Ia ty Toko’e Hinoa’o?

“Tsy kandrahaegne, fa sambe nisy namboatse ze kila tragno, faie Andrianagnahare ty namboatse ze kila raha iaby.”—HEBREO 3:4.

MAREGNE vao o reha ty Baiboly iohoe ty ama’o? Toko’e ho 2 000 taogne lasa zay ty nanoratagne io. Faie tena nandroso o siansao nanomboke tamy izay. Mbe misy mihevetse avao vao amy hinane zao, fa tsy maintsy misy ty Andrianagnahare sady i reke ty namolavola naho namorogne ze kila raha naho henteagne ty firafy i raha rey?

Maro ty mihevetse hoe izay, ndra tie amy ty tane maro ndaty mahay miomba ty siansa aza. Ty 80 isan-jato ty ndaty a Etazonia agne ohatse ro “mino fa Andrianagnahare ty namboatse ze kila raha iaby.” Izay ty trea amy ty fagnadikadignagne natao ty gazete Heregnandro Vaovao (anglisy) tamy i toeragney agne, tamy ty taogne 2005. Ze ndaty tsy le nahatrea fianaragne vao ty mino izay? Tsy izay satria misy ka mpahay siansa mino an’Andrianagnahare. Nirehake ohatse ty gazete anglisy miomba ty siansa atao tihoe Natiora, tamy 1997, fa nisy fagnadihadiagne natao tamy ty fizisiana naho mpahay matematika vaho manam-pahaiagne miomba ty raha managne aigne. Trea fa eo amy ty 40 isan-jato iareo ty mino fa misy ty Andrianagnahare sady mijanjigne vavake naho mamale vavake.

Faie tsy magneke ty mpahay siansa ila’e tie, misy ty Andrianagnahare. Mbe tsy ela zay, le nirehake ty Dr. Herbert Hauptman, agnisa ty nahazo loka Nobel, fa tsy mifagnarake amy ty siansa maregne ty finoagne tie misy hery ambone noho o olombelogneo, lohotsie fa tihoe misy ty Andrianagnahare. “Tsy mahasoa o ndatio hoe reke ty finoagne izay.” Ndra o mpahay siansa mino an’Andrianagnahareo aza tsy le mazoto hampianatse fa nisy namorogne o raha managne aigneo naho o bibio, naho fa henteagne ty firafy i raha rey. Ino ty anto’e? Nirehake anto’e raike ty Douglas Erwin, manam-pahaiagne miomba ty taolam-biby taloha, boake amy ty Fikambanagne Smithson. Hoe reke: “Ianaragne amo o siansao, fa tsy misy o fahagagagneo.”

Akore ty heve’o? Hino fahatane avao ze raha rehafegne ama’o vao rehe? Sa hipay porofo hagnamarenagne naho nisy namorogne vata’e ze kila raha, sa tsy nisy? Hirehake miomba ty raha trea o mpahay siansao mbe tsy ela ty lahatsoratse magnarake. Naho fa mamaky aze rehe, le eretsereto zao: ‘Tena maregne vao fa nisy namorogne ze kila raha?’

[Hevetse Lahibey]

Ty vatan-tegna’o ro mipaliava porofo

[Efajoro]

MPANOHAGNE O FAMOROGNAGNEO VAO O VAVOLOMBELO I JEHOVAH-O?

Mino o Vavolombelo i Jehovah-o fa maregne ty tantara miomba o famorognagneo, amy ty boke Genesisy amy Baiboly ao. Faie tsy agnisa i antoko o ndaty atao tihoe mpanohagne i famorognagney iareo. Ino ty anto’e? Voaloha’e, mino ty ankamaroa o mpanohagne o famorognagne reo fa niforognegne tagnate ty enegne andro misy 24 iaby ze kila raha, toko’e ho 10 000 taogne lasa zay. Agnisa izay ty tane toy naho ty raha managne aigne iaby ama’e eo. Faie tsy izay ty ampianare ty Baiboly. * Faharoe, magneke foto-pinoagne tsy trea agnate Baiboly ao o mpanohagne famorognagne reo. Faie boake amy Baiboly ao avao ty fampianara ty Vavolombelo i Jehovah.

Ankoatse izay, le mitovy avao amy ty ndaty amy ty tane ila’e agne, o “mpanohagne famorognagneo reo” naho i antoko o ndaty atao tihoe Mpitagne ty Foto-pinoagne Nahazatsey. Faie mafana fo amy ty politike o antoko o ndaty iohoe. Atao iareo ze handreseagne lahatse o mpanao politikeo naho o mpitsarao vaho o mpampianatseo, mba hagneke lalàna naho fampianaragne mitovy amo o mpanohagne famorognagneo reo.

Tsy manao politike ty Vavolombelo i Jehovah. Eké iareo fa manan-jò hamoake lalàna naho hanao ze hagnoriha o ndatio izay o fanjakagneo. (Romanina 13:1-7) Faie ankatoave iareo i reha i Jesosy tihoey “tsy agnisa ty tontolo toy” ty Kristiana. (Jaona 17:14-16) Ampahafantare’e amy ty ndaty itoria’e fa mahasoa ty mankatò ty fitsipin’Andrianagnahare. Faie tsy manohagne ty antoko o ndaty Mpitagne ty Foto-pinoagne Nahazatse iareo. Mikezake mamoake lalàna hanoagne foresé o ndatio hankatò ty fitsipy ty Baiboly o antoko o ndaty iohoe.—Jaona 18:36.

[Fagnamarehagne ambane peje]