tie amy izao naho ampitahaegne tamy ty fotoagne nianara iareo voaloha’e ty hamarenagne. Tena teà i Jehovah ka iareo, satria magnambara ty tahina’e avao ‘ndra tie fa foty volo aza.’​—Vakio ty Salamo 92:12-15.

4. Ino iaby ty raha mampahery o rahalahy naho o rahavave fa antetseo?

⁴ Naho ohatse rehe fa antetse tie amy izao, le matokia fa tsy haligno i Jehovah ty asa mafe natao’o amparake izay. (Heb. 6:10) Tena mahafale i Raentika an-dagnitse agney ty hafanam-po’o tamy ty asa fitoriagne. Maro ty raha va’e ho nahakivy azo faie niaretse avao rehe. Nagnorike naho niaro ty hamarenagne amy Baiboly ao ka rehe. Nanoe’o soa ty andraikitse nankinegne tama’o sady nampiofagne ty hafa ka rehe. Nanao ze fara’e soa vita’o rehe mba hagnorihagne ze fagnovàgne misy amy fandamina i Jehovah eo. Nandrisike ty hafa hanompo marain-tsy hariva ka rehe sady nanohagne iareo. Matokia areke fa tena tea azo ty Jehovah noho i rehe tsy nivalike ama’e. Nampitamà reke tie ‘tsy hafoe’e ze ndaty tsy mivalike ama’e’! (Sal. 37:28) Izao ka ty raha ampitamae’e azo: ‘Mbe hanohagne anareo avao raho ndra tie fa foty volo aza nareo.’ (Isaia 46:4) Ko mieretseretse areke tie fa tsy ilaegne amy i fandamina i Jehovah eo sasa rehe satria fa antetse. I rehe aza ro tena ilaegne!

5. Ino ty raha toko’e ho tadidie o rahalahy naho o rahavave fa antetseo?

⁵ Maro ty raha ipaliagne o rahalahy naho o rahavave fa antetseo amy i fandamina i Jehovah eo. Maregne fa va’e tsy managne hery manahake ty taloha sasa iareo, faie maro ty fahaiagne anagna iareo. Azo i Jehovah ampiasaegne amy ty fomba maro areke iareo. Andao ho henteantika ty fomba nampisehoa i Jehovah izay taloha naho amy izao.

6-7. Mirehafa ohatse amy Baiboly ao mampiseho tie tahie i Jehovah o ndaty fa antetse manompo aze sady tsy mivalike ama’eo.

⁶ Maro ty ndaty rehafe ty Baiboly tie nazoto nanompo i Jehovah avao ndra tie fa antetse aza. Fa 80 taogne eo ho eo ohatse ty Mosesy tamy i reke tinendre i Jehovah ho mpaminany naho ho mpitarike o firene Isiraelioy. Mbe nampiasae i Jehovah ho mpaminany avao ka ty Daniela ndra tie fa ni-90 taogne mahery  aza. Fa ni-90 taogne mahery ka ty apostoly Jaona tamy i reke nampanorategne ty boke i Apokalypsỳ.

⁷ Maro amo o ndaty tsy nivalike amy i Jehovah-o ro tsy le maro mpahafantatse. Faie i Jehovah nahavazoho iareo sady namale soa iareo. ‘Ndaty maregne naho natahotse an’Agnahare’ ohatse ty Simeona sady tsy le rehafegne mateteke amy Baiboly ao. Faie nivazoho i Jehovah soa reke sady nimea’e tombotsoa hahatrea i Jesosy mbe nimenamenay naho haminany miomba i Jesosy naho i rene’e. (Lioka 2:22, 25-35) Dineho ka ty Ana mpaminanivave. Fa ni-84 taogne reke, faie le mbe “niavy tsy tapake tamy i tempolỳ ao” avao. Nitahie i Jehovah reke sady nenga’e hahatrea i Jesosy mbe nimenamenay ka. Sambe sarobily amy i Jehovah areke ndra i Simeona ndra i Ana.​—Lioka 2:36-38.

8-9. Ino ty natao i rahavave Loïs naho fa nimate ty vali’e?

⁸ Maro ka amy izao ty rahalahy naho ty rahavave fa antetse tena fitsikombe soa hoahy o tanorao. Dineho ohatse ty raha niaigna i Rahavave Loïs Didur. Vaho ni-21 taogne reke, le fa tinendre ho mpisava lalagne manokagne ta Kanada agne. Tafara izay, le nanao ty asa ty faritse tagnate ty taogne maro iareo amy i John vali’e. Niasa tamy i Betela, a Kanada agne tagnate ty 20 taogne iareo naho fa tafara tatoy. Naho fa ni-58 taogne ty Loïs, le tinendre hanompo a Ukraine agne iareo. Akore ty hatao iareo? Nieretseretse vao iareo tie izahay fa antetse toy vao le mbe hifindra an-tane hafa agne? Aha’a. Neké iareo i fanendreagney iareo ho a Ukraine agney, le nivoatendre ho agnisa ty Komity ty Sampagne ty John naho fa niavy agne. Nimate ty John fito taogne tafara izay, faie le mbe nanohy i fanendreagne azey tagne avao ty Loïs. Fa 81 taogne ty Loïs amy izao, faie mbe manompo i Jehovah amy i Betela a Ukraine agne avao sady tena tea aze o keleia i Betelao.

