1. Taloha kede ty nimateza i Petera, ino ty raha nampanoe i Jehovah aze?

 NIFANTA i apostoly Petera tie fa kede sisa le ho mate reke. Tsy nivalike reke fa nanompo i Jehovah tagnate taogne maro. Niarake nitory tamy i Jesosy avao reke, nanokake ty fitoriagne tamo o hafa firenenao sady nanjare agnisa ty filan-keve-pitantanagne. Faie tsy izay avao ty fanompoagne natao’e. Nitarihe ty fagnahy masigne reke, le nanoratse taratasy roe tamy ty taogne 62-64 tagne ho agne. Tsy inogne zay fa ty boke Petera voaloha’e naho faharoe trea amy Baiboly ao. Nitamà reke fa hagnampe o Kristianao o taratasy reo naho fa mate reke.​—2 Pet. 1:12-15.

2. Nagnino ro tamy ty fotoagne tena nipaliagne aze ty taratasy nisorate i Petera?

² Tamy ty fotoagne nanorata i Petera o taratasy reo, le “niaretse fitsapagne sambe karaza’e” ty mpiara-manompo tama’e. (1 Pet. 1:6) Nisy ndaty raty ka nampianatse raha vande naho nitarike ty Kristiana haloto findesam-batagne tamo o fiangonagneo eo. (2 Pet. 2:1, 2, 14) Ty Kristiana ta Jerosalema tao indraike, le fa hiatreke ty “fara ty raha iaby” hoavy tsy ho elay, tsy ino zay fa ty handravà ty tafike Romana i tanàgney naho i tempolỳ. (1 Pet. 4:7) Azo antoke fa nagnampe ty Kristiana tamy izay, amy ty raha toko’e hatao mba hiatrehagne ty fitsapagne nahazo iareo, naho ty hiomanagne i fitsapagne mbe ho avỳ i taratasy i Peteray. b

3. Nagnino tika ro toko’e handineke ty taratasy nisorate i Petera?

³ Maregne fa hoahy ty Kristiana tamy ty taonjato voaloha’e ty nanorata i Petera o taratasi’e reo, faie natao i Jehovah ho agnisa ty Saontsi’e io mba handrambesantika soa. (Rom. 15:4)  Manahake o Kristiana taloha reo, le miara-miaigne amy ty ndaty maloto findesam-batagne ka tika ty amy izao. Voka’e, manjare sarotse amantika ty manompo i Jehovah. Tsy ho ela ka tika le hiatreke haoreagne lahibey hitarike amy ty fara’e sady mbe ambonembone i tamy ty nandravagne i Jerosalemay. Tena ilaentika areke ty faniahiagne amo o taratasy nisorate i Petera reo, satria hagnampe antika reo mba handigne avao i andro i Jehovah-y naho tsy hatahotse ndaty vaho hampitombo ty hateantika ty hafa. Afake magnampe o androanavi-pagnahio hahatrea ty fomba hikarakaragne ze raha ilae o agnondrio ka io.

4. Ino ty raha va’e hampihegne ty finoantika, arake ty 2 Petera 3:3, 4?

⁴ Tsy mino ty faminania ty Baiboly ty ndaty magnodidigne antika. Va’e hitsikike antika o mpanohetseo satria fa an-tao’e maro ty nitoriantika tie fa marine ty fara’e. Misy amy iareo aza mahavany mirehake tie raha tsy hisy zao. (Vakio ty 2 Petera 3:3, 4.) Akore naho mirehake raha hoe izay amantika ty ndaty itoriantika, ty mpiara-miasa amantika naho ty keleiantika? Va’e hihegne ty finoantika. Faie nihazavae i Petera ty raha afake magnampe antika.

