Dineho ze raha tena lahibey. Hoe ty Baiboly: ‘Fantaro soa ty raha lahibey.” (Filipianina 1:10) Anò lisita ze raha tena meke naho tena paliaegne. Faie intoy misy raha tsy toko’e hohaligno: Tsy voatere ho meke ty raha raike ndra tie tena ilaegne aza. Raha lahibey ohatse ty mahandro, faie azo’o atao ty mandigne kedekedeke vaho izay mahandro. Va’e fa tsy ligne’o ka zao ty hagnente tele satria fa mandeha i fandaharagne tea’oy, faie tsy raha lahibey zay naho ty maregne. *

Alamino mialoha ze raha hatao’o. Hoe ty Mpitoriteny 10:10: “Naho malomo o famakio faie tsy siognagne, le ho bey ty ozatse tsy maintsy ampiasaegne.” Ino ty lesogne boake amy izay? Tena ilaegne ty managne hilala naho teagne ho vita soa ty raha raike. Siogno hey areke i famaki’oy aloha ty hiasa’o. Ty dika izay, alamino mialoha ze raha hatao’o. Ko mandany lera amy ze raha tsy le tena ilaegne. Ho rokake avao ka rehe naho manao izay. Naho vaho vita’o ty asa raike, le avy le anò ka ty magnarake. Ho maro ty raha ho vita’o naho mahay mandamigne soa ze raha toko’e hatao’o rehe.

Ze raha tena ilaegne avao ro anò. Naho heagne’o iaby ty atia naho ty aroy, le ho rokake avao rehe sady tena ho lagìgne. Ajanogno areke ze raha tsy le tena ilaegne.

Ko mangatake andro, sady le avy le anò ze raha toko’e hatao’o. “Tsy hitongy ze mpisamba tioke sady tsy hijinja ze mitalake i rahogney avao.” (Mpitoriteny 11:4) Ino ty lesogne boake amy izay? Tsy mete ty mangatake andro lava. Ty anto’e, i leray mandeha avao, i asay tsy vita. Naho ohatse o mpamboleo mandigne ty hahasoa i androy avao vaho hambole, le tsy hahavita hitongy ndra hijinja iareo. Tsy hanapa-kevetse hanao raha raike ka rehe, naho mieretseretse tie: ‘Ndra aleo raho mandigne vaho manao itoy, satria mbe tsy le azoko antoke ty raha toy sady mbe maro ty pitsopitso’e tsy haiko ama’e.’ Maregne fa mila mikaroke naho mandineke soa rehe naho fa handrambe fanapahan-kevetse lahibey. Ty anto’e, mirehake ty Ohabolana 14:15 tie: “Mandineke ty lia’e ty mahimbagne.” Faie mateteke rehe ro tsy maintsy manapa-kevetse, ndra tie tsy le azo’o antoke aza tie ho mete vao i raha hatao’oy.​—Mpitoriteny 11:6.

Ko mieretseretse tie tsy hisy tsiko’e ze raha atao’o. Hoe ty Jakoba 3:17: “Ty hilala boake ambone agne [boake aman’Andrianagnahare], mahay manahatsahatse.” Tsy raty tihoe te hanao raha fara’e soa. Faie kindraike, le te hanao raha fanjaka loatse tika, hafara’e diso tamà naho fa avy eo. Tsy maintsy fa ampoize ty ndaty raike mianatse firehake hafa ohatse tie ho diso ty raha rehafe’e kindraike. Hagnampe aze tsy hagneregne i raha diso nirehafe’ey zay. Faie tsy hahay soa i rehake ianara’ey reke naho ohatse tsy mirehake, satria matahotse kera ho diso ty raha rehafe’e. Hoe ty Ohabolana 11:2: “Ze miambane ro ho hendre.” Ko le mitamà loatse areke tie tsy hisy tsiko’e ze kila raha atao’o. Sady tsy magnamelo-tegna loatse ka ty ndaty raike miambane naho fa manao raha tsy mete, fa mihehe avao.

Mahaia manahatsahatse naho fa miasa ndra mihisa. “Aleo fitofagne tagnan-draike, toy izay asa mafe tagnan-droe faie hoe mitsepake tioke avao.” (Mpitoriteny 4:6) Tsy mba mete hitofa zao ty ndaty andevoze o asao. Lava miasa mafe avao reke, hafara’e rokake, le tsy manam-potoagne mba hahazoagne tsiro’e amy i asa mafe nanoa’ey. Fa ty ndaty kamo tsy mete miasa fa ndra aleo’e mitofa avao, hafara’e lanilany avao ty fotoa’e. Faie mirehake ty Baiboly tie soa naho mahay manahatsahatse tika. Ty dika izay, mila miasa mafe faie mila mifale ka amy ty voka ze asantika zay. “Fagnomezagne boake aman’Andrianagnahare zay.”​—Mpitoriteny 5:19.

