1-2. Nagnino ro mahasoa antika ty mianatse ty tantara i Samsona?

 INO ty avy an-tsai’o ao naho fa maharey ty agnaragne tihoe Samsona? Va’e hieretseretse rehe tie lahilahy raike nanagne hery niambake zay. Maregne zay. Faie nisy fotoagne reke nandrambe fanapahan-kevetse raty. Nahavy aze hijale zay. Faie ndra tie teo zay, le ty tsy fivaliha’e ty nifantoha i Jehovah. Nazili’e amy Baiboly ao ty tantara’e mba handrambesantika soa.

² Nampiasa i Samsona ty Jehovah mba hanao raha mahagaga hagnampeagne o Israelio ndra i vahoake jinobo’ey. An-jato’e taogne maro tafara ty nimateza i Samsona, le nampiasa i apostoly Paoly ty Jehovah mba hampilitse ty agnara’e ho agnisa ty ndaty niambake nanam-pinoagne. (Heb. 11:32-34) Afake ty hampahery antika ty ohatse nengà i Samsona. Niantehetse tamy i Jehovah avao reke ndra tie tagnate ty fotoan-tsarotse aza. Hodinehentika ato ty lesogne azontika ianaragne boake ama’e, le nagnino ty ohatse nengà’e ro afake mampahery antika.

3. Ino ty fanendreagne niazo i Samsona?

³ Tamy ty fotoagne nahateraha i Samsona, le o Filistinao ty nifehe o firene Israelio sady nampahore iareo. (Mpits. 13:1) Nimafe ty fitondrà iareo hafara’e o Israelio tena nijale. Nijobogne i Samsona areke ty Jehovah mba “hamonje o Israelio tan-tagna o Filistinao.” (Mpits. 13:5) Asa tsy mora zay! Faie niantehetse tamy i Jehovah avao reke mba hamita’e ze fanendreagne sarotse zay.

4. Akore ty nagnampea i Jehovah i Samsona mba hahavita’e hagnavotse ty vata’e tagnatreha o Filistinao eo? (Mpitsara 15:14-16)

⁴ Dineho ty ohatse raike nanoroa i Samsona tie natoky i Jehovah sady niantehetse tamy ty fagnampea’e reke. Niavy ta Lehy, tanàgne ta Joda tagne o maramila Filistinao tie indraike mba hitsepake aze. Natahotse o lahilahy ta Joda taò, le nanapa-kevetse  iareo fa hanolotse i Samsona tan-tagna o fahavalo iareò. Nirohiza i vahoake tao rey taly roe mbe vaovao reke, sady nente iareo mbamo o Filistinao mbeo. (Mpits. 15:9-13) Faie ‘nagnomey hery aze ty fagnahy i Jehovah’, le nivita’e reke raike avao ty nampibalake i talỳ. Naho fa niavy eo reke “nahatrea valagnoram-birike lahi’e, sady mbe legne i taolagney tamy izay.” Nalae’e igne, le nampiasae’e mba hamonovonoa’e i Filistina 1000 lahy rey!​—Vakio ty Mpitsara 15:14-16.

5. Nangnino ty fampiasà i Samsona i valagnoram-birikey ro mampiseho tie niantehetse tamy i Jehovah reke?

⁵ Nagnino ty Samsona ro nampiasa taolam-balagnoram-birike, ie amy izao tsy fitaovagne findesegne mialy io? Azo antoke fa nihay i Samsona tie miankigne amy ty fagnampea i Jehovah ty handresea’e o Filistinao fa tsy amy i fitaovagne nente’e nialỳ. Nampiasa ze raha nisy teo o lahilahy nanam-pinoagne iohoe mba hagnatanterahagne ty zoton’arofo i Jehovah. Noho i Samsona niantehetse tamy i Jehovah, le nitahie’e reke sady nirese’e i lahilahy rey iaby.

6. Ino ty lesogne azo’o ianaragne boake amy ty tantara i Samsona?

⁶ Afake magnatanjake antika ka ty Jehovah mba hahavitantika ze raha ampanoe’e antika ndra tie hoe sarotse tanterahagne zay aza. Afake magnampe antika amy ty fomba va’e tsy hampoizentika reke. Matokia i Jehovah, i nagnomey hery i Samsonay, fa hagnampe azo reke mba hahavita hanao ty zoton’arofo’e, naho mbe mitavandra ty fagnampea’e avao rehe.​—Ohab. 16:3.

