Ty Raha Misy Magneran-tane

◼ ‘Ty agnate riake agne ro toeragne mivelatse sady agnisa ty sarotse iaignagne. Faie ahatreavagne raha managne aigne ty agne, ndra aia ndra aia ty agnenteagne aze, sady tena maro iareo kindraike.’​—NEW SCIENTIST, GRANDE-BRETAGNE.

◼ Tsy ela zay, le nisy raharaha ara-pitsaragne natao modely, ty a Harrisburg, a Pennsylvanie (Etazonia) agne. Namoake lily o mpitsarao, fa ‘tsy arake ty lalàm-pagnoregnagne naho [ty famorognagne ro] ampianaregne amy ty lakilasim-panjakagne agne fa tsy evolisiona.’​—NEW YORK TIMES, ETAZONIA.

◼ ‘Mandietse ty fampianaragne miomba ty evolisiona ty an-tsasa’e mahery amo o Amerikanao’, arake ty fitsapan-kevetse natao ty mpanao gazete, tamy 2005.—NEW YORK TIMES, ETAZONIA.

◼ Misy sokake jabajaba atao tihoe Harriet, amy ty toeragne fagnenteagne biby a Brisbane, Aostralia agne. Boake amy ty tokonose i Galápagos io, sady 175 taogne ro milanja 150 kilo. Io ty “biby fantatse fa tena antetse magneran-tane.”​—AUSTRALIAN BROADCASTING CORPORATION.

◼ Trea ty mpikaroke a Soisa agne ty fomba orihe ty karazan-tsako ila’e mba hiarovan-tegna amy ty anagno mpanimba tsako a Eoropa agne. Misy fofogne aboa’e ty amy i tane i tiria’ey eo. Manintogne oletse kidikidy i fofogney, le ireo ty mamono ty toeragne misy o karazan’anagno io voaloha’e.​—DIE WELT, GERMANY.

Azo Alake Sare ty Horita Jabajaba Raike

Samba’e ro niazo o mpahay siansao alake sare ty horita raike. Sady jabajaba io ro mbe velogne tamy ty toeragne voajagnahare misy aze, marine ty Tokonose Bonin (Japon). Horita kedekede naho tsitsike ro natao o mpahay siansao fandrike, sady naraviravi’e tamy lengo i fitifiran-tsarey eo. Nirefe valo metatse teo ho eo ty horita niboake boake amy ty 900 metatse agne.

“Nihinagne Ahetse o Dinôzôrò”

“Tena gaga o mpahay siansao”, hoe ty tatetse fampahafantaragne vaovao raike, fa kay “nihinagne ahetse o dinôzôrò.” Ty fandinehagne ty tay ty dinôzôro taloha, ta Inde agne, ty nahafantara iareo izay. Tena tsy nampoize iareo zay. Niheveregne fa “ela bey tafara ty nanjavogna o dinôzôrò vaho nisy o ahetseo, sady nanagne i karazanife fitsakoagne raven-draha marokoroko” rey o biby reo. Hoe ty Caroline Stromberg, manam-pahaiagne mpandineke sisan-draha mitiry, sady nitarike ty ekipa nahatreavagne i raha vaovaoy: “Tena tsy nieretseretse ty ankamaroa o ndatio tie nihinagne ahetse [o dinôzôrò].”

Akore ty Fomba Fitiligna o Tanteleo?

Somonga ty nirehafagne tie voaporofo o ezegnerao fa tsy afake mitiligne o tanteleo. Hoe tsy ampe hery hagnongahagne ty vata’e ty biby kedekede “mavesatse” hoe irey, satria fohe ty ela’e. Mba hahafantaragne ty tsiambaratelo o biby kedekede iohoe, le ‘nitifire [o ezegnerao] sare o tantele mitilitiligneo, le sare 6 000 isan-tsegondra ro azo’, hoe ty New Scientist. “Hafa” ty fomba fitiligna o tanteleo hoe iareo. Nirehake ty raike amy i mpikaroke rey, fa ‘velare o tanteleo mahitsy i ela’ey le atao’e afara agne, ahodi’e reke naho fa avy eo, le ahere’e aloha agne indraike. Malakilaky ty fanoa’e izay satria in-230 isan-tsegondra. Hoe alisin-drapolany zay sady afake mihodigne mahitsy io ro afake mihodigne mitsangagne.’ Va’e hagnampe o ezegnerao amy ty fagnamboaragne o alisin-drapolanio zay. Hahavita rapolany mora entegne iareo tie amy izay.

Mahay Mihira o Kotikao

‘Mahay mihira o kotikao, sady sarotse manahake o vorogneo ty hira’e naho fa mipay valy reke’, hoe ty New Scientist. Malakilaky loatse ty hira o kotikao, le tsy rey ty sofintikagne. Izay ty tsy ahafantaragne aze. Trea ty mpikaroke a Saint Louis, a Missouri (Etazonia) agne, fa ‘milamigne soa ty feo aboa ty kotika lahi’e, le azo atao tihoe “hira.” ‘Izay ty mampiambake kede o kotikao. Ty raha managne aigne mampinono mahay mihira ankoatse o kotikao, le ty trozogne, dauphin, ty kananavy ila’e, vaho o ndatio.