Anò ze hahampe torimaso azo naho fa miroro. Hoe ze mpanoratse Baiboly raike zay: “Hiroro amim-pilaminagne raho.” (Salamo 4:8) Toko’e hiroro agnate 8 lera o ndaty beio isan-kalegne. Amy izay salama soa ty vata’e naho ty sai’e vaho ty fo’e. Naho fa itikagne ka ampe roro soa, le ho mora amantika ty hifantoke naho fa manao raha sady hihasoa ka ty fitadidiantika. Ty voka’e, manjare mitombo ty fahaiantika. Fa ty ndaty tsy ampe roro, mora manao diso naho manimba raha sady tsiela boseke, satria tsy le miasa soa ty sai’e.

Ze raha ho vita’o avao ro anò tanjogne. “Aleo mifale amy ty raha trea ty maso toy izay hariorio o fagniriagneo.” (Mpitoriteny 6:9) Ino ty lesogne boake amy izay? Mihefe tegna ty ndaty mahihitse, fa tsy lava miasa loha avao amy ty fomba hahazoagne ze kila raha tea’e, lohotsie naho fa hai’e tie tsy ho azo’e ze raha zay ndra inogn’ino hatao’e. Tsy le avy le mitrosa ka reke, ndra le avy le taitse naho fa mahatrea raha soasoa atao o ndatio dokam-barotse. ‘Ze raha trea ty maso’e,’ ndra ze raha vita’e naho ho azo’e avao ro ifalea’e.

Dineho ty fomba indesa’o ty fiaigna’o. Va’e ho soa ndra ho raty ty fiaigna ty ndaty raike, arakarake ze tari-dalagne orihe’e avao. Naho managne tari-dalagne soa areke rehe, le raha mahasoa sady tena ilaegne ty hifantoha’o. Miankigne amy izay ka ty fomba andania’o ty fotoa’o isan’andro. Faie aia rehe ro hahatrea tari-dalagne soa? Amy Baiboly ao.​—Ohabolana 2:6, 7.

Hatea ro anò voalohan-draha. Hoe ty Kolosianina 3:14: ‘Fehe tsy misy tsiko’e mampiharo ty hatea.’ Tsy ho sambatse sady harare fo tika naho tsy managne hatea, ndra tsy misy ndaty maneho izay amantika, lohotsie fa ty keleiantikagne. Ze tsy midare izay, fa miasa naho mipay vola avao, le mipay haoreagne hoahy ty tegna’e. Izay ty mahavy ty Baiboly mampisongadigne o hateao naho mirehake mateteke miomba aze.​—1 Korintianina 13:1-3; 1 Jaona 4:8.

Manokàgna fotoagne hianaragne Baiboly. Infirmier ty asa ze lahilahy raike atao tihoe Geoff zay. Soa ty karama’e, sady tena tea aze ka ty valy aman’ana’e naho ty nama’e. Mateteke reke mahatrea ndaty mijale naho mate naho fa miasa, hafara’e nieretseretse tie: ‘Le fa ho hoe izao avao zane ty fiaignagne?’ Namaky o boke o Vavolombelo i Jehovah-o reke tie indraike zay, le nitrea’e ty vale i fagnontenea’ey.

Nirehafe i Geoff tamy i vali’e naho i ana’e rey zay, sady tena nahaliagne iareo. Niarake nianatse Baiboly iareo keleian-draike, le nanjare nihasoa ty fiaigna iareo sady nanjare tsy nandanilany ty fotoa iareo sasa ka iareo. Nanjare mitamà ka iareo tie hiaigne nainai’e amy i tontolo vaovaoy ao, i fiaignagne tsy hisia ty fijaleagney.​—Apokalypsy 21:3, 4.

Magnamaregne ty reha i Jesosy toy o tantara i Geoff iohoe. Hoe ty Jesosy: “Sambatse ze mahatsiaro fa mipay an’Andrianagnahare.” (Matio 5:3) Vognogne hanokagne fotoagne kedekede hianaragne miomba an’Andrianagnahare vao rehe? Hahazo hilala hirike aman’Agnahare rehe naho manao izay sady hahay hampiasa soa ty fotoa’o isan’andro.