Vita’o Io!

HANAO raha rehe hinane zao. “Mahereza” areke. (1 Tantara 28:10) Ino iaby ty dingagne fara’e toko’e hatao’o mba ho azo antoke fa ho afake amo o sigarao rehe?

Mametraha date. Mirehake ty Ministera ty Fahasalamagne naho ty Fagnasoavam-bahoake a Etazonia agne, fa naho vaho tapa-kevetse hiala amo o sigarao rehe, le soa naho miala agnate ty tapa-bolagne afara i nanapaha’o hevetsey. Amy izay rehe mbe vognogne soa. Mareho amy i kalandrie’oy eo i datey, rehafo ty nama’o sady ko ovagne sasa ndra inogn’ino hiseho.

Mamboara “karta kedekede.” Azo’o sorategne ao ty raha magnarake retoa, naho ty raha hafa mandrisike azo hiala:

● Ty anto’e hiala’o

● Ty nimerò telefony azo’o antsoegne naho magnaly te hifoke rehe

● Hevetse hagnampe azo hiala. Va’e andinin-teny boake amy Baiboly ao zay, agnisa izay ty Galatianina 5:22, 23

Indeso miarake ama’o avao i karta kedekedey sady vakio mateteke isan’andro. Vakio indraike reke naho magnaly te hifoke rehe ndra tie fa afake amo o sigarao aza.

Ialao tsikede ty fahazaragne mifoke amy ty raha miseho ila’e. Anò avao zay ndra tie mbe tsy avy i datey. Naho ohatse zatse mifoke rehe naho vaho mifoha maraindray, le ahemoro lera raike eo ho eo zay. Ko mifoke sasa naho fa mihinagne ndra naho fa boake nihinagne, naho zatse nanao izay rehe. Ihalaviro ze toeragne misy mpifoke. Naho fa irerike rehe, le aherenkeregno rehafegne mafe tihoe: “Fa tsy mifoke sasa raho fa misaotse.” Hagnampe azo ho vognogne hiala reo, sady haniahy azo fa ho afake amo o sigarao rehe tsy ho ela.

Miomàna. Mamoria raha azo tsakotsakoegne naho fa marine i datey. Ohatse, karoty, siligoma, katra. Tiahivo amy ty nama’o naho amy ty keleia’o i datey. Rehafo amy iareo ze raha azo iareo agnampeagne azo. Amy i andro aloha i dateỳ, le afaho i raha fasiagne tain-tsigaray, naho i birìkey vaho ze raha va’e hitsapa hevetse azo. Agnisa izay ohatse ty sigara an-tragno ao ndra agnate tobile ao ndra am-poso’o ao ndra am-piasagne agne. Ho mora ty le avy le mandrambe i raha rey naho oharegne amy ty mangatake amy ty namagne ndra mivily. Angataho lognandro ka ty fagnampean’Andrianagnahare, lohotsie fa afara i nifoha’o fara’ey.​—Lioka 11:13.

Ndaty maro ty “nisintake” tamo o sigarao, i nama’e sandoke sady raty toetsey. Afake manao hoe izay ka rehe. Amy izay rehe ho salama sady tena haivankivagne.

[Sare]

Indeso miarake ama’o avao i karta kedekedey sady vakio mateteke isan’andro