Hoe ty apostoly Paoly amy 1 Korintianina 15:8 ao: “Fara’e, le mba niseho tamako ka reke, manahake ty niseho tamo o ajaja tsy ampe volagneo.” Eto ty Paoly, le nirehake miomba ty raha nahazo aze tamy ireke nahatrea i Jesosy an-dagnitse agne tamy ty fahitagney. Faie ino ty tea’e ho rehafegne naho fa nirehake reke tie “ajaja tsy ampe volagne”? Taloha, ty nagnazavantikagne io le tihoe, hoe naterake ndra nivelomegne ho amy ty fiaignagne ara-pagnahy sahady ty Paoly, satria taonjato maro tafara tatoy ty toko’e ho nisehoa i famelomagne amy ty matey. Faie naho fa tena dinineke soa o andine’e iohoe, le trea tie mila ahitsy ty fomba nagnazavagne aze.

Tampoke i fiova’ey sady tsy nimora tama’e ty niatreke aze. Mateteke ro tsy ampoizegne tie ho terake tsy ampe volagne ty ajaja raike. Tsy nampoize i Saoly (Paoly ty tena nahafantaragne aze naho fa tafara tatoy) tie hahatrea fahitagne miomba i Jesosy nivelomagne amy ty matey reke, tamy ie tan-dalagne ho a Damasikosy agne, mba hagnenjeke ze Kristiana tagney. Tsy i Paoly avao ro tsy nagnampo ty fiova’e, fa ndra o Kristiana nieretserete’e ty ho enjehegne ta Damasikosy agneo ka aza le tsy nagnampo izay. Tsy nimora tama’e ka ty niatreke o raha niseho iohoe, satria nanjare tsy nahatrea tagnate ty fotoagne kedekede ty Paoly.​—Asa. 9:1-9, 17-19.

Tamy “ty fotoagne tsy nieretserete’e” reke ro niova. Hoe izao ty raha rehafe ty Baiboly Jerosalema miomba i reha i Paoly amy i tapa’e fara’e amy andine’eỳ: “Hoe naterake raho tamy izay faie tamy ty fotoagne tsy nampoizegne hiterahagne ahike.” Fa niheregne an-dagnitse agne ty Jesosy, tamy i fotoagne niova i Paolỳ. Tsy nitovy tamy i ndaty nirehafe’e amy ty andine’e aloha eo rey reke. Taloha ty nandehana i Jesosy an-dagnitse agne ty nahatreava iareo i Jesosy, fa i Paoly tsy hoe izay. (1 Kor. 15:4-8) Ty fisehoa i Jesosy tama’e tamy ty fotoagne tsy nampoize’e areke, le nagnomey fahafahagne aze hahatrea i Jesosy tamy ty mate, ndra tie tamy ty fotoagne tsy nieretsereta’e aze aza ty nisehoa’e tama’e.

Nirehake miomba ty vata’e reke faie natao’e am-piambaneagne. Misy manam-pahaizagne miomba ty Baiboly ila’e mirehake tie o fomba firehake nampiasae i Paoly iohoe le managne heve’e hoe te hagnambane zay. Naho izay ty tan-tsay i Paoly ao, le nagneke reke tie tsy fagneva’e i tombotsoa nimeigne azey. Magnamaregne izay ty reha’e retoa: “Fa izaho ty fara’e kedekede amo o apostolio, sady tsy fagneva ty ho tokavegne tihoe apostoly raho, satria nagnenjeke ty fiangonan’Andrianagnahare. Faie ty hasoa fagnahy miambake nasehon’Andrianagnahare ro nahavy ahy ho hoe izao.”​—1 Kor. 15:9, 10.

Naho izay ro henteagne, le hoe iretoa ty raha tea i Paoly ho rehafegne: Tampoke ty fotoagne naho ty fomba nisehoa i Jesosy tama’e, ndra tamy ty fotoagne tsy nieretserete’e reke ro niova, ndra ka tsy fagneva ty ho nahatrea o fahitagne miambake iohoe reke. Faie ndra inogn’ino ty tea i Paoly ho rehafegne, le nihevere’e ho sarobily o raha niseho iohoe. Io ty nagnaporofo tama’e fa nivelomegne amy ty mate vata’e ty Jesosy. Azo antoke ka fa mateteke reke ro nirehake o raha niseho iohoe naho fa nitory tamy ty hafa tie nivelomegne amy ty mate ty Jesosy.​—Asa. 22:6-11; 26:13-18.