5. Ino ty hagnampe antika hanagne toe-tsaigne soa avao amy itika mandigne ty fifaragna ty tontolo toỳ? (2 Petera 3:8, 9)

⁵ Va’e hisy hieretseretse tie tsy aniany ty hagnafoagna i Jehovah ty tontolo raty toy. Faie magnampe antika handigne i andro i Jehovah-y avao ty taratasy nisorate i Petera. Maniahy antika reke ty ao, fa tsy mitovy amy ty antika ty fomba fivazohoa i Jehovah o fotoagneo. (Vakio ty 2 Petera 3:8, 9.) Hoe andro raike avao ty arivo taogne ty ama’e. Managne faharetagne reke satria tsy tea’e ho ringagne o ndatio. Horingane’e ty tontolo toy naho fa avy i andro’ey. Tombotsoa ho antika areke tihoe afake mampiasa ty fotoagne sisa tavela mba hitoriagne amy ty ndaty amy ty firenena iaby.

6. Akore ty ‘hanoantika an-tsaigne’ avao i andro i Jehovah-y? (2 Petera 3:11, 12)

⁶ Nandrisike antika ty Petera mba hanao an-tsaigne avao i andro i Jehovah-y. (Vakio ty 2 Petera 3:11, 12.) Amy ty fomba akore? Soa naho misaintsaigne ty fitahiagne ho azontika amy i paradisay agne tika. Naho mete le anò isan’andro. Alao sare an-tsaigne tie mifoke tioke malio rehe tie agne, mihinagne hanegne mahasalama, manalaka ty longo’o nivelomegne amy ty mate naho mampianatse i ndaty fa niaigne taloha rey miomba ty fahatanteraha ty faminania ty Baiboly. Ino ty voka’e naho itika misaintsaigne hoe izay? Hahavy azo ho vognogne handigne ze fotoagne zay ty fisaintsaignagne sady hiaro azo mba tsy hieretseretse tie mbe ho ela ty hiavia ty fara’e. Hagnampe antika tsy ho “voataogne” hagnorike ty fampianaran-diso ty fahafantarantika mialoha ty hoavintika manahake izay.​—2 Pet. 3:17.

7. Ino ty ho voka’e naho itika matahotse ndaty?

⁷ Naho ataontika an-tsaigne avao i andro i Jehovah-y, le izay ty handrisike antika hitory i talily soay amy ty hafa. Faie kindraike tika tsy mahavany manao izay. Fa nagnino? Satria va’e misy fotoagne tika matahotse ndaty. Izay zao ty nahazo i Petera tamy i halegne taloha ty nimateza i Jesosỳ. Natahotse reke, le tsy nahavany nirehake tie agnisa ty mpiana i Jesosy sady nandietse tie mahafantatse aze. (Mat. 26:69-75) Faie nahavita nandrese ze tahotse ndaty zay reke, le hoe reke naho fa tafara tatoy: “Ko matahotse ze atahora iareo sady ko minekoneko.” (1 Pet. 3:14) Magnomey toky antika o reha i Petera iohoe fa ho vitantika ka ty handrese ty tahotse ndaty.

8. Ino ty hagnampe antika handrese ty tahotse ndaty? (1 Petera 3:15)

 ⁸ Ino areke ty hagnampe antika tsy ho rese ty tahotse ndaty? Hoe ty Petera amantika: “Hamasigno ho Tompo am-po’areo ao lognandro ty Kristy.” (Vakio ty 1 Petera 3:15.) Manao izay tika naho fa misaintsaigne ty fahefagne naho ty toeragne tana i Tompontika sady Mpanjakantikagney, le i Kristy Jesosy. Naho ohatse rehe matahotse hitory i talily soay ie amy izao rehe managne fahafahagne hanao izay, le tadidio i Mpanjakantikagney. Alao sare an-tsaigne tie mpanjaka an-dagnitse agne reke, le misy anjely tsiefa magnodidigne aze. Tadidio tie “fa nimeagne aze iaby ty fahefagne an-dagnitse agne naho an-tane etoy” sady ‘ho ama’o avao reke isan’andro amparake ty hiavia ty fara ty tontolo toy.’ (Mat. 28:18-20) Mandrisike antika mba ho “vognogne avao” hiaro ty finoantika ty Petera. Te hitory vao rehe naho fa am-piasa’areo agne ndra an-dakilasi’areo agne ndra amy ty toeragne ila’e agne? Eretsereto tie ombia rehe ty afake manao izay, le omano mialoha ty raha ho rehafe’o. Mangataha herim-po amy i Jehovah, mba handrese ty tahotse ndaty.​—Asa. 4:29.