7. Ino ty ohatse mampiseho fa tena ilaentika ty mipay tari-dalagne boake amy i Jehovah?

⁷ Maro amy ty rahalahy naho rahavave magnampe amy ty asa fagnoregnagne ro nanoro tie natoky i Jehovah. Taloha tagne le mateteke o rahalahio ro nanao pilan-tragno le nagnoregne Anjomba Fanjakagne vaovao ndra tragno hafa. Faie tafara tatoy, naho fa nitombo ty vahoa i Jehovah le nisy fagnovagne nila natao. Nipay ty tari-dala i Jehovah areke o rahalahy mpiandraikitseo le nagnandragne fomba fiasa vaovao, agnisa izay ty fivilianagne tragno naho ty fagnavaozagne aze. Hoe ty  Robert, agnisa ty niasa tamy ty ankamaroa ty tetik’asa fagnoregnagne magneran-tane vaho tsy ela zay: “Tamy ty voaloha’e, le tsy nimora tamy ty ila’e ty hanao ze o fomba fiasa vaovao zao.” Hoe ka reke: “Tena tsy nitovy tamy ty raha fa natao’ay, tagnate ze taogne maro zay i fomba fiasay. Faie nivognogne hanao raha mifagnarake amy ze raha misy eo avao o rahalahio, sady nitrea ka tie nitahy ze fagnovagne zay ty Jehovah.” Ohatse raike mampiseho ty fomba itariha i Jehovah ty mpanompo’e mba hanoagne ty zoton’arofo’e io. Azontika iaby atao ka ty mieretseretse tie: ‘Mipay ty tari-dala i Jehovah vao raho le vognogne hanao fagnovagne mba hanompoagne aze arake ze fara’e soa vitako?’

8. Ino ty natao i Samsona tamy ireke nitalignerey?

⁸ Va’e tadidi’o varagne ty raha hafa mahalatsa nanoe i Samsona. Ireke raike avao le fa nahavita namono liona raike. Tafara izay ka reke le namono 30 lahy boake amy tanà o Filistina ta Askelona tao. (Mpits. 14:5, 6, 19) Nifanta i Samsona fa tena tsy ho niafake nanao izay reke naho tsy nampea i Jehovah. Nitrea zay tamy ze andro raike zay, naho fa nitalignere reke tafara ty namonovonoa’e i Filistina 1000 lahy rey. Akore ty natao’e? Tsy niantehetse tamy ty tegna’e avao reke naho fa nipay rano hinome’e, fa nitoka i Jehovah mba hagnampe aze.​—Mpits. 15:18.

9. Akore ty namalea i Jehovah ty vavake nanoe i Samsona naho fa nipay fagnampeagne tama’e reke? (Mpitsara 15:19 naho ty fagnamarehagne ambane peje)

⁹ Namale ty fitaraigna i Samsona ty Jehovah, le namorogne loharano tamy ty fomba mahalatsa. Naho fa ninome’e amy izay i ranoy, le “nihanatanjake indraike reke sady nivelombelogne.” (Vakio ty Mpitsara 15:19 naho ty fagnamarehagne ambane peje.) Hoe mbe teo avao o loharano vaovao iohoe taogne maro tafara ty nanorata i Samoela mpaminany ty boke Mpitsara. Va’e ho naniahy ze Israelita nahita o loharano iohoe zay tie, azo ty mpanompo’e tsy mivalike ianteheragne ty Jehovah amy ty fotoagne ipaliae iareo fagnampeagne.

10. Ino ty tsy maintsy ataontika naho te hahazo ty fagnampea i Jehovah tika? (Henteo i sarey.)

¹⁰ Mila mipay ty fagnampea i Jehovah ka tika ndra inogn’ino ty talenta ndra ty fahaiagne va’e anagnantika ndra raha fa nivitantika tamy ty fanompoagne. Toko’e hiambane tikagne le hagneke fa tsy hahavita ze raha ampanoe’e antika naho tsy miantehetse ama’e. Nihanaozatse ty Samsona naho fa ninogne i rano nimea i Jehovah azey. Hoe izay ka, fa naho itika mahay magnararaotse ty fandaharagne anoe i Jehovah ho antika, le izay ty hagnampe antika hahavita tsy hivalike ama’e.​—Mat. 11:28.

