Ty raha misy Magneran-tane

MANDEFA

Ty raha misy Magneran-tane

▪ Misy amy ty firehake 43 naho amy ty soratse braille karaza’e 3 hinane zao Ny Soratra Masina—Fandikan-tenin’ny Tontolo Vaovao iaby. Misy amy ty firehake 18 naho amy ty soratse braille karaza’e 1 ka Ny Soratra Grika Kristianina—Fandikan-tenin’ny Tontolo Vaovao. Tamy Jolay 2007, le teo amy 143 458 577 ty natao pirinty.

▪ Ty atao tihoe Tso-drano o Mpisorogneo, amy Nomery 6:24-26 ao, ro andinin-teny tena fa hambo’e sady io avao ty voatahiry. Takela-bolafotsy roe manahake o horognagneo ty pozi’e naho natao aoly fiaro ty nanoratagne io, tamy ty fara ty taonjato fahafito ndra tam-panomboha ty taonjato fahaenegne T.K.—BIBLICAL ARCHAEOLOGY REVIEW, ETAZONIA.

▪ Hatrake amy 31 Desambra 2006, le boke raike amy Baiboly ao fara fahakede’e, ty natao pirinty tamy ty firehake naho tamy ty fireham-paritse 2 426, ty dika izay nitovogne 23 naho oharegne tamy 2005.—FIHARO TY FIKAMBANAGNE MAMPIPARITAKE BAIBOLY, GRANDE-BRETAGNE.

▪ Ty 28 isan-jato eo ho eo amy ty Amerikana ro mihevetse o Baibolio ho “tena saontsin’Andrianagnahare ... le toko’e ho rambesegne ara-bakiteny.” Ty 49 isan-jato ka mirehake fa “boake aman’Andrianagnahare io, faie tsy toko’e ho rambesegne ara-bakiteny iaby ze voarehake ao.” Ty 19 isan-jato ka mino fa “vande” avao ty agnate Baiboly ao.—GALLUP NEWS SERVICE, ETAZONIA.

Ombia ty Nampisy i Baiboly Sinoa Voaloha’ey?

“Tamy ty tsangambato raike [ankavia eo] tamy ty taogne 781 ty nahatreavagne firehafagne voaloha’e fa nisy Baiboly amy ty Soratse Hebreo nadika ho amy ty firehake sinoa”, hoe ty Yiyi Chen, manam-pahaiagne boake amy ty Oniversite Pékin. Ndaty boake amy ty fivavahagne nestoriana ty nagnoregne io. Trea amy ty tanà Xi’an agne i tsangambatoy, tamy 1625. Hoe ty Chen: “Izao ty agnaragne nimeagne i tsangambatoy naho adika: ‘Fahatsiarovagne ty Fagnelezagne ta Chine Teto ty Fivavahagne Mpagnazava Boake a Daqin agne’ (... Daqin ty nitokava o Sinoao ty Fanjakagne Romana). Intoagne ka ty rehake ila’e tamy i tsangambatoy teo: ‘Fandikagne o Baibolio’ naho ‘lisitse maregne mitantara ze boke agnisa ty Soratse Masigne.’”

[Sare]

Raha Sarobily Tagnate Honahona ao

Tamy 2006, le nisy mpiasa irlandey nahatrea boke Salamo amy ty rehake latina, tagnate honahona ao. Sinoratse tagnagne io, sady rinehake ao fa vita tamy ty taonjato fahavalo. Heveregne ho sarobily io satria tsy ampe amy ty boke niarake niboake tama’e ro mbe misy hatrake amy izao. Zato peje eo ho eo i bokey. Tena ambone karazagne o peje rehoe, satria tamy ty holim-biby malemeleme. Nirehake ty gazete The Times, a Londres agne tie: “Nisy sisan-tihy naho kitapo holitse ty niarake amo o boke Salamo iohoe, le va’e naetake io, mba tsy ho trea o Vikings reo tamy tie iareo nanafike, 1 200 taogne lasa zay.” Fa mipiteke o peje rehoe, sady fa misy momoke. Faie matoky o manam-pahaiagneo fa hahavita hampisaratsarake aze naho hitamiry aze.

Tane Nitamiry Raha fa Hambo’e

Nirehafegne fa nagnasivagne tane boake amy ty toeragne nisy ty tempoly i Jerosalema o mpikarokeo. Nahavory raha sambe karaza’e nisy taloha ty andro o Israelitao hatrake amo o andro hinane zao iareo. Agn’arivo’e ty raha nitrea iareo, agnisa izay ty loham-polesidoro mitovy amy ty nampiasae i maramila i Nebokadnezara rey, tamy tie iareo nandrava o tempoly Jiosy voaloha’eo. Nahatrea tampò tanelietse ka o mpikarokeo. Io ty raha tena nahaveregne, satria fa tamy ty taonjato fahafito ndra fahaefatse T.K. ty nisia’e. Nirehafegne ka fa nisy agnaragne hebreo tihoe Gedalyahu Ben Immer Ha-Cohen ty tamy io eo. Nirehake ty Gabriel Barkai, mpikaroke fa ‘va’e ho rahalahy i Pasora (Pashur Ben Immer), i rehafe ty Baibolỳ [Jeremia 20:1] ty Gedalyahu. Mpisorogne sady mpiandraikitse i tempolỳ ty Pasora.’

MIFOHAZA!