⁹ Va’e tsy le ho voamareke manahake ty tamy i vali’e mbe nivelogney ze vantotse manahake i Loïs. Faie mbe sarobily avao iareo ndra tie eo zay. Tena sarobily amy i Jehovah o rahavave nanohagne ty vali’e tagnate ty taogne maro sady mbe manohy manompo aze avao ndra tie fa nimate ty vali’eo aza. (1 Tim. 5:3) Mampahery o tanorao ka iareo.

10. Nagnino ty Tony ro modely soa ho antika?

¹⁰ Sarobily amantika ka o rahalahy naho o rahavave fa antetse mitoboke irery ndra miarake amy ty keleia’e tsy vavolombelogne, ndra amy ty toeragne fikarakaragne ze ndaty fa antetse agne reo. Mitoboke amo o toeragne fikarakaragne ze ndaty fa antetseo agne ohatse ty rahalahy Tony. Natao badisa ta Pennsylvania, a Etazonia agne reke tamy Aogositra 1942. Roapolo taogne reke tamy izay. Tafara kede i badisa’ey, le sinere hanao maramila reke faie tsy nimete. Ty voka’e, nigadraegne tagnate ty roe taogne tsy tapa’e reke. Nanambaly i rahavave Hilda reke tafara tatoy, le nanagne anake  roe iareo. Ni-mpiandraikitse mpitantan-draharaha * tamy ty fiangonagne telo nisy aze reke tagnate ty taogne maro sady fa ni-mpiandraikitse ty havoriambey faritse ka. Nitarike fivoriagne naho fampianaragne Baiboly tamim-pirizò agne ka reke. Fa 98 taogne reke, faie mbe tapa-kevetse ty hanohy ty fanompoa’e i Jehovah avao. Manao ze fara’e soa vita’e reke mba hanompoagne i Jehovah naho hiarahagne miasa amo o rahalahy naho o rahavave amo o fiangonagne misy azeo eò.

11. Akore ty ampisehoantika fa sarobily amantikagne o rahalahy naho o rahavaventika fa antetseo?

¹¹ Akore ty ampisehoantika fa sarobily amantikagne i rahalahy naho i rahavaventika fa antetse rey? Azo o androanavi-pagnahio atao ty magnampe iareo mba hahafaha iareo magnatreke ndra mitsanogne fivoriagne naho mitory. Azontika atao ka ty mitilike iareo ndra manao videoconférence amy iareo. Maneho fiheveragne iareo tika naho manao izay. Faie akore ka ty amo o rahalahy naho o rahavave fa antetse mitoboke lavitse rey? Tsy toko’e hataontika ambanen-draha ty fikarakaragne iareo. Va’e tsy mora amy ty rahalahy naho ty rahavaventika fa antetse ila’e ty hitantara ty raha niaigna’e. Faie handrambe soa tikagne naho manokagne fotoagne mba hitsanognagne iareo naho fa iareo mitantara ty fifaleagne nitsapa iareo tamy ty fanompoagne i Jehovah.

12. Rahalahy naho rahavave manao akore ty va’e ho treantika amy ty fiangonagne misy antikagne?

¹² Va’e ho gaga tika satria maro ty rahalahy naho ty rahavave fa antetse azontika tsikombegne amy ty fiangonagne misy antikagne. Fa tagnate ty taogne maro ty rahavave Harriette ro nanompo i Jehovah tamy ty fiangonagne nisy aze ta New Jersey a Etazonia agne. Faie niala tagne reke, le nitoboke tamy ze anak’ampela’e zay. Nanokagne fotoagne mba hahafantaragne aze soa ty rahalahy naho ty rahavave amy i fiangonagne vaovao nisy azey agne, le nitsapa iareo tie nahazo harena sarobily iareo. Nitantarae i rahavave Harriette tamy iareo ty fanompoa’e nanomboke tamy ty nahatreava’e ty hamarenagne tamy 1925 tagne ho agne, le tena nampahery iareo. Nirehafe’e tie naho fa nitory reke, le ninday borosy nife avao, satria mateteke nitsepahegne naho ginadra reke. Naho ty maregne aza, le indroe ginadra reke tamy 1933. Sambe heregnandro raike iaby ty fahareta o fotoagne nampigadragne aze rehoe. Tsy Vavolombelo i Jehovah ty vali’e tamy ze fotoagne zay, faie nanohagne aze sady nikarakara i ana iareo telo rey. Tena fagneva ty ho hajaegne ty rahalahy naho ty rahavave fa antetse sady tsy mivalike manahake i Harriette.

