Mikezaha mba Tena ho Tapa-kevetse

“Intoy avao ty tena nagnampe o mpifokeo ho afake amo o sigarao: Tena tapa-kevetse hiala iareo.”​—“Ko Mifoke Sasa!”

TOKO’E ho tena tapa-kevetse rehe naho te hiala amo o sigarao. Ino ty hagnampe azo amy izay? Eretsereto ty soa ho rambese’o naho miala amo o sigarao rehe:

Mitsitsy vola. Va’e ho lany vola an-ketse’e isan-taogne rehe naho pake’e raike isan’andro ty fohe’o. “Tena tsy nampoizeko ty hamaro ty vola nilaniko tamo o sigarao.”​—Gyanu, a Nepal agne.

Tena hahafinaritse ty fiaigna’o. “Naho fa niafake tamo o sigarao raho, vaho izay tena nahafinaritse ahy ty fiaignako sady tena nihasoa avao.” (Regina, Afrika Atimo agne) Naho fa afake amo o sigarao ty ndaty raike, le tena mihasoa ty fahareiza’e fofogne naho tsiron-draha. Mateteke mihamatanjake ka reke sady mihasoa ty vata’e naho ty tarehe’e.

Mihasalama. “Ho salama malaky ty ndaty miala amo o sigarao, ndra fire taogne reke ndra fire taogne.”​—Foibey Mialy amy ty Aretegne, a Etazonia agne.

Vao mainke hatoky tegna. “Niala tamo o sigarao raho satria tsy te ho andevoze’e. Izaho avao ty teako hikomandy ty tegnako.”​—Henning, a Danemark agne.

Handrambe soa ty longo’o naho ty nama’o. ‘Mamparare ze ndaty magnodidigne ka o sigarao. Trea tamy ty fagnadikadignagne natao fa agn’arivo’e isan-taogne ty mate ty kansera ty rabo naho ty aretem-po noho ty setron-tsigara ty ndaty hafa.’​—Fikambanagne Amerikana Mialy amy ty Kansera.

Hampifale i Mpamorogney. “Ry ragnetse ... toko’e hagnalio ty vatantikagne amy ze kila raha mandoto ty nofotse tikagne.” (2 Korintianina 7:1) “Atoloro’areo ty vata’areo mba ho sorogne masigne sady mahafale an’Andrianagnahare.”​—Romanina 12:1.

“Tapa-kevetse hiala amo o sigarao raho naho fa nifantako tie, tsy tean’Andrianagnahare ty raha mandoto o vatagneo.”​—Sylvia, a Espaigne agne.

Faie mateteke ro tsy ampe naho tapa-kevetse avao. Va’e ilaegne ka ty fagnampea ty hafa, agnisa izay o longò naho o namagneo. Ino ty azo iareo atao?