11. Akore ty azontika agnararaotagne ty fagnampeagne mea i Jehovah? Magnomeza ohatse.

¹¹ Dineho ohatse ty rahalahy Aleksey mitoboke a Rosia agne, agnisa ty niaretse fagnenjehagne mafe. Inogne ty nagnampe aze hiaretse avao tagnate i fotoan-tsarotsey? Ty fahazaragne ara-pagnahy tsy tapake nanoe iareo mirovaly. Hoe reke: “Mikezake manao i fahazaragne ara-pagnahikoy avao raho, le ty fianaragne raike naho ty famakiagne Baiboly isan’andro. Isake maraindraigne ka zahay mirovaly, le miarake manao teny vakina naho miarake mivavake.” Ino ty ianarantika boake amy izay? Tsy toko’e hiantehetse amy ty tegnantika tika fa amy i Jehovah. Amy ty fomba akore? Magnatanjake ty finoantika amy ty alala ty fianaragne Baiboly, ty vavake, ty fagnatrehagne fivoriagne naho ty fitoriagne. Naho manao izay tika, le hagnampe antika hahavita hanompo aze avao ty Jehovah. Nagnatanjake i  Samsona reke, le azo antoke fa hagnatanjake antika ka.

12. Ino ty fanapahan-kevetse raty nirambese i Samsona, le nagnino i fifandrambesa’e tamy i Delilay ro va’e hamandrike aze?

¹² Tsy voririke manahake antika avao ty Samsona, le nisy fotoagne reke nanao safidy raty tena nisy voka’e raty tama’e. Tafara kede ty nanoa i Samsona i asa amy maha mpitsara azey, ‘le nanjare nitea i ampela raike nitoboke amy Vavasaka i Soreka aoy reke.’ I Delila ty agnara’e. (Mpits. 16:4) Taloha io ty Samsona, le nite hanambaly ampela Filistina. Nengà i Jehovah hanao izay reke amy izay afake mialy amo o Filistinao. Tafara tatoy reke, le niheo tamy ty tragno ty makorely raike tamy ty tanà o Filistina reo ta Gaza tagne. Tamo o fotoagne iohoe ty Andrianagnahare, le nagnomey hery i Samsona mba hagnombotse i vavahady i tanàgney, hahavy ty mponegne ao ho salatse. (Mpits. 14:1-4; 16:1-3) Faie mbe hanagne fahafahagne hialy amo o Filistinao indraike vao reke noho ireke tea i Delila? Aha’a. Ty anto’e, noho i Delila va’e ho ampela Israelita.

13. Ino ty natao i Delila tamy i Samsona?

¹³ Nirambese i Delila i vola bey nimey o Filistinao azey mba ho karama’e amy ty famadiha’e i Samsona. Noho i Samsona tena nitea aze le va’e tsy niazo’e an-tsaigne ty raha tea i Delila hokotsohegne. Lava nagnontane i Samsona avao ty Delila mba hanereagne aze hirehake ty anto’e mahavy aze haozatse. Ie tamy ty fara’e, le nambara’e aze avao zay. Mampalahelo fa tagnate ty fotoagne kede avao, le nanjare nihanaleme ty Samsona sady tsy nankasitraha i Jehovah hey noho ty hadisoagne nanoe’e.​—Mpits. 16:16-20.

14. Ino ty nivoka’e naho fa natoky i Delila ty Samsona?

 ¹⁴ I Delila ro tena natokisa i Samsona fa tsy i Jehovah, le nahavy aze nijale zay. Nitsepahe o Filistinao reke le nipirite iareo ty maso’e. Nazily iareo tam-pirizò ta Gaza tao reke. Tamo o tanàgne iohoe ty nisy i vavahady, i aze nombota i Samsona talohay, le nanalara’e ty mponegne tao. Faie natao iareo ondevo reke hinane zao, le nanjare mpagnodigne vato bey fandisanam-bare. Tafara izay iareo, le ninday aze mba halam-baraka tamy i fete nanoe iareoy. Nanao fagnatetse tena bey hoahy i Dagona andrianagnahare diso iareoy o Filistinao satria nino iareo fa ie ty nanolotse i Samsona tan-tagna iareo eo. Nalae iareo boake am-pirizò agne ty Samsona le nandesegne amy i fetey ao mba “hamalefale iareo” naho hikizakizahagne aze.​—Mpits. 16:21-25.

15. Akore ty nanoroa i Samsona fa niantehetse tamy i Jehovah indraike reke? (Mpitsara 16:28-30) (Henteo ty sare amy ty fogno ty gazete toy.)

¹⁵ Nanao fahadisoagne tena lahibey ty Samsona. Faie tsy nikivy reke fa mbe nipay fomba hagnatanterahagne ty asa nampanoe i Jehovah aze, le ty hialy amo o Filistinao. (Vakio ty Mpitsara 16:28-30.) Nihalale mafe tamy i Jehovah reke tie: “Engao raho mba hamale fate o Filistinao.” Namale ty fihalalea’e i tena Andrianagnaharey, le nahere’e tama’e indraike i heri’e mahalatsay. Ty voka’e, nahavita namono Filistina maro reke tamo o fotoagne iohoe naho ampitahaegne amy ty fa nimate’e amparake izay.