13. Ino ty nianarantika miomba ty hasarobily o rahalahy naho o rahavave fa antetseo amy i fandamina i Jehovah eo?

¹³ Tena managne anjara asa lahibey amy i fandamina i Jehovah eo o rahalahy naho o rahavaventikagne fa antetseo. Nivazoho iareo tie maro ty fomba nitahia i Jehovah ty fandamina’e naho ty fomba nitahia’e iareo manokagne. Nandrambe lesogne lahibey tamy ty fahadisoagne natao iareo ka iareo. Hevero ho ‘loharanon-kilala’ iareo sady mikezaha hiana-draha amy iareo. (Ohab. 18:4) Naho manokagne fotoagne mba hahafantaragne iareo rehe, le vao maike hatanjake ty finoa’o sady ho maro ty raha ho hai’o.

14. Mandrisike o tanorao hanao ino ty Deoteronomia 32:7?

¹⁴ Manoa raha voaloha’e mba hirehafagne amo o rahalahy naho o rahavave fa antetseo. (Vakio ty Deoteronomia 32:7.) Maregne fa va’e fa tsy le mahavazoho soa sasa iareo, miadagne naho fa magnavelo, sady va’e ho  ambane avao ka ty fiaragnana iareo. Faie mbe mafana fo avao iareo sady managne “laza soa” agnatreha i Jehovah eo. (Mpito. 7:1) Tsiarovo avao tie nagnino iareo ro sarobily amy i Jehovah. Anehò fagnajagne lognandro avao iareo. Manahafa ka i Elisa. Taloha ty nandehana i Elia, le tsy nimete niala tama’e reke. Intelo reke ro nirehake tamy i Elia tie: “Tsy hienga azo raho.”​—2 Mpanj. 2:2, 4, 6.

15. Ino iaby ty raha azontika agnonteneagne o rahalahy naho o rahavave fa antetseo?

¹⁵ Manehoa fiheveragne iareo naho fa mirehake ama’e. (Ohab. 1:5; 20:5; 1 Tim. 5:1, 2) Agnonteneo aman-kasoa fagnahy ohatse iareo tie: “Nagnino rehe ro nirese lahatse tie nahatrea ty hamarenagne?” “Nagnino ty raha niaigna’o ro nagnampe azo hifandrambe maifitse amy i Jehovah?” “Ino ty nagnampe azo ho fale avao naho fa nanompo i Jehovah?” (1 Tim. 6:6-8) Naho fa mitantara ty raha niaigna’e amy izay iareo, le tsanogno soa.

16. Nagnino o rahalahy naho o rahavave fa antetseo vaho o tanorao ro handrambe soa naho mifampitantara ty raha niaigna iareo?

¹⁶ Sambe mandrambe soa o rahalahy naho o rahavave fa antetseo vaho o tanorao naho mifampitantara ty raha niaigna iareo. (Rom. 1:12) Vao maike hankasitrake i Jehovah ohatse o tanorao noho i reke mikarakara ty mpanompo’e tsy mivalike ama’e. Le o rahalahy naho o rahavave fa antetseo ka hahatsapa ho teagne. Tena ho tea iareo ty hitantara ama’o ty fomba nitahia i Jehovah iareo.

17. Nagnino tika ro afake mirehake tie arakarake ty itomboa ty tao o rahalahy naho o rahavave fa antetseo ro vao maike maha fanjaka iareo?

¹⁷ Naho fa mihantetse ty ndaty raike, le tsy eo sasa i hasoa tarehe’ey. Faie ze ndaty manompo i Jehovah, vao maike mihafanjaka avao arakarake ty itomboa ty tao’e. (1 Tes. 1:2, 3) Nagnino tika ro mirehake izay? Satria nenga iareo hampibokoboko iareo naho hagnampe iareo hanagne toetse soa ty fagnahy masy i Jehovah tagnate ze taogne maro zay. Naho itika mikezake hamantatse soa naho magnaja vaho miana-draha boake amo o rahalahy naho o rahavave fa antetseo, le vao maike ho tsapantika tie tena sarobily vata’e iareo.

18. Ino ty hodinehentika amy ty lahatsoratse magnarake?

¹⁸ Mila mihevetse o rahalahy naho o rahavave fa antetseo ho sarobily o tanorao. Faie mila mihevetse o tanorao ho sarobily ka iareo, amy izay hihamatanjake o fiangonagneo. Hodinehentika amy ty lahatsoratse magnarake tie akore ty azo iareo ampisehoagne fa mihevetse o tanora amo o fiangonagneo eò ho sarobily iareo.