9. Ombia ty Petera ro tsy nahavita naneho hatea? (Henteo i sarey.)

⁹ Nianatse naneho hatea ty Petera. Teo reke tamy i Jesosy nirehake tie: “Meako lily vaovao  nareo, le ty mba hifankateava’areo. Manahake ty niteavako anareo ro toko’e mba hifankateava’areo ka.” (Jaona 13:34) Faie naho fa tafara tatoy, noho ty taho’e o Kristiana Jiosio le tsy nimete hihinagne miarake amy ty rahalahy naho ty rahavave hafa firenena reke. Tamy ze fotoagne zay ty Petera le nirehafe i apostoly Paoly tie manao soa miatreke. (Gal. 2:11-14) Faie nimete ahitsy reke sady nandrambe lesogne. Nasongadi’e tamy i taratasy roe nisorate’ey tie tsy toko’e ho fihetseham-po avao ty hateantika o mpiara-manompo amantikagneo fa toko’e atoro amy ty atao ka.

10. Ino ty hagnampe antika “tsy hanao soa miatreke” fa tena ho tea o rahalahio? (1 Petera 1:22)

¹⁰ Nirehake ty Petera tie toko’e hanagne hatea tsy manao soa miatreke amo o mpiara-manompo amantikagneo tika. (Vakio ty 1 Petera 1:22.) Hanagne ze hatea zay tika naho fa ‘magnorike ty hamarenagne.’ Agnisa izay ty fampianaragne tihoe “tsy mifily volo ty Andrianagnahare.” (Asa. 10:34, 35) Tsy hahavita hagnorike i lily i Jesosy miomba ty hateay tika naho ndaty ila’e amo o fiangonantikagneo avao ty anehoantika hatea, fa ty hafa tsy ataontika hoe izay. Maregne fa misy ndaty ila’e tena namantika naho oharegne amy ty hafa. Ndra i Jesosy ka aza mba nihoe izay. (Jaona 13:23; 20:2) Faie naniahy antika ty Petera tie toko’e hikezake mafe tika mba ho tea o ‘rahalahintikagneo’ iaby satria agnisa ty keleiantika iareo.​—1 Pet. 2:17.

11. Ino ty dika tihoe ‘tena tea amy ty fo’?

¹¹ Nandrisike antika ty Petera mba “ho tena tea ty hafa amy ty fontika.” Tihoe ‘tena tea’ rehafegne eto, le midika tie maneho hatea amy ty ndaty raike ndra tie tsy mora aza ty maneho hatea ama’e. Akore zao ohatse naho nisy rahalahy raike nanao raha nampalahelo antika? Va’e le avy le te hamale fate tika fa tsy haneho hatea ama’e. Faie nianara i Petera tamy i Jesosy fa tsy tean’Andrianagnahare tihoe mamale fate. (Jaona 18:10, 11) Izao ty nisorate i Petera: ‘Ko mamale raty ze nanao raty ama’o ndra magnambanembane naho fa misy magnambanembane, fa ndra aleo mirare soa.’ (1 Pet. 3:9) Naho tena tea’o o mpiara-manompò, le ho vita’o ty ho soa fagnahy ama’e ndra tie nanao raha nampalahelo azo aza reke.