16. Ino ty azontika ianaragne boake amy i fahadisoagne nanoe i Samsonay?

¹⁶ Ndra tie nibabe ty voka-draty i fahadisoagne nanoe’ey ty Samsona le tsy tihoe nijanogne tsy nanao ty zoton’arofo i Jehovah sasa reke. Hoe izay ka fa ndra tie nila nanaregne tika naho fa nanao fahadisoagne, ndra itika namoe tombotsoa-panompoagne, le tsy toko’e ho kivy. Tsiarovo fa tsy kivy amantika ty Jehovah. (Sal. 103:8-10) Ndra tie nanao fahadisoagne aza tikagne, le mbe azo i Jehovah ampiasaegne avao manahake ty natao’e tamy i Samsona.

17-18. Nagnino ro mampahery azo ty ohatse nengà i Michael? (Henteo i sarey.)

¹⁷ Dineho ty ohatse ty rahalahy tanora raike atao tihoe Michael toy. Nibey atao amy ty fanompoagne i Jehovah reke satria ni-mpagnampe amy ty fiangonagne sady ni-mpisava lalagne maharetse. Faie mampalahelo fa nanao fahadisoagne reke le namoe ty tombotsoam-panompoa’ e tamo o fiangonagneo eo voka izay. Hoe reke: “Nibey atao tamy ty fanompoagne i Jehovah raho. Faie tampotampoke teo le nahatsapa raho tie hoe tsy afake nanao ndra inogn’ino amy ty fanompoagne i Jehovah sasa. Tsy nieretseretse raho tie hagnenga ahy ty Jehovah, faie nieretseretse raho tie mbe hanahake ty taloha indraike vao ty fifandrambesako ama’e, ndra mbe ho afake hanompo aze amo o fiangonagneo eo avao vao raho.”

¹⁸ Tsy nikivy ty Michael. Hoe reke: “Nifantoke tamy ty hagneregnako indraike ty fifandrambesako tamy i Jehovah raho, le naborako tama’e tsy tapake tamy ty alala ty vavake ze tagnate foko ao. Teo ka ty fianaragne naho ty fisaintsaignagne.” Tafara tatoy le niazo i Michael indraike i tombotsoam-panompoa’e tamo o fiangonagneo eoy. Androanavi-pagnahy reke ty amy izao sady mpisava lalagne maharetse. Hoe reke: “Ty fanohanagne naho ty fampaherezagne niazoko lohotsie fa tamo o androanavi-pagnahio ro nagnampe ahy hahatsapa fa mbe tea ahy ty Jehovah. Afake manompo amo o fiangonagneo eo indraike raho sady malio ty eretsereko. Nampianatse ahy igne fa vognogne hamela ty helo ze ndaty tena mibebake ty Jehovah.” Afake matoky tika fa hampiasa antika ty Jehovah sady hitahy antika ndra tie nanao diso aza tika. Faie mila manao ze azontika atao avao tika mba hagnitsiagne ty fomba fiaignantika sady manohy miantehetse ama’e avao.​—Sal. 86:5; Ohab. 28:13.

19. Nagnino ty ohatse nengà i Samsona ro mampahery azo?

¹⁹ Tamy ty lahatsoratse toy tika le nandineke raha ila’e mahalatsa tamy ty fiaigna i Samsona. Tsy voririke reke faie tsy nikivy, fa nikezake nanompo i Jehovah avao ndra tie tafara ty nanoa’e i hadisoagne tamy i Delilay aza. Tsy nikivy ka ty Jehovah fa mbe nampiasa aze avao. Nampiasa i Samsona tamy ty fomba tena niambake reke. Mbe nihevetse aze ho agnisa ty lahilahy niambake nanam-pinoagne ty Jehovah, le nanjilike aze ho agnisa ty ndaty tsy nivalike trea amy Hebreo toko faha-​11 ao. Tena mampahery ty mahafantatse tie manompo i Babantika bey hatea an-dagnitse agney tika, i magniry ty hagnatanjake antikay, lohotsie naho fa itika malemey! Lonike abey tika hihalale ama’e manahake ty nanoe i Samsona tie: “Mba tsiarovo raho ajafady le omeo hery.”​—Mpits. 16:28.