Lahibey vao ty Raha Inoa’o?

MISY anto’e iaignantikagne vao arake ty heve’o? Naho maregne ze raha fantantikagne amy izao miomba o evolisionao (ndra fiovagne erike), le “tsy tena misy anto’e ty mahavy antikagne ho velogne”, hoe ty gazete Amerikanina Siantifika.

Eretsereto ty dika izay. Naho tsy tena misy anto’e ty ivelomantikagne, le velogne mba hanao raha tsiampeampe avao rehe, sady hamindra amy ty tarana’o ty toetse holova’e. Tsy hisy sasa rehe naho fa mate. Kisendrasendra avao ka ty nanagna’o betro misaigne naho mandineke sady mieretseretse ty anto’e ivelomagne.

Tsy izay avao, fa maro amo o mino ty evolisionao ty mirehake tie tsy misy ty Andrianagnahare ndra tsy miraharaha o ndatio reke. Naho maregne zay, le hiantehetse amy ty raha atao o mpanao politikeo naho o manam-pahaiagneo vaho o mpitarike fivavahagneo ty hoavintikagne. Hitohy avao areke ty korontagne naho ty aly vaho ty kolikoly manimba ty fiaraha-monegne naho fa henteagne ty raha vita iareo taloha. Naho tena maregne ty fampianaragne miomba o evolisionao, le managne anto’e marem-pototse hagnorihagne ty fomba fireha o ndaty tsy managne fanantenagneo toy tikagne: “Andao tikagne hihinagne naho hinogne, fa ho mate naho hamaray.”—1 Korintianina 15:32.

Boake amy ty fampianara o ndaty mino ty evolisionao o hevetse rehoe. Matokia fa tsy mino ze raha zay ty Vavolombelo i Jehovah. Ty Baiboly ro maregne tie amy iareo. (Jaona 17:17) Mino ty rehafe ty Baiboly miomba ty nampisy antikagne toy areke iareo: “Irehe [Andrianagnahare] ty niboaha o aigneo.” (Salamo 36:9) Tena lahibey ty dika o rehake rehoe.

Tena misy anto’e ty mahavy antikagne ho velogne. Managne raha safiriegne feno hatea hoahy ze mifily hanao ty zoton’arofo’e i Mpamorogne antikagney. (Mpitoriteny 12:13) Agnisa ze raha safirie’e zay ty fampitamagne fiaignagne tsy misy korontagne naho aly vaho kolikoly sasa. Ndra o fateo aza hofoagna’e. (Isaia 2:4; 25:6-8) Ty fianaragne miomba an’Andrianagnahare naho ty fanoagne ty zoton’arofo’e avao ro tena mampisy dika’e ty fiaignagne. Afake magnamaregne izay ty Vavolombelo i Jehovah an-tapetrisa’e magneran-tane!—Jaona 17:3.

Tena lahibey areke ze raha inoa’o satria miankigne amy izay ty fahasambara’o manomboke amy izao naho amy ty hoavy. Mihamaro ty porofo fa nisy namboatse ze kila raha. I rehe vao hino fampianaragne raike manohetse izay, ie amy izao tsy afake magnaporofo izay? Sa rehe hagneke ty rehafe ty Baiboly tie nisy Mpamolavola tena mahay namboatse ty tane toy naho nampisy o fiaignagneo? Tsy ia zay fa i Jehovah, i Andrianagnahare “namorogne ze kila rahay.” (Apokalypsy 4:11) Anjara’o areke ty mifily!