12. a) Ino ty hagnampe antika mba tena ho tea o mpiara-manompò? b) Ino ty raha tea’o ikezahagne naho fa nagnente ty video tihoe Arovo ty Firaisan-tsaigne fa Fagnomezagne Sarobily?

¹² Nampiasa rehake mitovitovy amy izay ka ty Petera amy i taratasi’e voaloha’ey ao, le tihoe “mifampikoko.” Mandrongogne “fahotagne tsiefa” o hatea iohoe fa tsy fahotagne tsy ampe avao. (1 Pet. 4:8) Va’e tsiaro i Petera zao ty nampianara i Jesosy aze miomba ty famelan-keloke taogne maromaro taloha io. Tamy izay ty Petera le nieretseretse fa mete ty natao’e naho fa nirehake tie fa namela ty rahalahi’e “hatrake im-7” reke. Faie nampianare i Jesosy aze tie toko’e hamela heloke “hatrake im-77” reke, ty dika izay tsy misy fetra’e. (Mat. 18:21, 22) Tsy ho aze avao zay fa ho antika ka. Ko kivy naho tsapa’o tie tsy mora ama’o ty magnorike izay. Tsy voririke tika iaby, le va’e ho sarotse amantika kindraike ty hamela heloke. Fa ty raha lahibey toko’e hatao’o zao, le ty manao ze fara heri’o mba hamelagne ty helo o rahalahi’ò naho ty milongo ama’e. c

13. Nagnino ro va’e tsy ho mora amo o androanavi-pagnahio ty hahatrea fotoagne mba hampaherezagne o rahalahy naho o rahavaveo?

¹³ Azo antoke fa tsy nihaligno i Petera ty reha i Jesosy tama’e tafara ty namelomagne aze tamy ty mate manao tihoe: “Andrazo  o anak’agnondrikò.” (Jaona 21:16) Naho androanavi-pagnahy rehe, le hai’o soa fa natao ho azo ka o toromareke iohoe. Faie va’e ho sarotse ty hahatrea fotoagne hamitagne o andraikitse lahibey iohoe. Satria tsy maintsy mikarakara ty raha paliae ty keleia’e amy ty lafi’e ara-nofo naho ara-pagnahy vaho ara-pihetseham-po hey o androanavi-pagnahio. Mikezake ho modely soa amy ty fahazotoagne mitory ka iareo sady mbe mila magnomagne soa naho manao soa ty anjara iareo am-pivoriagne agne naho amo o havoriambeio. Ty ila’e amy iareo aza mbe agnisa ty Komity Mifandrambe amy ty Lapotaly ndra miara-miasa amy ty Sampan-draharaha ty Fagnoregnagne An-toeragneo. Maro vata’e ty raha atao o androanavi-pagnahio!

14. Ino ty hagnampe o androanavi-pagnahio hiarake o agnondrio? (1 Petera 5:1-4)

¹⁴ Nandrisike o androanavi-pagnahy manahake azeo ty Petera tie: “Andrazo o agnondrin’Andrianagnahareo.” (Vakio ty 1 Petera 5:1-4.) Naho androanavi-pagnahy rehe, le fanta’ay soa tie tea’o o mpiara-manompò sady te hiarake iareo rehe. Faie kindraike rehe va’e hahatsapa tie tsy le manam-potoagne ndra rokake le tsy mahavita o andraikitse iohoe. Ino areke ty azo’o atao? Voraho amy i Jehovah zay. Izao ty nisorate i Petera: “Naho misy manompo, le toko’e hanao izay reke sady hitavandra ty hery boake aman’Agnahare.” (1 Pet. 4:11) Va’e miatreke raha sarotse tsy ho voavaha amy ty tontolo toy eto o rahalahi’ò naho o rahavave’ò. Faie tsiarovo, fa afake manao mihoatse ze azo’o atao “i mpiarake lahibeỳ”, le i Jesosy Kristy. Afake manao izay reke manomboke amy izao hatrake amy tontolo vaovao agne. Izao avao ty angatahen’Andrianagnahare amo o androanavi-pagnahio, le ty ho tea o rahalahy naho o rahavaveo sady hiarake iareo le “ho modely hoahy o agnondrio.”

