Namagne Sandoke

“Nama’o” reke tamy i rehe mbe nikedey. Natao’e ty hahatsapa’o tie matotse rehe, sady nampea’e mba ho tea ze mitovy ama’o rehe. “Nampionogne” azo lognandro reke naho fa nivali-doha rehe. Nanjare niantehetse ama’e mateteke areke rehe.

Faie nitrea’o ty toetse rati’e naho fa tafara tatoy. Tsy te hisarake ama’o reke, faie tsy tea o ndatio ty hindesa’o aze amy ty toeragne ila’e. Namparare azo reke ndra tie natao’e ze hahavy azo hahatsapa tegna ho matotse sady nangalare’e ty karama’o.

Nikezake nisarake tama’e rehe tato ho ato faie tsy nipaoke reke. Sahala hoe ondevo’e rehe. Nanegnena’o ty niarake tama’e!

HOE izay ty fifandrambesa o mpifoke sigarao naho o sigarao. Hoe ty ampela raike atao tihoe Earline, mpifoke sigara tagnate ty 50 taogne toy: “Nagnampe ahy mihoatse o ndatio o sigarao. Fa ela ty naha namako aze, sady kindraike aza i reke irery avao ty namako.” Nifanta i Earline avao naho fa tafara tatoy fa namagne sandoke sady raty toetse o sigarao. Le hoe nihatse tama’e i raha nirehafegne taloha teoy, faie afake niala aze avao reke. Nifanta’e fa tsy tean’Andrianagnahare ty mifoke sigara satria mandoto i vatagne fagnomezagne boake aman’Andrianagnaharey io.​—2 Korintianina 7:1.

Te hampifale an’Andrianagnahare ka ty Frank, le nanapa-kevetse ty hiala amo o sigarao. Faie andro raike teo ho eo tafara i niala’ey, le nilaly tambane gorodogne tao reke mba hipay ze sisan-tsigara nipoke tao. Hoe reke: “Nahatsapa tegna raho. Nampangorìgne ahy tihoe le izaho ro nilaly tao mba hitimpogne sisan-tsigara. Tsy nifoke sigara sasa areke raho!”

Nagnino ro sarotse ialagne o sigarao? Izao ty trea o mpikarokeo: 1) Magnandevo manahake o rongonio o sigarao. 2) Fito segondra avao le fa avy amy i betroy agne i nikôtininay (poizin-tsigara). 3) Hoe fa fiaigna o ndatio ka ty mifoke o sigarao satria mifoke reke naho fa homagne, minon-toake, mirehake, mivali-doha, naho ty maro hafa.

Faie azo ialagne o fanao magnandevo iohoe arake ty niporofoe i Earline naho i Frank. Te hiala amo o sigarao ka vao rehe? Tena hagnampe azo hagnova ty fiaigna’o i lahatsoratse magnarake itoy rey.