15. Akore ty atao ty androanavi-pagnahy raike mba hiandrazagne o agnondrio? (Henteo i sarey.)

¹⁵ Fa ela ty naha androanavi-pagnahy i William le fanta’e soa tie tena ilaegne ty miarake o agnondrio. Naho fa nanomboke i COVID-19-oy, le natao’e naho ty androanavi-pagnahy hafa nama’e voalohan-draha ty nifandrambe tamy ty mpitory tsikiraidraike amy ty andiam-pitori’e isan-keregnandro. Izao ty nirehafe’e: “Maro tamo o mpiara-manompò ty nijanogne tan-tragno’e tao sady  tsiela nieretseretse raha mahakivy.” Naho fa misy amy iareo managne olagne, le mitsanogne soa ty William mba hamantaragne ty raha paliae iareo naho ty mampinekoneko iareo. Afara izay reke manao fikarohagne ty raha hampaherezagne iareo, le mateteke video boake amo o tragnom-porarontikagneo ao ty ampiasae’e. Hoe ka reke: “Tena ilaegne mandikoatse ty amparake izay ty fitilihagne agnondry. Mikezake mafe tika magnampe o ndatio hianatse ty miomba i Jehovah, le toko’e hanao hoe izay avao ka tika mba hiandrazagne o agnondrio, mba tsy hialà iareo amy ty hamarenagne.”

16. Akore ty azontika ampiharagne ty lesogne boake amy ty taratasy roe nisorate i Petera?

¹⁶ Lesogne tsiampeampe avao boake tamy ty taratasy roe nisorate i Petera ty nidinehentika tato. Va’e nahatrea raha azo’o hasoaegne rehe ty tato. Vao mainke te hisaintsaigne ty fitahiagne amy tontolo vaovao agne vao rehe? Sa rehe nanao tanjogne hitory am-piasagne agne, ndra an-dakilasy agne ndra amy ty toeragne hafa? Mahatrea fomba hafa hanoroa’o ty hatea’o o rahalahy naho o rahavaveo vao rehe? Naho androanavi-pagnahy rehe, tapa-kevetse vao rehe fa hiarake o agnondrio amy ty zoton-troke sady hazoto amy ty fanoagne izay? Va’e hahatrea raha mila ahitsy rehe naho fa mandineke ty vata’o faie ko kivy satria “soa fagnahy ty Tompo,” le hagnampe azo hihasoa. (1 Pet. 2:3) Izao ty toky nimea i Petera antika: “Hagnampe anareo ho mafe oregne reke sady hagnatanjake anareo, le atao’e mafe oregne soa nareo.”​—1 Pet. 5:10.

17. Ino ty ho voka’e naho itika tsy kivy sady magnenga i Jehovah hampiofagne antika?

¹⁷ Nisy fotoagne ty Petera nahatsapa ho tsy fagneva hiharo lia amy i anak’Andrianagnaharey. (Lioka 5:8) Faie nahavita nikezake nanonjohy ty lia i Kristy avao reke naho fa nampea i Jehovah naho i Jesosy. Ty voka’e, nengagne hilitse amy “Fanjakà i Jesosy Kristy Tompontika sady Mpamonje antika reke, le i Fanjakagne haharetse nainai’ey.” (2 Pet. 1:11) Valesoa tsy misy hoe’e zay! Naho tsy kivy manahake i Petera rehe, sady magnenga i Jehovah hampiofagne azo, le hahazo i valesoay, le ty fiaignagne nainai’e. ‘Hotrà’o ty tanjo’o, le ty hahazo famonjeagne noho irehe manam-pinoagne.’​—1 Pet. 1:9.